news

కొత్త ప్రభుత్వం వచ్చింది, ప్రతిపక్షంలో ఉండగా ఎన్నో హామీలు ఇచ్చారు, మాట తప్పరు, మడం తిప్పరు అని చెప్తారు, ఇక మన జీవితాలు మారిపోతున్నాయి, సంతోషమే సంతోషం అని భావించిన వివిధ వర్గాల ప్రజలు, రాష్ట్రంలో పోరాట బాట పడే పరిస్థితి వచ్చింది. ఇసుక లేక కూలి పని చేసుకునే వారి దగ్గర నుంచి, చిరు ఉద్యోగులు దాకా, మా జీవితాలు మార్చేస్తాడని నమ్మి జగన్ కు ఓటు వేశాం, ఇప్పుడు కనీసం పనులు లేక, ఉద్యోగ భద్రత లేక, రోడ్డున పడ్డాం అంటూ, రోజుకి ఒక వర్గం ప్రజలు, ఆందోళనలు చేస్తూ, ఉద్రిక్త పరిస్థితులు ఉండటం, మనం చూస్తున్నాం. ఈ రోజు వంతు, ఏపీలో ఏఎన్ఎంలది. తమకు కొత్తగా వస్తున్న గ్రామ సచివాలయ వ్యవస్థ వల్ల, తమ ఉద్యోగాలు పోయే పరిస్థితి వచ్చిందని ఆరోపిస్తూ, వారు ఈ రోజు ధర్నా చేసారు.

తమకు ఉద్యోగ భద్రత కలిగించాలని, కోరుతూ పెద్ద ఎత్తున ఆందోళన బాట పట్టారు. కొత్తగా వస్తున్న గ్రామ సచివాలయ పోస్టుల్లో ముందుగా తమకే ప్రాధాన్యం ఇవ్వాలని, తమ ఉద్యోగాలను ముందుగా క్రమబద్ధీకరించిన తరువాతే, కొత్తగా నోటిఫికేషన్‌ ఇవ్వాలని వారు కోరుతున్నారు. ఈ డిమాండ్లను ప్రభుత్వం ముందు ఉంచామని, ప్రతి రోజు ఆందోళన చేస్తున్నామని, అసెంబ్లీ జరుగుతున్నా సరే, మమ్మల్ని ఎవరూ పట్టించుకోలేదని వారు ఆందోళన చేసారు. ఈ రోజు డీఎంహెచ్‌వో కార్యాలయాల ముట్టడికి ఏఎన్‌ఎంలు ప్రయత్నించారు. అయితే ఏఎన్‌ఎంలు చేసిన ధర్నా ఉద్రిక్తతలకు దారి తీసింది. దీంతో పోలీసులు రంగ ప్రవేశం చేసి, వారిని ఈడ్చి అవతల పడేసారు. ఆడవాళ్ళు అని కూడా చూడకుండా, విచక్షణ లేకుండా ప్రవర్తించారు.

దీంతో కొంత మందికి గాయాలు కూడా అయ్యాయి. వారిని అదుపులోకి తీసుకుని పోలీస్‌స్టేషన్‌కు తరలించారు. తాము ఎన్నో ఆశలు పెట్టుకున్నామని, తమ కళ్లల్లో జగన్ ప్రభుత్వం కారం కొట్టిందని ఏఎన్‌ఎంలు ఆవేదన వ్యక్తం చేస్తున్నారు. అయితే వీరి ఆందోళన పై చంద్రబాబు స్పందించారు. అమెరికా పర్యటనలో ఉన్న చంద్రబాబు, ట్విట్టర్ ద్వారా స్పందించారు. ఉన్న ఉద్యోగాలు ఊడబీకి, కొత్త వాళ్ళకు ఉద్యోగాలు ఇస్తూ, ఇదే ఉద్యోగ కల్పన అంటూ ప్రచారం చేస్తున్న వీరిని ఏమనాలో అర్ధం కావటం లేదని అన్నారు. పెర్మనెంట్ ఉద్యోగాలు ఇస్తామని హామీ ఎందుకు ఇచ్చారని నిలదీశారు. తమ సమస్యలు చెప్పుకుందామని వస్తే ఇంటి చుట్టూ 144 సెక్షన్ పెట్టుకుంటారా? ఇది సీఎం ఇల్లా లేక లోటస్ పాండ్ లాంటి ప్రైవేటు రాజభవనమా?" అంటూ చంద్రబాబు ట్వీట్ చేసారు. ఒక్కరి ఉద్యోగం కూడా తియ్యటానికి వీలు లేదని, హామీ నిలబెట్టుకోవాలని చంద్రబాబు కోరారు.

జగన్ మోహన్ రెడ్డి కేసుల్లో, వాన్‌పిక్ కేసులో సహా నిందుతుడు అయిన నిమ్మగడ్డ ప్రసాద్ ను ఈ రోజు సెర్బియా దేశంలో, అక్కడి పోలీసులు అరెస్ట్ చెయ్యటం సంచలనంగా మారింది. ఇక్కడ సిబిఐ, ఈడీ కేసులు స్లో అయితే, అంతర్జాతీయంగా, మనోళ్ళు చేసిన పనికి మాత్రం, వీళ్ళు దొరికిపోతున్నారు. అక్కడ చట్టాలు ఖటినంగా ఉంటాయి కాబట్టి, తప్పించుకోవటం కుదరదు. ఇక వివరాల్లోకి వెళ్తే, నిమ్మగడ్డ ప్రసాద్‌‌ సెర్బియా దేశంలో హాలిడే ఎంజాయ్ చెయ్యటానికి వెళ్లారు. అయితే ఆయన్ను సెర్బియా పోలీసులు అరెస్ట్ చేసారు. వాన్‌పిక్ కేసులో నిమ్మగడ్డ ప్రసాద్ ను అక్కడ పోలీసులు అరెస్ట్ చేసారు. రస్ అల్ ఖైమాకు చెందిన ప్రతినిధులు ఇచ్చిన ఫిర్యాదుతో, సెర్బియాలోని బెల్‌గ్రేడ్‌లో నిమ్మగడ్డను అదుపులోకి తీసుకున్నారు.

అక్కడ పోలీసులు అదుపులోకి తీసుకుని, నిమ్మగడ్డను ప్రశ్నిస్తున్నారు. అయితే ఆయన అరెస్ట్ అయ్యి రెండు రోజులు అయినట్టు సమాచారం. ఈ సమాచారం చాలా లేట్ గా ఈ రోజు బయటకు వచ్చింది. అది కూడా వైసీపీ నేతల అత్యుత్సాహం వల్లే తెలిసింది. అక్కడ విహార యాత్రకు వెళ్ళిన నిమ్మగడ్డను రెండు రోజుల క్రితం అరెస్ట్ చెయ్యటంతో, తాడేపల్లిలో ప్రకంపనలు మొదలయ్యాయి. దీంతో వైసిపీ నేతలు రంగంలోకి దిగారు. ఎక్కడ ఏమి తమ మెడకు చుట్టుకుంటుందో అనే భయంతో, కేంద్రానికి వైసీపీ ఎంపీలు లేఖ రాసారు. నిమ్మగడ్డ సెర్బియాలో అరెస్ట్ అయ్యారని, ఆయన్ను వెంటనే భరత్ రప్పించే ప్రయత్నం చెయ్యాలని, వైసీపీ ఎంపీలు కేంద్రానికి లేఖ రాసినట్టు వార్తలు వచ్చాయి.

ఇదే విషయం పై, వైసీపీ ఎంపీలు, సెర్బియాతో సంప్రదింపులు జరపాలంటూ విదేశాంగమంత్రి జైశంకర్‌కు లేఖ రాసారు. దీంతో ఈ వ్యవహారం బయట పడింది. నిమ్మగడ్డ అరెస్ట్ అయితే, వైసీపీ ఎంపీలకు ఎందుకు అనే అనుమానం చాలా మంది తెలియని వాళ్లకు వచ్చే అనుమానం. నిజానికి నిమ్మగడ్డకు, జగన్ కు సన్నిహిత సంబంధాలు ఉన్నాయి. జగన్ కంపనీల్లో నిమ్మగడ్డ ప్రసాద్, 854 కోట్ల రూపాయల పెట్టుబడి పెట్టటం సంచలనం అయ్యింది. తరువాత వాన్పిక్ కేసులు అరెస్ట్ అవ్వటం, సిబిఐ కేసులు, ఇవన్నీ మనం చూసాం. పోయిన ఏడాది, పనామా పేపర్స్ లీక్స్ లో కూడా, నిమ్మగడ్డ, జగన్ వ్యవహారం ప్రముఖంగా వచ్చిన సంగతి తెలిసిందే. ఇప్పుడు మళ్ళీ నిమ్మగడ్డ అరెస్ట్ అవ్వటం, అదీ దేశం బయట అరెస్ట్ అవ్వటంతో, ఏమి అవుతుందా అనే టెన్షన్ వైసీపీ వర్గాలో వ్యక్తం అవుతుంది.

ఎన్నికల ఫలితాలు తరువాత దాదపుగా కనుమరుగు అయిన పవన్ కళ్యాణ్, గత రెండు మూడు రోజుల నుంచి, తన పార్టీ వ్యవహారాల్లో బిజీ అవుతున్నారు. ఎన్నో సమస్యలు ఉన్నా, పవన్ మాత్రం, జగన్ మోహన్ రెడ్డికి టైం ఇస్తాను అంటున్నారు. నిన్న పార్టీ రాజకీయ వ్యవహారాల కమిటీ సమావేశంలో పవన్ పాల్గుని కొన్ని ఆసక్తికర వ్యాఖ్యలు చేసారు. కొన్ని జాతీయ పార్టీలు తన వద్దకు వచ్చాయని, తముతో కలిసి పని చెయ్యాలని కోరుతున్నాయని అన్నారు. వారితో కలిసినా, లౌకిక పంథాను వదలనని పవన్ కళ్యాణ్ అన్నారు. అంతే కాదు, తాను జగనసేన పార్టీని విలువలు కోసం పెట్టానని, ఆ పార్టీని వేరే పార్టీలో విలీనం చేసే ప్రసక్తే లేదని అన్నారు. అయితే, పవన్ కళ్యాణ్ చేసిన ప్రకటన పై, విశ్లేషణలు మొదలయ్యాయి.

పవన్ కళ్యాణ్ బీజేపీతో కలిసి పని చెయ్యటానికి సిద్ధమవుతున్నట్టు ఆయన మాటలు చూస్తూ అర్ధమవుతుంది అని అంటున్నారు. ఎందుకంటే పవన్ కళ్యాణ్ కాంగ్రెస్ హటావో అనే పిలుపు ఇచ్చారు. బీజేపీ పై ఎప్పుడూ సానుకూలంగా ఉంటూ వచ్చారు. అప్పుడప్పుడు విమర్శలు చేసినా, మోడీ, అమిత్ షా పేరు కూడా ఎత్తకుండా, పవన్ రాజకీయం నడిపారు. చాలా సందర్భాల్లో తనకు మోడీ ఎంతో ఇష్టమైన నాయకుడు అని పవన్ కళ్యాణ్ చెప్పారు. అంతే కాదు పవన్ పనిగట్టుకుని, నేను ఎవరితో కలసినా, లౌకికవాదం వీడను అంటే, దాని అర్ధం ఆయన బీజేపీతో కలిసి వెళ్ళటానికి నిర్ణయం తీసుకున్నారని అర్ధమవుతుందని విశ్లేషకులు అభిప్రాయ పడుతున్నారు. రెండు రోజుల క్రితం పవన్ కళ్యాణ్, నాదెండ్ల మొనోహర్, చిరంజీవిని కలిసిన సంగతి తెలిసిందే.

చిరంజీవి, బీజేపీలో చేరతారని, ఆయనకు బీజేపీ రాష్ట్ర అధ్యక్షుడు బాధ్యతలు ఇస్తారనే ప్రచారం జరుగుతుంది. ఈ నేపధ్యంలో, పవన్ కళ్యాణ్, చిరంజీవిని కలవటం, ఆ తరువాత, నేను జాతీయ పార్టీతో కలిసి వెళ్ళటానికి సిద్ధంగా ఉన్నాను అని చెప్పటం చూస్తుంటే, పవన్ కళ్యాణ్ బీజేపీతో కలిసి ప్రయాణం చెయ్యటం, ఖాయంగా కనిపిస్తుంది. అయితే, పవన్ కళ్యాణ్ మొన్నటి వరకు ప్రధాన ఎజెండాగా, ప్రత్యెక హోదా పెట్టుకున్నారు. తన వల్లే ప్రత్యేక హోదా సజీవంగా ఉందని చెప్పుకునే వారు. మరి ఇప్పుడు బీజేపీ, అసలు హోదా లేదు అని తేల్చి చెప్పింది. అలాంటిది, పవన్ ఆ పార్టీలోకి ఎలా వెళ్తారు అనే వాదన కూడా వినిపిస్తుంది. మరో పక్క, కొన్ని రోజుల క్రిందట పవన్ మాట్లాడుతూ, ప్రత్యెక హోదా పై జనాల్లో అసలు ఏమి లేదని, తాను ఒక్కడినే పోరాటం చేస్తే ఏమి లాభం అని చెప్పిన విషయాలు ఇక్కడ గుర్తు తెచ్చుకోవాలి. అంటే పవన్ , బీజేపీతో కలిసి వెళ్ళే ఆలోచన ఉంది కాబట్టే, మొన్నటి దాక, తానె ప్రత్యేక హోదా ప్రతినిధిని అని చెప్పుకున్న పవన్, ఇప్పుడు మాత్రం, హోదా సెంటిమెంట్ ప్రజల్లో లేదు అని చెప్పేసారు. ఏది ఏమైనా, మన రాష్ట్రంలో కొత్త రాజకీయ సమీకరణాలు చూడబోతున్నాం.