news

ఆంధ్రప్రదేశ్ రాష్ట్రంలో జరుగుతున్న పరిణామాలు, రోజు రొజుకీ ఆందోళన కలిగించే విషయంగా మారుతున్నాయి. ఏకంగా ఒక యూనివర్సిటీ వైస్ ఛాన్సలర్ ని అరెస్ట్ చెయ్యటం, పెను సంచలనంగా మారింది. యూనివర్సిటీ వైస్ ఛాన్సలర్ ను, గవర్నర్ నియమిస్తారు. ఏ సమస్య వచ్చినా, ముందుగా గవర్నర్ దృష్టికి తీసుకు వెళ్ళాలి. మన రాష్ట్రంలో మాత్రం, గవర్నర్ కు కూడా చెప్పకుండా, ఏకంగా ఒక యూనివర్సిటీ వీసిని అరెస్ట్ చెయ్యటం సంచలనంగా మారింది. అయితే హైకోర్ట్ లో బెయిల్ రావటంతో, ప్రస్తుతానికి ఈ వివాదం సద్దు మణిగింది. ఆచార్య ఎన్జీ రంగా యూనివర్సిటీ వైస్‌ ఛాన్సలర్‌ పై ఎస్సీ, ఎస్టీ అట్రాసిటీ కేసు నమోదు కావటంతో, ఆయన్ను పోలీసులు అరెస్ట్ చేసారు. అయితే ఈ వివాదానికి కాంట్రాక్టు ఉద్యోగి మురళీకృష్ణ ఫిర్యాదు చెయ్యటమే. మురళీకృష్ణ ఇచ్చిన ఫిర్యాదు మేరకే, పోలీసులు వీసీ పై కేసు నమోదు చేసి అరెస్ట్ చేసారు.

మురళీకృష్ణ చెప్పిన వివరాలు ప్రకారం, ఏప్రిల్‌ 12న తనను విధులు నుంచి తొలగించారని, ఉద్యోగంలోకి తిరిగి తీసుకోవాలని కోరిన సందర్భంలో, వైస్‌ ఛాన్సలర్‌ తనను కులం పేరుతో దూషించారంటూ ఫిర్యాదు చేసారు. అయితే ఒక కాంట్రాక్టు ఉద్యోగి ఇచ్చిన ఫిర్యాదుతో, గవర్నర్ కు సమాధానం ఇవ్వకుండా, పోలీసులు దూకుడుగా వెళ్ళటం పై విమర్శలు వచ్చాయి. అయితే, నిన్న వైస్‌ ఛాన్సలర్‌ దామోదర నాయుడికి హైకోర్ట్ లో బెయిల్‌ మంజూరైంది. అయితే అన్ని యూనివర్సిటీల వీసిలను కొత్త ప్రభుత్వం రాజీనామా చెయ్యమని కోరిందని, ఆచార్య ఎన్జీ రంగా విశ్వవిద్యాలయం వీసీ దామోదర నాయుడు మాత్రం అందుకు నిరాకరించటంతో, ఆయన పై ఇలా కేసులు పెట్టి ఒత్తిడి తెస్తున్నరనే ప్రచారం నడుస్తుంది.

ఈ అరెస్ట్ పై వీసీ దామోదర నాయుడు స్పందిస్తూ, తనపై అక్రమంగా ఎస్సీ, ఎస్టీ అట్రాసిటీ కేసు పెట్టారని, తాను ఎవరినీ కులం పేరిట దూషించలేదని చెప్పారు. ఈ కేసు విషయంలో, దీని వెనుక కొన్ని శక్తులు ఉన్నాయని ఆయన విమర్శించారు. అట్రాసిటీ చట్టాన్ని దుర్వినియోగం చేస్తే సమర్ధవంతమైన అధికారులు ఎవరూ ప్రభుత్వ కార్యాలయాల్లో పని చేయలేరన్నారు. దీని వెనుక ఉన్న కధ మొత్తం తనకు తెలుసని, న్యాయస్థానంలో తనకు న్యాయం జరుగుతుంది అనే నమ్మకం ఉందని అన్నారు. మరో పక్క, హైకోర్ట్ లో వాదనలు వినిపిస్తూ, వీసీ అరెస్ట్‌ వెనుక రాజకీయ కుట్ర ఉందని ఆయన తరఫు న్యాయవాది హరిబాబు ఆరోపించటంతో, దీని వెనుక ప్రభుత్వ పెద్దల హస్తం ఉందని అర్ధమవుతుంది. మరో పక్క గవర్నర్‌ అనుమతి లేకుండా వీసీని అరెస్ట్‌ చేసిన విషయన్ని కోర్ట్ ద్రుష్టికి తీసుకు వెళ్లారు.

ప్రతిపక్ష తెలుగు దేశం పార్టీ రాష్ట్ర పోలీసు యంత్రాంగం పనితీరుపై గడిచిన కొద్ది కాలంగా విమర్శలు గుప్పిస్తోంది. అధికార పార్టీకి అండగా నిలుస్తూ ప్రతిపక్ష పార్టీకి చెందిన నేతలు, కార్యకర్తలపై అక్రమ కేసులు బనాయిస్తూ వేధిస్తున్నారని ఆరోపిస్తోంది. తాము ఇచ్చిన ఫిర్యాదులను ఏమాత్రం పట్టించుకోకుండా అధికార పార్టీకి చెందిన నేతలు ఇస్తున్న ఫిర్యాదులపై కేసులు నమోదు చేయడాన్ని తప్పుపడుతూ వస్తోంది. ముఖ్యంగా సోషల్ మీడియా పోస్టింగులపై పోలీసులు స్పందించిన తీరు పట్ల ప్రతిపక్ష పార్టీ నేతలు తీవ్ర ఆగ్రహం వ్యక్తం చేస్తున్నారు. ఇటీవల ఆ పార్టీ అధి నేత, మాజీ ముఖ్యమంత్రి చంద్రబాబునాయుడు గుంటూరులోని రాష్ట్ర పార్టీ కార్యాలయంలో మీడియా సమావేశాన్ని ఏర్పాటు చేసి తమ నేతలు, కార్యకర్తలపై జరిగిన దాడులు, పోలీసులు బనాయించిన కేసులను వివరించారు. ఈ సందర్భంగా ఆయన కొందరు పోలీసులు అత్యుత్సాహాన్ని ప్రదర్శిస్తూ అధికార పార్టీకి అండగా నిలుస్తున్నారని చేసిన వ్యాఖ్యలు వివాదాన్ని సృష్టించాయి.

మొత్తం పోలీసు వ్యవస్థనే కించపరుస్తున్నారంటూ పోలీసు అధికారుల సంఘం చంద్రబాబుపై ధ్వజమెత్తింది. మరోవైపు టీడీపీ పొలిట్ బ్యూరో సభ్యుడు వర్ల రామయ్య మాట్లాడుతూ, కేవలం కొందరు పోలీ సు అధికారుల తీరును మాత్రమే తమ అధినేత చంద్రబాబు తప్పుపట్టారని దీనినే మొత్తం వ్యవస్థకు అపాదించడం సరికాదని ఆయన హితవు పలికారు. ఇదే సమయంలో అధికార పార్టీ ఎమ్మెల్యేలు ఉండవల్లి శ్రీదేవి, మహ్మద్ ముస్తఫా, విడదల రజనీ గుంటూరులోని అరండల్‌పేట పోలీసు స్టేషన్లో పోలీసు వ్యవస్థను కించపరుస్తున్న చంద్రబాబుపై చర్యలు తీసుకోవాలని ఫిర్యాదు చేశారు. దీంతో ఈ వివాదం కాస్తా ముదిరింది. అగ్నికి ఆజ్యం తోడైనట్లు తాజాగా డీజీపీ గౌతమ్ సవాంగ్ మీడియాతో మాట్లాడుతూ టీడీపీని ఉద్దేశించి విమర్శలు గుప్పించారు. ఆయన పార్టీ పేరు ప్రస్తావించకుండా ఇదంతా ఆ పార్టీ మీడియా షో అంటూ వ్యాఖ్యానించారు. అంతేకాకుండా చంద్రబాబు రాసిన లేఖలపై స్పందిస్తూ తనకు నేరుగా లేఖలు అందించకుండా తొలుత మీడియాకు విడుదల చేసి ఆ తర్వాత పార్టీ నేతలతో పంపిస్తున్నారని చెప్పుకొచ్చారు.

ఇవన్ని రాజకీయ కోణంలో చేస్తున్న ఆరోపణలేనని కొట్టిపారేశారు. ఎటువంటి పక్షపాతం లేకుండా తనకు అందిన ప్రతి ఫిర్యాదుపై స్పందించి అవసరమైన చర్యలు తీసుకుంటున్నానని స్పష్టం చేశారు. డీజీపీ చేసిన ఈ వ్యాఖ్యలపై సోమవారం శ్రీకాకుళం జిల్లా పర్యటనలో ఉన్న చంద్రబాబు తీవ్రంగా స్పందించారు. డీజీపీ సవాంగ్ పై తీవ్ర అసహనాన్ని వ్యక్తం చేశారు. ప్రభుత్వ విధానాలతో పాటు డీజీపీ వ్యవహారశైలిపై మండిపడ్డారు. ఒకవైపు అధికార పార్టీ నేతలు, శ్రేణుల దాడుల్లో తమ పార్టీ నేతలు ప్రాణాలు కోల్పోవడంతో పాటు తీవ్రంగా గాయాలపాలవుతుంటే మీడియా షో అంటారా..? అంటూ విరుచుకుపడ్డారు. తాను ఏ తప్పు చేయలేదని, ఎవరికి భయపడే ప్రసక్తే లేదని చంద్రబాబు తేల్చి చెప్పారు. ఆనాడు రాజశేఖర్ రెడ్డి ముఖ్యమంత్రిగా ఉన్న సమయంలో తనపై 26 ఎంక్వెయిరీలు నిర్వహించారని అయినప్పటికి ఏమి సాధించలేకపోయారన్న విషయాన్ని గుర్తెర గాలన్నారు. అధికారం శాశ్వతం కాదని పదవుల కన్నా ప్రజలే ముఖ్యమని స్పష్టం చేశారు. చంద్రబాబు చేసిన ఈ వ్యాఖ్యలపై డీజీపీతో పాటు పోలీసు అధికారుల సంఘం ఏ విధంగా వ్యవహరిస్తుందో వేచి చూడాల్సి ఉంది.

వైసీపీ వచ్చిన గత అయుదు నెలలుగా, తెలుగుదేశం పార్టీ కార్యకర్తలు, నేతలు పై జరుగుతున్న దాడులతో పాటు, కేసుల్లో ఇరికించి ఇబ్బంది పెడుతున్న విధానం పై, తెలుగుదేశం పార్టీ అనేక విధాలుగా పోరాటం చేస్తుంది. ఇప్పటికే క్షేత్ర స్థాయిలో పోరాటంతో పాటు, చంద్రబాబు కూడా ప్రెస్ మీట్ లు పెట్టి ప్రెజంటేషన్ లు ఇచ్చి మరీ, వైసిపీ అరాచకాలను ఎండ గడుతున్నారు. అయినా, వైసీపీలో మార్పు రాకపోవటంతో, వివిధ ఫోరమ్స్ లో పోరాటానికి తెలుగుదేశం సిద్ధమైంది. ఇందులో భాగంగా, ముందుగా జాతీయ మానవ హక్కుల సంఘం వద్దకు వెళ్లి, ఇక్కడ జరుగుతున్న విషయాలు అన్నిటి పై ఆధారాలు ఇచ్చి, ఫిర్యాదు చేసింది తెలుగుదేశం. తెలుగుదేశం ఇచ్చిన ఫిర్యాదును పరిశీలించిన, జాతీయ మానవ హక్కుల సంఘం, సానుకూలంగా స్పందించింది. ఆంధ్రప్రదేశ్ ప్రభుత్వం, అధికారాన్ని అడ్డం పెట్టుకుని, తమని వేధిస్తుంది అంటూ టిడిపి చేసిన ఆరోపణల పై, విచారణకు ఆదేశించింది.

ఇందులో భాగంగా, ఆంధ్రప్రదేశ్ రాష్ట్ర ఛీఫ్ సెక్రటరీ, డీజీపీలకు, లేఖ రాస్తూ జాతీయ మానవ హక్కుల సంఘం, కీలక ఆదేశాలు జారీ చేసింది. టిడిపి ఎంపీ గల్లా జయదేవ్, ఇచ్చిన ఫిర్యాదు పై పూర్తి స్థాయి విచారణ జరిపి, ఆరు వారాల్లోగా, ఆ నివేదిక తమకు ఇవ్వాలని ఆదేశించింది. అయితే ఈ లోపే, గుంటూరు జిల్లాలోని పిన్నెల్లి, ఆత్మకూరు, జంగమేశ్వరపాడు, పునుగుపాడు గ్రామాలకు, పోలీసు, న్యాయశాఖలకు చెందిన ఇద్దరు అధికారులును పంపించి, అక్కడ ఊళ్ళు వదిలి వెళ్ళిన బాధితుల పరిస్థితి పై నివేదిక ఇవ్వాలని ఆదేశాలు జారీ చేసింది. ఈ మొత్తం వ్యవహారానికి సంబంధించి, 2 పేజీల ఆదేశాలను, ఆంధ్రప్రదేశ్ రాష్ట్ర చీఫ్ సెక్రటరీకి, ఆదేశాలు జారీ చేసింది, నేషనల్ హ్యూమన్ రైట్స్ కమిషన్.

ఆంధ్రప్రదేశ్ రాష్ట్ర ప్రభుత్వం, పోలీస్ యంత్రాంగాన్ని దుర్వినియోగం చేస్తూ, తెలుగుదేశం నాయకులు, కార్యకర్తలు, టిడిపి పార్టీకి ఓటేసిన సానుభూతిపరులను వేధిస్తూ, వారి పౌర హక్కులకు ఉల్లంఘన కల్గిస్తున్నట్లు తెలుగుదేశం పార్లమెంటరీ పార్టీ నేత, జయదేవ్‌ గల్లా ఈనెల 15న, నేషనల్ హ్యూమన్ రైట్స్ కమిషన్ కు ఫిర్యాదు చేశారు. కేసులు విచారణ పేరిట, బాధితులనే పోలీసులు వేధిస్తున్నారని, బాధితులను నిస్సహాయులుగా మార్చేస్తున్నారని, వీటికి సంబంధించి, 19 కేసుల వివరాలను, గల్లా జయదేవ్ సమర్పించారు. గుంటూరు జిల్లా పల్నాడు ప్రాంతంలోని గ్రామాల్లో, దళిత వర్గానికి చెందిన పౌరులను, ఊరి నుంచి వెళ్ళగొట్టిన విషయంలో, మానవ హక్కుల సంఘం పరిగణనలోకి తీసుకుని, చీఫ్ సెక్రటరీ, డీజీపీలను, విచారణ చేసి, నివేదిక ఇవ్వాలని ఆదేశాలు జారీ చేసింది.