news

జగన్ మోహన్ రెడ్డి తన స్థాయిని కూడా మరిచి, ఇంకా రోడ్డు మీద పాదయాత్రలో తిరిగే నాయకుడుని అనుకుంటూ, ప్రతిపక్షాల పై వ్యక్తిగత విమర్శలు చేస్తూ, తన హోదాని దిగజారుస్తున్నారు. రాష్ట్రంలో ఎన్ని సమస్యలు ఉన్నా నోరు తెరవని జగన్ మోహన్ రెడ్డి, ఇంగ్లీష్ మీడియం పై, తన పైన వస్తున్న ఆరోపణలకు సమాధానం ఇస్తూ, వ్యక్తిగత విమర్శలు, అదీ తీవ్రంగా చేసి, అందరినీ ఆశ్చర్య పరిచారు. ఒక ముఖ్యమంత్రి హోదాలో ఉంటూ, ఇలాంటి వ్యాఖ్యలు చెయ్యటం పై, టీవీలు చేసే వారే కాదు, అక్కడ ఉన్న వైసిపీ మంత్రులు, ఎమ్మేల్యేలు కూడా అవాక్కయ్యారు. జగన్ మోహన్ రెడ్డి, ఒక సియం హోదాలో ఉంటూ, ఇలాంటి వ్యాఖ్యలు చేస్తారని, ఎవరూ ఊహించలేదు. రాష్ట్ర ప్రభుత్వ, తెలుగు మీడియంని పూర్తిగా ఎత్తేస్తూ, అన్ని ప్రభుత్వ స్కూల్స్ లో ఇంగ్లీష్ మీడియం పెడుతూ, ఉత్తర్వులు ఇచ్చింది. అయితే ఒకేసారి ఇలా మార్చేస్తే, ఎలా అని, అదీ కాక, ఎవరి ఇష్టం వచ్చినట్టు వారు చదువుకుంటారని, తెలుగు భాషని కాపాడే విధంగా ఉండాలని అన్ని వైపుల నుంచి విమర్శలు వస్తున్నాయి.

తెలుగుదేశం అధినేత చంద్రబాబు స్పందిస్తూ, గతంలో మేము ఆప్షన్స్ ఇచ్చామని, మీరు ఇలా చెయ్యటం కరెక్ట్ కాదని, తెలుగు భాషని కాపాడుకోవాలని అన్నారు. అలాగే పవన్ కళ్యాణ్, వరుస ట్వీట్లతో ఈ అంశం పై స్పందించారు. ఇక నిన్న ఉప రాష్ట్రపతి వెంకయ్య నాయుడు కూడా, మాతృభాషని కాపాడాలని, ఒక వ్యాసం రాసారు. అయితే అది తెలుగు ఒక్కటే కాదు, దేశంలో ఉన్న అన్ని భాషల గురించి రాసారు. అయితే, జగన్ మోహన్ రెడ్డి తన కోసమే రాసారని, బుజాలు తడుముకున్నారు. మరో పక్క అన్ని పేపర్లు కూడా, ఈ విషయం పై ప్రభుత్వాన్ని నిర్ణయాన్ని తప్పుబట్టాయి. దీని పై ఈ రోజు జగన్ స్పందిస్తూ, తన అక్కసును వెళ్ళగక్కారు. ఎందుకు నిర్ణయం తీసుకున్నాం, ఎలా చేస్తాం అనేది వివరంగా చెప్పకుండా, ఎదురు దాడి చేసారు. అది కూడా వ్యక్తిగత దాడి.

వెంకయ్య నాయుడు పిల్లలు ఎక్కడ చదువుతున్నారు, మీ కొడుకులు, మనవళ్లు ఏ మీడియంలో‌ చదువుతున్నారు. అంటూ, డైరెక్ట్ గా ఉప రాష్ట్రపతి పైనే వ్యాఖ్యలు చేసారు. నిజానికి వెంకయ్య, ఎక్కడా రాష్ట్ర ప్రభుత్వ నిర్ణయం పై స్పందించలేదు. కేవలం మన దేశంలో ఉన్న అన్ని భాషల గురించి వ్యాసం రాసారు. అయితే జగన్ మాత్రం తనకు ఆపాదించుకున్నారు. ఇక పవన్ కళ్యాణ్ పై అయితే, తీవ్రంగా వ్యక్తిగత దాడి చేసారు. అయ్యా సినిమా యాక్టర్ పవన్ కల్యాణ్ గారు.. పవన్ కల్యాణ్‌కు ముగ్గురు భార్యలు... నలుగురో ఐదుగురో పిల్లలు కూడా ఉన్నారు, వారు ఎక్కడ చదువుతున్నారు అంటూ ప్రశ్నించి, సమస్య పై స్పందించకుండా, వ్యకిగత దాడి చేసారు. అలాగే చంద్రబాబు, ఈనాడు, ఆంధ్రజ్యోతి పిల్లలు ఎక్కడ చదువుతున్నారు అంటూ, వ్యాఖ్యలు చేసారు. అయితే, ఒక ముఖ్యమంత్రి హోదాలో ఉంటూ, ఇలా మనసులో ఉన్నది ఉక్రోషంతో కక్కేస్తూ, వ్యాఖ్యలు చెయ్యటం పై, మాత్రం, జగన్ వైఖరిని ఆక్షేపించక తప్పదు. రేపు పవన్ కళ్యాణ్ కూడా, జగన్ కుటుంబ సభ్యుల పై, ఇలాంటి వ్యాఖ్యలు చేస్తే, ఏమి చేస్తారు ?

ప్రస్తుతం కార్తీక మాసం నడుస్తుంది. వనభోజనాలు టైం. ఎవరి కులం వాళ్ళు, ఇంకా చెప్పాలంటే, ఎవరి ఇంటి పేరున వాళ్ళు, కార్తీక వనసమారాధనలను చేసుకుంటూ ఉంటారు. కుల భోజనాలు అని కూడా, వీటికి పేరు ఉంది. ఒక కులం అని కాదు, అన్ని కులాల వారు ఇలాగే చేస్తారు. ఇక్కడ వరకు పర్వాలేదు కానీ, మా కులమే గొప్ప, అవతలి కులం ఇలా అలా అంటే మాత్రం, ఇది ఆక్షేపనీయం. ఇక ఈ కుల భోజనాల్లో, రాజకీయాలు మాట్లాడితే అంతకంటే హేయం కూడా ఉండదు. నీ కులం గురించి గొప్పగా చెప్పుకో, నీ చరిత్ర చెప్పుకో, నీ కులంలో ఉన్న గొప్పవాళ్ళని స్మరించుకుని, వారిలా జీవితంలో ఎలా ఎదగాలి అనేది నేర్చుకుంటే, ఇలాంటి వాటికి ఏమైనా అర్ధం ఉంటుంది. అంతే కాని, కులం గజ్జిని, భవిష్యత్తు తరానికి అందిస్తూ, మనమే గొప్ప, ఎదుటి వాళ్ళు అందరూ అల్పులు, అని అర్ధం వచ్చేలా వ్యాఖ్యలు చేస్తే మాత్రం, ఇది ఏ మాత్రం సమాజానికి మంచిది కాదు. మన కర్మకి, ఇప్పుడు ఇలాగే జరుగుతుంది.

అయితే ఇప్పుడు నిన్న జరిగిన ఒక సంఘటన గురించ చెప్పుకుందాం. కాకినాడ సమీపంలోని అచ్చంపేటలో రెడ్డి సంక్షేమ సంఘం ఆధ్వర్యంలో, కార్తీక వన సమారధాన జరిగింది. ఈ కార్తీక వనసమారాధనలకు, ముఖ్య అతిధిగా, నగరి ఎమ్మెల్యే, ఏపీఐఐసీ చైర్మన్‌ ఆర్‌కే రోజా వచ్చారు. ఆమె మాట్లాడుతూ, ఈ సంవత్సరం, జగన్ అన్న పాలనలో, రెడ్డి కులస్థులు కార్తీక వనసమారాధనలను చాలా సంతోషంగా జరుపుకుంటున్నారని అన్నారు. ఇక్కడతో ఆగకుండా, తెలుగుదేశం పార్టీ పై కుల విమర్శలు చేసారు. గత అయుదు సంవత్సరాల్లో చంద్రబాబు రెడ్లను తొక్కి పెట్టి, తీవ్రంగా అవమానపరిచారని అన్నారు. రెడ్ల అందరూ, కష్టపడి జగన్ అన్నకు, 151 సీట్లు వచ్చేలా కష్టపడ్డారని, రెడ్లు అంటే ఒక కులం కాదని, ఒక గుణం, ఒక ధైర్యం, ఒక భరోసా అని, రోజా అన్నారు.

అయితే, రోజా వ్యాఖ్యల పై, పెద్ద దుమారమే రేగింది. 151 మంది ఎమ్మెల్యేలు గెలవటానికి, కేవలం రెడ్లు మాత్రమే సహాయం చేసారా ? మిగతా కులాల వారి సంగతి ఏంటి అని ప్రశ్నిస్తున్నారు. మీకు వచ్చిన 50 శాతం ఓట్లు రెడ్ల వల్ల వచ్చాయి అంటారా అని ప్రశ్నిస్తున్నారు. మిగతా కులాల వాళ్ళు మీకు ఓట్లు లేదంటారా ? చివరకి కమ్మ కులంలో నుంచి కూడా దాదాపుగా 40 శాతం ఓట్లు వైసిపీకి పడ్డాయని గుర్తు చేస్తున్నారు. రెడ్లు మాత్రమే సంతోషంగా ఉంటే చాలా అని రోజా వ్యాఖ్యలకు ప్రశ్నిస్తున్నారు. 40 లక్షల మంది భవన నిర్మాణ కార్మికులు, అన్ని కులాలు వారు, మతాల వారు, చివరకు రెడ్డి కులస్తులు కూడా, పనులు లేక పస్తులు ఉంటున్నారని, వారిని కూడా సంతోష పెట్టే కార్యక్రమం చెయ్యమని, జగన్ కు చెప్పమని అంటున్నారు. ఇక చంద్రబాబు రెడ్లను తోక్కేసారు అనటం పై కూడా విమర్శలు వస్తున్నాయి. చంద్రబాబు 5 మంత్రి పదవులు ఇచ్చి, కార్పొరేషన్ చైర్మన్ పదవులు ఇచ్చి రెడ్లను గౌరవించారని గుర్తు చేస్తున్నారు. అంతెందుకు, ఇన్ని చెప్తున్న రోజా రెడ్డి గారిని, రాజకీయాల్లోకి తీసుకు వచ్చిందే చంద్రబాబు అనే విషయం, ఆమె మర్చిపోవటం, ఆశ్చర్యకరం. చంద్రబాబు సమాజంలో అన్ని వర్గాలకు ప్రాధాన్యత ఇచ్చారని, కుల ముద్ర వేసుకోవాలి అంటేనే ఆయన భయపడతారని గుర్తు చేస్తున్నారు. ఒక ప్రజా ప్రతినిధిగా ఉంటూ, కులాల పై మాట్లాడటం, సమంజసం కాదని, రోజాకి గుర్తు చేస్తున్నారు.

ఆంధ్రప్రదేశ్ రాష్ట్ర ప్రభుత్వ మాజీ చీఫ్ సెక్రటరీ, ఎల్వీ సుబ్రహ్మణ్యానికి ఢిల్లీ నుంచి పిలుపు రావటం, సంచలనంగా మారింది. ఆయన ఢిల్లీ పిలుపు మేరకు, రెండు రోజుల క్రితమే ఢిల్లీ చేరుకున్నారు. అయితే, ఆయనకు ఆదివారం ప్రధాని మోడీతో అపాయింట్మెంట్ ఉంటుందని వార్తలు వచ్చాయి. అయితే మహారాష్ట్ర పరిణామాలు నేపధ్యంలో, ప్రధాని మోడీ బిజీగా ఉండటంతో, ప్రధానితో భేటీకి కుదరలేదు. రాత్రి వరకు పీఎంఓ వేచి చూడమని చెప్పినా, ప్రధాని అందుబాటులోకి రాకపోవటంతో, ఆయన నిన్న రాత్రి హైదరాబాద్ తిరిగి వచ్చేసారు. అయితే, ఈ నెల 15న, ఆయనకు ప్రధాని మోడీ మరో అపాయింట్మెంట్ ఇచ్చారని, తెలుస్తుంది. ఈ నెల 14న మరోసారి ఎల్వీ ఢిల్లీ వెళ్లనున్నారు. ప్రధాని మోడీతో ఏ అంశాల పై స్పందిస్తారు అనే విషయం మాత్రం తెలియటం లేదు. హస్తిన నుంచి పిలుపు రావటంతో, అటు వైపు నుండే అజెండా ఉండే అవకాసం కనిపిస్తుంది. మరో పక్క ఎల్వీ కూడా, తనా మనసులో మాట చెప్పే అవకాసం ఉంది.

ముఖ్యంగా ఆయన కేంద్ర సర్వీసులకు వస్తాను అనే ప్రతిపాదన ప్రధాని ముందు పెట్టబోతున్నారని, అలాగే రాష్ట్ర ప్రభుత్వం తనను అవమానకరంగా సాగనంపిన తీరు గురించి ఆయన ఫిర్యాదు చేసి, రాష్ట్రం పై ట్రిబ్యునల్ లో పోరాడటానికి కూడా కేంద్రం దగ్గర సలహా తీసుకోనున్నారని తెలుస్తుంది. ఈ నెల నాలుగున, ఎల్వీని అకస్మాత్తుగా బదిలే చేసి, సాధారణ హోదా కలిగిన బాపట్లలోని ఏపీ మానవ వనరుల అభివృద్ధి సంస్థ డైరెక్టర్‌గా పోస్టింగ్ ఇచ్చారు. అయితే, ఎల్వీ మాత్రం, ఆ పదవి తీసుకోకుండా, వచ్చే నెల 6 వరకు లాంగ్ లీవ్ పెడుతూ, సెలవు పై వెళ్ళిపోయారు. ఆయన తరువాత ఢిల్లీలో ప్రత్యక్షం అవ్వటంతో, ఏమి జరుగుతుందా అని చర్చకు దారి తీసింది. ఆయన బదిలీ తీరు పై, ప్రతిపక్షాలు కూడా, ఆయనకు మద్దతుగా నిలిచాయి.

మరో చర్చ ఏమిటి అంటే, రాష్ట్రంలో జరుగుతున్న జగన్‌ పాలన, లోటుపాట్ల గురించి ఒక నివేదికను ఎల్వీ తయారు చేసారని, ఆ నివేదికను కూడా ప్రధానికి ఇస్తారనే చర్చ, రాజకీయ వర్గాల్లో ప్రధానంగా చర్చనీయాంశంగా మారింది. అయితే ఎల్వీ ఢిల్లీ వెళ్ళటం వెనుక, బీజేపీ కూడా ఉందని ప్రచారం జోరుగా సాగుతోంది. ఒక మాజీ ఐఏఎస్ అధికారి, తతంగం మొత్తం నడుపుతున్నారని తెలుస్తుంది. ఒక చీఫ్ సెక్రటరీని బదిలీ చెయ్యటం అంటే, ఒక పెద్ద సంచలనం అని, ప్రధాని కూడా ఈ విషయం పై అరా తియ్యటంతో, ఆయనకే నేరుగా విషయం చెప్పే విధంగా, ఎల్వీని ప్రధానితో భేటీ అయ్యేలా చేస్తున్నారని సమాచారం. బీజేపీ ఈ వ్యవహారంలో, రాజకీయ మలుపు తిప్పి, రాజకీయంగా ఈ అంశాన్ని ఉపయోగించుకునే పనిలో భాగంగానే, ఎల్వీ ఢిల్లీ ట్రిప్ అనే ప్రచారం జరుగుతుంది. 15న ప్రధానితో భేటీ అయిన తరువాత కాని, అసలు విషయం తెలిసే అవకాసం లేదు.