news

నర్సాపురం ఎంపీ రఘురామకృష్ణం రాజు, జగన్ మోహన్ రెడ్డికి కంటి మీద కునుకు లేకుండా చేస్తున్నారు. రెండేళ్లుగా జగన్ మోహన్ రెడ్డి ప్రభుత్వం పై అనేక ఆరోపణలు చేస్తూ, తనదైన శైలిలో ప్రజల్లోకి వెళ్తున్నారు. రఘురామకృష్ణం రాజు వైఎస్ఆర్ కాంగ్రెస్ పార్టీ నుంచి గెలవటంతో, ఆయనకు ముందుగా షోకాజ్ నోటీసులు పంపించారు. షోకాజ్ నోటీసులు పంపించింది విజయసాయి రెడ్డి. దీని పై రఘురామరాజు అభ్యంతరం చెప్పారు. తనకు బీఫాం ఇచ్చింది యువజన శ్రామిక రైతు కాంగ్రెస్ పార్టీ నుంచి అయితే, వైఎస్ఆర్ కాంగ్రెస్ పార్టీ నుంచి ఎలా షోకాజ్ నోటీసు పంపిస్తారని ప్రశ్నించారు. అంతే కాదు, నిబంధనలు ప్రకారం, పార్టీ క్రమశిక్షణ సంఘం నోటీసులు ఇవ్వాలని, అయితే విజయసాయి రెడ్డి ఏ అర్హతతో ఇచ్చారని, విజయసాయి రెడ్డి ఇచ్చిన నోటీస్ చెల్లేదని అన్నారు. దీంతో ఈ మొదటి ఐడియా ఫ్లాప్ అయ్యింది. అయినా రఘురామరాజు ఆగలేదు. ప్రభుత్వం చేస్తున్న ప్రజా వ్యతిరేక పనుల పై మీడియాలో చెప్తూనే ఉన్నారు. తరువాత ఇక లాభం లేదు అనుకున్నారో ఏమో, నేరుగా రంగంలోకి దిగారు. విజయవాడ నుంచి స్పెషల్ ఫ్లైట్ వేసుకుని మరీ, విజయసాయి రెడ్డి సారధ్యంలో ఢిల్లీ వెళ్ళారు. ఢిల్లీలో స్పీకర్ ని కలిసి, రఘురామకృష్ణం రాజు పై అనర్హత వేటు వేయాలని కోరారు.

అయితే దీని పై రఘురామరాజు వివరణ ఇస్తూ, తాను ఎక్కడా పార్టీ పైన కానీ, పార్టీ అధినేత పైన కానీ పార్టీ వ్యతిరేక కార్యక్రమాలకు పాల్పడలేదని అన్నారు. ప్రభుత్వంలో ఉన్న తప్పులను మాత్రమే ఎత్తి చూపానని అన్నారు. ఇది రాజ్యాంగం ప్రకారం తనకు ఇచ్చిన హక్కు ని అన్నారు. దీంతో ఈ ఐడియాకు బెడిసికొట్టినట్టే ఉంది. ఏడాది తరువాత కూడా, మేము ఇచ్చిన అనర్హత పిటీషన్ ఏమైంది అంటూ విజయసాయి రెడ్డి లేఖ కూడా రాసారు. ఇక మొన్న లక్ష ఉత్తరాలు రాయాలని, నిర్ణయం తీసుకున్నారని, సాక్షి ఆఫీస్ లో ఉత్తరాలు ప్రింట్ చేస్తున్నారని రఘురామరాజు లీక్ చేయటంతో, ఇదీ ఫ్లాప్ అయ్యింది. ఇప్పుడు మరో సారి, చివరి ప్రయత్నంగా మరో ఎత్తు వేసినట్టు ఉన్నారు. నర్సాపురం నియోజకవర్గానికి చెందిన ఎస్సీలు, ఎస్టీల పేరిట, చలో ఢిల్లీ కార్యక్రమం నిర్వహిస్తున్నామని, ఎస్సీలకు, ఎస్టీలకు రఘురామరాజు మోసం చేసారు కాబట్టి, అనర్హత వేటు వేయాలని కోరటానికి, చలో ఢిల్లీ కార్యక్రమం చేపట్టాం అంటూ, ఒక ప్రకటన విడుదల అయ్యింది. అయితే దీని వెనుక వైసీపీ ఉందని, రఘురామరాజు అనుచరులు చెప్తున్నారు. మరి ఈ ప్రయత్నం అయినా ఫలిస్తుందో లేదో చూడాలి.

కృష్ణా నది మీద ఉన్న ప్రాజెక్టుల పై, తెలంగాణా ప్రభుత్వం విద్యుత్ ఉత్పత్తి చేస్తూ ఉండటం, తద్వారా ఆంధ్రప్రదేశ్ రైతులకు అన్యాయం జరుగుతూ ఉండటంతో, తక్షణమే తెలంగాణా ప్రభుత్వం విద్యుత్ ఉత్పత్తి నిలిపివేయాలని, తెలంగాణా ప్రభుత్వానికి దీని పై వెంటనే ఆదేశాలు ఇవ్వాలని చెప్పి, ఆంధ్రప్రదేశ్ రైతులు నిన్న తెలంగాణా హైకోర్టులో అత్యవసరంగా వాదించాలి అంటూ, హౌస్ మోషన్ పిటీషన్ దాఖలు చేసారు. అయితే ఈ పిటీషన్ సాంకేతిక కారణాలతో, తిరస్కరణకు గురయ్యింది. హౌస్ మోషన్ పిటీషన్ గా దాఖలు చేయాలని రైతులు పిటీషన్ మూవ్ చేయగా, సాంకేతిక కారణాలు ఉండటంతో, ఆ పిటీషన్ తిరస్కరించి, అందులో తిరస్కరణకు గురైన అంశాలు చూపించారు. దీంతో ఈ రోజు పిటీషన్ ను సవరించి, మళ్ళీ దాఖలు చేయనున్నారు. ఇందులో ప్రధానంగా తెలంగాణా ప్రభుత్వం జారీ చేసిన జీవో నెంబర్ 34, ఏపి పునర్విభజన చట్టానికి విరుద్ధంగా ఉందని చెప్పి, రైతులు పేర్కొన్నారు. ముఖ్యంగా సాగు నీటి కోసం ఆంధ్రప్రదేశ్ లో ఉన్న కృష్ణా డెల్టాతో పాటుగా, నాగార్జున సాగర్ ఆయుకట్టు కింద ఉన్న రైతులు నీటి కోసం ఎదురు చూస్తున్నారని, ఈ నేపధ్యంలో శ్రీశైలం , నాగార్జన సాగర్, పులిచింతల ప్రాజెక్ట్ లో విద్యుత్ ఉత్పత్తి చేస్తున్నారని తెలిపారు.

ఉన్న నీతితో విద్యుత్ ఉత్పత్తి చేస్తూ, నీటిని కిందకు వదలటం అనేది, చట్ట విరుద్ధం అనేది చెప్తున్నారు. నీటి విడుదలను కృష్ణా రివర్ మ్యానేజ్మెంట్ బోర్డు, పర్యవేక్షిస్తున్నా, ఆ బోర్డు అనుమతి లేకుండా, నీటిని జల విద్యుత్ ప్రాజెక్ట్ కోసం ఉపయోగించటం అనేది న్యాయ, చట్ట విరుద్ధం అని వారు పేర్కొన్నారు. తెలంగాణా ప్రభుత్వం విద్యుత్ ఉత్పత్తి చేయాలనీ ఏకపక్షంగా జీవో జారీ చేసిందని, వెంటనే విద్యుతు ఉత్పత్తి నిలిపివేయాలని, ఏపి ప్రభుత్వం చేసిన ఫిర్యాదు పై, తెలంగాణా ప్రభువాన్ని కృష్ణ రివర్ మ్యానేజ్మెంట్ బోర్డు ఆదేశించినా కూడా, తెలంగాణా ప్రభుత్వం మాట వినటం లేదని, రైతులు ఆ పిటీషన్ లో తెలిపారు. ఆంధ్రప్రదేశ్ ప్రభుత్వం విద్యుత్ ఉత్పత్తి ఆపమని ఫిర్యాదు చేసిందని, అయినా ఈ రోజుకీ కూడా విద్యుతు ఉత్పత్తి నిలిపివేయలేదని, ఈ నేపధ్యంలో వెంటనే దీని పై తగు చర్యలు తీసుకుని, కృష్ణా డెల్టా రైతులను, నాగార్జున సాగర్ ఆయుకట్టు కింద ఉన్న రైతులను కాపాడాలని, వారు ఆ పిటీషన్ లో తెలిపారు. అయితే ఈ పిటీషన్ సవరించి, ఈ రోజు లంచ్ మోషన్ పిటీషన్ గా మూవ్ చేసే అవకాసం ఉంది.

సుదీర్ఘ విరామం తరువాత, జనసేన అధినేత పవన్ కళ్యాణ్, మళ్ళీ రాజకీయంగా ఆక్టివ్ అవుతున్నారు. తిరుపతి ఉప ఎన్నికలకు ముందు కూడా పవన్ పెద్దగా ఆక్టివ్ గా లేరు అనే చెప్పాలి. ఉప ఎన్నికల్లో ఆయన ఒక మీటింగ్ లో పాల్గున్నారు అంతే. ఆ తరువాత ఆయనకు క-రో-నా రావటంతో, ఆయన ఇంటికే పరిమితం అయిపోయారు. అయితే ఇక్కడ మరో అంశం ఏమిటి అంటే, జరిగే విషయాల పై ఆయన పేరుతో పార్టీ ప్రెస్ నోట్ లు కానీ, ట్వీట్ లు కానీ వస్తూ ఉండేవి, అయితే గత రెండు నెలలుగా అవి కూడా ఆగిపోవటం చర్చనీయంసం అయ్యింది. ప్రభుత్వం అవలభిస్తున్న విధానాలు, పన్ను పెంపు, జాబ్ క్యాలెండర్, పోలవరం అంశం, ఇలా అనేక అంశాల పై పవన్ వైపు నుంచి స్పందన రాలేదు. అయితే ఇక గత నెల రోజులుగా పవన్ కళ్యాణ్ కేంద్ర మంత్రి అవుతున్నారు అంటూ ప్రచారం సాగింది. వీటి అన్నిటి నేపధ్యంలో, ఎట్టకేలక పవన్ కళ్యాణ్ మళ్ళీ రాజకీయంగా ఆక్టివ్ అవుతున్నారు. ఏడవ తేదీన పవన్ కళ్యాణ్ మంగళగిరి పార్టీ కార్యాలయంలో ముఖ్య నేతలతో భేటీ అవనున్నారు. రాజకీయ పరిణామాలతో పాటుగా, ప్రజలు ఎదుర్కుంటున్న అనేక సమస్యల పై ఆయన చర్చించనున్నారు. ముఖ్యంగా యువత అంతా జాబ్ క్యాలండర్ పై ఆగ్రహంగా ఉండటంతో, అది ప్రధానాంశంగా తీసుకోనున్నారు.

ఆరవ తారిఖు రాత్రి పవన్ కళ్యాణ్ హైదరబాద్ నుంచి విజయవాడ చేరుకుంటారు. ఏడవ తేదీ ఉదయం మంగళగిరిలో ఉన్న పార్టీ కార్యాలయానికి చేరుకుని, ఆ రోజంతా ఆయన పార్టీ కార్యాలయంలోనే, అనేక అంశాల పై చర్చిస్తారని పార్టీ వర్గాలు చెప్తున్నాయి. ఉదయం ముఖ్య నాయకులతో భేటీ అయ్యి పలు కీలక నిర్ణయాలు తీసుకుంటారని తెలుస్తుంది. ప్రభుత్వ విధానాలు, అలాగే ఎలా వివిధ జిల్లాల్లో ఉద్యమాలు చేయాలి అనేది ప్లాన్ చేయనున్నారు. ఆ రోజు సాయంత్రం ప్రత్యేకంగా నిరుద్యోగ యువతతో భేటీ అయ్యి, గతంలో జగన్ మోహన్ రెడ్డి ఇచ్చిన హామీలకు, ఇప్పుడు అమలు అవుతున్న వాటి గురించి అందరి నుంచి అభిప్రాయాలు తీసుకుని, జనసేన స్టాండ్ తో పాటు, భవిష్యత్తు కార్యాచరణ ఈ జాబ్ క్యాలండర్ విషయంలో ప్రకటిస్తారని తెలుస్తుంది. దీంతో, పవన్ భేటీ కంటే ముందు, ఈ రోజు నాదెండ్ల మనోహర్ పార్టీ ముఖ్య నేతలతో చర్చలు జరిపి, పవన్ కళ్యాణ్ తో చర్చించాల్సిన అంశాల గురించి, ముఖ్య నేతల అభిప్రాయం తీసుకోనున్నారు.