news

తిరుపతి నుంచే తన రాజకీయ జీవితం ప్రారంభమైందని, విద్యార్థి దశ నుంచే రాజకీయాల్లోకి వచ్చానని తెదేపా అధినేత, సీఎం చంద్రబాబు అన్నారు. అప్పటి నుంచి ఇప్పటి వరకు న్యాయం కోసం పోరాడుతూనే ఉన్నానని, కష్టపడి పని చేస్తూ.. నిజాయతీగా ఉన్నానన్నారు. ఎన్టీఆర్‌ ట్రస్ట్‌ ఆధ్వర్యంలో తిరుపతిలో ఏర్పాటు చేసిన రక్త నిధి కేంద్రాన్ని ఆయన ప్రారంభించారు. అనంతరం మీడియాతో మాట్లాడుతూ.. న్యాయం అనుకున్నప్పుడు రాజీలేని పోరాటం చేశానని, జాతీయ స్థాయిలో ఎక్కడ అన్యాయం జరిగితే అక్కడ పోరాడానని చెప్పారు. రాష్ట్ర విభజనతో ఏపీ తీవ్రంగా నష్టపోయిందన్నారు. విభజన అనివార్యమైతే రెండు ప్రాంతాలకూ న్యాయం చేయాలని కోరానని గుర్తు చేశారు.

విభజన హామీలు, ప్రత్యేక హోదాపై తిరుపతిలో ప్రధాని మోదీ హామీ ఇచ్చారని.. వాటిని అమలు చేయకుండా రాష్ట్ర ప్రజలను మోసం చేశారని చంద్రబాబు ఆరోపించారు. ఆ హామీలు నెరవేర్చాలన్న డిమాండ్‌తో రాజీలేని పోరాటం చేశామన్నారు. ధర్మపోరాట దీక్ష ప్రారంభించి నేటితో ఏడాది పూర్తయిందని చంద్రబాబు వివరించారు. ‘ప్రస్తుతం ప్రజాస్వామ్య వ్యవస్థలను నిర్వీర్యం చేసే పరిస్థితి వచ్చింది. ఎన్నికల సంఘాన్ని దుర్వినియోగం చేయాలని చూశారు. కానీ, నా పోరాటం ఎన్నికల సంఘంపై కాదు.. ఈసీ అవలంభించే విధానాలపైనే’ అని చంద్రబాబు స్పష్టం చేశారు. ఒడిశా, కర్ణాటక సీఎంలు ప్రయాణించే హెలికాప్టర్లను ఈసీ అధికారులు తనిఖీ చేశారని.. ప్రధాని హెలికాప్టర్‌లో తనిఖీ చేసిన అధికారిని మాత్రం సస్పెండ్‌ చేశారని చంద్రబాబు ఆరోపించారు.

ఎన్నికల కోడ్‌ అమల్లో ఉన్నప్పటికీ ఐబీ సహా ఇతర అధికారులతో ప్రధాని సమీక్షలు చేస్తున్నారని విమర్శించారు. ప్రజాస్వామ్యాన్ని కాపాడుకోవడం మనందరి బాధ్యత అని సీఎం అన్నారు. ‘అందరికీ ఆంక్షలు పెడితే నేను కూడా అనుసరిస్తాను. ఆంక్షలు కేవలం ఆంధ్రప్రదేశ్‌కే ఎందుకు వర్తింపజేస్తున్నారు?’ అంటూ ఈసీపై మండిపడ్డారు. కర్ణాటక, తమిళనాడులో భాజపా మినహా ఇతర పార్టీల నేతలపైనే ఐటీ దాడులు జరిగాయని, ఇలాంటి చర్యలతో ప్రజాస్వామ్యాన్ని అపహాస్యం చేయవద్దన్నారు. మోదీ కోసం కాకుండా దేశం కోసం పని చేయాలని ఈసీకి సూచించారు. ‘ఈ సారి మోదీ ఇంటికి వెళ్లడం ఖాయం’ అంటూ చంద్రబాబు వ్యాఖ్యానించారు.

ముఖ్యమంత్రి హోదాలో చంద్రబాబు సమీక్షలు చేయడంపై ఎన్నికల సంఘం అభ్యంతరం తెలిపిన సంగతి తెలిసిందే. ఎన్నికల కోడ్ అమలులో ఉన్నందును సమీక్షలు చేయడానికి వీల్లేదని ఈసీ చెబుతోంది. ఈ వ్యవహారం రాజకీయ రంగు పులుముకోవడంతో వైసీపీ-టీడీపీ మధ్య మాటల యుద్ధం నడుస్తోంది. తాజాగా వైసీపీ చేసిన విమర్శలకు మంత్రి నారా లోకేష్ ట్విట్టర్‌లో కౌంటరిచ్చారు. రాష్ట్రానికో రూల్ ఉందా అంటూ ఘాటుగా ట్వీటారు. ‘ఎన్నికల కోడ్ ఒక్క ఏపీలోనే ఉందా? ఈసీ ఆంక్షలన్నీ ఒక్క టీడీపీకే వర్తిస్తాయా?ఎండలు, తాగునీటి సమస్యలపై కూడా ముఖ్యమంత్రి సమీక్షలు జరిపి చర్యలు తీసుకోకపొతే ప్రజల పరిస్థితి ఏమిటి? ఆలోచించరా? కోడి గుడ్డు మీద ఈకలు పీకే మీ బుద్ధి మారదా?’అన్నారు . ‘తెలంగాణ ముఖ్యమంత్రి జరిపే సమీక్షల్లో ప్రధాన కార్యదర్శితో సహా డీజీపీ కూడా పాల్గొంటున్నారు. కెసిఆర్ సమీక్షలపై సమాచార పౌర సంబంధాల శాఖ అధికారికంగా పత్రికా ప్రకటనలు కూడా చేస్తోంది. అక్కడ కోడ్ వర్తించదా? ఏంటీ పక్షపాతం?’అని ప్రశ్నించారు.

ముఖ్యమంత్రి చంద్రబాబునాయుడు గురువారం సచివాలయంలో నిర్వహించిన సీఆర్డీయే పనుల పురోగతిపై నిర్వహించిన సమీక్షతో సరికొత్త వివాదం తెరమీదికి వచ్చింది. ముఖ్యమంత్రి ఏకపక్షంగా వ్యవహరిస్తూ, రాష్ట్రంలోని ఎన్నికల నిబంధనలను తూట్లు పొడుస్తున్నారని ప్రతిపక్షపార్టీ వైఎస్‌ఆర్‌ కాంగ్రెస్‌, బీజేపీ నేతలు గగ్గోలు పెడుతున్న సంగతి తెలిసిందే. గురువారం సీఎం సీఆర్డీయే సమీక్ష నిర్వహించిన అనంతరం మధ్యాహ్నం వైఎస్‌ఆర్‌ కాంగ్రెస్‌పార్టీ నేతలు వెలగపూడిలోని అమరావతి సచివాలయంలో 5వ బ్లాక్‌లో రాష్ట్ర ఎన్నికల ప్రధాన అధికారికి లిఖిత పూర్వకమై ఫిర్యాదును అందజేశారు. అప్పటికే రాష్ట్ర ఎన్నికల ప్రధాన అధికారి గోపాలకృష్ణ ద్వివేది ముఖ్యమంత్రి చంద్రబాబు కార్యాలయ ఉన్నతాధికారులకు నోటీసులను ప్రత్యేక దూతతో పంపారు.

సీఈఓ కార్యాలయం నుండి నోటీసు అందిందన్న విషయం తెలిసిన వెంటనే చంద్రబాబు అమరావతి నిర్మాణ పనుల పురోగతి, రాష్ట్రంలోని శాంతిభద్రతలపై హోంమంత్రి నిమ్మకాయల చినరాజప్ప, సీఎస్‌ ఎల్వీ సుబ్రహ్మణ్యం, డీజీపీ ఆర్పీ ఠాకూర్‌, హోంశాఖ ముఖ్యకార్యదర్శి ఏ.ఆర్‌.అనూరాధ, ఇతర ఉన్నతాధికారులతో కలిసి సమీక్ష నిర్వహించాలని భావించి, ఆపైన రద్దు చేసుకున్నారు. శాంతిభద్రతలపై సమీక్షకు సంబంధించి సీఎస్‌ ఎల్వీ సుబ్రహ్మణ్యం ముఖ్యమంత్రి కార్యాలయ ప్రత్యేక ప్రధాన కార్యదర్శి సతీష్‌చంద్రతో చర్చించారు. ప్రస్తుతం రాష్ట్రంలో ఎన్నికల కోడ్‌ అమలులో ఉన్నందున ముఖ్యమంత్రి నిర్వహించే సమీక్షా సమావేశానికి రాష్ట్ర ప్రభుత్వ ప్రధాన కార్యదర్శి హోదాలో తాను హాజరు కాకూడదని, ఇది కోడ్‌కు వ్యతిరేకమని స్పష్టం చేయడంతోపాటు, సీఎంతో హోంశాఖ ముఖ్యకార్యదర్శి అనూరాధ విడిగా భేటి అయ్యి, శాంతిభద్రతలకు సంబంధించిన ముఖ్యమంత్రి సూచనలు తనకు తెలియజేయాలని ఆదేశించారు. దీంతో సీఎం చంద్రబాబు కూడా వెనక్కి తగ్గనట్లు సీఎం కార్యాలయ ఉన్నతాధికారి ఒకరు తెలిపారు.

ఏపీకి కాబోయే ముఖ్యమంత్రి వైసీపీ అధినేత వైఎస్ జగన్ మోహన్‌రెడ్డి అంటూ ఇటీవల సోషల్ మీడియాలో ఓ నేమ్ ప్లేట్ దర్శనమిచ్చిన సంగతి తెలిసిందే. ఈ నేమ్‌ప్లేట్ సోషల్ మీడియాలో వైరల్ అయ్యింది. ఈ వ్యవహారంపై సీఎం చంద్రబాబు స్పందించారు. శనివారం రోజున తిరుపతిలో పుట్టిన రోజు వేడుకలు జరుపుకున్న ఆయన అనంతరం కార్యక్రమంలో మాట్లాడుతూ.. వైసీపీ గెలుస్తుందని సీఎం అంటూ నేమ్‌బోర్డ్‌లు రాసుకోవడం చూశామని అయితే అసలు నిజాలు తెలియడంతో నేతలు పారిపోయారన్నారు. అధికారులపై ఉన్న కేసుల జగన్ వల్ల కలిగిన ఇబ్బందులను ఈ సందర్భంగా ఆయన గుర్తు చేశారు. తనకు అధికారులపై ఎలాంటి ద్వేషం లేదన్నారు.

చంద్రబాబు మాట్లాడుతూ ఇదే తిరుపతిలో మోడీ రాష్ట్రానికి న్యాయం చేస్తామని హామీ ఇచ్చి మాట తప్పారని.. నేటికి ధర్మ పోరాట దీక్ష మొదలుపెట్టి ఏడాది పూర్తయిందన్నారు. హామీలను నెరవేర్చకపోతే రాజీలేని పోరాటం చేశామని.. ఇప్పుడు మళ్ళీ ఎన్నికల కోడ్ అడ్డుపెట్టుకొని కుట్రలు చేస్తున్నారన్నారు. ఇప్పడు నా పోరాటం ఎన్నికల సంఘం మీద కాదని.. ఎన్నికల సంఘం అవలంభిస్తున్న తీరు మీద తన పోరాటమన్నారు. ఎవరి ఆదేశాల మేరకు ఎన్నికల సంఘం పనిచేస్తుందో రాష్ట్రంలో అందరికీ తెలుసని.. వైసీపీ నేతలు ఫిర్యాదులు ఈసీకి ఆదేశాలుగా మారుతున్నాయన్నారు.

దేశంలో ఎక్కడా ఎవరికి లేని ఆంక్షలు ఏపీలో ఉంటున్నాయన్న బాబు ప్రధాని మోడీ ఐబీతో సహా అన్ని సమీక్షలు చేస్తున్నారన్నారు. అందరికీ ఆంక్షలు పెడితే నేను కూడా అనుసరిస్తానని.. ఒక్క ఏపీలోనే ఈ విధానాలు ఎందుకని ప్రశ్నించారు. అధికారులను ప్రధాని మోడీ కోసం పనిచేయవద్దని కోరుతున్నానని.. ప్రజాస్వామ్యం కోసం, ప్రజల కోసం పనిచేయాలని అయన కోరారు. బీజేపీ, మోడీకి వ్యతిరేకంగా దేశంలో ఏ పార్టీ, ఏ అభ్యర్థి పనిచేస్తుంటే అక్కడ ఈసీ, ఐటీ, ఈడీ ప్రత్యక్షమవుతారని.. ఇదే ప్రజాస్వామ్యమంటే అని ప్రశ్నించారు.