news

త‌మ ఇంటి ప‌ని చేసేవారు ఒక స‌ల‌హాదారుడు. త‌మ వంట ప‌నిచేసేవాడు మ‌రొక స‌ల‌హాదారుడు. సాక్షి జీత‌గాళ్ల‌కు ప్ర‌జాధ‌నం దోచిపెట్ట‌డానికి స‌ల‌హాదారుల పోస్టులు క‌ట్టబెట్టిన వైసీపీ ప్ర‌భుత్వం హైకోర్టు వ్యాఖ్య‌ల‌తో భ‌యం ప‌ట్టుకుంది. లెక్కలేనంత మంది స‌ల‌హాదారుల్ని వేసుకుని జ‌నం సొమ్ము దోపిడీకి దారులు వేసిన వైసీపీ స‌ర్కారుకి ఎంత మంది ఉన్నారో తెలియ‌క‌పోవ‌డం షాక్ కి గురిచేస్తోంది. దేవాదాయ శాఖ సలహాదారుగా శ్రీకాంత్, ఉద్యోగుల సంక్షేమ‌ సలహాదారుగా చంద్రశేఖర్ రెడ్డి నియామకాలపై హైకోర్టులో దాఖ‌లైన పిటిష‌న్ల‌పై వాద‌న‌ల సంద‌ర్భంగా కీల‌క వ్యాఖ్య‌లు చేసింది ధ‌ర్మాస‌నం.  చివ‌రికి ఉద్యోగుల‌కు డీఏ ఇవ్వ‌డం కోసం మరో సలహాదారున్ని నియమిస్తారా అని ప్రశ్నించారు. ఇలా వదిలేస్తే రేపు తహసీల్దార్లకు కూడా సలహాదారులను నియమిస్తారని కోర్టు ఆగ్ర‌హం వ్య‌క్తం చేసింది. ఐఏఎస్ అధికారులు ఉండగా శాఖలకు సలహాదారులు ఎందుకని హైకోర్టు ప్రశ్నించింది. సలహాదారుల నియామకంపై రాజ్యాంగబద్దతను తేలుస్తామని, ఎంత మంది స‌ల‌హాదారులున్నారో..వారి విధులు, జీత‌భ‌త్యాలు తెలియ‌జేయాల‌ని కోర్టు ఆదేశించింది. దీంతో తాము ఎడాపెడా నియ‌మించిన స‌ల‌హాదారులు ఎంత‌మంది  రాష్ట్రంలో ఉన్నారో వారి వివరాలు ప్ర‌భుత్వం సేక‌రిస్తోంది. శాఖలవారీగా సలహాదారుల వివరాలు వెంటనే పంపాలని అన్ని శాఖలకు ప్ర‌భుత్వం ఆదేశాలు జారీ చేసింది. సలహాదారుల పేర్లు, హోదా, ఎప్పట్నుంచి ఉన్నారనే వివరాలు పంపాలని, ఇవి హైకోర్టుకు సమర్పించాల్సి ఉంద‌ని కోరింది.

బ్రిటిష్ కాలం నాటి (1861) చ‌ట్టంని ఉప‌యోగించి ఏపీ స‌ర్కారు తెచ్చిన జీవో 1పై రాష్ట్ర ప్రభుత్వానికి సుప్రంకోర్టులో చుక్కెదురు అయ్యింది. ఈ జీవోని హైకోర్టు స‌స్పెండ్ చేయ‌డంతో సుప్రీం కోర్టులో జ‌గ‌న్ స‌ర్కారు వేసిన‌ పిటిషన్‌పై విచారణని ముగించారు. ప్రస్తుత పరిస్థితుల్లో ఈ పిటిషన్‌పై జోక్యం చేసుకోము అని స్పష్టం చేసిన ప్రధాన న్యాయమూర్తి ఆధ్వ‌ర్యంలోని ధర్మాసనం స్ప‌ష్టంచేసింది. కేసు తదుపరి విచారణను రాష్ట్ర హైకోర్టు ప్రధాన న్యాయమూర్తి ధర్మాసనం విచారణ చేపడుతుందని పేర్కొంది. ఈనెల 23న హైకోర్టు ప్రధాన న్యాయమూర్తి నేతృత్వంలోని ధ‌ర్మాస‌నం దీనిపై విచారణ చేపట్టాలని సిజెఐ ఆదేశించారు. వాద ప్రతివాదులు ఇరువురు అన్ని అంశాలను డివిజన్‌ బెంచ్‌ ముందు ప్రస్తావించుకోవచ్చని  పేర్కొన్నారు. అన్ని అంశాలు ఓపెన్‌గా ఉంచుతున్నామన్న సిజెఐ, కేసు మెరిట్స్‌పై ఇప్పుడు ఎలాంటి విచారణ చేపట్టడం లేదని తేల్చి చెప్పారు.  శీతాకాల సెలవుల్లో ఉన్న ధర్మాసనం ఈ కేసుని టేక‌ప్ చేయ‌డం, దాని విచారణ పరిధిపై రాష్ట్ర ప్రభుత్వం తరపు న్యాయవాది అభ్యంత‌రం లేవ‌నెత్తారు. దీనికి ప్రతివాదుల తరపు న్యాయవాదులు  స‌మాధానం ఇచ్చారు.

టిడిపి జాతీయ ప్ర‌ధాన కార్య‌ద‌ర్శి నారా లోకేష్ యువ‌గ‌ళం పేరుతో 400 రోజుల‌పాటు పాద‌యాత్ర చేస్తామ‌ని ప్ర‌క‌టించారు. దీనిపై వైసీపీ స్పంద‌న‌లు చాలా విచిత్రంగా వున్నాయి. లోకేష్ పాద‌యాత్ర చేస్తే మాకేంట‌ట అంటూనే రోజుకొక మంత్రి మీడియా ముందుకు వ‌చ్చి నోటికొచ్చిన విమ‌ర్శ‌లు చేస్తున్నారు. పాద‌యాత్ర‌ని ప‌ట్టించుకోన‌ప్పుడు మంత్రులు, ఎమ్మెల్యేలు విమ‌ర్శల‌తో విరుచుకుప‌డ‌టం వెనుక భావ‌మేంట‌ని రాజ‌కీయ ప‌రిశీల‌కులు వ్యాఖ్యానిస్తున్నారు. మ‌రోప‌క్క పాద‌యాత్ర‌కి ఇప్ప‌టివ‌ర‌కూ అనుమ‌తి ఇవ్వ‌కుండా తాత్సారం చేస్తున్నారు. జీవో1ని హైకోర్టు స‌స్పెన్ష‌న్లో పెట్టినా, దాని అమ‌లు కోసం సుప్రీంకోర్టు మెట్లెక్కి చీవాట్లు తిని వ‌చ్చారు. ఓ వైపు కోర్టుల ద్వారా ప‌రోక్షంగా ఆప‌డానికి ప్ర‌య‌త్నాలు చేస్తోంది జ‌గ‌న్ స‌ర్కారు. ఇంకోవైపు పోలీసుల‌కు అన్ని స్థాయిల్లో అనుమ‌తుల కోసం ద‌ర‌ఖాస్తులు చేసినా ఎవ్వ‌రూ అనుమ‌తి తిర‌స్క‌రించిన‌ట్టు కానీ..ఇస్తున్న‌ట్టు కానీ ప్ర‌క‌టించ‌కుండా నాన్చుతున్నారు. టిడిపి కార్యాల‌యం నుంచి రిమైండ‌ర్ లేఖ‌లు రాసినా స్పంద‌న శూన్యం. పాద‌యాత్ర కాక‌పోతే పొర్లుదండాలు పెట్టుకోమంటూ మంత్రి రోజా సెటైర్లకి టిడిపి నుంచి గ‌ట్టిగానే కౌంట‌ర్లు ప‌డ్డాయి. రాప్తాడు ఎమ్మెల్యే తోపుదుర్తి ప్ర‌కాష్ రెడ్డి మాట్లాడుతూ లోకేశ్ గురించి ఆలోచించాల్సినవసరం లేదంటూనే అక్క‌సు వెళ్ల‌గ‌క్కాడు. మొత్తానికి లోకేష్ పాద‌యాత్ర అనేస‌రికి వైసీపీలో వ‌ణుకు ప్రారంభ‌మైంద‌ని వాళ్ల ప్ర‌క‌ట‌న‌లు, చ‌ర్య‌ల వ‌ల్ల స్ప‌ష్టం అవుతోంది.