news

ఏపీలో వైసీపీ ప్ర‌భుత్వం వ‌చ్చిన నుంచీ ప్ర‌చార‌పిచ్చి ప‌రాకాష్ట‌కు చేరింద‌ని క‌థ‌నాలు వ‌చ్చాయి. ప‌చ్చ‌నిచెట్లు కొట్టేసి, వాటికి మోడుకి వైసీపీ రంగులు వేయ‌డం, ప‌థ‌కాల పేర్లు మార్చేయ‌డం ద‌గ్గ‌ర నుంచీ ప్ర‌తీ విష‌యంలోనూ సీఎం జ‌గ‌న్‌ ప‌బ్లిసిటీ పిచ్చ చూపించుకుంటున్నార‌ని ఆరోప‌ణ‌లు వ‌చ్చాయి. కేస్ట్ స‌ర్టిఫికెట్ల మీద‌, పాసుబుక్కుల మీద, కొల‌త‌ల రాళ్ల మీద కూడా జ‌గ‌న్ రెడ్డి ఫోటోలు వేసుకోవ‌డం చూసి సామాన్య జ‌నం మా హ‌క్కుల‌పై జ‌గ‌న్ ఫోటోలేంటి అని బాహాటంగానే ప్ర‌శ్నిస్తున్నారు. అయినా వెన‌క్కి త‌గ్గ‌ని ప్ర‌భుత్వ పెద్ద‌లు విద్యార్థులు పాఠ్య‌పుస్త‌కాలు, స్ట‌డీమెటీరియ‌ల్, నోటు బుక్కుల‌పైనా త‌మ ఫోటోలు, పార్టీ రంగులు వేసుకోవ‌డం అన్నివ‌ర్గాల నుంచీ తీవ్ర విమ‌ర్శ‌లు వెల్లువెత్తుతున్నాయి. కాకినాడ, తూర్పుగోదావరి, డాక్టర్ బి.ఆర్ అంబేద్కర్ కోనసీమ, అల్లూరి సీతారామరాజు జిల్లాల పరిధిలోని 480 ప్రభుత్వ పాఠశాలల విద్యార్థుల కోసం రూ. 1.20 కోట్లు వెచ్చించి 49వేల తెలుగు-ఆంగ్ల మాధ్యమ స్టడీ మెటీరియల్ పుస్తకాలను ముద్రించ‌డానికి జడ్పీ నిధులు వెచ్చించారు.  ‘జగనన్న విద్యా భారతి’ పేరుతో ముద్రించిన ఈ స్టడీ మెటీరియల్ పుస్తకాల‌పై సీఎం జగన్, మంత్రులు బొత్స సత్యనారాయణ, బూడి ముత్యాల నాయుడు, పినిపే విశ్వరూప్, దాడిశెట్టి రాజా, చెల్లుబోయిన వేణు, జెడ్పి చైర్మన్, సీఈఓల ఫోటోలు వేశారు. మెటీరియ‌ల్ ఇంగ్లీషు మీడియం..క‌వ‌ర్ పై వైసీపీ ప్ర‌క‌ట‌న‌లు తెలుగులో ఉన్నాయి. విద్యార్థుల‌కు ఇచ్చే స్ట‌డీ మెటీరియ‌ల్ పై వైసీపీ నేత‌ల ఫోటోలు, రంగులు వేయ‌డంపై విద్యావేత్త‌లు తీవ్ర అభ్యంత‌రం వ్య‌క్తం చేస్తున్నారు.

మాజీ మంత్రి చింత‌కాయ‌ల అయ్య‌న్న‌పాత్రుడు అన్నంత ప‌నీ చేశాడు. అకార‌ణంగా త‌ప్పుడు కేసుల‌తో త‌న‌ను, త‌న కుటుంబాన్ని ఇబ్బందులు పాల్జేస్తున్న వారిని వ‌దిలే ప్ర‌స‌క్తే లేద‌ని గ‌తంలోనే ప్ర‌క‌టించారు. అయితే టిడిపి ప్ర‌భుత్వంలోకి వ‌చ్చాక మీ సంగ‌తి తేలుస్తానని ప్ర‌క‌ట‌న‌లు ఇవ్వ‌లేదు. నేరుగా ప్రైవేటు కేసుల‌తో అధికారుల‌ను కోర్టుకి లాగారు అయ్య‌న్న పాత్రుడు. తన ఇంటి ప్రహరీ గోడను రాత్రి సమయంలో కూల్చివేసిన అధికారులపై నర్సీపట్నం అదనపు జూనియర్‌ సివిల్‌ ఫస్ట్‌ క్లాస్‌ మేజిస్త్రేట్‌ కోర్టులో సోమవారం ప్రైవేటు కేసు వేశారు మాజీ మంత్రి చింతకాయల అయ్యన్నపాత్రుడు. నీటి పారుదల శాఖ స్థ‌లంలో గోడ నిర్మించార‌ని ఆరోపిస్తూ ఇంటి ప్ర‌హ‌రీని కూల్చివేత‌కు ఆదేశాలు ఇచ్చిన‌ ఆర్డీవో గోవిందరావు, ఏఎస్పీ మణికంఠ, తహసీల్దారు జయ, మునిసిపల్‌ కమిషనర్‌ కనకారావు, మరో 14 మంది అధికారులపై అయ్య‌న్న‌పాత్రుడు  ప్రైవేటు కేసు వేశారు. ఎంపీ విజయసాయిరెడ్డి ఆదేశాలతోనే అధికార యంత్రాంగం ప్ర‌హ‌రీ ప‌డ‌గొట్టార‌ని అయ్యన్నపాత్రుడు ఆరోపించారు. మొత్తానికి తెలుగుదేశం పార్టీ అక్ర‌మ కేసులు, దాడుల‌కు పాల్ప‌డుతున్న అధికారులు, పోలీసుల‌పై ప్రైవేటు కేసులు వేస్తామ‌ని ఎప్ప‌టి నుంచో బెదిరిస్తూ ఉంది. టిడిపి అన్న‌ట్టే అయ్య‌న్న‌పాత్రుడు ముందుకొచ్చి ప్రైవేటు కేసులు దాఖ‌లు చేయ‌డంతో ప్ర‌భుత్వ ఆదేశాల‌తో అడ్డ‌గోలుగా వ్య‌వ‌హ‌రించిన అధికారులు ఇప్పుడు కోర్టు మెట్లు ఎక్కి ఏం స‌మాధానం చెప్పాల్సి వ‌స్తుందో అని భ‌య‌ప‌డుతున్నారు.

ఆంధ్ర‌ప్ర‌దేశ్ రాష్ట్రం ప్ర‌మాద‌క‌ర ప‌రిస్థితుల్లో ఉంద‌ని కేంద్ర‌మంత్రి దేవ్ సిన్ష్ సంచ‌ల‌న ప్ర‌క‌ట‌న చేశారు. ఏపీలో ప‌ర్య‌టిస్తున్న ఆయ‌న వైఎస్ జ‌గ‌న్ రెడ్డి ప్రభుత్వం ప్రజాదరణ కోల్పోయింద‌న్నారు. గుడ్ గవర్నెన్స్ లో జగన్ విఫలమయ్యార‌ని తెలిపారు.  కేంద్రం ఇచ్చే నిధులు, 14, 15 వ ప్రణాళికా సంఘం నిధులను ప్రభుత్వం వేరే మార్గంలో వాడుకుంటోంద‌ని ఆరోపించారు. కేంద్ర నిధులు ఇతర మార్గాల్లో ఖర్చు చేయ‌డం నిబంధ‌న‌ల ఉల్లంఘ‌నేన‌న్నారు. కేంద్ర ప్ర‌భుత్వం పంచాయతీలకు ఇచ్చే నిధులను గ్రామాల అభివృద్ధికి వినియోగించాల‌న్నారు.  రాష్ట్రంలో ఉద్యోగులు, పెన్షనర్లు, సిబ్బంది జీతాలు లేక ఇబ్బందులు పడుతున్నార‌ని పేర్కొన్నారు. వైసీపీ తెచ్చిన వాలంటీర్లు సేవ చేయడం లేద‌ని, ఇతర పార్టీలను అణచివేసేందుకు వాలంటీర్లను వాడుకుంటున్నార‌ని తీవ్ర ఆరోప‌ణ‌లు చేశారు. ప్ర‌భుత్వ నిధుల‌ను వాలంటీర్లకు పంచుతున్నార‌ని మండిప‌డ్డారు. కేంద్ర ప్రభుత్వం అమ‌లుచేస్తోన్న ఆయుష్మాన్ కార్డు పేదలకు ఇవ్వడంలేద‌ని  కేంద్రమంత్రి ఆగ్ర‌హం వ్య‌క్తం చేశారు.