news

ఒక వైపు ఢిల్లీ ఏపి భవన్ లో చంద్రబాబు దీక్ష చేసి, 22 పార్టీల మద్దతుతో, మోడీకి చుక్కలు చూపిస్తుంటే, పార్లమెంట్ లోపల కుర్ర ఎంపీ హీట్ పెంచుతున్నారు. కేంద్రం ఏపీకి తీరని ద్రోహం చేసిందని తెలుగుదేశం పార్టీ ఎంపీ రామ్మోహన్‌నాయుడు ఆరోపించారు. నాలుగున్నరేళ్లుగా కేంద్రం తీవ్ర జాప్యం చేసిందన్నారు. ఏపీ సమస్యలపై, నిన్న గుంటూరులో ప్రధాని మోదీ చేసిన విమర్శలను ఆయన పార్లమెంట్‌లో ప్రస్తావించారు. రైల్వేజోన్ హామీని కేంద్రం తుంగలో తొక్కిందన్నారు. ఇప్పటి వరకు కనీసం ఒక్క మీటింగ్ పెట్టలేదని ఆయన విమర్శించారు. ఏపీలో వెనుకబడిన జిల్లాల కోసం రూ. 350 కోట్లు అకౌంట్‌లో వేసి... ఆ తర్వాత రాజకీయ కక్షతో కేంద్రం వెనక్కి తీసుకుందని రామ్మోహన్‌ నాయుడు విమర్శించారు. ఇంతటి దారుణం ఎప్పడూ జరగలేదని అన్నారు. ముఖ్యమంత్రి చంద్రబాబు తనను విమర్శిస్తున్నారని మోదీ అనడం దారుణమని రామ్మోహన్‌నాయుడు అన్నారు. చంద్రబాబు ఎప్పుడూ వ్యక్తిగత విమర్శలు చేయలేదని, ఆయన ఎప్పుడూ ఏపీ కోసమే మాట్లాడారన్నారు. ఏపీకి చేయాల్సిన సాయం కేంద్రం చేసి ఉంటే.. తాము మాట్లాడాల్సి వచ్చేది కాదని ఆయన అన్నారు. ఇలా ధర్మపోరాట దీక్షల వరకు వచ్చేది కాదన్నారు.

'ఏపీకి తీరని ద్రోహం చేశారు. వెనుకబడిన జిల్లాలకు డబ్బులిచ్చి వెనక్కి తీసుకున్నారు. అమరావతిలో రాజధాని నిర్మాణానికి కేవలం రూ.1.500 కోట్లు ఇచ్చి చేతులు దులిపేసుకున్నారు. ఆ డబ్బులతో ఏ రాజధాని కట్టొచ్చో చెబితే మేం సంతోషిస్తాం. ఇదేం తీరు. ఇదేం పద్ధతి' అంటూ కేంద్ర ప్రభుత్వ తీరుపై టీడీపీ ఎంపి రామ్మోహన్ నాయుడు నిప్పులు చెరిగారు. ఏపీ కోసం చంద్రబాబు మాట్లాడితే, దానికి ప్రధాని మోదీ సమాధానం చెప్పకుండా వ్యక్తిగత విమర్శలు చేయడం దారణమని, అసలు చేయాల్సిన సాయం చేస్తే 'ధర్మపోరాటం' వరకూ ఎందుకు వెళ్తాం? అని ఆయన కేంద్రాన్ని నిలదీశారు. ఏపీకి జరుగుతున్న అన్యాయంపై లోక్‌సభలో రామ్మోహన్‌నాయుడు మాట్లాడుతూ, రాజకీయ కక్షతోనే ఇచ్చిన డబ్బులు కూడా వెనక్కి తీసుకున్న ఘనత మోదీ సర్కార్‌కే దక్కుతుందంటూ నిప్పులు చెరిగారు.

'నాలుగున్నరేళ్లుగా ఆంధ్రప్రదేశ్‌కు తీరని అన్యాయం చేస్తూనే ఉన్నారు. రైల్వే జోన్ ఇస్తామన్నారు. ఆ ఊసే లేదు. దీనికోసం కనీసం ఒక్క మీటింగ్ కూడా పెట్టలేదు. వెనుకబడిన జిల్లాలకు రూ.350 కోట్లు అకౌంట్లో వేసి...ఆ తర్వాత వెనక్కి తీసేసుకున్నారు. ఇంతకంటే దారణం ఏమైనా ఉంటుందా?' అని రామ్మోహన్ నాయుడు ఆవేదన వ్యక్తం చేశారు. అమరావతిలో రాజధాని కోసం కేంద్రం కేవలం రూ.1,500 కోట్లు ఇచ్చి చేతులెత్తేసింది. ఆ డబ్బులతో ఎలాంటి రాజధాని కట్టాలి? పటేల్ విగ్రహానికి వేల కోట్లు ఇచ్చి, అమరావతిని పట్టించుకోరా?. మా చంద్రబాబు మీద ఉన్న నమ్మకంతోనే రైతులు 35వేల ఎకరాలు రాజధాని కోసం స్వచ్ఛందంగా ఇచ్చారు. అది మా నాయకుడి స్థాయి...అని రామ్మోహన్ నాయుడు అన్నారు. ఏపీకి కేంద్రం సహకరించకపోయినా, సాయం చేయకపోయినా చంద్రబాబు రాష్ట్రం కోసం అహరహం శ్రమిస్తున్నారని, రాష్ట్రానికి జరిగిన అన్యాయం గురించి చంద్రబాబు మాట్లాడుతూంటే ఆయనపై మోదీ వ్యక్తిగత విమర్శలు గుప్పించడంలో అర్ధం ఏమిటని నిలదీశారు. ఏపీకి జరిగిన అన్యాయంపైనే చంద్రబాబు ధర్మపోరాట దీక్షకు దిగారని అన్నారు. 'మా ఆవేదన చెబుతాం. మాకు జరిగిన అన్యాయంపై నిలదీస్తూనే ఉంటా' అని ఆయన కుండబద్ధలు కొట్టారు.

ఢిల్లీ ఆంధ్రా భవన్‌లో ధర్మపోరాట దీక్ష చేస్తున్న చంద్రబాబు, కేంద్రాల పెత్తనాల పై తిరగబడ్డారు. అన్ని రాష్ట్రాలని నియంత్రిస్తున్న కేంద్రానికి సూటి ప్రశ్న వేసారు. కేంద్రం పదే పదే లెక్కలు చెప్పాలి అనటం పై స్పందించారు. "మేము మీకు లెక్కలు చెప్పాలా...చెప్తాం... మీ లెక్కలు, మా లెక్కలు కాగ్ చూసుకుంటుంది, వాళ్లకి చెప్తాం. కాని ముందు మా రాష్ట్రం నుంచి, కేంద్రానికి కట్టిన పన్నులు లెక్కలు మాకు చెప్పండి" అంటూ చంద్రబాబు అదిరిపోయే పాయింట్ లేవనెత్తారు. కేంద్రం మీకు అన్ని ఇచ్చాం, అన్ని ఇచ్చాం అంటూ ఎదో భిక్ష వేసినట్టు చెప్తారు. కాని, అది రాష్ట్రాల నుంచి వచ్చిన పన్నుల డబ్బులు. మన డబ్బులు మనకే ఇస్తూ, కేంద్రం బిల్డ్ అప్ ఇస్తూ ఉంటుంది. మొదటి సారి చంద్రబాబు, ఈ పోకడలకు విసుగెత్తి, రాష్ట్రాలు ఇస్తున్న పన్నుల గురించి రాష్ట్రాలకు లెక్కలు చెప్పండి అంటూ, ఢిల్లీ అహంకారుల పై కొత్త అస్త్రం వదిలారు. మిగిలిన అన్ని రాష్ట్రాలు ఇలాగే అడిగితే, ఢిల్లీ మదం అప్పుడు దిగుతుంది.

చంద్రబాబు మాట్లాడుతూ, ఏపీకి జరిగిన అన్యాయం కోసమే తాము పోరాడుతున్నామని, కేంద్రం భిక్ష కోసం కాదని చెప్పారు. ‘‘మూడు రోజుల సమయం ఇస్తున్నా. పార్లమెంట్‌ వేదికగా ఏపీ ప్రజలకు క్షమాపణ చెప్పాలి. లేకుంటే ఏపీ ప్రజలు మిమ్మల్ని క్షమించరు’’ అంటూ ఆగ్రహం వ్యక్తంచేశారు. ప్రత్యేక హోదా, విభజన హామీల కోసం ముఖ్యమంత్రి చంద్రబాబు సోమవారం ఏపీ భవన్‌ వేదికగా ధర్మపోరాట దీక్ష చేపట్టారు. ఈ సందర్భంగా మాట్లాడుతూ.. ‘‘ఒక రాష్ట్రం పట్ల వివక్ష చూపినప్పుడు న్యాయం కోసం పోరాడిల్సిందే. పరిపాలించే వ్యక్తులు ధర్మాన్ని పాటించనప్పుడు మనం పోరాడిల్సిందే. పార్లమెంట్‌ సాక్షిగా ఏపీకిచ్చిన హామీలు పరిష్కరించలేదు. దీనిపై నిలదీయాల్సిన బాధ్యత అందరిపైనా ఉంది. విభజన సమయంలో ఇచ్చిన ఏ ఒక్క హామీ నెరవేర్చలేదు. విభజనతో నష్టపోయిన ఏపీకి ప్రత్యేక హోదా ఇవ్వాలని ఆనాడు భాజపా నేతలే చెప్పారు. వెంకయ్యనాయుడు ప్రత్యేక హోదా పదేళ్లు కావాలని అడిగారు. అలాంటిది ఇంతవరకు ఏ ఒక్క హామీని నెరవేర్చకుండా ఏపీకి అన్యాయం చేశారు. ఇచ్చిన నిధులు కూడా వెనక్కి తీసుకున్నారు. పోలవరం డీపీఆర్‌ను ఆమోదించలేదు. విశాఖ రైల్వేజోన్‌, కడప ఉక్కు పరిశ్రమపై అతీగతీ లేదు. రెవెన్యూ లోటు తీర్చలేదు. రాజధాని నిర్మాణానికి నిధులు ఇవ్వలేదు.’’

‘‘ఏపీకి జరుగుతున్న అన్యాయాన్ని నిలదీసేందుకే ఇక్కడ దీక్షకు కూర్చున్నా. కేంద్రం అన్యాయం చేసినందుకే పోరాటం చేస్తున్నాం. పార్లమెంట్‌లో తెలుగుదేశం పార్టీ ఎంపీలు పోరాటం చేస్తున్నారు. హక్కుల కోసం మేం పోరాడుతున్నాం. మీ భిక్ష కోసం పోరాడడం లేదు. మీ ఆటలు సాగవని చెప్పేందుకే ఇక్కడికి వచ్చా. ఐదు కోట్ల ప్రజల కోసం.. భావితరాల భవిష్యత్తు కోసం.. ఐదు కోట్ల ఆంధ్రుల ఆత్మగౌరవం కోసం పోరాడుతున్నాం. ఆంధ్రభవన్‌ సాక్షిగా ఎన్నో ఉద్యమాలు చేశాం. అవన్నీ కూడా విజయవంతమయ్యాయి. ఆత్మగౌరవాన్ని దెబ్బతీస్తే తగిన గుణపాఠం చెప్తాం. అద్దె జనాలను పెట్టుకుని రాష్ట్రంపై ప్రధాని మోదీ దాడి చేశారు. కేంద్రం దయాదాక్షిణ్యాలు మాకు అవసరం లేదు. లెక్కలు చెప్పడానికి మేం సిద్ధం. మేం కట్టిన పన్నులకు మీరు లెక్కలు చెప్తారా? ఇప్పటికైనా మూడు రోజుల సమయం ఉంది. చేసింది తప్పని పార్లమెంట్‌లో ఒప్పుకుంటే ఏపీ ప్రజలు క్షమిస్తారు. లేకుంటే శాశ్వతంగా ఈ భాజపాను, నరేంద్రమోదీని రాష్ట్ర ప్రజలు బహిష్కరిస్తారు. ఏపీ చరిత్రలో మీ పార్టీ అడ్రస్‌ పూర్తిగా గల్లంతు అవుతుంది’’ అని చంద్రబాబు హెచ్చరించారు.

ముఖ్యమంత్రి చంద్రబాబు చేపట్టిన ధర్మపోరాట దీక్షకు కాంగ్రెస్ పార్టీ అధ్యక్షుడు రాహుల్ గాంధీ సంఘీభావం తెలిపారు. సోమవారం దీక్షా స్థలికి చేరుకున్న ఆయన ముందుగా ఎన్టీఆర్ చిత్రపటానికి పూలమాల వేసి నివాళులర్పించారు. అనంతరం చంద్రబాబును కలిసి దీక్షకు మద్దుతు తెలిపారు. ఇక్కడ ఉన్న మీకు ఒక ప్రశ్న, ఓ రాష్ట్ర ప్రజలకు ఇచ్చిన మాట నిలబెట్టుకోలేని ప్రధానమంత్రి ఎక్కడైనా ఉంటారా అంటూ ప్రసంగం మొదలు పెట్టారు. ప్రధాని స్థాయిలో ఉన్న వ్యక్తి ఇచ్చిన మాటకు కట్టుబడాలని ఏఐసీసీ అధ్యక్షుడు రాహుల్‌ గాంధీ అన్నారు. ఈ ప్రధాని మాత్రం చెప్పేవన్నీ అబద్ధాలేనని దుయ్యబట్టారు. ఏపీ ప్రజలకిచ్చిన హామీలను ఆయన విస్మరించారన్నారు. ఏపీ ఈ దేశంలో భాగం కాదా? అని ప్రశ్నించారు.

ఆంధ్రప్రదేశ్‌ ప్రజలకు ఇచ్చిన మాటను ప్రధాని పెడచెవిన పెట్టారని దుయ్యబట్టారు. ప్రధాని ఎక్కడికి వెళితే అక్కడి పాట పాడతారని ధ్వజమెత్తారు. ఏపీకి వెళ్తే హోదా ఇవ్వకుండా అబద్ధాలు చెబుతారని విమర్శించారు. ప్రధాని మోదీకి విశ్వసనీయత లేదని, ఆయన చెప్పేవన్నీ అబద్ధాలేనని ఆరోపించారు. ఏపీ ప్రజల సొమ్మును దోచి అంబానీకి కట్టబెట్టారన్నారు. ఏపీ ప్రజలకు అండగా ఉంటామని మరోసారి హామీ ఇచ్చారు. మాట ఇచ్చి నిలుపుకోలేని ఘనత వహించిన ప్రధాని దేశానికి అవసరమా? అని ప్రశ్నించారు. ఈ ప్రధాని ఏపీ ప్రజలకు ఇచ్చిన హామీలను నెరవేర్చలేదని గుర్తు చేస్తూ, ఆంధ్రప్రదేశ్ ఇండియాలో భాగం కాదా? అని ప్రశ్నించారు. కాంగ్రెస్ పార్టీ అధికారంలోకి రాగానే రాష్ట్రానికి జరగాల్సిన న్యాయం నిమిషాల్లో జరుగుతుందని హామీ ఇచ్చారు.

మరో పక్క, చంద్రబాబు చేపట్టిన ధర్మపోరాట దీక్షకు జమ్ముకశ్మీర్‌ మాజీ ముఖ్యమంత్రి ఫరూక్‌ అబ్దుల్లా మద్దతు తెలిపారు. ఈ సందర్భంగా ఆయన మాట్లాడుతూ.. పార్లమెంట్‌ సాక్షిగా ఇచ్చిన హామీలను నెరవేర్చాల్సిన బాధ్యత కేంద్రానిదేనని ఉద్ఘాటించారు. ధర్మం తప్పినప్పుడే ప్రజల్లో ఆందోళన మొదలవుతుందని, అందుకే ఆంధ్రా ప్రజలు ఇక్కడికి వరకు వచ్చారన్నారు. ఓట్ల కోసం ప్రజలను కులాలు, మతాలను విభజించి పాలించాలని చూస్తున్నారని కేంద్రంపై విమర్శలు గుప్పించారు. దేశం సురక్షితంగా ఉండాలంటే ఈ ప్రభుత్వం పోవాలన్నారు. వ్యక్తిగత దూషణల స్థాయికి ప్రధాని దిగజారకూడదని హితవు పలికారు. ప్రధాని అన్న వ్యక్తి ప్రజలకు ఇచ్చిన హామీలను అమలు చేయాలని డిమాండ్‌ చేశారు. ఏపీకి కేంద్రం చేసిన అన్యాయానికి నిరసనగా ఈరోజు రాత్రి 8 గంటల వరకు చంద్రబాబు దీక్ష చేయనున్నారు. దీక్షకు పలు జాతీయ పార్టీలు మద్దతు తెలుపనున్నాయి.