news

కేంద్ర మాజీ మంత్రి కోట్ల సూర్యప్రకాశ్‌రెడ్డి ఈనెల 28న తెదేపాలో చేరనున్నారు. కోడుమూరు సభలో తెదేపా అధినేత, సీఎం చంద్రబాబు సమక్షంలో కోట్ల సూర్యప్రకాశ్‌రెడ్డి పార్టీ కండువా కప్పుకోనున్నారు. ఇందుకోసం కోడుమూరులోని ఆర్‌అండ్‌బీ అతిథి గృహం సమీపంలో భారీ బహిరంగ సభకు ఏర్పాట్లు చేస్తున్నారు. ఇదే మైదానంలో గతేడాది నవంబరు 11న కాంగ్రెస్‌ పార్టీ ‘రైతు మహాసభ’ జరిగింది. దానికన్నా భారీగా లక్ష మంది కార్యకర్తలతో ఈ సభ నిర్వహించడానికి కసరత్తు జరుగుతోంది. తదనుగుణంగా కర్నూలు పార్లమెంట్‌ నియోజకవర్గ పరిధిలో జనసేకరణ చేస్తున్నారు. తెదేపా అధినేత చంద్రబాబు సమక్షంలో సూర్యప్రకాశ్‌రెడ్డి ఆ పార్టీ కండువా కప్పుకోనున్నారు.

మరో రెండు రోజుల్లో కాంగ్రెస్‌ పార్టీకి ఆయన రాజీనామా చేయనున్నట్లు తెలిసింది. కోట్ల సూర్యప్రకాశ్‌రెడ్డి కర్నూలు ఎంపీ అభ్యర్థిగా తెదేపా తరఫున బరిలోకి దిగే అవకాశాలున్నాయి. ఆలూరు, డోన్‌ అసెంబ్లీ నియోజకవర్గాలూ తమకు కేటాయించాలని కోట్ల కుటుంబం ప్రతిపాదించింది. మరోవంక ఉప ముఖ్యమంత్రి కేఈ కుటుంబం సీఎంతో భేటీ అయినప్పుడు పత్తికొండ, డోన్‌ తమకే కేటాయించాలని కోరినట్లు తెలుస్తోంది. ఒకవేళ డోన్‌ కేఈ కుటుంబానికే ఇస్తే ఆలూరు నుంచి కోట్ల సుజాతమ్మ పోటీ చేస్తారు. కోట్ల కుమారుడు రాఘవేంద్రరెడ్డికి ఏదైనా పదవి కేటాయించే అవకాశం ఉండనుంది. మరోవైపు ఉపముఖ్యమంత్రి కేఈ కుటుంబం కూడా డోన్‌ను కోరుతోంది. ఈ నేపథ్యంలో దీనిపై స్పష్టత రావాల్సి ఉంది. దీంతో పాటు కర్నూలు జిల్లాలోని వేదవతి, గుండ్రేవుల ప్రాజెక్టులను పూర్తి చేయడంతో పాటు ఎల్‌ఎల్‌సీ కాలువకి పైపులైన్‌ వేయాలనే డిమాండ్లను సీఎం చంద్రబాబు దృష్టికి కోట్ల తీసుకెళ్లారు.

ఇప్పటికే వేదవతికి నిధులు మంజూరు చేస్తూ ప్రభుత్వం జీవోను విడుదల చేసింది. ఎల్‌ఎల్‌సీ పైపు లైన్‌, గుండ్రేవుల ప్రాజెక్టుల శంకుస్థాపనకు సీఎం హామీ ఇచ్చినట్లు కోట్ల అనుచరులు చెబుతున్నారు. తెదేపాలో చేరికపై కోట్ల సూర్యప్రకాశ్‌రెడ్డి తన అనుచరులకు ఇప్పటికే సమాచారం ఇచ్చారు. ఇది ఇలా ఉంటే, కడప జిల్లాకు చెందిన మాజీ మంత్రి డీఎల్ రవీంద్రారెడ్డి, మరో రెండు మూడు రోజుల్లో చంద్రబాబుతో భేటీ కానున్నారు. మైదుకూరు టికెట్‌ ఇవ్వాలని మాజీ మంత్రి డీఎల్ కోరుతున్నారు. టీడీపీ అధిష్టానం కూడా మైదుకూరు టికెట్‌ డీఎల్‌కు ఇచ్చేందుకు మొగ్గు చూపుతున్నట్టు సమాచారం. అయితే.. మైదుకూరు టికెట్ తనకే ఇవ్వాలని టీటీడీ చైర్మన్ పుట్టా సుధాకర్ యాదవ్ పట్టుబడుతున్నారు. డీఎల్, చంద్రబాబు భేటీ అనంతరం మైదుకూరు టికెట్ విషయంలో ఓ స్పష్టత వచ్చే అవకాశముంది. టికెట్ ఖాయమైతే డీఎల్ టీడీపీలో చేరేందుకు లైన్ క్లియర్ అయినట్టుగా భావించవచ్చు.

అభ్యర్థుల ఖరారులో టీడీపీ అధ్యక్షుడు చంద్రబాబు దూకుడు ప్రదర్శిస్తున్నారు. రోజుకు రెండు పార్లమెంటు నియోజక వర్గాలపై సమీక్ష నిర్వహిస్తున్నారు. మంగళవారం విజయవాడ, మచిలీపట్నం పార్లమెంటు నియోజకవర్గాలపై సమీక్ష జరిగింది. ఇది బుధవారం తెల్లవారుజాము రెండు గంటల వరకు కొనసాగింది. తొలుత ఆయా లోక్‌సభ నియోజకవర్గాల పరిధిలోని ఎమ్మెల్యేలు, నియోజకవర్గ ఇన్‌చార్జిలతో చంద్రబాబు సమావేశం అవుతున్నారు. జిల్లాలో పరిస్థితిని అడిగి తెలుసుకుంటున్నారు. తాను ఇప్పటికే చేయించిన నాలుగు సర్వే నివేదికలను దగ్గర పెట్టుకుని అసెంబ్లీ నియోజకవర్గాల వారీగా ముఖాముఖి సమీక్షలు చేస్తున్నారు. ఒక్కో ఎమ్మెల్యే లేదా ఇన్‌చార్జితో వన్‌ టు వన్‌ మాట్లాడుతున్నారు. ఈ సందర్భంగా సర్వే సారాంశాలను వారికి వివరించి, నివేదికలను చేతిలో పెడుతున్నారు. నియోజకవర్గంలో నేతల మధ్య విభేదాలను సైతం అధినేత ప్రస్తావి స్తున్నారు. గన్నవరం నియోజకవర్గంలో వివాదాస్పదమైన మట్టి తవ్వకాల అంశాన్ని కూడా ప్రస్తావించినట్లు తెలిసింది.

కృష్ణా జిల్లాలో 10 నియోజకవర్గాల అభ్యర్థులను ప్రచారం ప్రారంభించుకోవాల్సిందిగా అధినేత ఆదేశించారు. మిగిలిన ఆరు నియోజకవర్గాల్లో నూజివీడు, కైకలూరు అభ్యర్థుల అంశాన్ని మూడు నాలుగు రోజుల్లో నిర్ణయిస్తామని తెలిపినట్లు సమాచారం. ఈ రెండూ ఏలూరు పార్లమెంటు నియోజకవర్గ పరిధిలో ఉన్నాయి. ఈ నెల 25లోపు ఏలూరు పార్లమెంటు నియోజకవర్గ సమీక్ష ఉంటుందని ఆ సమయంలో ఆ రెండు నియోజకవర్గాలపైనా అధినేత స్పష్టత ఇస్తారని పార్టీ వర్గాలు చెబుతున్నాయి. ప్రచారానికి గ్రీన్‌ సిగ్నల్‌ లభించిన వారిలో.. విజయవాడ పార్లమెంటు పరిధిలో.. విజయవాడ తూర్పు(గద్దె రామ్మోహన్‌), సెంట్రల్‌(బొండా ఉమ), పశ్చిమ(షబానా ఖాతూన్‌), మైలవరం(దేవినేని ఉమ), జగ్గయ్యపేట(శ్రీరాం తాతయ్య), నందిగామ(తంగిరాల సౌమ్య) మచిలీపట్నం పార్లమెంటు పరిధిలో.. పెనమలూరు(బోడె ప్రసాద్‌), మచిలీపట్నం(కొల్లు రవీంద్ర), అవనిగడ్డ(మండలి బుద్ధప్రసాద్‌), గన్నవరం(వల్లభనేని వంశీ) ఉన్నారు.

ఇవీ పెండింగ్‌..! విజయవాడ పార్లమెంటు నియోజకవర్గం పరిధిలో తిరువూరు నియోజకవర్గంపై అధినేత స్పష్టత ఇవ్వలేదు. ఇక్కడ గత ఎన్నికల్లో నల్లగట్ల స్వామిదాసు పోటీ చేసి ఓడిపోయారు. మచిలీపట్నం పార్లమెంటు పరిధిలో.. గుడివాడ, పెడన, పామర్రుపై అధ్యక్షుడు స్పష్టత ఇవ్వలేదు. పెడనలో కాగిత వెంకట్రావు అనారోగ్యం కారణంగా ఆయన ఈసారి బరిలోకి దిగడం లేదని సమాచారం. తన కుమారుడికి అవకాశం ఇవ్వాలని ఆయన కోరినట్లు తెలుస్తోంది. గుడివాడ అభ్యర్థి ఖరారు విషయంలోనూ ఆయన స్పష్టత ఇవ్వలేదు. రెండు మూడు రోజుల్లో అందరినీ పిలిపించి మాట్లాడ తానని రావి వెంకటేశ్వరరావుతో అధినేత పేర్కొన్నారు. పామర్రులో ఉప్పులేటి కల్పన విషయంలో స్థానిక నేతల నుంచి తీవ్ర వ్యతిరేకత ఉన్న నేపథ్యంలో ఆ నియోజకవర్గం అంశాన్ని పెండింగ్‌లో పెట్టారు. మచిలీపట్నం పార్లమెంటు స్థానం నుంచి కొనకళ్ల నారాయణ, విజయవాడ పార్లమెంటు నియోజకవర్గం నుంచి కేశినేని నాని పోటీ చేసేందుకు గ్రీన్‌ సిగ్నల్‌ ఇచ్చారు.

రజకులని మాత్రమే పిలవాలని రాష్ట్రప్రభుత్వం ఆదేశం ముఖ్యమంత్రి చంద్రబాబుకు కృతజ్జ్ఞతలు తెలిపిన రజక సంఘ నేతలు ముఖ్యమంత్రికి పాలాభిషేకం చేయాలని పిలుపు ముఖ్యమంత్రి శ్రీ నారా చంద్రబాబునాయుడు హామీ మేరకు రజకులని మాత్ర్మే పిలవాలని ఆదేశిస్తూ రాష్ట్రప్రభుత్వం ఉత్తర్వులు జారీ చేసింది. ఆ ఆదేశాల మేరకు ఎన్నో సంవత్సరాల నుంచి రజకులు గ్రామాల్లో అరే సాకలోడా ఒరే సాకలి ఇంకా ఘోరమైన అంశాలతో పదజాలంతో దూషించడం నిషేధింజారు. కులం పేరుతో బూతులు తిట్టకూడదు. కొన్ని గ్రామాల్లో బట్టలు ఉతిక పోతే గ్రామ బహిష్కరణలు దారుణమైన పరిస్థితి రజకులు అనుభవిస్తున్నారని గతంలో రజక సంఘ నేతలు ముఖ్యమంత్రి దృష్టికి తీసుకురావడంతో ఆయన తగిన విధంగా చర్యలు తీసుకున్నారు.

ఫలితంగా రాష్ట్ర ప్రభుత్వం రజకుల కోసం చట్టాన్ని తీసుకొచ్చింది. ఈనేపధ్యంలో రాష్ట్రవ్యాప్తంగా ఉన్న రజకులు అందరం కూడా ముఖ్యమంత్రి గారికి జీవితాంతం రుణపడి ఉంటామని స్పష్టం చేశారు. దాంతోపాటు రజకులను ఎస్సీ జాబితా చేర్చడంపై ఒక కమిటీని వేస్తామని హామీ ఇవ్వడం,ఇస్త్రీ షాపులకు 150 యూనిట్లు కరెంటు ఉచితంగా అందించడం, దోబీఘాట్లుకు ఉచిత కరెంటు అందించి, ఆదరణ పథకం కింద రజకులకు వాషింగ్ మిషన్లు ఇస్త్రీ పెట్టెలు, పది వేల రూపాయల ఎన్టీఆర్ భరోసా కింద ఇవ్వడం జరిగినందుకు ముఖ్యమంత్రి చంద్రబాబుకు రజక సంఘ నేతలు హృదయ పూర్వక ధన్యవాదాలు తెలియజేశారు.ముఖ్యమంత్రిపై తమ గౌరవాన్ని చాటేందుకు గురువారం రాష్ట్రంలో ఉన్న రజకులు అందరు కూడా పాలాభిషేకం చేయాలని నిర్ణయం తీసుకున్నారు.

మళ్ళీ ముఖ్యమంత్రిగా నారా చంద్రబాబునాయుడు అధికారంలోకి రావాలని రజకులు అందరు కూడా కష్టపడి పనిచేయాలని ప్రతి ఒక్కరు నిబద్ధతతో తమ గురించి ఆలోచించిన ముఖ్యమంత్రి చంద్రబాబునాయుడును గెలిపిద్దామని రాష్ట్ర రజక సంఘాల ఐక్యవేదిక అధ్యక్షుడు అంజిబాబు, చైతన్య సంస్థ రాష్ట్ర అధ్యక్షులు గ్రంథం రవి, రజక కార్పొరేషన్ చైర్మన్ రాజమండ్రి నారాయణలు స్పష్టం చేశారు. రజకుల ప్రయోజనాలు కాపాడటానికి జీవో రావడానికి ముఖ్య కారణమైన టీడీపీ ఎమ్మెల్సీ టిడి జనార్దన్ కి, ప్రిన్సిపల్ సెక్రటరీ ఉదయ లక్ష్మికి ధన్యవాదాలు చెప్పారు.