news

రాష్ట్రంలో మూడు రాజధానుల ఏర్పాటు విషమై రెండు బిల్లులు తీసుకు వస్తూ, ఆంధ్రప్రదేశ్ ప్రభుత్వం జారీ చేసిన గెజిట్ నోటిఫికేషన్ పై దాఖలైన 55 పిటిషన్లు సంయుక్తంగా గురువారం హైకోర్టులో విచారణకు వచ్చాయి. హైకోర్టు ధర్మాసనం ఇప్పటికే ఈ గెజిట్ నోటిఫికేషన్ పై ఇచ్చిన స్టేటస్ కో గడువు గురువారంతో ముగియబోతున్న సమయంలో, హైకోర్టు ఏమి చెప్తుందా అని అందరూ ఆసక్తిగా ఎదురు చూస్తున్న సమయంలో, ఈ సారి హైకోర్టు భారీ షాక్ ఇచ్చింది. ఈ సారి ఏకంగా వచ్చే నెల 21 వరకు స్టేటస్ కో పొడిగిస్తూ హైకోర్టు ఆదేశాలు ఇచ్చింది. దీంతో ఇక వచ్చే నెల దాకా, ప్రభుత్వానికి ఏమి చెయ్యటానికి ఉండదు. అలాగే అందరినీ అఫిడవిట్లు కూడా దాఖలు చెయ్యమని, ప్రభుత్వాన్ని కూడా ఏదైనా స్పెషల్ పిటీషన లో, అఫిడవిట్ వెయ్యాలి అంటే, వెయ్యమని ఆదేశాలు ఇచ్చింది. వచ్చే నెల 21 నుంచి రోజు వారీ విచారణ గురించి విధివిధానాలు రూపొందించే అవకాసం ఉందని తెలుస్తుంది. ఇక మరో వైపు, వైజాగ్ లో 30 ఎకరాల్లో నిర్మిస్తున్న గెస్ట్ హౌస్ పై, కంటెంప్ట్ అఫ్ కోర్ట్ కింద, ఢిల్లీ లాయర్ మూవ్ చేసారు. ఒక పక్క స్టేటస్ కో ఉన్నా, కోర్టు ఆదేశాలు ధిక్కరించి, గెస్ట్ హౌస్ పేరుతొ భారీగా 30 ఎకరాల్లో సచివాలయం కోసమే నిర్మాణాలు చేస్తున్నారని కోర్టుకు తెలిపారు. అయితే ప్రభుత్వం తరుపు న్యాయవాది, దానికి ప్రభుత్వానికి సంబంధం లేదని, అది విశాఖ కార్పొరేషన్ నిర్మిస్తుందని చెప్పారు.

అయితే రాష్ట్రపతి గెస్ట్ హౌస్ 5 ఎకరాల్లో ఉంటే, ఇక్కడ 30 ఎకరాల్లో గెస్ట్ హౌస్ ఏమిటి అంటూ, పిటీషనర్ తరుపు వాదించారు. దీని పై హైకోర్టు ఒకింత సీరియస్ గా తీసుకుని, దీని పై ప్రభుత్వం వెంటనే అఫిడవిట్ వెయ్యాలని, ఈ అఫిడవిట్ చీఫ్ సెక్రటరీ వెయ్యాలని చెప్పటంతో, హైకోర్టు ఈ విషయం సీరియస్ గా తీసుకుందని అర్ధం అవుతుంది. మరోవైపు నిన్న సుప్రీం కోర్టులో ఈ అంశంపై జరిగిన విచారణ సంద ర్భంగా హైకోర్టులోనే తేల్చుకోవాలని, కేసు అక్కడ విచారణలో ఉండగా.. తమ జోక్యం సరికాదనిసర్వోన్నత ధర్మాసనం స్పష్టంచేసింది. ఈ నేపథ్యంలో హైకోర్టు ధర్మాసనం ఈ సారి, వచ్చే నెల 21 దాకా వాయిదా వెయ్యటంతో, రాష్ట్ర ప్రభుత్వం ఏమి చేస్తుందో చూడాలి. జస్టిస్ రాకేష్ కుమార్, జస్టిస్ ఏవీ శేషసాయి, జస్టిస్ ఎం.సత్యనారాయణమూర్తిలతో కూడిన త్రిసభ్య ధర్మాసనం ఇప్పటికే రెండుసార్లు స్టేటస్ కోను విధించింది. దీంతో ఈ రోజు విచారణలో కూడా స్టేటస్ కోను పొడిగిస్తూ, ఈ సారి ఏకంగా వచ్చే నెల 21 వరకు వాయిదా వేసింది. అయితే గత రెండు వాయిదాలలో స్టేటస్ కోను ఎత్తివేయాలని కోరిన ప్రభుత్వం తరుపు న్యాయవాది, ఈ సారి అలాంటి వాదన చెయ్యలేదని తెలుస్తుంది. ఒకసారి స్టేటస్ కో ఇస్తే, చివరి వాదన వరకు, ఇలాగే కొనసాగవచ్చనే అభిప్రాయంతోనే, ఇలా చేసి ఉండవచ్చు అని తెలుస్తుంది.

విశాఖపట్నం జిల్లా నక్కపల్లిలోని హెటిరో ఫర్మా కంపెనీకి అడ్డగోలుగా ప్రభుత్వం భూములు అప్పగించే కార్యక్రమం చాపకిందనీరులా ప్రారంభించింది అనే ఆరోపణలు వస్తున్నాయి. తమ డ్రగ్స్ యూనిట్ విస్తరణ కోసం, 108 ఎకరాలు కావాలని, జగన్ ప్రభుత్వానికి హెటిరో కంపెనీ దరఖాస్తు చేసుకుంది. తమ పరిశ్రమ విస్తరణ కోసం ఇంటర్నల్ రోడ్లు, కల్వర్టుల ఏర్పాటు చేసుకోవటం కోసం ఈ భూమి తమ కంపెనీకి అవసరమని ఆ దరఖాస్తులో పేర్కొంది. అయితే, కంపెనీ కోరిన భూమిలో దేవాలయలాకు సంబందించిన భూములు, డీ-పట్టా భూములు, అలాగే చెరువు గర్భాలు, శ్మశానం భూములు, గెడ్డలు, పోరంబోకు భూములు, బంజరు భూములు ఉన్నాయనే ఆరోపణలు వస్తున్నాయి. ఇక మరో విషయం ఏమిటి అంటే, కంపెనీకి ఆనుకుని ఉన్న ప్రభుత్వ భూముల్లోని 50 ఎకరాలకు పైగా ఇప్పటికే ఆక్రమించుకొని వినియోగించుకుంటున్నారని అభియోగం కూడా ఉంది. ఈ ఉల్లంఘన పై గత తెలుగుదేశం ప్రభుత్వ హయంలో, ఈ విషయం పై విచారణ కూడా జరిగింది. అయితే విచారణ కమిటీ సమర్పించిన నివేదికను, ఇప్పటి వైసిపీ ప్రభుత్వం పట్టించుకోకుండా హెటిరోకు అనుకూలంగా నిర్ణయం తీసుకుంది. ఈ ఏడాది ఏప్రిల్ 28న, అంటే క-రో-నా పీక్స్ లో ఉన్న సమయంలో, కంపెనీకి భూమి బదలాయింపు ప్రతిపాదన పై పంచాయతీల తీర్మానం, అభ్యంతరాల స్వీకరణకు, విశాఖ కలెక్టర్ ఆదేశాలు ప్రకారం, నక్కపల్లి తహశీల్దార్ వి.వి.రమణ నోటీసులు ఇచ్చారు.

ప్రత్యేకాధికారుల పాలనలో పంచాయతీలు ఉన్నాయి కాబట్టి, ఈ తీర్మానాలకు ఎటువంటి ఆటంకం ఉండవని భావించినా, హెటిరోకు భూములు ఇవ్వవద్దంటూ నల్లిమట్టిపాలెం, ఎన్.నర్సాపురం, ఉప్మాక, సిహెచ్ఎల్.పురం, రాజయ్యపేట గ్రామల ప్రజలు అధికారులకు విన్నవించుకుంటూ, వినతి పత్రాలు ఇచ్చారు. అయితే వీటిని పట్టించుకోకుండా, హెటిరో కంపెనీకి అనుకూలంగా ప్రభుత్వానికి ప్రతిపాదనలు పంపించారు అధికారులు. ప్రస్తుతం ఆ ప్రాంతంలో ఎకరం ధర రూ.25 లక్షలు ఉంటే, 2016లో రైతుల నుంచి ప్రభుత్వం సేకరించిన జిరాయితీ భూమికి చెల్లించిన రూ.18 లక్షల ధరను రెవెన్యూ అధికారులు ప్రతిపాదించారు. ప్రస్తుత ఉన్న ధర ప్రకారం అత్యంత విలువైన 108 ఎకరాల భూమికి కేవలం రూ.19.44 కోట్లు విలువ కట్టినట్టు తెలుస్తుంది. భూమి విలువలోనే లబ్ది పొందేలా ప్లాన్ చేశారు. ప్రభుత్వం చేస్తున్న ఈ పని పై, ఇప్పటికే పలువురు ఆందోళన బాట పట్టారు. దీని పై ఉద్యమిస్తాం అని అంటున్నారు. మరో పక్క కలెక్టర్ మాత్రం, నివేదిక మాత్రమే ఇప్పటికి ప్రభుత్వానికి ఇచ్చాం అని, ప్రభుత్వం ఇంకా నిర్ణయం తీసుకోలేదని అన్నారు.

ఆంధ్రప్రదేశ్ రాజధాని అమరావతి పై, ఈ రోజు సుప్రీం కోర్టులో కీలక విచారణ జరిగింది. రాష్ట్ర ప్రభుత్వం వేసిన పిటీషన్ పై ఈ రోజు సుప్రీంలో విచారణ జరిగింది. అయితే రాష్ట్ర ప్రభుత్వానికి సుప్రీంలో చుక్కు ఎదురు అయ్యింది. ఏపి ప్రభుత్వ పిటీషన్ ను సుప్రీం కొట్టేసింది. ప్రభుత్వ వాదనలు హైకోర్టులోనే వినిపించుకోవాలని, అక్కడ విచారణలో ఉన్నందున, మేము ఏమి ఆదేశాలు ఇవ్వలేమని సుప్రీం కోర్టు చెప్పింది. ఇప్పటికే సిఆర్డీఏ రద్దుతో పాటు, వికేంద్రీకరణ బిల్లు పై, రైతులు, అమరావతి పరిరక్షణ సమితి, హైకోర్టుకు వెళ్ళారు. అయితే హైకోర్టులో ఈ కేసు విచారణ సందర్భంగా, ఈ బిల్లుల పై స్టేటస్ కో ఇస్తూ, హైకోర్టు నిర్ణయం తీసుకుంది. రెండు వాయిదాలలో కూడా, స్టేటస్ కో ఇస్తూ హైకోర్టు నిర్ణయం తీసుకుంది. ఇందులో భాగంగానే, హైకోర్టు ఈ కేసు పై 27 వరకు స్టేటస్ కో విధించారు. అయితే దీని పై, ఆంధ్రప్రదేశ్ రాష్ట్ర ప్రభుత్వం, సుప్రీం కోర్టుని ఆశ్రయించింది. అత్యవసరంగా ఇది విచారణ చెయ్యాలని సుప్రీం కోర్టుని విజ్ఞప్తి చేసినా, ఇది లేట్ అవుతూ వచ్చింది. ఒకసారి ప్రభుత్వం వేసిన పిటీషన లో తప్పులు ఉండటంతో, సుప్రీం కోర్టు పిటీషన్ ని తిప్పి పంపించింది. తప్పులు సరి చేయమని కోరింది. తరువాత తప్పులు సరి చేసి ప్రభుత్వం పిటీషన్ వేయగా, మొదటిగా ఈ కేసు సుప్రీం కోర్టు చీఫ్ జస్టిస్ బాబ్డే ముందుకు ఈ కేసు వచ్చింది.

అయితే సుప్రీం కోర్టు చీఫ్ జస్టిస్ కూతురు, అమరావతి రైతుల తరుపున హైకోర్టులో వాదనలు వినిపించారని, చీఫ్ జస్టిస్ కు తెలపటంతో, నైతికంగా ఈ కేసు నా ముందుకు వద్దు అంటూ, చీఫ్ జస్టిస్ ఈ కేసుని, వేరే బెంచ్ కు ట్రాన్స్ఫర్ చేసారు. రెండో సారి ఈ కేసు జస్టిస్ నారీమన్ ముందుకు వచ్చింది. అయితే ఇక్కడ కూడా జస్టిస్ నారిమాన్ తండ్రి, అమరావతి పరిరక్షణ సమితి తరుపున వాదనలు వినిపిస్తూ ఉండటంతో, నారీమన్ కూడా, ఈ కేసు నేను వినటం సమంజసం కాదు అంటూ, వేరే బెంచ్ కు ఈ కేసుని ట్రాన్స్ఫర్ చేసారు. ఇలా రెండు సార్లు మారి మూడో బెంచ్ కు ఈ కేసు వచ్చింది. అయితే ఈ కేసు రేపు అంటే, ఆగష్టు 27న సుప్రీం కోర్టు ముందుకు రావలసి ఉండగా, రాష్ట్ర ప్రభుత్వం విజ్ఞప్తి చేస్తూ, హైకోర్టులో ఈ కేసు ఉంది కాబట్టి, ఒక రోజు ముందే ఈ కేసు వినాలని సుప్రీం కోర్టుని కోరటంతో, ఈ కేసు ఈ రోజుకు ప్రీపోన్ అయ్యింది. ఈ రోజు ఈ కేసు విన్న ధర్మాసనం, ఈ ఆదేశాలు ఇచ్చింది. రేపు హైకోర్టులో ఈ కేసు పై, తదుపరి విచారణ ఉంది. మరి రేపు హైకోర్టు ఈ కేసు పై స్టేటస్ కో కొనసాగిస్తుందా, లేక స్టేటస్ కో ఎత్తేసి ఏమైనా ఆదేశాలు ఇస్తుందా అనేది చూడాలి. మొత్తంగా ఈ రోజు సుప్రీం కోర్టు ఇచ్చిన ఆదేశాలతో, ఊరట లభించింది.