news

తిరుమలలో బాలుడి అపహరణ కేసు సుఖాంతమైంది. ఈ కేసులో నిందితుడిని తిరుపతి అర్బన్‌ పోలీసులు మీడియా ముందు ప్రవేశపెట్టారు. బాలుడిని క్షేమంగా తల్లిదండ్రులకు అప్పగించారు. ఈ కేసుకు సంబంధించిన వివరాలను ఎస్పీ అన్బురాజన్‌ మీడియాకు వెల్లడించారు. ‘కిడ్నాపర్‌ విశ్వంభర్‌ నిజామాబాద్‌ వాసి.. కూలీ పని చేస్తున్నాడు. గతంలో చిన్న చిన్న దొంగతనాలు చేసేవాడు. బాలుడిని పెంచుకోవాలన్న ఉద్దేశంతోనే అతను కిడ్నాప్‌ చేశాడు. డిసెంబర్‌ 22న తిరుమల వచ్చి చిన్నారులను కిడ్నాప్‌ చేయాలనే ఉద్దేశంతో తిరిగాడు. నిందితుడిపై అనుమానం వచ్చి 26న విజిలెన్స్‌ సిబ్బంది విచారించారు. అయితే ఈ విచారణలో నిందితుడు తప్పుడు సమాచారం ఇచ్చాడు’ అని ఎస్పీ తెలిపారు.

నిందితున్ని పట్టుకునేందుకు 6 ప్రత్యేకబృందాలు ఏర్పాటు చేశామని.. తితిదే, విజిలెన్స్‌, రైల్వే పోలీసులు సమష్టిగా కృషి చేశారని కొనియాడారు. డిసెంబర్‌ 28న ఉదయం తిరుమలలో 16 నెలల బాలుడు వీరేశ్‌ను విశ్వంభర్‌ కిడ్నాప్‌ చేశాడు. అనంతరం బాలునితో మహారాష్ట్రలోని మాహూరుకు నిందితుడు వెళ్లాడు. సీసీ కెమెరా దృశ్యాల ఆధారంగా నిందితుడు వెళ్లిన మార్గాన్ని పోలీసులు గుర్తించారు. బాలుని ఆచూకీ కనుగొనడంలో తిరుపతి అర్బన్‌ పోలీసులు, మహారాష్ట్ర పోలీసులు సమష్టిగా కృషి చేశారని ఎస్పీ తెలిపారు. అక్కడి స్థానికులు గుర్తుపట్టి సమాచారం ఇవ్వడంతో మాహూరు పోలీసులు నిందితుడిని అదుపులోకి తీసుకున్నారని చెప్పారు. మీడియాలో విస్తృత ప్రచారంతో ఆచూకీ త్వరగా లభించిందన్నారు. ఈ ఘటనతో తిరుమలలో భద్రతను మరింత కట్టుదిట్టం చేసినట్లు చెప్పారు. చిన్నారులతో వచ్చే తల్లిదండ్రులకు ఇకపై చైల్డ్‌ ట్యాగింగ్‌ వేస్తామని తెలిపారు.

బాలుడు అదృశ్యమైన నాటి నుంచి పోలీసులు ఆచూకీ కోసం ప్రత్యేక బృందాలుగా విడిపోయి గాలించారు. నిందితుడిని గుర్తించి, అతని ఫోటో తీసి, ప్రచారం చెయ్యటంలో తిరుపతి పోలీసులు సక్సెస్ అయ్యారు. ఈ ఘటనపై పత్రికలు, ప్రసార మాధ్యమాలు, సామాజిక మాధ్యమాల వేదికగా కూడా పెద్దఎత్తున ప్రచారం లభించింది. ఈ నేపథ్యంలో సామాజిక మాధ్యమాల ద్వారా బాలుడిని, నిందితుడిని ఆదివారం ఉదయం మహారాష్ట్ర పోలీసులు గుర్తించారు. నిందితుడిని అదుపులోకి తీసుకుని ఇక్కడి పోలీసులకు సమాచారం ఇచ్చారు. దీంతో నిందితుడిని, బాలుడిని తిరుపతి పోలీసులు మహారాష్ట్ర వెళ్లి, తిరుపతి తీసుకువచ్చారు. రెండు రోజుల్లోనే కేసును చేదించటంతో అందరూ ఊపిరి పీల్చుకున్నారు.

ఏపీ సీఎం చంద్రబాబు నాయుడు కేంద్ర ప్రభుత్వానికి లేఖ రాశారు. నవంబర్ 29న పాకిస్తాన్‌లో బందీలైన శ్రీకాకుళం జిల్లాకు చెందిన మత్స్యకారులను విడిపించాలని రాజ్‌నాథ్‌, సుష్మాస్వరాజ్‌కు చంద్రబాబు లేఖలు రాశారు. పొట్టకూటి కోసం గుజరాత్ వెళ్లి పాకిస్తాన్ చెరలో చిక్కుకున్నారని మత్స్యకారులను విడిపించాలని చంద్రబాబు లేఖలో కోరారు. 22 మంది మత్స్యకారులకు చెందిన 11 కుటుంబాలకు ప్రభుత్వ సాయం చేస్తుందని ఈ సందర్భంగా బాబు స్పష్టం చేశారు. సీఎం క్యాంప్‌ ఆఫీస్‌లో నవ్యాంధ్ర హైకోర్టు ఏర్పాటు చేయడం జరిగింది. తాత్కాలిక హైకోర్టును ప్రారంభించిన అనంతరం కార్యక్రమంలో చంద్రబాబు మాట్లాడుతూ పై వ్యాఖ్యలు చేశారు.

పాకిస్తాన్‌ నేవీ అదుపులో ఉన్న 24 మంది మత్స్యకారుల కుటుంబాలకు ఆర్థిక సాయం చేయాలని సీఎం చంద్రబాబు నాయుడు ఆదేశాలు జారీ చేశారు. మంత్రి కళా వెంకట్రావు విజ్ఞప్తితో కుటుంబానికి రూ. 2 లక్షలు ఇవ్వాలని నిర్ణయించారు. జాలర్లను విడిపించేందుకు చర్యలు చేపట్టాలని చంద్రబాబు ఆదేశించారు. పట్టుబడిన జాలర్లది శ్రీకాకుళం, విజయనగరం, తూ.గో జిల్లాల వారు. గుజరాత్ వద్ద సరిహద్దు దాటారని ఆరోపిస్తూ చేపట వేటకు వెళ్లిన 24 మంది ఏపీ జాలర్లను పాకిస్థాన్ కోస్ట్ గార్డు అధికారులు గత నెలలో అదుపులోకి తీసుకున్నారు. పాకిస్థాన్ నిర్బంధంలో ఉన్న శ్రీకాకుళం మత్స్యకారులపై భారత ఎంబసీ స్పందించింది.

ఏపీ ప్రభుత్వ ఫిర్యాదుపై ఇస్లామాబాద్‌లోని భారత హైకమిషన్ స్వీకరించింది. ఏపీ ప్రభుత్వ ఆందోళనను భారత హైకమిషన్.. పాకిస్థాన్ విదేశాంగ శాఖ దృష్టికి తీసుకెళ్లింది. నిర్బంధించిన మత్స్యకారులను కరాచీ పంపినట్లు తెలుస్తోంది. పాకిస్థాన్ విదేశాంగ అధికారులతో భారత ఎంబసీ అధికారి గౌరవ్ అహ్లువాలియా సంప్రదింపులు జరుపుతున్నారు. ఏపీ ప్రభుత్వానికి పూర్తి తోడ్పాటు ఇస్తామని భారత ఎంబసీ అధికారుల హామీ ఇచ్చారు. ఈ మేరకు ఢిల్లీలోని ఏపీ భవన్‌కు కమిషనర్ అర్జా శ్రీకాంత్‌కు సమాచారం అందించారు. ఢిల్లీలో ఏపీ భవన్ అధికారులకు ముఖ్యమంత్రి చంద్రబాబు ఫోన్ చేసి వివరాలు తెలుసుకున్నారు. పాకిస్థాన్ నిర్బంధంలో ఉన్న మత్స్యకారుల యోగక్షేమాలపై ఆరా తీశారు. మత్స్యకారులంతా సురక్షితంగా రాష్ట్రానికి వచ్చేలా చూడాలని సూచించారు.

నూతన సంవత్సరం తొలి రోజు సీఎం రిలీఫ్ ఫండ్ ఫైలు పై ఆంధ్రప్రదేశ్ ముఖ్యమంత్రి నారా చంద్రబాబు నాయుడు తొలి సంతకం చేసారు. వైద్య చికిత్సల సాయం కోసం వచ్చిన రీఇంబర్స్‌మెంట్ దరఖాస్తులు 7,386. రీఇంబర్స్‌మెంట్ ఇస్తున్న కేసుల సంఖ్య 6,207. ముఖ్యమంత్రి సహాయనిధి నుంచి విడుదల చేసిన రీ ఇంబర్స్‌మెంట్ సొమ్ము మొత్తం రూ.34,50,59,383. ఎల్ ఓ సీలకు వచ్చిన దరఖాస్తులు 1179, విడుదల చేసిన సొమ్ము మొత్తం రూ. 19, 13, 41,055. రీఇంబర్స్ మెంట్, ఎల్.ఓ.సీలు కలపి విడుదల చేసిన సొమ్ము మొత్తం 53,64,00,438. 2014 నుంచి నేటిదాకా సీఎం ఆర్ ఎఫ్ నుంచి విడుదల చేసిన సొమ్ము మొత్తం రూ.1249.56 కోట్లు.

మరో వైపు, ఆంధ్రప్రదేశ్‌ హైకోర్టు కొలువుదీరింది. హైకోర్టు తొలి తాత్కాలిక ప్రధాన న్యాయమూర్తిగా జస్టిస్‌ సి.ప్రవీణ్‌కుమార్‌ బాధ్యతలు స్వీకరించారు. విజయవాడలో గవర్నర్‌ నరసింహన్‌ ఆయనతో ప్రమాణస్వీకారం చేయించారు. ఈ కార్యక్రమానికి ముఖ్యమంత్రి చంద్రబాబునాయుడు, సుప్రీంకోర్టు న్యాయమూర్తి జస్టిస్‌ ఎన్వీరమణ హాజరయ్యారు. ప్రధాన న్యాయమూర్తితోపాటు మిగిలిన న్యాయమూర్తులతో గవర్నర్‌ ప్రమాణస్వీకారం చేయించారు. దీంతో ఆంధ్రప్రదేశ్‌ రాష్ట్ర ఉన్నత న్యాయస్థానం పూర్తి స్థాయిలో కార్యకలాపాలకు శ్రీకారం చుట్టినట్లయింది.

ఏపీ విభజన నేపథ్యంలో 62ఏళ్ల తర్వాత సోమవారం అమరావతికి హైకోర్టు తరలివెళ్లింది. దీంతో రాష్ట్రంలో చారిత్రక ఘటం ఆవిష్కృతమైంది. 2018 డిసెంబరు 26న ఉమ్మడిహైకోర్టు విభజన నోటిఫికేషన్‌ వెలువడింది. దీంతో నేటి నుంచి అమరావతి కేంద్రంగా ఏపీ రాష్ట్ర హైకోర్టు విధులు ప్రారంభమయ్యాయి. ఉమ్మడిహైకోర్టులో 3.4లక్షల వ్యాజ్యాలు ఉండగా.. అందులో 70శాతం వరకు కేసులు ఏపీకి చెందినవే. ఏపీ హైకోర్టుకు మంజూరైన న్యాయమూర్తుల పోస్టులు 37 కాగా... ప్రస్తుతం ఉన్న వారు 14 మంది.