news

ఆంధ్రప్రదేశ్ ప్రభుత్వం, ఆర్ధికంగా ఎన్ని కష్టాలు పడుతుందో అందరికీ తెలిసిందే. ఈ నెల జీతాలకు కూడా వెతుక్కోవాల్సిన పరిస్థితి ఏర్పడింది. అసలు తెచ్చిన అప్పు డబ్బు అంతా ఏమై పోతుందో అర్ధం కావటం లేదు. అభివృద్ధి శూన్యం. మరో పక్క సంక్షేమం గురించి ఎంత గొప్పగా చెప్తున్నా, అది ఆరోకర సంక్షేమమే. అయితే ఈ పరిస్థితిలో ఈ నెల జీతాలు, పెన్షన్ల కోసం, ఆర్బిఐ వద్దకు అప్పు కోసం వెళ్ళిన రాష్ట్ర ప్రభుత్వానికి, ఆర్బిఐ షాక్ ఇచ్చింది. నిన్న సెక్యూరిటీ, బండ్ల వేలం ద్వారా, ఒక రెండు వేల కోట్లు అప్పు తెచ్చుకుందామని రాష్ట్ర ప్రభుత్వం భావించింది. అయితే రాష్ట్ర ప్రభుత్వ ప్రతిపాదనను, ఆర్బిఐ తిరస్కరించింది. కేంద్రం నుంచి అనుమతి తెచ్చుకోవాలి అంటూ, రాష్ట్ర ప్రభుత్వానికి షాక్ ఇచ్చింది. అయితే కేంద్రం నుంచి అనుమతి తెచ్చుకుంటాం అని, అయితే ఈ లోపు రెండు వేల కోట్లు అప్పు తెచ్చుకునేందుకు అనుమతి ఇవ్వాలని రాష్ట్ర ప్రభుత్వం మళ్ళీ కోరినా, ఆర్బిఐ నుంచి సానుకూల స్పందన రాలేదు. అంతే కాకుండా, సెక్యూరిటీ, బాండ్ల వేలాన్ని కూడా రద్దు చేసింది. దీంతో మళ్ళీ ఈ నెల 15 వ తదీ వరకు, ఆర్బిఐ వద్ద బాండ్ల వేలం కుదరదు. ఈ పరిణామంతో రాష్ట్ర ప్రభుత్వం ఖంగుతింది. ఎలాగైనా అప్పు సాధించి, ఖర్చులు చేసుకోవాలని అనుకున్న ప్రభుత్వానికి షాక్ తగిలింది.

అయితే సాధారణంగా, అప్పు తెచ్చుకోవటానికి, కేంద్రం నుంచి రెండు సార్లు, రాష్ట్ర ప్రభుత్వాలు పర్మిషన్ తెచ్చుకోవాల్సి ఉంటుంది. మొదటి తొమ్మిది నెలలకు ఒకసారి, అలాగే తరువాత మూడు నెలలకు ఒకసారి, ఇలా రెండు సార్లు పర్మిషన్ తెచ్చుకోవాల్సి ఉంటుంది. అయితే ఈ సారి మాత్రం, ఇంకా కేంద్రం నుంచి, రాష్ట్ర ప్రభుత్వానికి అనుమతి రాలేదు. గత ఆర్ధిక ఏడాది ఎన్ని అప్పులు చేసారు, గ్యారంటీ ఇచ్చి ఎన్ని రుణాలు పొందారు, రెవిన్యూ ఖర్చు ఎంత చేసారు, క్యాపిటల్ వ్యయం ఎంత, ఇలా అనేక వాటి పై క్లారిటీ రావాల్సి ఉన్నా, రాష్ట్ర ప్రభుత్వం నుంచి పూర్తి స్థాయిలో ఈ సమాచారం కేంద్రానికి వెళ్ళక పోవటంతో, ఆర్బిఐ వద్ద అనుమతి లభించలేదని తెలుస్తుంది. ఈ సమాచారం అంతా కేంద్రానికి పంపితే కాని, అన్నీ చూసి కేంద్రం అనుమతి ఇచ్చే అవకాసం లేదు. అయితే ఈ పరిస్థితి పై విపక్షాలు, ఆర్ధిక నిపుణులు మండిపడుతున్నారు. సొంత మీడియాలో ఎదురు దాడి కాకుండా, రాష్ట్ర ఆర్ధిక పరిస్థితి పై, రాష్ట్ర ప్రభుత్వం శ్వేతపత్రం విడుదల చేయాలని కోరుతున్నారు.

జగన్ మోహన్ రెడ్డి పై, 11 సిబిఐ, 5 ఈడీ కేసులు ఉన్న సంగతి తెలిసిందే. ఈ కేసులు పై, అయన 16 నెలలు జైలులో ఉండి, చార్జ్ షీట్ లు ఫైల్ చేసిన తరువాత, కోర్టు కండీషనల్ బెయిల్ ఇవ్వటంతో, ఆయన బయటకు వచ్చారు. 2017 ఆ సమయంలో, ప్రతి వారం వారం కోర్టుకు విచారణ కావాలని, ఆదేశాలు వచ్చాయి. అయితే తరువాత ఆయన ముఖ్యమంత్రి అవ్వటంతో, కేసు ముందుకు సాగటం లేదు. వారం వారం విచారణ జరుగుతున్నా, జగన్ మోహన్ రెడ్డి మాత్రం, కోర్టుకు విచారణకు వెళ్ళటం లేదు. ఇది చాలా మందికి ఆశ్చర్యాన్ని కూడా కలిగిస్తుంది. ఇదే విషయం పై, వైసిపీ ఎంపీ రఘురామరాజు, ఈ రోజు ఆవేదన చెందుతూ ప్రెస్ మీట్ పెట్టారు. మా జగన్ మోహన్ రెడ్డి గారు, అందరి చేత మాటలు పడుతున్నారని అన్నారు. మొన్న బీజేపీ నేత సునీల్ దియోధర్ కూడా , జగన్ ని జైలుకు పంపిస్తాం అని అంటున్నారని, అందుకే విచారణ ఎదుర్కుని కడిగిన ముత్యంలా బయటకు రావాలని కోరుకుంటున్నా అని అన్నారు. అందుకే మా ముఖ్యమంత్రి గారి బెయిల్ రద్దు చేయాలని, విచారణ తొందరగా చేయాలని, సిబిఐ కోర్టులో, తాను కొద్ది సేపటి క్రితమే, పిటీషన్ దాఖలు చేసామని అన్నారు. తానే స్వయంగా, ఈ కేసు వేశానని, ఈ కేసు విచారణ పై, సిబిఐ కోర్టు ఏమి చెప్తుందో చూడాలని అన్నారు. అలాగే, అసలు ఏడాదిగా విచారణకు హాజరుకాకపొతే, సిబిఐ ఏమి చేస్తుందని ప్రశ్నించారు.

సిబిఐ కోర్టు అంత నిస్సహయతగా ఉందా ? ఎందుకు నువ్వు విచారణకు రావటం లేదని, ఒక ఏ1ని అడిగే సాహసనం ఎందుకు చేయటం లేదు అంటూ ప్రశ్నించారు. ఈయన బయట ఉంటే, అందరినీ ప్రభావితం చేస్తారని అనిపిస్తుందని, ఇప్పటికే తన కేసులో సహా నిందితులకు, అనేక పదవులు ఇచ్చారని అన్నారు. ఇప్పటికే సిబిఐ మీద నమ్మకం పోతూ ఉంటే, న్యాయ వ్యవస్థ కూడా ఒక ఏ1 విచారణకు రాకపొతే, ఏమి చేస్తున్నారని ప్రశ్నించారు. మహారాష్ట్రలో తన పై ఆరోపణలు రావటంతో, హోంమంత్రి రాజీనామా చేసి, విచారణ ఎదుర్కుంటున్నారని, మా ముఖ్యమంత్రి పై ఇన్ని కేసులు ఉంటే, ఈయన ఇలా ఉన్నారని అన్నారు. అందుకే జగన్ గారు కూడా, ఈ విచారణ ముగించేలా, వేరే వారిని తన సీటులో పెట్టి, ఈ విచారణ తొందరగా అయ్యేలా చూడాలని అన్నారు. న్యాయ వ్యవస్థ మీద ఎదురుదాడి, న్యాయ వ్యవస్థను వివస్త్రను చేస్తున్న మా ముఖ్యమంత్రి అంటూ, రఘురామరాజు ఘాటు వ్యాఖ్యలు చేసారు. అయితే ఈ కేసు ఎప్పుడు విచారణకు వస్తుంది ? కోర్టు ఏమి చెప్తుంది అనే దాని పై సస్పెన్స్ నెలకొంది.

ఆంధ్రప్రదేశ్ హైకోర్టు, కొద్ది సేపటి క్రితం సంచలన ఉత్తర్వులు జారీ చేసింది. ఎంపీటీసి, జెడ్పీటీసి ఎన్నికలు నిలిపివేయాలి అంటూ, తెలుగుదేశం పార్టీ వేసిన పిటీషన్ పై, కొద్ది సేపటి క్రితం ఈ తీర్పుని వెలువరించింది. ముఖ్యంగా సుప్రీం కోర్టు ఆదేశాలు పాటించకుండా, ఎందుకు ముందుకు వెళ్ళారని ప్రశ్నిస్తూ, ఈ నెల ఒకటిన ఎన్నికలు జరుపుతూ రాష్ట్ర ఎన్నికల కమిషన్ నీలం సాహనీ ఇచ్చిన నోటిఫికేషన్, ఎన్నికల ప్రక్రియను, తదుపరి ఆదేశాలు ఇచ్చే వరుకు నిలిపివేయాలని హైకోర్టు ఆదేశించింది. ఎన్నికల నోటిఫికేషన్ పై కూడా స్టే జారీ చేసింది. గత ఏడాది మార్చ్ 15 వ తేదీన, క-రో-నా కారణంగా ఎన్నికలు వాయిదా వేసిన సమయంలో, రాష్ట్ర ప్రభుత్వం ఈ అంశం పై స్పెషల్ లీవ్ పిటీషన్ దాఖలు చేసింది. దీని పై సుప్రీం కోర్టు తీర్పు ఇస్తూ, ఒక కీలక అంశం పేర్కొంది. ఎన్నికల వాయిదా వేస్తూ అప్పటి ఎన్నికల కమిషన్ తీసుకున్న నిర్ణయాన్ని సమర్దిస్తూనే, మరో వైపు ఈ సారి ఎన్నికలు నిర్వహించే ముందు, ఎన్నికల కమిషన్ రాష్ట్ర ప్రభుత్వంతో సంప్రదించి, ప్రధానంగా నోటిఫికేషన్ ఇవ్వటానికి, పోలింగ్ జరగటానికి మధ్యలో 28 రోజులు సమయం ఉండాలని, గతంలో సుప్రీం కోర్టు ఆదేశాలు జారీ చేసింది. అయితే ఈ సారి, మాత్రం, నీలం సాహనీ నోటిఫికేషన్ ఇస్తూ, ఒకటో తారీఖు బాధ్యతలు స్వీకరించి, సాయంత్రం నోటిఫికేషన్ ఇచ్చి, ఎనిమిదో తేదీ ఎన్నికలు అంటూ, ప్రకటించారు.

అయితే ఈ నోటిఫికేషన్ ని సవాల్ చేస్తూ, హైకోర్టులో పలు పిటీషన్లు దాఖలు అయ్యాయి. జనసేన, బీజేపీతో పాటుగా, తెలుగుదేశం కూడా ఈ పిటీషన్ లు దాఖలు చేసారు. ఈ పిటీషన్ లలో ప్రధానంగా, గతంలో సుప్రీం కోర్టు ఇచ్చిన ఆదేశాల ప్రకారం, రాష్ట్ర ఎన్నికల కమిషన్ నోటిఫికేషన్ ఇవ్వలేదని, సుప్రీం కోర్టు ఆదేశాలను ఉల్లంఘించటం, రాజ్యాంగ, న్యాయ, చట్ట విరుద్ధం అని చెప్పి పేర్కొన్నారు. ముఖ్యంగా నోటిఫికేషన్ కు , పోలింగ్ కు మధ్య, 28 రోజులు సమయం ఉండాలని చెప్పి, సుప్రీం కోర్టు పెర్కొందో, ఈ సారి నోటిఫికేషన్ ఇచ్చినప్పుడు, ఆ నిబంధనలు పాటించలేదని, న్యాయవాదులు వాదించారు. గతంలో మునిసిపల్ ఎన్నికలకు నోటిఫికేషన్ ఇచ్చిన సమయంలో, 28 రోజులు నిబంధన పాటించరని, ఈ సారి మాత్రం సుప్రీం కోర్టు నిర్ణయం పాటించలేదని నిలదీశారు. ఈ అంశాన్ని పరిగణలోకి తీసుకున్న హైకోర్టు, కొద్ది సేపటి క్రితం ఉత్తర్వులు ఇచ్చింది. ప్రధానంగా సుప్రీం కోర్టు ఆదేశాలు పాటించకపోవటం పట్ల అభ్యంతరం వ్యక్తం చేస్తూ, తదనంతర ప్రక్రియ నిలిపివేయాలని, ఈ పిటీషన్ ల తదుపరి విచారణ చేస్తామని హైకోర్టు చెప్పింది.