news

ఆంధ్రప్రదేశ్ మాజీ మంత్రి, జగన మోహన్ రెడ్డి బాబాయ్ అయిన వైఎస్ వివేక కేసు హైకోర్టు ఆదేశాల మేరకు, సిబిఐ విచారణ చేస్తున్న సంగతి తెలిసిందే. హైకోర్టు ఆదేశాలు ప్రకారం, రెండు నెలల క్రితమే సిబిఐ రంగంలో దిగింది. మొదటి విడతగా సిబిఐ 15 రోజులు పాటు పులివెందుల, కడపలో విచారణ చేసింది. తరువాత 40 రోజులు విచారణకు బ్రేక్ ఇచ్చిన సిబిఐ, వారం రోజుల క్రితం రెండో దఫా విచారణ ప్రారంభించింది. ఈ సారి విచారణలో కొన్ని కీలక పరిణామాలు చోటు చేసుకున్నాయి. ముఖ్యంగా గత రెండు రోజులుగా జరిగిన విచారణలో, కొన్ని ఆసక్తికర విషయాలు బయటకు వస్తున్నాయి.. నిన్నటి విచారణలో కొన్ని కీలక ఆధారాలు బయట పడినట్టు తెలుస్తుంది. పులివెందులలో చెప్పుల షాపు యజమానిగా ఉన్న మున్నా అనే వ్యక్తితో పాటు అతని కుటుంబ సభ్యులను కూడా సిబిఐ విచారణ చేసింది. వివేక బ్రతి ఉండగా, ఆ కుటుంబానికి సంబంధించి ఒక సెటిల్మెంట్ చేసినట్టు చెప్తున్నారు. ఈ క్రమంలోనే సిబిఐ వారిని విచారణ చేసింది.

అయితే ఆ విచారణలో మున్న బ్యాంక్ లాకర్ లో, భారీగా నగదు గుర్తించారు. దాదాపుగా ఒకే బ్యాంక్ లాకర్లో, 48 లక్షల నగదుతో పాటుగా, 25 తులాల బంగారాన్ని కూడా సిబిఐ గుర్తించింది. అలాగే మరిన్ని బ్యాంకు ఖాతాలను కూడా సిబిఐ గుర్తించింది. ఈ మొత్తం నగదు పై కూడా సిబిఐ ఆరా తీస్తుంది. అయితే ఇదే క్రమంలో ఈ రోజు పులివెందులలో మరి కొంత మందిని విచారణ చేసారు. ఏడుగురిని ఈ రోజు పులివెందులలో విచారణ చేసారు. అయితే ఈ క్రమంలో వైసీపీ ఎంపీకి చెందిన సన్నిహితుడు ఉదయ్ కుమార్ రెడ్డిని విచారణ చేసిన సిబిఐ, మరింత విచారణ కోసం తన ఫోన్ ని స్వాధీనం చేసుకున్నారు. ఫోన్ ని సీజ్ చేసి, లోతుగా విశ్లేషణ చెయ్యనున్నారు. ఉదయ్ కుమార్ రెడ్డి అనే వ్యక్తీ యురేనియం ఫాక్టరీలో ఉద్యోగిగా పని చేస్తున్నారు. ఈ మొత్తం వ్యవహారంలో, రెండు రోజుల నుంచి కీలక పరిణామాలు ఎదురు అవుతున్నాయి.

గత నాలుగు రోజులుగా కొడాలి నాని హిందూ దేవుళ్ళ పై, అలాగే తిరుమల డిక్లరేషన్ పై చేసిన వ్యాఖ్యలు పెద్ద దుమారం రేగిన సంగతి తెలిసిందే. అయితే తాను మాట్లాడిన మాటల పై, ఎంత మంది ఆందోళన చెందినా, నిరసన తెలిపినా మంత్రి కొడాలి నాని మాత్రం, ఇష్టం వచ్చినట్టు మాట్లాడుతూనే ఉన్నారు. తన వ్యాఖ్యలకు కట్టుబడి ఉన్నానని తెలిపారు. అయితే ఇన్ని వ్యాఖ్యలు చేసిన నానిని ప్రభుత్వం వైపు నుంచి కూడా ఎవరూ ఖండించక పోవటం కొసమెరుపు. ఇలా ఈ వివాదాలు కొనసాగుతూ ఉండగానే, కొడాలి నాని, ఈ రోజు తిరుమల చేరుకున్నారు. జగన్ మోహన్ రెడ్డితో కలిసి ఈ రోజు శ్రీవారికి పట్టు వస్త్రాలు ఇవ్వనున్నారు. ఈ సందర్భంగా కొడాలి నాని మీడియాతో మాట్లాడుతూ చంద్రబాబు, తెలుగుదేశం పై ఎప్పటిలాగే విరుచుకు పడ్డారు. అయితే ఈ సారి అందరినీ ఆశ్చర్య పరుస్తూ ఏకంగా ప్రధాని మోడీని కూడా ఈ వివాదంలోకి లాగారు కొడాలి నాని. మీడియాతో మాట్లాడుతూ ఉండగా, ఒక మీడియా ప్రతినిధి, జగన్ ఒక్కరే పట్టు వస్త్రాలు ఇవ్వకూడదు, సతీ సమేతంగా ఇవ్వాలి అని బీజేపీ అంటుందని, ప్రశ్నించారు.

దీని కి సమాధానం ఇచ్చిన నాని, ఇందులోకి ప్రధాని మోడీ, ఉత్తరప్రదేశ్ సియం యోగి ఆదిత్యనాద్ ని కూడా లాగారు. ప్రధాని మోడీ ఎప్పుడైనా తన భార్యతో కలిసి చేసారు. మొన్న అయోధ్య పూజ చేసారా ? కాబట్టి ఆయన్ను తన భార్యను తీసుకు వచ్చి, వెంకటేశ్వర స్వామి, పద్మావతి అమ్మవారి లాగా, కలిసి మళ్ళీ అయోధ్య పూజ చెయ్యమనండి, అలాగే ఉత్తర ప్రదేశ్ సియం యోగి ఏ నాడైనా తన భార్యను తీసుకుని వచ్చారా ? అని కొడాలి నాని ప్రశ్నించారు. ఒక పది మంది కలిసి నన్ను తీసేయమంటే తీసేస్తారా ? నేను ఒక పది మందిని తీసుకుని వెళ్లి అమిత్ షా ను తీసేయమంటే తీసేస్తారా ? అని ప్రశ్నించారు. సోము వీర్రాజు వచ్చిన తరువాత నుంచి, ఆలయాల్లో దాడులు జరుగుతున్నాయని, నేను చెప్తే ఆయన్ను తీసి వేస్తారా ? అని అడిగారు. కాబట్టి బీజేపీ ఇక్కడ నోటాతో పోటీ పడుతుందని, సోము వేర్రాజు ఒక్క శాతం నుంచి, ఒకటిన్నర శాతానికి ఎలా ఎదగాలి అనేది చూసుకుంటే మంచిది అని, వాళ్ళు మాకు సలహాలు ఇచ్చే స్థాయిలో లేరని అన్నారు.

గతంలో పోలీస్ స్టేషన్ పై దాడి ఘటనకు సంబంధించి, ఈ రోజు ఆంధ్రప్రదేశ్ హైకోర్టుల విచారణ జరిగింది. విచారణ సందర్భంగా హైకోర్టు కొన్ని కీలక వ్యాఖ్యలు చేసింది. ఈ దాడిలో పాల్గున్న వారి అందరి పై గతంలో, అప్పటి ప్రభుత్వంలో ఎఫ్ఐఆర్ నమోదు చేసారు. అయితే ఈ కేసు పై, ఇప్పటి ప్రభుత్వంలో ఉన్న రాష్ట్ర డీజీపీ గౌతం సవాంగ్, కేసుల ప్రాసిక్యూషన్ ని ఉపసంహరించుకుంటున్నట్టు , రాష్ట్ర ప్రభుత్వానికి ఓక లేఖ రాసారు. డీజీపీ లేఖను ఆమోదించిన ప్రభుత్వం, ఒక జీవోని విడుదల చేసింది. అయితే ఈ జీవో విడుదలే చట్ట విరుద్ధం అని చెప్పి హైకోర్టు వ్యాఖానించింది. ముఖ్యంగా స్టేషన్ హౌస్ ఆఫీసర్, పబ్లిక్ ప్రాసిక్యూటర్ పై అభ్యంతరాలు వ్యక్తం చేసింది. ఈ అంశం మొత్తం పై పసుపులేటి రమేష్ అనే వ్యక్తి, హైకోర్టులో ప్రజా ప్రయోజన వ్యాజ్యం దాఖలు చేసారు. ఈ రోజు హైకోర్టులో ఈ కేసు విచారణకు రావటంతో, పిటీషనర్ తరుపు న్యాయవాదులు, గట్టిగా వాదనలు వినిపించారు. స్టేషన్ పై దాడిలో, పోలీసులే ప్రాసిక్యూషన్ ని ఉపసంహరించు కోవటం అనే అంశం ప్రజా ప్రయోజనాలకు విరుద్ధం అని వారు గట్టిగా వాదించారు.

ఇటువంటి నేరాలు మళ్ళీ జరక్కుండా ఉండాలి అంటే, ఇలాంటి జీవోలు ఇవ్వకూడదని వారు వాదించారు. వాదనలు విన్న న్యాయమూర్తులు, పోలీసుల పైన, ఈ ఉత్తర్వులు ఇచ్చిన అధికారుల పైనా ఆగ్రహం వ్యక్తం చేసారు. లౌకిక ప్రజాస్వామ్య దేశంలో, ముస్లిం యువత అంటూ ప్రస్తావించి, ఇలాంటి జీవోలు ఇస్తే కనుక, భ్యవిష్యత్తులో కేసులు పెట్టటానికి కూడా పోలీసులు ఇబ్బంది పడే పరిస్థితి ఉంటుందని కోర్టు వ్యాఖ్యానించింది. ఈ పిటీషన్ లో నేషనల్ ఇన్వెస్టిగేటివ్ ఏజెన్సీని ఒక పార్టీగా చెయ్యాలని, పిటీషనర్ కు హైకోర్టు ఆదేశాలు ఇచ్చింది. కేసు తదుపరి విచారణను అక్టోబర్ 1కి వాయిదా పడింది. పోలీసుల పైనే నేరుగా దాడి జరిగితే, కేసుని ఉపసంహరించుకుంటూ ఎలా ఆదేశాలు ఇస్తారు, దాన్ని ప్రభుత్వం ఎలా ఆమోదించింది అంటూ హైకోర్టు సీరియస్ అయ్యింది. దీని పై మధ్యంతర ఉత్తర్వులు కూడా ఇస్తే, ఈ కేసుని రద్దు చెయ్యటం కుదరదు, కొనసాగించాలని ఆదేశించింది.