news

వైఎస్ జగన్ కు, తెలుగుదేశం అధినేత చంద్రబాబు లేఖ రాశారు. ప్రభుత్వం ఏర్పడిన తరువాత, జగన్ కు ఇది మూడో లేఖ. గత నాలుగు నెలలుగా, ఉపాధి హామీ పనుల పై ప్రభుత్వం, పూర్తిగా నిర్లక్ష్యం చేసిందని, పేదల జీవనోపాధిని దెబ్బతీస్తోందని లేఖలో పెర్కున్నారు. ఇవి లేఖలోని ముఖ్యాంశాలు. " ఏ ప్రాంతంలో అయినా, కొత్తగా అధికారంలోకి వచ్చిన ప్రభుత్వాలు, గత అభివృద్ధి కార్యక్రమాల వేగం తగ్గకుండా ముందుకు తీసుకుపోవడంతో పాటుగా, కొత్తగా మరింత సంక్షేమం, అభివృద్ధి కార్యక్రమాలను చేపట్టడం ఇప్పటిదాకా చూశాం. కానీ గడిచిన 4నెలలుగా ఆంధ్రప్రదేశ్‌లో జరుగుతున్న పరిణామాలు రాష్ట్ర ప్రజలనే కాకుండా దేశవ్యాప్తంగా ఆశ్చర్యానికి, ఆందోళనకు గురిచేస్తున్నాయి. రద్దుల పద్దులు, కూల్చివేతలు, నిలిపివేతలే త్రిసూత్ర పథకంగా రాష్ట్ర ప్రభుత్వ వ్యవహారశైలి వివాదాస్పదంగా మారింది. ఆ జాబితాలోకి అత్యంత ప్రతిష్టాత్మక పథకం మహాత్మాగాంధీ జాతీయ ఉపాధి హామీ పథకం (నరేగా) కూడా చేరడం అత్యంత ఆందోళనకరం. నరేగా పనుల పట్ల ఈ ప్రభుత్వ నిర్లక్ష్యం లక్షలాది పేద కుటుంబాల జీవనోపాధిని దెబ్బతీస్తోంది."

"రాష్ట్రవిభజన వల్ల 2014-15లో తలెత్తిన తీవ్ర ఆర్ధిక లోటు అధిగమించడం అత్యంత క్లిష్టంగా మారిన నేపథ్యంలో మహాత్మాగాంధీ జాతీయ గ్రామీణ ఉపాధి హామీ పథకం (నరేగా) ఏపిలోని 13 జిల్లాలలో గ్రామీణాభివృద్ధికి ఎంతో ప్రయోజనకారి అయ్యింది. గత ఏడాది రూ.9,300కోట్లతో నరేగా పనులు చేయడం దేశంలోనే ఒక రికార్డు. గడిచిన 5ఏళ్లలో నరేగా నిధులు రూ.32వేలకోట్ల పైగా ఆంధ్రప్రదేశ్‌ రాష్ట్రం వినియోగించుకోగలిగింది అంటే దానివెనుక ఎంతో నిర్మాణాత్మక కృషి, దూరదృష్టి, కార్యాచరణతో సాధించాం. అలాంటి స్థితినుంచి ప్రస్తుత సంక్షోభంలోకి, 'నరేగా' పనులు నెట్టబడటం బాధాకరం, భవిష్యత్‌ గ్రామీణాభివృద్దికే తీవ్ర విఘాతం. ఇటు పేదల ఉపాధికి, అటు అభివృద్ధికి గణనీయంగా ఉపయోగపడిన నరేగా పథకాన్ని గత 4 నెలలుగా రాష్ట్ర ప్రభుత్వం పూర్తిగా నిర్లక్ష్యం చేసింది. కేంద్రం ఈ పథకానికి విడుదల చేసిన నిధులతోపాటు రాష్ట్ర ప్రభుత్వ వాటా నిధులను కలిపి విడుదల చేయకుండా ఆ మొత్తాన్ని వేరే పనులకు దారి మళ్ళించారు. పాలకుల చేతకానితనం కారణంగా, ప్రతిష్టాత్మకమైన నరేగా పథకం నిర్వహణ నీరుగారిపోతోంది, అంతేకాకుండా పథకం ప్రాథమిక లక్ష్యాన్నే దెబ్బతీస్తోంది."

"2019-20 సంవత్సరానికి రాష్ట్రంలో నరేగా పనులకు కేంద్రం నిధులు విడుదల చేస్తూ కేంద్ర గ్రామీణాభివద్ధి మంత్రిత్వ శాఖ డైరెక్టర్‌ 3 జీవోలు ఇచ్చారు. 05.08.2019న రూ.836,00,68,000 మరియు 08.07.2019న రూ.641,39,52,000 మరియు 09.04.2019న రూ.367,65,41,000... మొత్తం రూ.1,845 కోట్లు విడుదల చేసింది. రాష్ట్రం తన వాటా నిధులతో పాటు ఈ నిధులను స్టేట్‌ ఎంప్లాయ్‌మెంట్‌ గ్యారంటీ ఫండ్‌కు, కేంద్రం నిధులు విడుదల చేసిన 3 రోజుల్లోపు విడుదల చేయాలని స్పష్టంగా ఆదేశించింది. లేనిపక్షంలో భవిష్యత్తులో నరేగాకు ఇచ్చే నిధులను ఆంధ్రప్రదేశ్‌కు ఆపేస్తామని హెచ్చరించింది. రాష్ట్రం ఎన్నాళ్లు నిధులు విడుదల చేయకుండా ఆపితే అంత కాలానికి 12% వడ్డీతో సహా రాష్ట్ర ప్రభుత్వం చెల్లించాలని హెచ్చరించింది. కూలీలకు సకాలంలో వేతనాల చెల్లింపులు లేవు. క్షేత్రస్థాయి సహాయకుల్లో అభద్రతతో రాష్ట్రంలో ఈ పథకం మనుగడే ప్రశ్నార్ధకం అయ్యింది. చెల్లింపులు జరపలేదు కాబట్టి పనులు చేపట్టలేమని అటవీశాఖే బాహాటంగా ప్రకటించింది. ఇప్పటికైనా మీరు తక్షణమే స్పందించి, కేంద్రం విడుదల చేసిన నిధులతోపాటు రాష్ట్ర వాటా నిధులు కలిపి సత్వరమే విడుదల చేయాలని, పెండింగ్‌ బిల్లులను ప్రాధాన్యతా క్రమంలో చెల్లించాలని, నరేగా పనులు కుంటుపడకుండా చూడాలని, కోట్లాది కూలీల జీవనోపాధికి భంగం కలగకుండా చర్యలు తీసుకోవాలని డిమాండ్‌ చేస్తున్నాం."

పోలవరం ప్రాజెక్ట్ నుంచి, తమను తప్పించటం పై, ఏపి ప్రభుత్వ వైఖరిని తప్పుబడుతూ, నవయుగ కంపెనీ హైకోర్ట్ కు వెళ్ళిన సంగతి తెలిసిందే. అయితే అప్పట్లో హైకోర్ట్ మధ్యంతర ఉత్తర్వులు ఇస్తూ, జెన్కో కి షాక్ ఇచ్చింది. ప్రభుత్వ ఉత్తర్వులు చెల్లవు అంటూ కోర్ట్ ఉత్తర్వులు ఇచ్చింది. అయితే, ఆ ఉత్తర్వులను ఎత్తివేయాలని కోరుతూ జెన్కో హైకోర్టులో మరో పిటిషన్‌ దాఖలు చేసింది. ఈ కేసు పై నిన్న హైకోర్ట్ లో వాదనలు జరిగాయి. వాదనలు జరిగిన సమయంలో, నవయుగ తరుపు లాయర్, గట్టి వాదనలు వినిపిస్తూ, ప్రభుత్వాన్ని, జెన్కో ని ఇరుకున పెట్టారు. పోలవరం హైడల్ ప్రాజెక్ట్‌ నుంచి తమను తప్పిస్తూ, ప్రభుత్వంతో కుదుర్చుకున్న ఒప్పందం రద్దు చేసే విషయంలో ఏపీ జెన్‌కో దురుద్దేశంతో వ్యవహరించిందని నవయుగ తరఫు న్యాయవాది పి.విల్సన్‌ హైకోర్టుకు విన్నవించారు. ఈ మొత్తం వ్యవహారం పై, ప్రభుత్వం వెనుక ఉండి , ఏపి జెన్కోని నడిపించిందని, హైకోర్ట్ కి తెలిపారు.

జగన్ మోహన్ రెడ్డి దగ్గర జరిగిన సమీక్షలో, మా ఒప్పందం రద్దుకు నిర్ణయం తీసుకోవటమే, ఇందుకు నిదర్శనం అని అన్నారు. మా ఒప్పందం రద్దు వెనుక, ప్రభుత్వం ఉందని, జెన్కో ఒప్పుకున్న విషయాన్ని, కోర్ట్ కు తెలిపారు. విద్యుత్‌ ప్రాజెక్టు ఒప్పందం పై జెన్కో తరుపున, గతంలో సంతకం చేసిన జెన్‌కో చీఫ్‌ ఇంజినీర్‌ ప్రభాకరరావు, ఇప్పుడు మా ఒప్పంద నిర్ణయం అక్రమం అని, చట్టవిరుద్ధమని ఆయనే చెప్పటం ఆశ్చర్యం కలిగిస్తోందని అన్నారు. జెన్కో చీఫ్‌ ఇంజనీరే ఇప్పుడు కి దురుద్దేశాలు ఆపాదిస్తూ కోర్టుకు నివేదించారు కాబట్టి, ఆ చీఫ్‌ ఇంజనీర్‌ను ప్రాసిక్యూట్‌ చేయాలని కోర్ట్ కు తెలిపారు. ప్రభుత్వాలు మారితే అధినేతలు మారతారు కాని, విధానపరమైన నిర్ణయాలు, అధికారులు మారరని గుర్తు చేసారు.

రాష్ట్ర ప్రభుత్వాన్ని మూడో పార్టీగా చెప్తూ, వారు చెప్పినట్లు వ్యవహరించి తమతో చేసుకున్న ఒప్పందాన్ని ఏపీ జెన్‌కో రద్దు చేసుకుందని కోర్ట్ కు తెలిపారు. మూడో పార్టీ జోక్యం ఉన్నప్పుడు మధ్యవర్తిత్వ విధానాన్ని ఎలా ఆశ్రయించమంటారని ప్రశ్నించారు. ఈ ఒప్పందం రద్దు సహజ న్యాయసూత్రాలకు విరుద్ధంగా జరిగిందని, కనీసం నోటీసివ్వకుండా ఏకపక్షంగా మా ఒప్పందాన్ని రద్దు చేసినప్పుడు హైకోర్టును ఆశ్రయించే వెసులుబాటు తమకు ఉందన్నారు. ఈ కాంట్రాక్టు రద్దు వెనుక ప్రభుత్వ దురుద్దేశం ఉంది కాబట్టి, హైకోర్టు ఇచ్చిన స్టేను యధాతథంగా ఉంచండి అంటూ అభ్యర్దించారు. నవయుగ బలమైన వాదనలు వినిపించటంతో, జెన్కో తరుపు లాయర్ కూడా, వాదనలు వినిపించారు. అక్కడ ఇప్పటి వరకు నవయుగ పనులు మొదలు పెట్టలేదు అంటూ, చెప్పుకొచ్చారు. ఇరువురి వాదనలు విన్న న్యాయమూర్తి, తీర్పును వాయిదా వేశారు.

టీవీ9 ఛానెల్ లో, ముఖాముఖి కార్యక్రమం ద్వారా, తనదైన ముద్ర వేస్తూ, పొలిటికల్ ఇంటర్వ్యూ లు చేసే జాఫర్ అంటే తెలియని వారు ఉండరు. ఈ కార్యక్రమంలో ఎక్కువగా సంచలనాలు, వివాదాలు ఉండటంతో, ఈ షోకి టీఆర్పీలు కూడా ఎక్కువే. తద్వరా టీవీ9కి కూడా టీఆర్పీ పెరిగేది. యుట్యూబ్ లో వ్యూస్ కూడా అధికంగా వచ్చేవి. దాదపుగా 175 ఎపిసోడ్ లు నడిచింది ఈ ప్రోగ్రామ్. అయితే నిన్నటి నుంచి, టీవీ9, జాఫర్ చేత బలవంతంగా రాజీనామా చేపించి, పంపించేసారు అనే వార్తలు వచ్చాయి. సోషల్ మీడియాలో ఈ వార్తలు హల్ చల్ చేసాయి. సీనియర్ జర్నలిస్ట్ అయిన జాఫర్ ని అర్దాంతరంగా తప్పించారని, ఆయన చేత బలవతంగా రాజీనామా చేపించారని, ఆ ప్రచారంలోని సారంశం. గతంలో టీవీ9కు కర్త, కర్మ, క్రియగా ఉన్న రవి ప్రకాష్ ను, టీవీ9 నుంచి తప్పించి, కొత్త యాజమాన్యం కైవసం చేసుకున్న సంగతి తెలిసిందే.

అయితే అప్పటి నుంచి, రవి ప్రకాష్ కు సన్నిహితంగా ఉండే స్టాఫ్ ని తీసేస్తూ వచ్చారు. అయితే రవి ప్రకాష్ కు సన్నిహితుడగా ఉండే జాఫర్ ని మాత్రం, తప్పించలేదు. అయినా జాఫర్ ఎప్పటి లాగే, తన ముఖాముఖి షో చేస్తూ వస్తున్నారు. నిన్న ఉన్నట్టు ఉండి, ఆయనను రాజీనామా చేపించటం సంచలనంగా మారింది. దీనికి కారణం, ఆయన రవి ప్రకాష్ ను కలిసారని. ఓకే మాజీ బాస్ ను కలిస్తేనే, రాజీనామా చేస్తారా, ఒక సీనియర్ జర్నలిస్ట్ కు ఇచ్చే గౌరవం ఇదేనా, 15 ఏళ్ళ నుంచి టీవీ9 లో పని చేస్తుంటే, ఇచ్చే బహుమానం ఇదా అంటూ, జాఫర్ తన సన్నిహితుల దగ్గర గోడు వెల్లబోసుకున్నారని సమాచారం. అయితే, సోషల్ మీడియాలో వస్తున్న ఈ వార్తల పై, అటు జాఫర్ కాని, టీవీ9 కాని స్పందించక పోవటంతో, ఈ వార్తా పై అనుమానాలు వచ్చాయి.

కాని, వాటికి ఫుల్ స్టాప్ పెడుతూ, ఈ రోజు జాఫర్ ఒక మీడియా సందేశాన్ని విడుదల చేసారు. 15 ఏళ్ళుగా తనకు టీవీ9తో ఉన్న బంధం తెగిపోయిందని అన్నారు. ఈ ప్రయాణంలో 5 ఏళ్ళ పాటు, 175 ఎపిసోడ్ లు గా తీసిన ముఖా ముఖి కార్యక్రమం ఎంతో పేరు తెచ్చిపెట్టిందని అన్నారు. ఇన్నేళ్ళు తనకు సహాయం చేసిన రవి ప్రకాష్ తో పాటుగా, 175 ఎపిసోడ్ లలో, తనతో షో చెయ్యటానికి వచ్చిన అతిధులకు కూడా ధన్యవాదాలు చెప్పారు. టీవీ9 మీద కాని, ఎవరి మీద తనకి కోపం లేదని అన్నారు. కొన్ని రోజులు ఫ్యామిలీతో గడుపుతానని, తరువాత ఎటు వెళ్ళాలి అనే దాని పై ఆలోచన చేస్తానాని జాఫర్ అన్నారు. అయితే, 15 నిమిషాల ఈ వీడియోలో, ఆయన ప్రస్తుత టీవీ9 యాజమాన్యం పై కాని, తనను తప్పించటం పై కాని, ఎలాంటి ప్రకటన చెయ్యలేదు.