news

ప్రతి ఆరు నెలలకు ఎదో ఒకటి చేసి, అన్ని వర్గాల ప్రజలను ఇబ్బంది పెట్టటం, కేంద్రానికి అలవాటు అయిపొయింది. నోట్లు రద్దు, ఏటిఎం కష్టాలు, జీఎస్టీ, పెట్రోల్ రేట్లు, ధరల పెరుగుదల, ఇలా ప్రతి ఆరు నెలలకు, సామాన్యులను ఇబ్బంది పెడుతున్న కేంద్రం, ఇప్పుడు సామాన్య ప్రజలు వాడే కేబుల్ టీవీ పై పడింది. ట్రాయ్ కొత్త నిబంధనల పేరుతొ, బుల్లితెర వినోదం ఇకపై మరింత భారం కానుంది. కొత్తగా ట్రాయ్‌ రూపొందించిన టారిఫ్‌ ఆరో తేదీ అర్ధరాత్రి నుంచి అమల్లోకి రానుంది. అంటే ప్రస్తుతం ప్రసారమవుతున్న ఫ్రీ చానెల్స్‌ బుధవారం అర్ధరాత్రి నుంచి నిలిచిపోనున్నాయి. ఇకపై వినియోగదారుడు నచ్చిన చానెల్స్‌ను కొంత మొత్తం చెల్లించి చూడాల్సి ఉంటుంది. ఇప్పటివరకు వందల సంఖ్యలో వస్తున్న ఫ్రీ ఎయిర్‌ చానెల్స్‌కు కూడా నిర్దేశించిన మొత్తాన్ని చెల్లించాల్సి ఉంటుంది.

ఫ్రీ టూ ఎయిర్‌ చానెల్స్‌ ప్రసారాలన్నీ బుధవారం అర్ధరాత్రి నుంచి బంద్‌ కానున్నాయి. ఇకపై వీటికి నెట్‌వర్క్‌ కెపాసిటీ ఫీజు (ఎన్‌సీఎఫ్‌) కింద నెలకు రూ.130, ట్యాక్స్‌ రూ.24 కలిపి మొత్తం రూ.154 చెల్లించాల్సి ఉంటుంది. ఈ మొత్తాన్ని చెల్లించిన వినియోగదారుడు ఫ్రీ టూ ఎయిర్‌లో వుండే 300 చానెల్స్‌లో నచ్చిన వంద చానెల్స్‌ను ఎంపిక చేసుకోవచ్చు. ఫ్రీ ఎయిర్‌లో వుండే ఇతర ఏ ఒక్క చానెల్‌ను చూడాలన్నా వినియోగదారుడు రూ.20 చెల్లించాల్సి ఉంటుంది. అప్పుడే తనకు నచ్చిన ఒక చానెల్‌తోపాటు మరో 24 చానెల్స్‌ను ఎంపిక చేసుకోవచ్చు. ప్రస్తుతం సగటు తెలుగు టీవీ ప్రేక్షకుడు చూసే ప్రధాన చానెల్స్‌లో ఒక్కటి కూడా ఫ్రీ టూ ఎయిర్‌లో లేవని తెలుస్తోంది. 300 చానెల్స్‌లో 26 డీడీ చానెల్స్‌, ఇతర చానెల్స్‌ వున్నట్టు నిపుణులు చెబుతున్నారు. ప్రధాన చానెల్స్‌ అన్నీ పే చానెల్స్‌లో పెట్టడం వల్ల వినియోగదారుడిపై మరింత భారం పడనున్నది.

పే చానెల్స్‌ను అర్ధరూపాయి నుంచి రూ.19కి మించకుండా వినియోగదారుడికి అందించాలని సుప్రీం కోర్టు ఆదేశించింది. అయితే ఆయా కంపెనీలన్నీ రూ.19కే ఇస్తున్నాయి తప్ప కనిష్ఠంగా పేర్కొన్న అర్ధరూపాయిని పరిగణనలోకి తీసుకోవడం లేదు. పైగా కొన్ని చానెల్స్‌ సిండికేట్‌గా ఏర్పడి ప్యాకేజీల రూపంలో అందించే ప్రయత్నాన్ని చేస్తున్నాయి. దీనివల్ల ప్రస్తుతం సగటు టీవీ ప్రేక్షకుడు రూ.150 నుంచి రూ.250 చెల్లించి వందల చానెల్స్‌ను చూస్తుంటే, ఇకపై రెట్టింపు చెల్లిస్తేగానీ ప్రస్తుతం చూస్తున్న చానెల్స్‌ చూడలేని పరిస్థితి. ప్రస్తుతం ట్రాయ్‌ తీసుకువచ్చిన కొత్త నిబంధనలతో వినియోగదారుడు చెల్లించే మొత్తంలో 80 శాతం బ్రాడ్‌కాస్టర్‌కు, 20 శాతం ఎంఎస్‌వో, లోకల్‌ కేబుల్‌ ఆపరేటర్‌ తీసుకోవాల్సి ఉంటుంది. అదే సమయంలో ఆయా చానెల్స్‌లో వచ్చే ప్రకటనల ఆదాయంలోను బ్రాడ్‌ కాస్టర్స్‌కు కొంత వాటా వస్తుంది. అంతిమంగా ట్రాయ్‌ తీసుకువచ్చిన కొత్త నిబంధనల వల్ల వినియోగదారుడిపై భారం పడనుండగా, బ్రాడ్‌కాస్టర్స్‌కు ప్రయోజనం చేకూర్చ నున్నాయని పలువురు విశ్లేషకులు చెబుతున్నారు. పే చానెల్స్‌లో ప్రకటనలు వున్న వాటిని వినియోగదారుడికి రూ.19కి ఇవ్వాలని, ప్రకటనలు లేని చానెల్స్‌ను అర్ధ రూపాయికి ఇవ్వాలని వినియోగదారులు డిమాండ్‌ చేస్తున్నారు.

వ్యవసాయ రంగంలో ఆంధ్రప్రదేశ్‌ అగ్రస్థానంలో ముందుకు సాగుతోందని ముఖ్యమంత్రి చంద్రబాబు అన్నారు. ఈ రంగంలో నాలుగేళ్లలో జాతీయ సగటు వృద్ధిరేటు 2.4శాతం ఉంటే, ఏపీలో 11శాతం ఉందని తెలిపారు. ఎన్ని అవాంతరాలు ఎదురైనా, వర్షాభావం ఏర్పడినా ఎదుర్కొని అధిగ దిగుబడి సాధిస్తున్నామని చెప్పారు. వ్యవసాయం, దాని అనుబంధ రంగాలపై మంగళవారం అసెంబ్లీలో చేపట్టిన స్వల్పకాలిక చర్చలో ఆయన ప్రసంగించారు. ‘‘2004 నుంచి 2014 వరకు రైతులు తీవ్ర ఇబ్బందులు పడ్డారు. ఎరువుల్లేక, విత్తనాలు లేక ఆత్మహత్యలు చేసుకున్నారు. విద్యుత్‌షాక్‌లతో మృత్యువాత పడ్డారు. చివరికి కోనసీమలో కూడా క్రాప్‌ హాలిడే ప్రకటించే పరిస్థితి తీసుకొచ్చారు. తెలుగుదేశం ప్రభుత్వం మొట్టమొదటిసారిగా వ్యవసాయ రంగానికి ప్రత్యేక బడ్జెట్‌ విధానం తీసుకొచ్చింది. నాలుగేళ్లలో వ్యవసాయ రంగానికి రూ.81వేల కోట్లు ఖర్చుచేశాం. రైతుల ఆదాయం 97శాతం పెంచాం. ప్రకృతి సేద్యంలో 8శాతం వృద్ధి సాధించాం’’ అని వివరించారు.

కేంద్రం రైతులకు అన్ని రకాలుగా అన్యాయం చేసిందని విమర్శించారు. ఐదు ఎకరాలు ఉన్న కుటుంబానికి రూ.6వేలు ఇస్తామని ప్రకటించారని, అంటే రైతుకు రోజుకు రూ.17 వస్తాయని, ఇది రైతుకు భిక్షం వేస్తున్నట్టుగా ఉందని మండిపడ్డారు. ఫసల్‌ బీమా పథకమే పెద్ద ఫార్సు అని ఆరోపించారు. తమ ప్రభుత్వం జీరో బడ్జెట్‌ వ్యవసాయానికి అత్యధిక ప్రాధాన్యమిస్తోందని తెలిపారు. వచ్చే ఆర్థిక సంవత్సరంలో 7.5లక్షల మంది రైతులు ప్రకృతి సేద్యంలోకి వస్తున్నారని, 2024 నాటికి అందరూ ఇదే విధానంలోకి వస్తారన్నారు. ‘‘స్వాతంత్య్రం వచ్చాక ఎవరూ చేయనివిధంగా రైతుకు రూ.లక్షన్నర చొప్పున రుణవిముక్తి చేశాం. ఇంకా కొందరికి అందాలి. అందరికీ రుణవిముక్తి చేశాకే ఎన్నికలకు వెళ్తాం. అప్పట్లో మోదీ రుణవిముక్తి వద్దన్నారు. ఆర్‌బీఐ కూడా వద్దని చెప్పింది. అయినా రైతుల కోసం అమలు చేశాం’’ అని వివరించారు.

ఈ ఏడాది తొలి త్రైమాసికంలో ఉద్యాన రంగంలో 17శాతం వృద్ధి వచ్చిందని, కరువు వల్ల వ్యవసాయంలో కొంత లోటు ఏర్పడిందని వ్యవసాయ మంత్రి సోమిరెడ్డి చంద్రమోహన్‌రెడ్డి తెలిపారు. కేంద్రం రైతు కుటుంబం మొత్తానికి ఏడాదికి రూ.6వేలు ఇస్తే, తాము వృద్ధాప్య పెన్షన్‌ కింద అవ్వకు ఏడాదికి రూ.24వేలు ఇస్తున్నామని చెప్పారు. రూ.5400కోట్లు పెట్టుబడి రాయితీ కింద ఇస్తున్నామని పేర్కొన్నారు. ‘‘ప్రతిపక్షానికి వ్యవసాయం అంటే ఏంటో తెలియదు. అందుకే రోడ్లపై తిరుగుతూ ఏదేదో మాట్లాడుతున్నారు. కనీసం అసెంబ్లీకైనా వచ్చి ఉంటే సాగు గురించి తెలుసుకునే అవకాశం వచ్చేది. అసెంబ్లీకి రాకపోయినా జీతాలు మాత్రం కచ్చితంగా తీసుకుంటున్నారు’’ అని సోమిరెడ్డి మండిపడ్డారు.

‘రాష్ట్ర ప్రజలకు మీరు ఏదైనా చేస్తే చెప్పుకోండి. అంతే తప్ప నమ్మక ద్రోహం చేసి నా పైనే అవినీతి విమర్శలు చేస్తే సహించేది లేదు. నన్ను విమర్శించే నైతికత ఎన్డీయే, బీజేపీ నేతలకు లేదు. మా అబ్బాయిని సీఎం చేస్తానని ఎప్పుడైనా అమిత్‌ షాకు చెప్పానా? నీ కొడుకు అక్రమ వ్యాపారాలు చేస్తుంటే విచా రణ జరపరు కాని నన్ను విమర్శిస్తారా? ఇదే పరిస్థితి కొనసాగితే పలాస పరాభవమే అన్ని చోట్లా జరుగుతుంది’ అంటూ ముఖ్యమంత్రి నారా చంద్రబాబునాయుడు బీజేపీ నేతలపై నిప్పులు చెరిగారు. భార్యనే చూడని వాడు దేశానికి ఏం చేస్తాడంటూ బీజేపీ అగ్రనేత, కేంద్రమంత్రి నితిన్‌ గడ్కరీ వ్యాఖ్యలను ఈ సందర్భంగా సభలో ఉదహరించిన ముఖ్యమంత్రి చంద్రబాబునాయుడు మోడీ ఇక దేశానికి ఏం చేస్తాడు అంటూ ఎద్దేవా చేశారు.

రైల్వేజోన్‌ ఇస్తామంటే విశాఖ ప్రజలు ఒక పార్లమెంటు, శాసనసభ్యుడిని కూడా గెలిపించారు. ఇచ్చిన హామీ నెరవేర్చనందుకు విష్ణుకుమార్‌ రాజు తదితరులు రాజీనామా చేస్తే తానే అభినందించేవాడినని చెబుతూ ప్రజల కోసం ఉండండి తప్ప పార్టీల కోసం కాదంటూ ముఖ్యమంత్రి హితవు పలికారు. శాసనసభలో మంగళవారం వ్యవసాయం, అనుబంధ రంగాల అభివృద్ధిపై జరిగిన లఘు చర్చలో పాల్గొన్న ముఖ్యమంత్రి చంద్రబాబునాయుడు సోమవారం పలాస సభలో చంద్రబాబును లక్ష్యంగా చేసుకొని బీజేపీ జాతీయాధ్యక్షుడు అమిత్‌ షా చేసిన వ్యాఖ్యలపై మండిపడ్డారు. తెలుగుజాతి న్యాయం కోసం పోరాడుతున్నానే తప్ప యు టర్న్‌ తీసుకోలేదని, బీజేపీ పార్టీనే అనేక వంకర టర్న్‌లు తీసుకుందని ఆయన అన్నారు. మరోసారి నరేంద్ర మోడీ ప్రధాని కానున్నారంటూ అమిత్‌ షా చెప్పడంపై స్పందిస్తూ, ప్రజలు తగిన గుణపాఠం చెప్పేందుకు సిద్ధంగా ఉన్నారన్నారు.

2014లో స్వయంగా మోడీ హైదరాబాద్‌ వచ్చి ప్రత్యేక హోదా, విభజన హామీలపై నిర్థిష్టమైన హామీ ఇచ్చిన తర్వాతనే బీజేపీతో కలిశాను తప్ప తనంత తానుగా వెళ్లి కలవలేదన్నారు. నాలుగేళ్ల పాటు ఎదురుచూసినప్పటికీ నమ్మక ద్రోహం చేసిన మోడీ, అమిత్‌ షాలు తనపై ఎదురుదాడి చేస్తున్నారని, ఎంత ఒత్తిడి పెంచితే అంత పతనం తప్ప దని ఆయన హెచ్చరించారు. తన పరిధిలో అగ్రిగోల్డ్‌ మోసంపై కేసులు పెట్టి నిందితులను జైలుకు పంపడంతో పాటు ఆస్తులను సీజ్‌ చేయడం ద్వారా బాధితులకు న్యాయం చేస్తున్నానన్నారు. మరి మోడీ రాఫెల్‌ స్కాంపై విచారణ ఎందుకు చేయడం లేదని, బ్యాంకుల సొమ్మును కొల్ల గొట్టిన నిందితులు దేశం విడిచి ఎలా పరార య్యారని ముఖ్యమంత్రి ప్రశ్నించారు.