news

సార్వత్రిక ఎన్నికల్లో ఓటేసేందుకు పొరుగు రాష్ట్రాల్లోని ఆంధ్రులు ఎంతో ఆసక్తి చూపిస్తున్నారు. హైదరాబాద్‌, బెంగళూరు, చెన్నైల నుంచి ఏపీలోని తమ సొంతూళ్లకు చేరుకుని ఏప్రిల్‌ 11న జరిగే పోలింగ్‌లో ఓటు హక్కు వినియోగించుకోవాలని ఉవ్విళ్లూరుతున్నారు. ఫలితంగా ఆర్టీసీ, రైల్వే శాఖలపై ‘సంక్రాంతి’ తరహా ఒత్తిడి కనిపిస్తోంది. హైదరాబాద్‌తోపాటు ఇతర తెలంగాణ జిల్లాల్లో సుమారు 35లక్షల మంది వరకూ ఆంధ్రా ఓటర్లున్నట్లు ఓ అంచనా. పెద్ద పండక్కి సొంతూళ్లకు వెళ్లేందుకు ఏవిధంగా అయితే ముందుగానే ప్రయాణ రిజర్వేషన్‌ చేయించుకుంటారో.. ఈ ఎన్నికల్లోనూ అదే తరహా జాగ్రత్తలు తీసుకుంటున్నారు.

అయితే తెలంగాణా ప్రభుత్వం, ఏప్రిల్ 10న, అక్కడ నుంచి ఏపిలోని వివిధ ప్రదేశాలకు వచ్చే బస్సులను రద్దు చేస్తుంది అంటూ, సోషల్ మీడియాలో కధనాలు వస్తున్నాయి. ఆర్టీసీ ఒక్కటే కాక, ప్రైవేటు బస్సులు కూడా ఏపి వైపు వెళ్ళకుండా జాగ్రత్తలు తీసుకుంటున్నారని, దీని కోసం సాకుగా, తెలంగాణాలో జరిగే పార్లమెంట్ ఎన్నికలు చూపిస్తున్నారని అంటున్నారు. మా రాష్ట్రంలో కూడా ఎంపీ ఎన్నికలు ఉన్నాయి కాబట్టి, హైదరాబాద్ నుంచి, తెలంగాణాలోని వివిధ ప్రాంతాలకు బస్సులు నడుపుతామని, ఏపి వైపు పంపటం కుదరదని, తెలంగాణా చెప్తున్నట్టు, సోషల్ మీడియాలో వైరల్ అవుతుంది. తెలంగాణ నుంచి ఏపీకి రోజూ 615 బస్సులు తిరుగుతుంటాయి. వీటిలో 105 బస్సులు ఒక్క హైదరాబాద్‌ నుంచే నడుస్తాయి.

ఇక ఏప్రిల్‌ పదో తేదీ రాత్రి రైళ్ళు అన్నీ ఫుల్ కానున్నాయి. సికింద్రాబాద్‌ నుంచి తూర్పు, పశ్చిమ గోదావరి జిల్లాలకు వెళ్లే పలు రైళ్ల స్లీపర్‌క్లా్‌సలో వెయిటింగ్‌ లిస్ట్‌ 200 నుంచి 400కు చేరుకుంది. దీంతో ఆయా రైళ్లల్లో బుకింగ్‌ ఆపేశారు. ఏసీ బోగీల పరిస్థితి కూడా ఇలాగే ఉంది. నరసాపూర్‌, గౌతమి ఎక్స్‌ప్రె్‌సలలో స్లీపర్‌ క్లాస్‌ వెయిటింగ్‌ లిస్ట్‌ 401కు చేరింది. ఏపీ మీదుగా ఒడిసా, కోల్‌కతా వెళ్లే రైళ్లలోనూ ఇదే రద్దీ ఉంది. గరీభ్‌రద్‌లోనూ ఇదే పరిస్థితి. ఏప్రిల్‌ 11న ఓటేసిన తర్వాత తిరిగి వెళ్లేవారికి రిజర్వేషన్‌ ఉంటే సరే. లేదంటే చుక్కలు తప్పవు. ఏప్రిల్‌ 11 నుంచి ఏప్రిల్‌ 14, 15 తేదీల వరకూ రైళ్లలో భారీగా వెయిటింగ్‌ లిస్ట్‌ కనిపిస్తోంది. అందుకే దక్షిణమధ్య రైల్వే రద్దీని దృష్టిని పెట్టుకుని అదనపు బోగీలు, లేదా ప్రత్యేక రైళ్లను వేయడంపై పోలింగ్‌ రోజుకు కొద్ది రోజుల ముందుగా నిర్ణయం తీసుకుంటామని విజయవాడ రైల్వేస్టేషన్‌ డైరెక్టర్‌ సీహెచ్‌ సురేశ్‌ చెప్పారు. సికింద్రాబాద్‌ నుంచి విజయవాడకు ప్రతిరోజూ 24 ఎక్స్‌ప్రెస్‌ రైళ్లు రాకపోకలు సాగిస్తుంటాయి.

హైదరాబాద్ నుంచి రోజుకి ఒకరిని దింపుతున్న జగన్, ఇప్పుడు తన సోదరిని కూడా దించారు. ఆమె వచ్చీ రావటంతోనే పవన్ టార్గెట్ గా, చంద్రబాబుని విమర్శలు చేస్తూ మొదలు పెట్టారు. ఏపీ సీఎం చంద్రబాబుకు ఈసారి ఓటు వేస్తే ఏపీ మరో 25 సంవత్సరాలు వెనక్కి వెళ్లిపోతుందని జగన్ సోదరి వైఎస్ షర్మిల హెచ్చరించారు. చంద్రబాబు తీరు రోజుకో మాట, పూటకో వేషంగా తయారయిందని విమర్శించారు. త్వరలో ఆంధ్రప్రదేశ్ లో జరగనున్న ఎన్నికల పోరాటంలో మంచిని గెలిపించాలని ఏపీ ప్రజలకు షర్మిల విజ్ఞప్తి చేశారు. ముఖ్యమంత్రి కుర్చీలో కూర్చున్న వ్యక్తికి మంచి మనసుంటేనే సామాన్యులకు మేలు జరుగుతుందని అభిప్రాయపడ్డారు. అమరావతిలోని వైసీపీ కార్యాలయంలో ఈరోజు నిర్వహించిన మీడియా సమావేశంలో షర్మిల మాట్లాడారు.

ఏపీ ప్రస్తుతం దుర్మార్గుల చేతిలో పడి అల్లాడుతోందని వ్యాఖ్యానించారు. వైసీపీ అధినేత జగన్ పై జనసేన పార్టీ చీఫ్ విమర్శలు చేయడంపై స్పందిస్తూ..’పవన్ కల్యాణ్ ఎవరు. యాక్టర్.. అవునా? ఒక యాక్టర్ ఏం చేయాలి? డైరెక్టర్ చెప్పింది చెప్పినట్లు చేయాలి. పవన్ రాజకీయ సినిమాలో పవన్ కల్యాణ్ యాక్టర్ అయితే చంద్రబాబు గారు డైరెక్టర్. కాబట్టి పవన్ కల్యాణ్ చంద్రబాబు చెప్పినట్లే చేస్తున్నారు’ అని ఘాటుగా వ్యాఖ్యానించారు. ఐటీ గ్రిడ్స్ కేసులో పవన్ కల్యాణ్ చంద్రబాబును ప్రశ్నించకపోవడమే ఇందుకు నిదర్శనమని విమర్శించారు. పవన్ నామినేషన్ వేయడానికి వెళితే అక్కడ పచ్చపార్టీ కేడర్ కనిపిస్తోందని ఎద్దేవా చేశారు.

పొత్తులేదు పొత్తులేదు అని చెప్పుకుంటూనే లోలోపల సీట్ల సర్దుబాటు చేసుకుంటున్నారని తెలిపారు. వైఎస్ వివేకా హత్యకేసులో తాము మూడో పక్షం విచారణ కోరుతుంటే పవన్ ఎందుకు మద్దతు తెలపడం లేదని ప్రశ్నించారు. పవన్ కల్యాణ్ జనసేనకు ఓటేస్తే చంద్రబాబుకు వేసినట్లేనని స్పష్టం చేశారు. తమ కుటుంబంలో ఎలాంటి గొడవలు లేవని తేల్చిచెప్పారు. తమ ఇంటిపెద్ద వివేకానందరెడ్డిని దారుణంగా చంపేశారని ఆవేదన వ్యక్తం చేశారు. ఎవరైనా కుటుంబంలో గొడవలు ఉంటే హత్యలు చేసుకుంటారా? అని ప్రశ్నించారు. తమ కుటుంబ సభ్యులను చంపి తమపైనే అభాండాలు వేస్తున్నారని ఆమె మండిపడ్డారు.

ఒకప్పటి టీడీపీ కంచుకోట గుడివాడలో పార్టీ మళ్లీ పూర్వవైభవం సంతరించుకుంటోంది. టీడీపీ నియోజకవర్గ అభ్యర్థిగా దేవినేని అవినాష్‌ ఎంపికతోనే కార్యకర్తల్లో జోష్‌ వచ్చింది. టికెట్‌ ఖరారు సమయంలో సీఎం చంద్రబాబు చేసిన దిశానిర్దేశంతో నియోజకవర్గ అగ్రనాయకులు రావి వెంకటేశ్వరరావు, పిన్నమనేని వెంకటేశ్వరరావు, యలవర్తి శ్రీనివాసరావు ఏకతాటిపైకి వచ్చి అవినాష్‌ గెలుపునకు సర్వశక్తులూ ఒడ్డుతున్నారు. కొంతకాలంగా స్తబ్దుగా ఉన్న టీడీపీ శ్రేణులు, అవినాష్‌ రాకతో కదం తొక్కుతున్నాయి. గుడివాడ చరిత్రలో గతంలో ఎన్నడూ లేని రీతిలో అవినాష్‌ నామినేషన్‌కు తరలివచ్చిన భారీ జనసందోహమే దీనికి నిదర్శనమని రాజకీయ పరిశీలకులు భావిస్తున్నారు. ఎన్నికల ప్రచారంలో దేవినేని అవినాష్‌కు యువత, మహిళలు, వృద్ధుల్లో లభిస్తున్న ఆదరణ వైసీపీ శ్రేణులకు గుబులు పుట్టిస్తోంది. గుడివాడ పట్టణం, గ్రామీణ ప్రాంతాలనే తేడా లేకుండా యువత అవినాష్‌తో సెల్ఫీలు దిగేందుకు ఉత్సాహం కనబరుస్తోంది. ప్రచారంలో భాగంగా అవినాష్‌ ఎక్కడికి వెళ్లినా మహిళలు హారతులతో స్వాగతం పలుకుతున్నారు. స్వతహాగా సౌమ్యుడు, వివాదరహితుడైన అవినాష్‌, వైరిపక్షం నుంచి వస్తున్న విమర్శలను పట్టించుకోకుండా, తన పని తాను చేసుకుపోతున్నారు.

ప్రచారపర్వంలో అందరిలో ఒక్కడిగా మమేకమవుతున్న అవినాష్‌ తీరు ఆకట్టుకుంటోంది. స్థానికుడు కాదనే ప్రత్యర్థుల ఆరోపణలను అవినాష్‌ బలంగా తిప్పికొడుతున్నారు. స్థానిక సత్యనారాయణపురంలో ఇల్లు తీసుకుని ఉంటున్న ఆయన, తన ఫోన్‌ నెంబరు, అడ్రస్‌ చెప్పి ఎవరికీ ఏ అవసరం వచ్చినా నేరుగా సంప్రదించవచ్చని కార్యకర్తలకు భరోసా ఇస్తున్నారు. కొడాలి నాని పేరుకు స్థానికుడే అయినా, ఎప్పుడూ హైదరాబాద్‌లోనే ఉంటూ ఫోన్‌లో కూడా అందుబాటులో ఉండరని టీడీపీ శ్రేణులు వైసీపీ విమర్శలను తిప్పి కొడుతున్నాయి. సమస్యల పరిష్కారానికి దీటుగా ప్రతిస్పందించే నాయకుడు రావడంతో టీడీపీ ద్వితీయ శ్రేణి నాయకులు, కార్యకర్తల్లో ఆత్మస్థైర్యం పెరిగింది. ప్రత్యర్థుల కన్నా ముందే ఏలూరు రోడ్డులో ఎన్నికల కార్యాలయాన్ని ప్రారంభించి, ఎన్నికలను ఎదుర్కొనే దిశగా కార్యకర్తలను సమరోన్ముఖుల్ని చేశారని అవినాష్‌ను సీనియర్‌ నాయకులు ప్రశంసిస్తున్నారు.

టీడీపీ ఆవిర్భావం తరువాత గుడివాడ నియోజకవర్గంలో ఏడు సార్లు విజయబావుట ఎగురువేసిన చరిత్రను పునరావృతం చేయాలనే కసి ప్రతి కార్యకర్తలోనూ కనిపిస్తోంది. టీడీపీ నుంచి రాజకీయ జీవితాన్ని ప్రారంభించిన కొడాలి నాని, పార్టీ ఫిరాయించడమే కాక తమ అధినేత చంద్రబాబును నోటికి వచ్చినట్లు మాట్లాడ టాన్ని కార్యకర్తలు తట్టుకోలేకపోతున్నారు. అందుకే నానీని ఈసారి ఎలాగైనా ఓడించి, గుడివాడను చంద్రబాబుకు బహుమతిగా ఇవ్వాలన్న కసిని కార్యకర్తలు కనబరుస్తున్నారు. ఎప్పుడూ గెలుపు తమదే అన్న ధీమాలో ఉండే కొడాలి నాని శిబిరంలో కళ తప్పింది. గ్రామాల్లో అవినాష్‌ ప్రచారంలో నెలకొంటున్న సందడితో పోలిస్తే వైసీపీ ప్రచారాలు వెలవెలబోతున్నాయి. ఆ పార్టీ నాయకుల్లో సైతం గెలుపుపై ఆత్మవిశ్వాసం సన్నగిల్లినట్లు కనిపిస్తోంది. టీడీపీలో బహునాయకత్వం కలసి పనిచేస్తుండటంతో వైసీపీలో ఆందోళన నెలకొంది. వైసీపీ మొత్తం ఒక్క నానీపైనే ఆధారపడి ఉండటంతో, పార్టీలో ఊపు తెచ్చే వారే లేకపోయారనే అభిప్రాయం పలువురిలో నెలకొంది.