గత నాలుగు సంవత్సరాలలో జరిగిన అభివృద్ధి ఒక ఎత్తు అని, ఇక ముందు జరిగే పనులను సవాల్‌గా తీసుకోవాలని ఫలితాలను రాబట్టాలని ముఖ్య మంత్రి నారా చంద్రబాబునాయుడు అన్నారు. జరగబోయేది మలిదశ అభివృద్ధి అనే విషయం గుర్తుంచుకోవాలన్నారు. మొత్తం పది కార్యక్రమాల పై ప్రత్యేక దృష్టి సారించాలంటూ పిలుపునిచ్చారు. బుధవారం ఆయన వెలగ పూడి సచివాలయంలో వివిధ విభాగాల అధిపతులు, కార్యదర్శులతో ఉన్నత స్థాయి సమావేశం నిర్వహించారు. వివిధ అంశాలపై దిశానిర్దేశం చేశారు. ఈ సందర్భంగా ముఖ్యమంత్రి మాట్లాడుతూ నూరు శాతం సంతృప్తిని సాధించే దిశగా పనిచేయాలన్నారు. ఎక్కడికక్కడ సమ స్యలుంటే పరిష్కరించుకొని ముందుకు సాగు తున్నామని, వృద్ధిరేటులో ఆంధ్రప్రదేశ్‌ స్థిరంగా కొనసాగుతున్నదని అన్నారు.
ఇండియాలో ఏదైనా ఒక రాష్ట్ర బృందం పటిష్టంగా, పకడ్భందీగా కష్టపడి పనిచేస్తుందంటే అది ఆంధ్రప్రదేశ్‌ మాత్రమేనని చెప్పారు. లక్ష్యాల సాధనలో ముందుండాలని, కేంద్రం పూర్తిగా రాష్ట్రానికి సహకరించడం లేదని, ప్రత్యేక హోదా ఇవ్వడం లేదని, అది ఇచ్చివుంటే వేగంగా అభివృద్ధి జరిగి వుండేదని అన్నారు. అప్పుడు ఇచ్చిన మాట ప్రకారం ప్రత్యేక హోదా ఇవ్వాల్సిన బాధ్యత ప్రధానమంత్రి పై ఉందన్నారు. హోదాపై తొలుత పదేళ్ళు అన్నారని, తర్వాత మాటతప్పారని , పరిశ్రమలు రావా లంటే ప్రత్యేక హోదా కావాల్సిందేనని స్ప ష్టం చేశారు. హోదా అనేది రాజకీయ నిర్ణయమని, మనది ప్రజాస్వామ్య పాలన అని రాజకీయ నిర్ణయం తీసుకున్నాక అమలు చేయాల్సిందేనని తెలిపారు. ఆంధ్రప్రదేశ్‌కు అన్యాయం జరిగిందంటే అన్ని పార్టీలు మద్దతుగా నిలిచాయని గుర్తుచేశారు. విభజన చట్టాన్ని అమలు చేయాలని, ఇదే వేగంతో మరో ఏడు సంవ త్సరాలు కష్టపడితే దక్షిణ భారతదేశంలో ఆదాయంలో వృద్ధి చెందుతామని, దేశంలోనే నెంబర్‌వన్‌గా నిలుస్తామని ముఖ్యమంత్రి చంద్ర బాబునాయుడు పేర్కొన్నారు.
గత ఏడాది వర్షపాతం తక్కువైనా అభివృద్ధి తగ్గలేదని, వరుసగా సుస్థిర అభివృద్ధిని సాధిస్తున్నామని చెప్పారు. జలవనరుల పై కూడా ఎక్కువగా దృష్టి పెట్టామని తెలియజేశారు. గతంలో మౌలిక సదుపాయాలు లేవని, రాయలసీమలో నీళ్ళు లేవని, ఆంధ్రలో తుఫానులు వచ్చేవని, ఏడాదిలో విశాఖను సాధారణ స్థితికి తీసుకొచ్చామని పేర్కొన్నారు. ప్రస్తుతం శ్రీశైలం రిజర్వాయర్‌ నిండుతోందని, పట్టిసీమ వల్ల రాయలసీమకు పూర్తిస్థాయిలో నీరు ఇవ్వడం సాధ్యమవుతున్నదని, పంటలు వేయడం, సీజన్‌ మిస్సయితే ఆదుకోవడంపై రైతులకు దిశానిర్దేశం చేస్తున్నట్టు చెప్పారు. టెక్నాలజీని తెచ్చామని, పంట కుంటలు, రెయిన్‌ గనులు వినియోగించామని, వర్షపునీటిని భూగర్భజలంగా మార్చుకుంటున్నామని, భూగర్భజలాల మట్టం పెరిగిందని, ప్రణాళిక ప్రకారం వెళితే ముందుగా కోటి ఎకరాల్లో ఉధ్యాన పంటలకు నీరందించడం వీలవుతుందని, తర్వాత మరో కోటి ఎకరాల వ్యవసాయయోగ్య భూమికి నీరందిస్తామని ముఖ్యమంత్రి చంద్రబాబు నాయుడు అన్నారు.
