news

జగన్ మోహన్ రెడ్డి పై, నిన్న సిబిఐ కోర్ట్ లో, సిబిఐ వేసిన పిటీషన్ పై చంద్రబాబు ఆగ్రహం వ్యక్తం చేసారు. ఆ పిటీషన్ లో సిబిఐ పేర్కున్న అంశాల పై జగన్ సమాధానం చెప్పాలని అన్నారు. ఇలాంటి వ్యక్తి మన సియం అయినందుకు సిగ్గు పడాలని అన్నారు. సిబిఐ నిన్ను ఒక అవినీతి చక్రవర్తి అంటుంటే, మీరు మాత్రం అవినీతిని అంతం చెయ్యటానికి, దేవుడు నన్ను పంపించాడు అని చెప్పటం సిగ్గు చేటు అని చంద్రబాబు అన్నారు. "జగన్‌ జైల్లో ఉన్నప్పుడే సాక్షులను ప్రభావితం చేసినందున, ముఖ్యమంత్రిగా మరింతగా సాక్షులను ప్రభావితం చేయగలరని సీబీఐ చేసిన వ్యాఖ్యల పై జగన్ సమాధానం చెప్పాలి. అవినీతి నియంత్రణకు తనను దేవుడు పంపాడని ఆయన చెప్పడం సిగ్గుచేటు. సీబీఐ కేసుల్లో నిండా మునిగిన ఆయన నీతులు చెప్పడం విడ్డూరం. అవినీతి ఆస్తుల్ని ప్రభుత్వానికి అప్పగించి నిజాయతీ పాటిస్తే.. అప్పుడు జగన్‌ను నేనూ అభినందిస్తా’ అని చంద్రబాబు వ్యాఖ్యానించారు.

రాష్ట్రంలో అన్ని జిల్లాలకు చెందిన మాజీ సర్పంచులు, ఎంపీటీసీ, జడ్పీటీసీ, పంచాయతీరాజ్‌ ఛాంబర్ల రాష్ట్ర అధ్యక్షులతో నిన్న రాత్ర గుంటూరులోని తెలుగుదేశం పార్టీ రాష్ట్ర కార్యాలయంలో జరిగిన సమావేశంలో చంద్రబాబు మాట్లాడారు. ఇదే సందర్భంలో, జగన్ సిబిఐ కోర్ట్ కు వారం వారం రాకుండా, తనకు మినహాయింపు ఇవ్వాలి అంటూ, సిబిఐ కోర్ట్ లో వేసిన పిటీషన్ పై, సిబిఐ వినిపించిన వాదనలు, వార్తాల్లో రావటంతో, చంద్రబాబు ఆ విషయం ప్రస్తావించారు. సిబిఐ, జగన్ పై చేసిన తీవ్ర వ్యాఖ్యలు సంచలనంగా మారాయి. చట్టం ముందు, ఒక సియం అయినా, సామాన్యుడు అయినా ఒక్కటే అనే విధంగా, సిబిఐ వాదనలు చేసింది. కోర్ట్ విచారణ నుంచి మినహయింపు కోరుతూ, జగన్ వేసిన పిటీషన్ ను కొట్టేయాలని కోర్ట్ ని కోరింది.

చట్టం ముందు ప్రతి పౌరుడు సమానమేనని, అధికారంలో ఉన్నంత మాత్రాన, కోర్ట్ విచారణ నుంచి వ్యక్తిగత హాజరుకు మినహాయింపు ఇవ్వాలని కోరటం, రాజ్యాంగంలోని 14వ అధికరణకు విరుద్ధమని సిబిఐ కోర్ట్ కు తెలిపింది. జగన్ జైల్లో ఉన్న సమయంలోనే, తన పలుకుబడిని, ఉపయోగించి సాక్ష్యాలను ప్రభావితం చేసారని, ఇప్పుడు సీఎం హోదాలో, అన్ని అధికారాలూ ఆయనకు ఉన్నాయని తెలిపింది. నిందితుల హోదా, ఆర్థిక నేపథ్యం ఆధారంగా వ్యక్తిగత హాజరుకు మినహాయింపు ఇవ్వకూడదని, ఇలా చేస్తే, ప్రజలకు తప్పుడు సంకేతాలు వెళ్తాయని కోర్ట్ కు చెప్పింది. అధికారాన్ని ఉపయోగించి, సాక్షులు భయాందోళనకు గురయ్యే అవకాశముందని తెలిపింది. అందుకే జగన్ కు కోర్ట్ నుంచి మినహాయింపు ఇవ్వ కూడదు అని తెలిపింది.

జగన్ మోహన్ రెడ్డి పై అక్రమాస్తుల కేసులు ఉన్న సంగతి తెలిసిందే. 11 సిబిఐ కేసులు, 5 ఈడీ కేసులు ఉన్నాయి. వీటి పై ప్రతి శుక్రవారం, హైదరాబాద్ లోని నాంపల్లి కోర్ట్ లో వాదనలు జరుగుతున్నాయి. అయితే జగన్ మోహన్ రెడ్డి ప్రభుత్వంలోకి వచ్చిన దగ్గర నంచి ఆయన కోర్ట్ కు వెళ్ళటం లేదు. ప్రతి వారం కోర్ట్ నుంచి మినహాయింపు అడుగుతున్నారు. ప్రతి వారం ఇలా మినహాయింపు కోరటం కష్టం కాబట్టి, తనకు ప్రతి వారం రాకుండా, అక్రమాస్తుల కేసులో వ్యక్తిగత హాజరు నుంచి మినహాయింపు ఇవ్వాలని నాంపల్లి సీబీఐ కోర్టులో జగన్ పిటీషన్ దాఖలు చేసారు. ఈ పిటీషన్ పై ఈ రోజు వాదనలు జరిగాయి. అయితే ఈ రోజు జరిగిన వాదనల్లో, జగన్ పిటిషన్‌ పై సీబీఐ తీవ్ర అభ్యంతరం వ్యక్తం చేస్తూ, జగన్ కి షాక్ ఇచ్చింది. మొన్నటి వరకు జగన్ కేసుల్లో చూసి చూడనట్టు ఉన్న సిబిఐ, ఈ సారి మాత్రం గట్టిగా పట్టుకుంది.

జగన్ పిటీషన్ పై సీబీఐ కౌంటర్‌ దాఖలు చేస్తూ, బలమైన వాదనలు వినిపించింది. జగన్ మోహన్ రెడ్డి వాస్తవాలు దాచిపెట్టి కోర్టుకు వచ్చారని కౌంటర్‌లో సీబీఐ తెలిపింది. జగన్ ఎంపీగా ఉన్న సమయంలో సాక్ష్యాలను తారుమారు చేస్తారనే అప్పట్లో ఆయనను అరెస్టు చేశామని సీబీఐ చెప్పింది. రాజశేఖర్ రెడ్డి సీఎంగా ఉన్నప్పుడే, ఆయన కుమారుడిగా ఉన్నప్పుడే జగన్‌ పై అక్రమ లావాదేవీల అభియోగాలు ఉన్నాయని, కోర్ట్ కి సమర్పించిన కౌంటర్‌లో సిబిఐ వివరించింది. జగన్ జైల్లో ఉన్నప్పుడే తన బలాన్ని ఉపయోగించి, సాక్షులను ప్రభావితం చేశారని, ఇప్పుడు ఒక ప్రభుత్వానికి అధినేతా సాక్షులను ప్రభావితం చేసేందుకు ఇప్పుడు మరింత ఎక్కువ అవకాశాలు ఉన్నాయని సీబీఐ పేర్కొంది.

మరో పక్క తాను రావటానికి, ఎక్కువ ఖర్చు అవుతుందని, ప్రభుత్వం పై భారం పడుతుంది అంటూ జగన్ చెప్పిన వాదనని ప్రస్తావిస్తూ, ఆయన పేర్కొన్న రాష్ట్ర పునర్విభజన, గత ప్రభుత్వ పనితీరుకు, ఈ కేసుకు ఎలాంటి సంబంధం లేదని సీబీఐ తెలిపింది. రాష్ట్రానికి సంబంధించిన ఆర్థిక, రెవెన్యూ అంశాల ప్రస్తావన ద్వారా, ఈ కేసుకు సంబందించిన వాస్తవాలను పక్కదారి పట్టించే ప్రయత్నం చేస్తున్నారని సిబిఐ ఆరోపించింది. ఆర్థిక వ్యవస్థ పై తీవ్ర ప్రభావం చూపే అభియోగాలు జగన్‌ పై ఉన్నాయని, సుప్రీం కోర్టు చెప్పిన విషయాన్ని, సీబీఐ కౌంటర్‌లో ప్రస్తావించింది. అసలు రాష్ట్ర రెవెన్యూ లోటనేది, ఒక కేసులో ఉన్న వ్యక్తి, వ్యక్తిగత హాజరుకు మినహాయింపునిచ్చే కారణం కాదని పేర్కొంది. విజయవాడ నుంచి వారానికోసారి హైదరాబాద్ రావడం పెద్ద కష్టం ఏమి కాదని, ఇది సరైన కారణం కాదని అభిప్రాయపడింది. సీఎంగా ఆయనకు ఉన్న సౌకర్యాలతో 275 కి.మీ.ప్రయాణించడం కష్టమేమీ కాదని కౌంటర్‌లో సీబీఐ పేర్కొంది. జగన్ కు మినహాయింపు ఇవ్వద్దు అంటూ కోర్ట్ ని కోరింది, సిబిఐ.

సంవత్సరానికి ఒక్క రోజు, మద్యం, మాంసం ముట్టకుండా ఉండే రోజు, అక్టోబర్ 2. ఆ మహాత్ముడి జయంతి సందర్భంగా, గాంధీ తాతకు ఈ దేశం ఇచ్చే నివాళి ఇది. అక్టోబర్ 2న, మాంసం, మద్యం అమ్మకూడదు అనేది చట్టం కూడా, సామాన్య ప్రజలు ఎవరైనా మద్యం తాగి కనిపించినా, చిరు వ్యాపారస్తులు ఎవరైనా మాంసం విక్రయాలు అమ్మినా, వాళ్ళను తీసుకు వెళ్లి లోపల వేస్తారు. అయితే, మన ఆంధ్రప్రదేశ్ రాష్ట్రంలో మాత్రం, ఇవేమీ పట్టవు. ఏకంగా, ఎమ్మెల్యేల సారధ్యంలోనే, కొత్తగా ఏర్పడిన గ్రామ సచివాలయాల సాక్షిగా, ఆ మహాత్ముడి ఆశయాలకు తూట్లు పొడుస్తూ, మాంసంతో విందు చేసుకోవటం కలకలం రేపింది. ఏకంగా గ్రామ సచివలయాల్లో, ఎమ్మెల్యేలు పాల్గున్న చోట, ఇలా మాంసం తినటంతో, అందరూ అవాక్కయ్యారు. ప్రభుత్వ కార్యక్రమంలోనే అక్టోబర్ 2న మాంసంతో విందు భోజనం పెడితే, ఇక సామాన్యులు, ఎందుకు ఈ రూల్స్ పాటిస్తారు ?

ఈ సంఘటన, చిత్తూరు జిల్లాలోని వరదయ్యపాలెం మండలంలోని 2 చోట్ల ప్రభుత్వ కార్యక్రమంలో జరిగింది. రెండు చోట్లా ప్రభుత్వ కార్యాలయాల్లో మాంసాహారం దర్శనమిచ్చింది. మత్తేరిమిట్ట, చినపాండూరులో గ్రామ సచివాలయం ప్రారంభ కార్యక్రమంలో అక్కడకు వచ్చిన ప్రజలకు మాంసాహారంతో భోజనం పెట్టారు. మత్తేరిమిట్టలో గ్రామ సచివాలయం ఎమ్మెల్యే ఆదిమూలం ప్రారంభించారు. ఎమ్మెల్యే ప్రారంభించి వెళ్లిన తర్వాత మాంసాహారంతో విందు ఏర్పాటు చేసారు. ఇక చినపాండూరు గ్రామ సచివాలయం ప్రారంభ కార్యక్రమంలో నిర్వాహకులు చికెన్ బిర్యాని పెట్టారు. గాంధీ జయంతి రోజు మాంసాహారం నిషేధం ఉన్నా అధికారులు కాని, నేతలు కాని, పట్టించుకోలేదు. వారికే అలా ఉంటే, ఇక ప్రజలు ఏముంది, వారు పెట్టారు కదా అని వీరు లాగించారు.

మరో పక్క, మద్యం దుకాణాల పై, టీడీపీ అధినేత చంద్రబాబు ఆగ్రహం వ్యక్తం చేశారు. గాంధీ జయంతి రోజు మద్యం దుకాణాలు నిర్వహించడమేంటని, ఇంతకంటే ఘోరం ఇంకా ఏమి ఉంటుందని ప్రశ్నించారు. ఒక ప్రభుత్వమే దగ్గర ఉండి, పోలీసులను పెట్టి మరీ మద్యం అమ్మిస్తూ గాంధీ జయంతి రోజున ఎలాంటి సందేశాలు ఇస్తున్నారని ప్రభుత్వాన్ని నిలదీశారు. ఎవరి విశ్లేషణకూ అర్థంకాని రీతిలో జగన్‌ వ్యవహారశైలి ఉందని, రాష్ట్రం జగన్‌ జాగీరు కాదని అన్నారు. బ్రిటీష్‌ వారైనా చట్టాన్ని అనుసరించేవారని, జగన్ కనీసం చట్టాన్ని కూడా గౌరవించడం లేదని విమర్శించారు. అలాగే ప్రభుత్వం మొదలు పెట్టిన మద్యం దుకాణాల పై, ప్రజలు కూడా తిరగబడుతున్నారు. జనావాసాల మధ్య మద్యం అమ్మకాలు ఏమిటంటూ మహిళలు భగ్గుమంటున్నారు.