news

ఈఎస్ఐ కేసులో తెలుగుదేశం పార్టీ నేత, ఎమ్మెల్యే అచ్చెన్నాయుడుని, ఏసీబీ అధికారులు అరెస్ట్ చేసిన సంగతి తెలిసిందే. అచ్చెన్నాయుడుకు ఆపరేషన్ అయిన తరువాత రోజే, ఆయన్ను శ్రీకాకుళం నుంచి విజయవాడ వరకు, కారులో 15 గంటల పాటు తిప్పి, చివరకు కోర్టు ముందు హాజరు పరిచారు. అయితే అచ్చెన్నాయుడుకి గాయం తిరగబడటంతో, డాక్టర్ల ఆదేశాలు ప్రకారం, హాస్పిటల్ లో జాయిన్ చేసారు. తరువాత గాయం మరీ పెద్దది కావటంతో, మళ్ళీ ఆపరేషన్ చేసారు. అయితే నిన్న ఏసీబీ కోర్టు అచ్చెన్నాయుడిని, మూడు రోజుల పాటు, ఏసిబీ కస్టడీకి ఇస్తూ ఆదేశాలు ఇచ్చింది. అచ్చెన్నాయుడి ఆరోగ్యం బాగోలేదు కాబట్టి, ఆయన్ను హాస్పిటల్ లోనే విచారణ చెయ్యాలని, ఎలాంటి ఇబ్బంది పెట్టకూడదు అని, ఆదేశాలు ఇస్తూ, కోర్టు ఉత్తర్వులు ఇచ్చింది. దీని ప్రకారం, ఈ రోజు నుంచి అచ్చెన్నాయుడిని మూడు రోజుల పాటు హాస్పిటల్ లోనే విచారణ చెయ్యనున్నారు. అయితే, ఏమైందో ఏమో కాని, అచ్చెన్నాయుడు ఉన్న, గుంటూరు జీజీహెచ్ లో, నిన్న అర్దరాత్రి ఉన్నట్టు ఉండి హైడ్రామా చోటు చేసుకుంది.

అచ్చెన్నాయుడిని నిన్న అర్దరాత్రి డిశ్చార్జ్ చేసేందుకు, గుంటూరు జీజీహెచ్ అధికారులు ప్రయత్నం చేసారు. అచ్చెన్నాయుడిని డిశ్చార్జ్ చేసిన వెంటనే, ఆధీనంలోకి తీసుకోవటానికి ఏసీబీ అధికారులు కూడా సిద్ధం అయ్యారు. అయితే ఇదంతా కుట్ర ప్రకారం చేస్తున్నారని, ఇప్పటికిప్పుడు అర్ధరాత్రి ఏమిటి అంటూ, తెలుగుదేశం నేతలు తెలుసుకుని, హుటాహుటిన హాస్పిటల్ కు వచ్చి, జీజీహెచ్ అధికారులను నిలదీసారు. తెలుగుదేశం అధికారులు నిలదియ్యటంతో, ఇప్పుడే డిశ్చార్జ్ చెయ్యటం లేదు అంటూ, వెనక్కు తగ్గారు. తమకు డిచ్చార్జ్ కాపీ ఇవ్వాలని, అచ్చెన్నాయుడు లాయర్లు కోరారు. అయితే డిశ్చార్జ్ ని రద్దు చేసామని అధికారులు చెప్పారు. ఆ రద్దు చేసిన కాపీ ఇవ్వండి అని కోరగా, అది కూడా ఇవ్వలేదని సమాచారం. ఈ మొత్తం ఎపిసోడ్ పై టిడిపి భగ్గుమంది. అచ్చెన్నాయుడును ఎందుకు టార్గెట్ చేస్తున్నారు, ఏదైనా ప్లాన్ చేసారా అనే తీవ్ర వ్యాఖ్యలు చేసారు. మీరు చేసిన అరాచకానికి రెండు సార్లు ఆపరేషన్ చెయ్యాల్సి వచ్చింది. ఇప్పుడు ఏమి చేద్దాం అనుకుంటున్నారు అంటూ నిలదీశారు.

వైసీపీ ఎంపీ రఘురామకృష్ణం రాజుకు, వైసిపీ షోకాజ్ నోటీసు ఇచ్చిన సంగతి తెలిసిందే. దీని పై, ఈ రోజు రఘురామకృష్ణం రాజు, ఒక వీడియో మెసేజ్ రూపంలో స్పందించారు. "ఈ రోజు మధ్యానం నాకు, మా పార్టీ నుంచి షోకాజ్ నోటీసు రావటం జరిగింది. చాలా మంది మీడియా మిత్రులు, నా వద్దకు వచ్చి, అభిప్రయం అడుగుతాం అన్నారు. కాని కరోనా సమయంలో, ఎందుకు అని, నేను రికార్డెడ్ వీడియో పంపిస్తున్నా. నాకు 18 పేజీల షోకాజ్ నోటీస్ ఇచ్చింది. అందులో రెండు పేజీలు రిటెన్ షోకాజ్, మరో 16 పేజీలు  పేపర్ క్లిప్పింగ్స్ తో కలిపి పంపించారు. వాటి పై నన్ను సమాధానం అడగటం జరిగింది. నేను ఎప్పుడూ కూడా, మీరు అందరూ నన్ను చూస్తానే ఉన్నారు, ప్రజలు చూస్తూనే ఉన్నారు, నేను ఎప్పుడూ కాని, మా పార్టీని కాని, పార్టీ అధ్యక్షుడుని కాని, ఒక్క మాట అయినా విమర్శ చేసానా ? నేను ఎప్పుడూ ఒక్క మాట కూడా అనలేదు. అది ప్రజలు అందరికీ తెలిసిన సత్యం. ప్రభుత్వంలో ప్రజల మంచి కోసం, చేపట్టిన పధకాలు, అనుకున్నట్టుగా, సజావుగా కొన్ని చోట్ల జరగటం లేదు అన్న దాని పై, నేను కొన్ని సూచనలు చేసాను."

"మా ముఖ్యమంత్రి అపాయింట్మెంట్ దొరకటం లేదు కాబట్టి, ఆ కాల పరిమితి దాటి పోకుండా, మీడియాలో కొన్ని విషయాలు చెప్పాల్సి వచ్చింది. తిరుమల తిరుపతి దేవస్థానం భూములు విక్రయం కాని, ఇతర అంశాలు కాని, మా ముఖ్యమంత్రి గారికి, మీడియా ముఖంగా తెలియ చేయటం జరిగింది. ఇది ప్రభుత్వానికి సూచన తప్ప, ఇది పార్టీకి సూచన కాదు. నేను పార్టీని ఏనాడు ఒక్క మాట అనలేదు, మా పార్టీ అధ్యక్షుడు జగన్ గారిని ఒక్క మాట అనలేదు. అదే విషయం నేను, సవివరంగా, ఈ నోటీసులు రిప్లై గా, నేను రేపటి లోగా సమాధానం పంపిస్తున్నాను. నాకు ఏడు రోజులు సమయం ఇచ్చినప్పటికీ, నేను రేపే వివరణ పంపిస్తున్నాను. మా పార్టీ ఆల్ ఇండియా జనరల్ సెక్రటరీ విజయసాయి రెడ్డి గారికి పంపిస్తాను. పంపించిన తరువాత, మిగిలిన విషయాలు మీడియాకు తెలియచేస్తాను" అని రఘురామకృష్ణం రాజు అన్నారు.

కొద్ది సేపటి క్రితం, రాష్ట్ర మాజీ ఎన్నికల కమీషనర్ నిమ్మగడ్డ రమేష్ కుమార్, ఆంధ్రప్రదేశ్ విశ్వభూషన్‌ హరిచందర్‌ కు లేఖ రాసారు. గవర్నర్ కు రాసిన లేఖలో, నిమ్మగడ్డ పలు కీలక అంశాలు ప్రస్తావించారు. ప్రస్తుతం తనకు వ్యతిరేకంగా, ఏపి ప్రభుత్వం టెర్రర్ సృష్టిస్తుంది అని చెప్తూ, తన లేఖలో పేర్కొనటంతో పాటుగా, ఈ సమయంలో తమ జోక్యం ఎంతో అవసరం అంటూ గవర్నర్ ను కోరారు. హైదరాబాద్ ప్రశాంత నగర్ లో ఉన్న తన ఇంటి పై, 24 గంటల పాటు నిఘా విధించారని, ఏపి పోలీస్ విభాగానికి చెందిన ఒక ఫోర్ వీలర్ , అదే విధంగా రెండు మోటార్ సైకిల్స్ తనను నీడలా వెంటాడుతున్నాయని ఆ లేఖలో తెలిపారు. అలాగే తన ఫోన్ ని నిరంతరం, ట్యాప్ చేసి ఉంచుతున్నారని, ఆయన గవర్నర్ దృష్టి కి తీసుకువచ్చారు. తన ఫోన్ లు ట్యాప్ అవుతున్న విషయాన్ని, తాను నమ్ముతున్నాని పేర్కొన్నారు. అయితే ఈ ఏడాది మార్చ్ 18వ తేదీన తనకు రక్షణ కల్పించాలని, కేంద్రానికి లేఖ రాసిన విషయాన్ని కూడా ఆయన గవర్నర్ కు చెప్పారు.

అయితే ఈ లేఖ పై కూడా విజయసాయి రెడ్డి, దర్యాప్తు చెయ్యాలి అంటూ , పోలీసులకు లేఖ రాయటం పై ఆయన ఆశ్చర్యం వ్యక్తం చేసారు. దీని పై దురుద్దేశం ఉందని ఆయన పేర్కొన్నారు, ఈ లేఖ ఫోర్జరీ అని చెప్పారని అన్నారు. అయితే ఈ లేఖ తానే రాసానని నేను చెప్పాను, లేఖ అందింది అని కేంద్రం చెప్పిన విషయాన్ని కూడా చెప్పారు. ఈ లేఖ ఆధారంగా కేంద్రం తనకు రక్షణ కూడా ఇచ్చిందని పేర్కొన్నారు. అయితే ఈ కేసును ఇన్వెస్టిగేషన్ చేస్తున్న ఏపి సిఐడి అధికారులు, తన కార్యాలయం పై దాడి చేసి, అందులో ఒక హార్డ్ డిస్క్ స్వాధీనం చేసుకున్నారని, ఒక ఉద్యోగిని కూడా అదుపులోకి తీసుకుని విచారించారని పేర్కొన్నారు. ఈ లేఖ బయట తయారు అయ్యింది అని చేస్తున్న ప్రచారం అవాస్తవం అని, గవర్నర్ కు తెలిపారు. తనకు వ్యతిరేకంగా కుట్ర జరుగుతుందని, తాను భావిస్తున్నానని, తెలంగాణా పోలీసులను కూడా రక్షణ కల్పించాలని కోరానని, ఆయన గవర్నర్ కు తెలిపారు.

తాను విజయవాడకు రాకుండా, తన కార్యాలయానికి వెళ్ళకుండా, ఏపి ప్రభుత్వం వ్యవహరిస్తుందని, విజయవాడలో ఉన్న తన తల్లిని చూసేందుకు కూడా అడ్డుపడుతున్నారని లేఖలో తెలిపారు. రాష్ట్ర ఎన్నికల కార్యదర్శి, వాణి మోహన్, తన ఎంట్రీని అడ్డుకుంటున్నారని, ఎలాంటి సదుపాయాలు ఇవ్వటం లేదని, లేఖలో తెలిపారు. మే 29 న హైకోర్టు ఆదేశాలు ఇచ్చినా, అలాగే కనకరాజ్ నియామకం కోర్టు కొట్టేసినా, ఇప్పటికీ కనకరాజ్ కు అన్ని సదుపాయలు ఇవ్వటం పై కూడా, ఆయన అభ్యంతరం తెలిపారు. తన ఆఫీస్ కారుని కూడా, కనకరాజ్ కు ఇచ్చారని అభ్యంతరం తెలిపారు. రాష్ట్ర ఎన్నికల కమీషనర్ ని నియమించే అధికారం ఉన్న మీరు, ఈ విషయాల పై జోక్యం చేసుకోవాలని, హైకోర్టు ఆదేశాలు అమలు అయ్యలా చూడాలని, తన వ్యక్తిగత భద్రత పై కూడా భరోసా ఇవ్వాలని, తన పై జరుగుతున్న కుట్రని అడ్డుకోవాలని కోరారు.