news

మళ్లీ ఈ ఎన్నికల్లో కూడా ఓడిపోతామనే భయంతో వైసీపీ నాయకులు కుట్రలకు తెరతీశారు. ప్రజల అభిమానం చూరగొనడంలో ఘోరంగా విఫలమైన వైసీపీ నేతలు నేరగాళ్ల ముఠాలను దింపింది. తాము గెలిస్తే ఏం చేయగలమో చెప్పుకొని ఓట్లడిగేవారు కొందరైతే దొడ్డిదారి ప్రయత్నాలతో ముందుకెళ్లాలని మరికొందరు వ్యూహాలు రచించి అమలు చేస్తున్నారు. ఐదేళ్లుగా అధికారంలో ఉన్న టీడీపీ ఏం చేసిందో చెప్పుకుంటూ తాము గెలిస్తే ఇంకా ఏం చేయగలమో హామీ ఇస్తూ ఆ పార్టీ అభ్యర్థులు ప్రచారంలో దూసుకుపోతున్నారు. వారిని ఽడీకొనడానికి వైసీపీ అభ్యర్థుల వద్ద సరైన మార్గం లేక అడ్డదారులను వెతుక్కుంటున్నట్లు తాజా పరిణామాలు తేటతెల్లం చేస్తున్నాయి.

వైసీపీ అధినేత జగన్‌ ఎక్కడికక్కడ ఇచ్చిన సూచనలతో టీడీపీకి చెందిన ఓటర్లను రద్దు చేయించే కుట్ర ఫారం-7 ద్వారా బయటపడింది. టీడీపీ నేతలు ఆ కుట్రను ముందుగానే పసిగట్టి ఓట్లు రద్దు గాకుండా అడ్డుకున్నారు. ఆ పన్నాగం పారలేదని ఎక్కడికక్కడ వైసీపీ ఎమ్మెల్యే అభ్యర్థులు కొత్త ఎత్తులు వేస్తున్నారు. తాజాగా రాయదుర్గంలో భీమవరం నుంచి నేరగాళ్లను రప్పించి ప్రచారంలో వేసిన ఎత్తులు బయటపడ్డాయి. అలాగే రాప్తాడులోనూ కర్ణాటక నుంచి రప్పించిన బృందాలు కూడా పట్టుబడ్డాయి. మంత్రి కాలవ శ్రీనివాసులు కదలికలపై వైసీపీ నిఘా పెట్టింది. ఆయన కదలికలను ఎప్పటికప్పుడు వీడియోల్లో బంధిస్తున్నారు. ఆయన చేస్తున్న ప్రచారాల వద్ద రెక్కీ నిర్వహిస్తున్నారు. దీని కోసం భీమవరం నుంచి మనుషులను రప్పించారు.

300 మంది దాకా నియోజకవర్గంలో సంచరిస్తున్నట్లు విశ్వసనీయ సమాచారం. వైసీపీ ఎమ్మెల్యే అభ్యర్థి కాపు రామచంద్రారెడ్డి వియ్యంకుడు శ్రీరామరెడ్డికి చెందిన మనుషులుగా పోలీసులు గుర్తించారు. ఇప్పటికే 21 మందిని పోలీసులు అదుపులోకి తీసుకుని విచారిస్తున్నారు. ప్రధానంగా భీమవరం బ్యాచ్‌ నుంచి ముప్పు ఉందని ఇప్పటికే మంత్రి కాలవ శ్రీనివాసులు ఎన్నికల కమిషన్‌కు ఫిర్యాదు చేశారు. దీనిపై పోలీసులు కూడా కేసు నమోదు చేశారు. ముఖ్యంగా వీరిని అంతదూరం నుంచి ఎందుకు రప్పించాల్సి వచ్చిందనే సందేహం సర్వత్రా వ్యక్తం అవుతోంది. వీరికి సంబంధించి పూర్తి బాధ్యతను వైసీపీ తీసుకోవడంలో అంతర్యం ఏంటనే ప్రశ్న ఉదయిస్తోంది.

గుంటూరు పశ్చిమ నియోజకవర్గంలో ఓ డివిజన్‌ టీడీపీ అధ్యక్షుడు ఇంటికి శనివారం వైసీపీకు చెందిన ద్వితీయ శ్రేణి నాయకులు వచ్చారు. కొందరు ఇంట్లోకి వెళ్లి.. తమ పార్టీలో చేరాలంటూ చర్చించారు. ఆ నాయకుడు ససేమిరా అన్నారు. వెంట వచ్చిన కార్యకర్తలు ఇంటి ముందు చాలాసేపు వేచి ఉన్నారు. ఈ క్రమంలో ఇంటి ముందు జెండాలతో ఉన్న వైసీపీ నాయకుల ఫొటోలు, ఆయనను కలిసిన ఫొటోలు జోడించి పార్టీ మారాడంటూ సోషల్‌ మీడియాలో పోస్టింగులు చేశారు. దీంతో ఆ నాయకుడు సొంత పార్టీకి వివరణ ఇవ్వాల్సి వచ్చింది. ఇదో మైండ్‌ గేమ్‌. నాయకుల్ని మానసికంగా ఇబ్బంది పెడుతూ ఓటర్లను అయోమయానికి గురిచేసే ఆట..! ఇందుకు మీడియా, సోషల్‌ మీడియా ఆయుధాలు. ప్రధాన రాజకీయ పార్టీల అభ్యర్థులు, ముఖ్యనాయకులు తమ కార్యక్రమాలు చిత్రీకరించేందుకు సొంతగా కెమెరామెన్లను నియమించుకున్నారు.

అనుచరగణం ఎలాగూ వెంటుంటారు. వీరు ప్రచారంలో నాయకుల వెంట తిరుగుతూ కొత్త ఆలోచనలతో ఓటర్లను ఆయోమయంలో పడేస్తున్నారు. ప్రత్యర్థి పార్టీల నుంచి నాయకులు తమ పార్టీలోకి చేరారంటూ భ్రమ కలిగిస్తూ అసత్య, అర్థసత్యాలతో కూడిన ప్రచారం చేస్తున్నారు. తమ నాయకుడి వద్దకు ఇతర పార్టీ నాయకులు, కార్యకర్తలు ఎవరు వచ్చినా క్లిక్‌ మనిపించడం.. వివిధ సామాజిక మాధ్యమాల్లో పోస్ట్‌ చేసి తప్పుడు ప్రచారం చేయడం ఇటీవల రివాజుగా మారింది. గుంటూరు శివారు ప్రాంతంలోని ఓటర్లకు, నాయకులకు బెదిరింపులు ఎక్కువయ్యాయని తెలుస్తోంది. ప్రతిపక్ష పార్టీలోకి ఇటీవల చెరిన ఓ ’అన్న’ తన బలగంతో రాత్రివేళ్లలో బెదిరింపులకు దిగుతున్నట్లు సమాచారం. కాస్త పలుకుబడి ఉండి.. నాలుగు ఓట్లు వేయించగలిగిన వ్యక్తులను బెదిరించడం, ప్రతిపక్ష పార్టీకి సహకరించాలని ఒత్తిడి తేవడంపై ఫిర్యాదులు వస్తున్నాయి.

అంతా అన్న చూసుకుంటాడు.. మీరు మాకు పనిచేయాలనంటూ చోటామోటా నాయకులపై హుకుం జారీ చేస్తున్నారు. ఇలాంటి పరిస్థితులే పల్నాడు ప్రాంతంలోని కొన్ని నియోజకవర్గాలోను ఉంది. దిగువస్థాయి నాయకుల్ని ప్రలోభ పెడుతూ, బెదిరింపులకు పాల్పడుతూ ప్రత్యేకంగా ఓ ముఠా తిరుగుతోంది. గ్రామాల్లో పట్టున్న వారిని, అధికారులను హెచరిస్తున్నట్లు ఆరోపణలు వస్తున్నాయి. ‘గ్రామాల బాధ్యత మీకు అప్పగిస్తాం. ఎంత కావాలో చెప్పండి. ఏం కావాలో అడగండి. ఆ బూత్‌లతో మాకు మెజార్టీ రావాల్సిందే’నంటూ ముందు మర్యాదగా, తర్వాత బెదిరింపుగా హెచ్చరికలు జారీ చేస్తున్నారు. ‘ప్రత్యర్థి పార్టీలోకి మారొద్దు... అంతర్గతంగా మాకు సహకరించాలి. మీ వైపు ఉన్న ఓట్లన్నీ మాకు పడేలా చూడండి. కావాల్సింది మేం చూసుకుంటాం’ అంటూ సంకేతాలు ఇస్తున్నారు. టిక్కెట్‌ కోసం ప్రయత్నించి విఫలమైన వారికి ఇలాంటి నజరానాలు ఎక్కువగా వస్తున్నాయి. నిరాశావాదులు ఎవరికీ తెలియకుండానే సమావేశాలు పెట్టి... ప్రత్యర్థి పార్టీలకు సహకరించేఆలా తమ వారికి సంకేతాలు ఇస్తున్నారు. వారికి వచ్చే ఆఫర్లను చెబుతూ.. ఈసారి వారికి పనిచేస్తే వచ్చే లాభాలను వివరిస్తున్నారు. ఈ కోవర్టు ఆపరేన్లు భారీగా జరుగుతున్నాయి.

మహిళల సాధికారతకు శ్రీకారం చుట్టిన తెలుగుదేశం.. వారికి రాజకీయాధికారం కట్టబెట్టే దిశగా మరింత ముందడుగు వేసింది. ఈ అసెంబ్లీ ఎన్నికల్లో అత్యధికంగా వారికి 20 టికెట్లు కేటాయించింది. వైసీపీ, జనసేన, కాంగ్రెస్‌ 15 చొప్పున కేటాయించగా.. కేంద్రంలో అధికారంలో ఉన్న బీజేపీ.. ఆంధ్రలో కేవలం ఆరుగురు మహిళలకు టికెట్లు ఇచ్చింది. మొత్తం 175 స్థానాలకు గాను ఈ పార్టీల నుంచి 71 మంది మహిళలు మాత్రమే బరిలో నిలిచారు. సీఎం చంద్రబాబు తన సొంత జిల్లా అయిన చిత్తూరు నుంచి ముగ్గురు మహిళలకు అవకాశమిచ్చారు.

తూర్పుగోదావరి, కర్నూలు, విజయనగరం జిల్లాల్లోనూ ముగ్గురు చొప్పున అవకాశం పొందారు. శ్రీకాకుళం, కృష్ణా జిల్లాల్లో రెండేసి టికెట్లు ఇచ్చారు. జగన్‌ తన సొంత జిల్లా కడపలో మహిళలకు ఒక్క సీటూ కేటాయించలేదు. వివిధ రకాల సమీకరణల వల్ల గుంటూరు, కడప, నెల్లూరు జిల్లాల నుంచి మహిళలకు సీట్లు ఇవ్వలేకపోయారు.175 స్థానాల్లోనూ పోటీ చేస్తున్న వైసీపీ, 8 జిల్లాల్లో 15 మం ది మహిళలను బరిలో నిలిపిం ది. కడప, కృష్ణా, ప్రకాశం, నెల్లూరు, పశ్చిమ గోదావరి జిల్లాల్లో ఒక్క మహిళను కూడా ఎంపిక చేయలేదు. రాష్ట్రంలో మొత్తం ఓటర్లు 3,93,45,717 మంది. వీరిలో మహిళలు 1,98,79,421, పురుష ఓటర్లు 1,94,62,339. అంటే పురుషుల కంటే 4,17,082 మంది మహిళలు అధికంగా ఉన్నారు.

కమ్యూనిస్టుల మొండిచేయి.. రాష్ట్రంలో 120 స్థానాల్లో పోటీచేస్తున్న జనసేన.. మహిళల కు 15 సీట్లు కేటాయించింది. పొత్తులో భాగంగా ఏడేసి స్థానాలను సీపీఐ, సీపీఎంలకు కేటాయించింది. కమ్యూనిస్టు పార్టీలు రెండూ ఒక్క సీటై నా మహిళలకు ఇవ్వలేదు. కృష్ణా, ప్రకాశం,నెల్లూరు, శ్రీకాకుళం జిల్లాల్లో జనసేన మహిళలకు అవకాశమివ్వలేదు. సొంతగా బరిలోకి దిగిన కాంగ్రెస్‌ కూడా 15 సీట్లు కేటాయించింది. నెల్లూరు, విజయనగరం జిల్లాలు మినహా మిగిలిన 11 జి ల్లాల నుంచి కాంగ్రెస్‌ మహిళలను బరిలో నిలిపింది. బీజేపీ ఆరుగురికి మాత్రమే టికెట్లిచ్చింది. చిత్తూరు, కడప,కర్నూలు, ప్రకాశం, విశాఖ, పశ్చిమ గోదావరి జిల్లాల నుంచి అవకాశమే ఇవ్వలేదు.