news

ఈ రోజు రాజ్యసభలో, కేంద్ర హోం మంత్రి చేసిన ప్రకటన, దేశాన్ని ఒక ఊపు ఊపింది. మెజారిటీ ప్రజలు ఈ నిర్ణయాన్ని స్వాగతిస్తున్నారు. కాశ్మీరీ ప్రజల అభిప్రాయం మాత్రం, తెలియటం లేదు. అయితే ఈ నిర్ణయాన్ని సమర్ధించే వారు, వ్యతిరేకించే వారు. ఈ విషయం పై రాజ్యసభలో చర్చ జరుగుతుంది. వివిధ పార్టీలకు చెందిన వారు, వారి వారి అభిప్రాయాలు చెప్తున్నారు. ఇదే విషయం పై మన రాష్ట్రానికి చెందిన వైసీపీ ఎంపీ విజయసాయిరెడ్డి తన అభిప్రాయాన్ని చెప్పారు. ఈ 370 అధికరణను రద్దు చేస్తూ, మోడీ ప్రభుత్వం ఎంతో అద్భుతమైన నిర్ణయం తీసుకుందని విజయసాయి రెడ్డి అన్నారు. ఈ విషయంలో మా అధినేత జగన్ మోహన్ రెడ్డి సపోర్ట్ మీకు ఉంటుందని తెలియచెస్తున్నాం అని విజయసాయి రెడ్డి అన్నారు.

ఇలాంటి సాహసోపేతమైన నిర్ణయం తీసుకున్న, మోడీ, అమిత్ షా లకు హాట్స్ ఆఫ్ చెప్పారు విజయసాయి రెడ్డి. అంతే కాదు పనిలో పనిగా నెహ్రుని కూడా తిట్టారు. సహజంగా బీజేపీ పార్టీ రాజకీయంగా నెహ్రుని, కాంగ్రెస్ ని తిడుతూ ఉంటుంది. అయితే ఇక్కడ వెరైటీగా విజయసాయి రెడ్డి నెహ్రుని తిట్టారు. ఇంతటితో అయిపోలేదు. అసలు విషయం ఇక్కడే ఉంది. అమిత్ షాని అభినవ సర్దార్ వల్లభాయ్ పటేల్ అంటూ రాజ్యసభలో విజయసాయి రెడ్డి ఆకాశానికి ఎత్తేసారు. బీజేపీ నేతలు కూడా ఈ రేంజ్ లో భజన చెయ్యలేదు కాని, విజయసాయి రెడ్డి మాత్రం, కొత్త పేరు పెట్టి మరీ, అమిత్ షా భజన చేసారు. నిజంగా ఈ సమస్య పై విజయసాయి రెడ్డి ఇంతగా కనెక్ట్ అయ్యి, అమిత్ షా ని ఈ రేంజ్ లో ఎత్తారా లేక రాజకేయంగా ఈ ప్రకటన చేసారో కాని, మరోసారి విజయసాయి రెడ్డి తమ స్వామి భక్తిని చాటుకున్నారు.

ఇక మరో పక్క ఆర్టికల్ 370 రద్దు అంశం పై, ఇరు తెలుగు రాష్ట్రాల్లో ఉన్న పార్టీలు అయిన టిడిపి, వైసీపీ, టీఆర్‌ఎస్‌ తమ మద్దతు ప్రకటించాయి. ఇక జాతీయ పార్టీల్లో బీఎస్పీ, ఏఐఏడీఎంకే, బిజు జనతా దళ్,ఆమ్‌ ఆద్మీ పార్టీలు మద్దతు ప్రకటించగా, కాంగ్రెస్‌, పీడీపీ, డీఎంకే, ఎస్పీ తీవ్రంగా వ్యతిరేకించాయి. అయితే మద్దతు తెలిపిన పార్టీలు మాత్రం, ఇంతటితో కాశ్మీర్ లో శాంతి వచ్చేయదని, నోట్ల రద్దులా కాకుండా, దీన్ని సంపూర్ణంగా పూర్తీ చెయ్యాలని, కాశ్మీర్ లో ఇప్పుడు హింస చెలరేగకుండా చూడాలని వివధ పార్టీలు కోరుతున్నాయి. ఇప్పటికే జమ్ము కాశ్మీర్ రాష్ట్రం మొత్తం, భద్రతా బలగాల పహారాలో ఉంది. రాష్ట్రం అంతటా 144 సెక్షన్, కొన్ని చోట్ల కర్ఫ్యూ కూడా ఉంది. అలాగే చాలా మంది హౌస్ అరెస్ట్ లో ఉన్నారు, కమ్యూనికేషన్ వ్యవస్థ మొత్తం బంద్ అయ్యింది. ఈ పరిస్థితిలో అక్కడ పరిస్థితి ఎలా ఉందొ, తెలియని పరిస్థితి. ఏది ఏమైనా, అంతా మంచి జరగాలని కోరుకుందాం.

కాశ్మీర్ నుంచి కన్యాకుమారి దాకా, కాషాయ జెండా ఎగరువేయలాని మోడీ, షా తహతహలాడుతున్నారు. ఇందుకోసం వీరు ఎంచుకున్న మార్గంలో, ఇప్పటి వరకు ఎదురు లేదనే చెప్పాలి. ఎవరిని టార్గెట్ చేసినా, వారిని నయానో, భయానో, న్యాయంగానో, అన్యాయంగానో ఓడించి పక్కన కూర్చోబెడుతున్నారు. మొన్నటి ఎన్నికల్లో ఆంధ్రప్రదేశ్ లో చంద్రబాబుని చెప్పి మరీ కొట్టారు, బెంగాళ్ లో మమతకు చుక్కలు చూపించారు, తెలంగాణాలో ఎదురు లేదు అనుకున్న కేసీఆర్ ఇలాకలో, నాలుగు ఎంపీ సీట్లు గెలిచారు, కర్ణాటకను కైవసం చేస్తుకున్నారు, రేపో మాపో మధ్యప్రదేశ్, రాజస్తాన్ ని కూడా లాగేసుకునే ప్రయత్నాల్లో ఉన్నారు. ఇన్ని ప్రయత్నాలు చేస్తున్న బీజేపీ తరువాత వచ్చే ఎన్నికల్లో తెలంగాణా, వెస్ట్ బెంగాల్ లో అధికారంలోకి రావటానికి చూస్తుంది.

అలాగే ఆంధ్రప్రదేశ్, తమిళనాడులో కనీసం 30-40 సీట్లు గెలిచే టార్గెట్ పెట్టుకుంది. ఇందుకోసం, ఇప్పటికే ఆంధ్రప్రదేశ్ లో ప్లాన్ మొదలు పెట్టింది. ముందుగా చంద్రబాబుని తప్పించి, వారి పని ఈజీ అయ్యేలా చేసుకున్నారు. ఇప్పుడు వైసీపీని టార్గెట్ చేస్తున్నారు. వైసీపీని దెబ్బ కొట్టాలి అంటే, చంద్రబాబుకి వేసిన స్కెచ్ లు అవసరం లేదు. రాత్రికి రాత్రి పార్టీని క్లోజ్ చెయ్యొచ్చు. కాని వైసీపీ ప్రభుత్వం పై ప్రజల్లో వ్యతిరేకత వచ్చేలా, ప్రతి రోజు విమర్శలు గుప్పిస్తున్నారు బీజేపీ నేతలు. 60 రోజులకే, జగన్ ప్రభుత్వం అన్నిట్లో విఫలం అయ్యింది అంటున్నారు. దీనికి తోడు, జగన్ చేసే పనులు కూడా బీజేపీకి కలిసి వస్తున్నాయి. అయితే, బీజేపీ ఎన్ని మాటలు అంటున్నా, వైసీపీ నుంచి మాత్రం అసలు రియాక్షన్ అనేది లేదు. ఎందుకో అందరికీ తెలిసిన విషయమే.

అయితే ఇందుకు భిన్నంగా, ఈ రోజు వైసీపీ మంత్రి పేర్ని నాని స్పందించారు. బీజేపీ పై మండి పడ్డారు. పోలవరంలో నవయుగని తప్పించటం పై, పార్లమెంట్ లో, కేంద్ర జలశక్తి మంత్రి గజేంద్రసింగ్ షెకావత్ తీవ్ర అసంతృప్తి వ్యక్తం చేసారు. అయితే ఈ రోజు మంత్రి పేర్నినాని మాట్లాడుతూ, కేంద్రం ఉద్దేశపూర్వకంగానే పార్లమెంట్ లో ఇలా మాట్లాడిందని, పోలవరం ప్రాజెక్టు పై కేంద్ర మంత్రి చేసిన వ్యాఖ్యలు రాష్ట్రాన్ని ఇబ్బంది పెట్టేలా ఉన్నాయని, బాధ్యతాయుత పదవిలో ఉంటూ, దేశానికి ప్రాతినిధ్యం వహిస్తున్న కేంద్ర మంత్రి వ్యాఖ్యలు కక్షసాధింపు ధోరణిలో ఉన్నాయని నాని ఆరోపించారు. అయితే ఏకంగా పార్లమెంట్ లో కేంద్రం చేసిన ప్రకటననే, ఏపి మంత్రి కక్ష సాధింపు, రాజకేయం అంటున్నారు అంటే, బీజేపీతో వైసీపీకి నెమ్మదిగా గ్యాప్ పెరుగుతుందా అనే వ్యాఖ్యలు వినిపిస్తున్నాయి. ఇలాంటి అవకాసం కోసం, వైసీపీని రెచ్చగోడుతున్న బీజేపీ, ఇప్పుడు పేర్ని నాని వ్యాఖ్యల పై ఎలా స్పందిస్తుందో చూడాలి. ఇప్పటికే, పోలవరం జాతీయ ప్రాజెక్ట్ అని, దీని పై సోమవారం సమీక్ష చేస్తామని బీజేపీ పెద్దలు అంటున్నారు. ఇది ఎంత దూరం వెళ్తుందో చూడాలి.

దేశంలో కీలకమైన పరిణామాలు చోటు చేసుకున్నాయి. రాజ్యసభలో కేంద్రం మూడు అంశాలకు సభ ముందు పెట్టి, అందరినీ ఆశ్చర్య పరిచింది. ఆర్టికల్‌ 370 రద్దు , 35(ఏ) రద్దు , జమ్ము కశ్మీర్‌ రాష్ట్ర విభజన వంటి మూడు కీలక అంశాలు ప్రవేశపెట్టారు. దీంతో ఒక్కసారిగా గందరగోళ పరిస్థితి చెలరేగింది. నిమిషాల్లోనే ఆర్టికల్‌370 రద్దు చేస్తూ రాష్ట్రపతి వెనువెంటనే ఆదేశాలు జారీ చేశారు. మరో పక్క జమ్ము, కశ్మీర్‌, లద్దాక్‌ ప్రాంతాలుగా, జమ్ము కశ్మీర్‌ రాష్ట్రాన్ని విడదీసారు. జమ్ము, కశ్మీర్‌లు అసెంబ్లీతో కూడిన కేంద్రపాలిత ప్రాంతాలుకాగా, లద్దాక్‌ అసెంబ్లీ లేని కేంద్ర పాలిత ప్రాంతంగా ప్రకటించారు. ఈ గందరగోళం మధ్య కొంచెం సేపు రాజ్యసభ ప్రసారాలు కూడా ఆగిపోయాయి. లోపల ఏమి జరుగుతుందో తెలియలేదు. కొద్ది సేపటి తరువాత ప్రసారాలు ప్రారంభం అయ్యాయి.

దీని పై కాంగ్రెస్, పీడీపీ, డీఎంకే, ఎస్పీ వ్యతిరేకత వ్యక్తం చేస్తూ నిరసనకు దిగాయి. మరో పక్క టిడిపి, వైసిపీ, టీఆర్ఎస్ అనుకూలంగా ఉన్నాయి. ఈ నిర్ణయం పై దేశం మొత్తం సంతోషం వ్యక్తం చేస్తున్నా, అసలు నిర్ణయం అమలు అయినా జమ్ము కాశ్మీర్ వాసులు ఎలా ఆలోచిస్తున్నారు అనే విషయం మాత్రం తెలియలేదు. ఈ పరిణామాలు అన్నీ చూస్తుంటే, ఆంధ్రప్రదేశ్ విభజన నాటి పరిస్థితి గుర్తుకు వస్తుంది. అప్పుడు కూడా తెలంగాణాలో సంబరాలు చేసుకుంటే, ఏపిలో నిరసనలు చెలరేగాయి. ఇప్పటికీ ఈ నిర్ణయం వల్ల ఏపి నష్టపోయింది. ఎప్పటికి కోలుకుంటుందో కూడా తెలియని పరిస్థితి. అప్పుడు కూడా ఇలాగే ఆదరాబాదరాగా తలుపులు మూసి, లైవ్ కవరేజ్ ఆపేసి, అప్పటి కాంగ్రెస్ బిల్ పాస్ చేసింది. దీనికి బీజేపీ సహకరించింది.

ఇప్పుడు కాంగ్రెస్ కు, ఇలాంటి పరిస్థితి ఎదురైంది. అప్పట్లో వాళ్ళు ఎలా చేసారో, ఇప్పుడు బీజేపీ కూడా మంద బలంతో ఈ నిర్ణయం తీసుకుంది. కొంచెం సేపు లైవ్ కవరేజ్ ఆగిపోయింది కూడా. ఇప్పుడు కూడా దేశం అంతా సంతోష పడుతుంటే, అసలు నిర్ణయం అములు అయ్యే కాశ్మీర్ ప్రజలు మాత్రం నిఘా నీడలో, కనీసం ఇంటర్నట్, ఫోన్ కూడా లేకుండా బిక్కు బిక్కు మంటూ ఉన్నారు. కాశ్మీర్ లోయ మొత్తం సైన్యం ఆధీనంలో ఉంది. ఏది ఏమైనా, కొన్ని ఏళ్ళుగా నడుస్తున్న ఈ సమస్యను, ప్రభుత్వం ఒక ఫుల్ స్టాప్ పెట్టాలి అనుకుంటుంది. అయితే, ఇప్పుడు తీసుకుంది కేవలం నిర్ణయం మాత్రం. అసలు పని ఇప్పటి నుంచి ఉంటుంది. కాశ్మీర్ లో హింస చెలరేగకుందా చూసుకోవాలి. అక్కడ ప్రజలని ఒప్పించాలి. ఇవన్నీ చెయ్యకుండా, మొండిగా వెళ్తే మాత్రం, సమస్య మరింత జటిలం అవుతుంది. మరో నోట్ల రద్దు, జీఎస్టీ లాగా, నిర్ణయం మంచిదే అయినా , అమలులో లోపం ఉన్న నిర్ణయంగా మారిపోతుంది. కేంద్రం, జాగ్రత్తగా డీల్ చేస్తుందని భావిద్దాం.