news

ఆంధ్రప్రదేశ్‌ రాష్ట్ర ప్రభుత్వ ప్రధాన కార్యదర్శి అనిల్‌ చంద్ర పునేఠా బదిలీపై ముఖ్యమంత్రి చంద్రబాబు తీవ్రంగా స్పందించారు. ఎందుకు బదిలీ చేశారో వివరణ ఇవ్వాలని కేంద్ర ఎన్నికల సంఘాన్ని డిమాండ్‌ చేశారు. పార్టీలకతీతంగా ఎన్నికలు నిర్వహించాలని కోరారు. ఎన్నికల ప్రచారంలో భాగంగా విశాఖలోని ఎన్‌ఏడీ కూడలిలో నిర్వహించిన రోడ్‌ షోలో చంద్రబాబు మాట్లాడారు. ‘‘ఎన్నికల కోడ్‌ అమల్లోకి రాగానే మన కలెక్టర్‌ను మార్చారు. మొన్న ఇద్దరు ఎస్పీలు..ఇంటెలిజెన్స్‌ డీజీని మార్చారు. ఈ రోజు మన సీఎస్‌ను మార్చారు. దీనిపై ఎన్నికల సంఘాన్ని నిలదీయాలా.. లేదా?’’ అని వ్యాఖ్యానించారు. ఏ తప్పు చేయని సీఎస్‌ను బదిలీ చేస్తారా? అని తీవ్ర ఆగ్రహం వ్యక్తం చేశారు. "కేంద్రం చేస్తున్న దుర్మార్గాలను ఖండిస్తున్నాను. వీవీ ప్యాట్లను లెక్కించడం సాధ్యం కాదంటున్నారు. తెలంగాణలో ఓట్లు గల్లంతు అయితే ఈసీ ఏం చేసింది?. కోడికత్తి పార్టీకి ఈసీ సహకరిస్తోంది. వైసీపీ అభ్యర్థులంతా నేరస్థులు, కబ్జాదారులే. రౌడీలు అధికారంలోకి వస్తే భద్రత ఉండదు" అని చంద్రబాబు చెప్పుకొచ్చారు.

" నేరస్థులను నేనెప్పుడూ ప్రోత్సహించలేదు. మతకలహాలను, తీవ్రవాదాన్ని అణచివేశాను. నాపై 24 బాంబులేసినా భయపడలేదు. మనల్ని ఏకాకి చేసి ఇష్టమొచ్చినట్లు దాడి చేస్తున్నారు. మా అభ్యర్థులు, నేతల ఇళ్లపై ఐటీ, ఈడీ దాడులు చేస్తున్నారు. అవసరమైతే జైలుకెళ్తా, భయపడేది లేదు. మోదీ ప్రజాస్వామ్యాన్ని అపహాస్యం చేస్తున్నారు. ఇష్టానుసారం ముందుకెళ్తే మోదీ ఖబడ్దార్. ఎంత మంది వస్తారో రండి, నేను భయపడను, రా మోడీ" అని చంద్రబాబు వ్యాఖ్యానించారు. రాజీలేని పోరాటం చేసినప్పటికీ విశాఖకు తలలేని మొండెంలా కేంద్రం రైల్వేజోన్‌ ఇచ్చిందని చంద్రబాబు ఆరోపించారు. హుద్‌హుద్‌ తుపానుతో విశాఖ నగరం అతలాకుతలమైతే ప్రధాని మోదీ రూ. వెయ్యి కోట్లు ప్రకటించి, రూ. 650 కోట్లు మాత్రమే ఇచ్చారని.. మరో రూ. 350 కోట్లు ఎగ్గొట్టేశారని దుయ్యబట్టారు.

మోదీ గొప్పవారంటూ కోడికత్తి పార్టీ చెబుతోందని, దిల్లీ నాయకులతో చెప్పి మనపై దాడి చేయిస్తోందని వైకాపాను ఉద్దేశించి సీఎం ఆరోపించారు. ‘‘ పవన్‌కు ఒకేదారి తెలుసు అదే అత్తారింటికి దారి. సీబీఐ మాజీ జేడీ లక్ష్మీనారాయణకు ఓటేస్తే మీ ఓటు వృథా అవుతుంది. విశాఖకు పూర్వ వైభవం తేవాలంటే అది కేవలం తెదేపాతోనే సాధ్యం’’ అని చంద్రబాబు వివరించారు. పట్టణప్రాంత పేదలకు ఉచితంగా ఇళ్లు కట్టిస్తామని హామీ ఇచ్చారు. పేద విద్యార్థుల ఉన్నత విద్య కోసం రూ.25 లక్షలు ఇస్తామన్నారు. వైకాపా అభ్యర్థి మళ్ల విజయప్రసాద్‌ అంతర్జాతీయ నేరస్తుడని.. ఆయన ఉండాల్సింది కటకటాల్లో అని చంద్రబాబు విమర్శించారు. కేసీఆర్‌ డేగ కన్ను ఏపీపై పడొద్దని చెబుతూనే.. వైకాపా అధ్యక్షుడు జగన్‌ ఆయనకు వత్తాసు పలుకుతున్నారని చంద్రబాబు మండిపడ్డారు.

ఆంధ్రప్రదేశ్‌లో ఎన్నికల వేళ కేంద్ర ఎన్నికల సంఘం (ఈసీఐ) సంచలన నిర్ణయం తీసుకుంది. ఏపీ ప్రభుత్వ ప్రధాన కార్యదర్శి (సీఎస్‌) అనిల్‌ చంద్ర పునేఠాను బదిలీ చేసింది. కొత్త సీఎస్‌గా 1983 బ్యాచ్‌కు చెందిన ఐఏఎస్‌ అధికారి ఎల్వీ సుబ్రహ్మణ్యంను నియమిస్తూ ఉత్తర్వులు జారీ చేసింది. పునేఠాను ఎన్నికలతో సంబంధంలేని పోస్టులో నియమించాలని ఆదేశాల్లో స్పష్టంగా పేర్కొంది. ఇటీవల రాష్ట్రంలో ముగ్గురు ఐపీఎస్‌ల బదిలీల విషయంలో సీఎస్‌ను పునేఠాను కేంద్ర ఎన్నికల సంఘం దిల్లీకి పిలిపించింది. ఐపీఎస్‌ల బదిలీ అంశం తర్వాత రాష్ట్ర ప్రభుత్వం వెంటవెంటనే జారీచేసిన మూడు జీవోల విషయమై ఈసీఐ సుదీర్ఘ వివరణను కోరింది.

అనంతరం ఐపీఎస్‌ అధికారుల బదిలీపై రాష్ట్ర ప్రభుత్వం హైకోర్టును ఆశ్రయించింది. ఎన్నికల విధులకు దూరంగా ఉంటున్న ఇంటెలిజెన్స్‌ చీఫ్‌ ఏబీ వెంకటేశ్వరరావు కేసులో ప్రధానంగా రాష్ట్ర ప్రభుత్వం అభ్యంతరాలు వ్యక్తంచేసిన విషయం తెలిసిందే. కేంద్ర ఎన్నికల సంఘం ఇచ్చిన ఆదేశాలు రాష్ట్ర ప్రభుత్వానికి వర్తించవని, ఆయన ఎన్నికల విధుల్లో లేరని జీవోలో పేర్కొన్నారు. వీటిపై వివరణ కోరిన ఈసీఐ ఆయనను తప్పిస్తూ నిర్ణయం తీసుకుంది. కొత్త సీఎస్‌గా ఎల్వీ సుబ్రహ్మణ్యంను నియమించింది ఎలక్షన్ కమిషన్. ఎల్వీ సుబ్రహ్మణ్యం జగన్ అవినీతి కేసుల్లో కూడా ఉన్నారు.

ఎన్నికల సమయంలో తెదేపాను నిర్వీర్యం చేసి, అభ్యర్థుల మనోధైర్యాన్ని కోల్పోయేలా కేంద్రం, వైకాపా ప్రవర్తిస్తున్నాయని తెదేపా జాతీయ అధ్యక్షుడు, ముఖ్యమంత్రి చంద్రబాబు ధ్వజమెత్తారు. విజయవాడలోని తుమ్మలపల్లి కళాక్షేత్రం వద్ద ఐటీ దాడులకు నిరసనగా శుక్రవారం ప్రదర్శన చేపట్టారు. ప్రజాస్వామ్యానికి తూట్లు పొడిచేలా మోదీ ప్రవర్తిస్తున్నారంటూ అంబేడ్కర్‌ విగ్రహానికి విజ్ఞాపన పత్రం అందజేశారు. అనంతరం నల్ల బెలూన్లు ఎగరవేసి నిరసన తెలిపారు. రాష్ట్రానికి న్యాయం చేయాలని మోదీని అడిగితే అందుకు వ్యతిరేకంగా ఎదురుదాడి చేస్తున్నారని చంద్రబాబు దుయ్యబట్టారు. ఇటీవల జగన్‌ మోదీని పొగుడుతూ మాట్లాడడం, అంతకుముందు పీయూష్‌ గోయల్‌ జగన్‌కు అనుకూలంగా వ్యాఖ్యలు చేయడం వంటివి ఈ కుట్రలకు నిదర్శనాలని వివరించారు.

గత రెండు రోజులుగా జగన్‌ లోటస్‌పాండ్‌లో కూర్చొని ఈ కుతంత్రాలకు పెద్ద ఎత్తున పథక రచన చేస్తున్నారని మండిపడ్డారు. తమిళనాడు, కర్ణాటక, దిల్లీల్లోనూ కేంద్రం ఈ తరహా దాడులే చేయిస్తోందని వివరించారు. మోదీ బారి నుంచి ప్రజాస్వామ్యాన్ని, దేశాన్ని కాపాడాలని చంద్రబాబు పిలుపునిచ్చారు. రాజ్యాంగ స్ఫూర్తిని విస్మరించి చేస్తున్న ఈ తరహా చర్యలకు తగిన మూల్యం చెల్లించుకుంటారని, వీటిని చరిత్రలో ఎప్పటికీ గుర్తుంచుకునేలా చేస్తామని హెచ్చరించారు. ప్రజాస్వామ్య వాదులంతా దీన్ని ఖండించాలని పిలుపునిచ్చారు. చట్టప్రకారం రాజ్యాంగబద్ధ సంస్థలను తమ పని చేసుకోనివ్వాలని, ఏకపక్షంగా వాటిపై ఒత్తిడి తేవాలని ప్రయత్నిస్తే మోదీని వదిలిపెట్టబోమని హెచ్చరించారు.

దేశాన్ని నాశనం చేయాలని మోదీ కంకణం కట్టుకున్నారని ఆగ్రహం వ్యక్తం చేశారు. ‘‘మొదట దేశం.. రెండో ప్రాధాన్యం పార్టీ.. మూడోది వ్యక్తిగతం అని నిన్న ఎల్‌కే అడ్వాణీ చెప్పారు. కానీ మోదీ దీనికి చాలా వ్యతిరేకం. ఆయనకు తొలుత వ్యక్తిగతం. తర్వాతే పార్టీ, దాని తర్వాతి ప్రాధాన్యం దేశంగా ఆయన భావిస్తారు’’ అని చంద్రబాబు విమర్శించారు. భాజపా, తెరాస, వైకాపాను గంగలో కలిపే పరిస్థితి రావాలని చంద్రబాబు ప్రజలకు పిలుపునిచ్చారు.