news

ప్రకాశం జిల్లా చీరాల ఎమ్మెల్యే ఆమంచి కృష్ణమోహన్ టీడీపీకి గుడ్ బై చెప్పిన సంగతి తెలిసిందే. పార్టీ సభ్యత్వానికి రాజీనామా చేసిన అనంతరం ఆమంచి.. వైసీపీ అధినేత వైఎస్ జగన్‌‌తో భేటీ అయ్యారు. మంచిరోజు చూసుకుని వైసీపీలో చేరుతున్నట్లు ఆయన ప్రకటించారు. ఆమంచి పార్టీని వీడటంపై ఇప్పటికే పలువురు మంత్రులు, టీడీపీ నేతలు స్పందించారు. తాజాగా చంద్రబాబు మాట్లాడుతూ.. ఆమంచి లాంటి వ్యక్తులు పార్టీని వీడినా ఎలాంటి నష్టం లేదన్నారు. ఇచ్చిన గౌరవాన్ని కృష్ణమోహన్‌ నిలుపుకోలేకపోయారన్నారు. బిజీగా ఉన్నా ఆమంచితో గంట సేపు మాట్లాడిన విషయాన్ని ఈ సందర్భంగా చంద్రబాబు గుర్తు చేశారు. చీరాల నియోజకవర్గ అభివృద్ధికి రూ.700 కోట్లు ఇచ్చామని సీఎం స్పష్టం చేశారు. గురువారం ఉదయం పార్టీ నేతలతో చంద్రబాబు నిర్వహించిన టెలీకాన్ఫరెన్స్‌లో ఆమంచి విషయం ప్రస్తావనకు వచ్చింది.

మరో పక్క, బీజేపీ వైఖరి పై కూడా చంద్రబాబు స్పందించారు. ఎన్నికలకు ముందే బీజేపీయేతర పక్షాల కూటమి ఉంటుందన్నారు. "నేను రాష్ట్రం కోసం పోరాడుతున్నా. 5 కోట్ల ప్రజల హక్కుల కోసం ధర్మపోరాటం. బీజేపీ, వైసీపీ, టీఆర్‌ఎస్‌ కుట్రలు చేస్తున్నాయి. అవకాశవాదులకు టీడీపీలో స్థానంలేదు. కొందరు పోతే నష్టాలకన్నా లాభాలే మిన్న. నాపై కులముద్ర వేయాలని చూడటం దారుణం. వైసీపీ కులాలను రెచ్చగొట్టే కుట్రలు చేస్తోంది. ఓ వైపు రాష్ట్రంలో అభివృద్ధి, సంక్షేమం..మరోవైపు ఢిల్లీలో ప్రజాస్వామ్య పరిరక్షణ మీరిచ్చిన ప్రోత్సాహంతోనే ఈ నిరంతర శ్రమ. ఢిల్లీలో కేజ్రీవాల్ దీక్షకు గొప్ప స్పందన వచ్చింది. మోదీ పాలనపై దేశవ్యాప్తంగా తీవ్ర వ్యతిరేకత ఉంది. అన్నదాత సుఖీభవ పథకం ఒక చరిత్ర. కేంద్రం ఇచ్చిన సాయంలో అనేక ఆంక్షలు విధించింది. ఏపీలో మాత్రం రైతులందరికీ ఇస్తున్నాం" అని ఈ సందర్భంగా చంద్రబాబు చెప్పుకొచ్చారు.

రాష్ట్రంలో అమలు చేస్తున్న వివిధ సంక్షేమ కార్యక్రమాలతో ఎన్నికలు ఏకపక్షంగా జరిగే అవకాశం ఉందని చంద్రబాబు అన్నారు. పింఛన్‌ కింద ఏడాదికి రూ.24 వేలు, పసుపు కుంకుమ కింద ఒక్కో మహిళకు రూ.20 వేలు, రాష్ట్రంలో ప్రతి రైతు కుటుంబానికి రూ.10 వేలు ఇస్తున్నామని, ఈ మూడు ప్రతిష్టాత్మక కార్యక్రమాలు ప్రజల్లోకి తీసుకెళ్లాలని క్యాడర్‌కు దిశా నిర్దేశం చేశారు. జాతీయ పార్టీల నేతలతో చర్చలు ఫలప్రదం అయ్యాయని, ఎన్నికలకు ముందే పొత్తు పెట్టుకోవాల్సి ఉందని వ్యాఖ్యానించారు. ఈవీఎంలపై సుప్రీంకోర్టుకు వెళ్లాలని నిర్ణయించామని తెలిపారు. చీరాలలో పార్టీ బలంగా ఉందని, నాయకులు వస్తుంటారు.. పోతుంటారు అని ఆమంచి పార్టీ వీడడంపై వ్యాఖ్యానించారు. పార్టీని అంటి పెట్టుకుని ఉన్నది కార్యకర్తలేనని పేర్కొన్నారు. ఆశయం కోసం పనిచేసేది వారేనని కితాబిచ్చారు.

ఏమైందో ఏమో కాని, ప్రేమికుల దినోత్సవం రోజు, అమరావతిలో కలుద్దమనుకున్న కొత్త ప్రేమికులు ఇద్దరూ అమరావతి రావటం లేదు. ఒక పక్క జగన్ మోహన్ రెడ్డి రేపు మంగళగిరిలో జరగాల్సిన తన గృహప్రవేశం వాయిదా వేసుకున్న సంగతి తెలిసిందే. కారణం ఏంటో తెలియదు కాని, కుటుంబ పరమైన సమస్యలు అంటూ వాయిదా వేసారు. అయితే, ఈ వార్తలు వచ్చిన మరుసటి రోజే, ఇప్పుడు కేసీఆర్ పర్యటన కూడా వాయిదా పడింది. రేపు జరగాల్సిన కేసీఆర్‌ విశాఖ పర్యటన రద్దు అయింది. ముందుగా అనుకున్న ప్రకారం గురువారం విశాఖ శారద పీఠంలో నిర్వహించనున్న రాజశ్యామల యాగానికి సీఎం కేసీఆర్ హాజరుకావాల్సి ఉంది.

అయితే ఈ పర్యటన రద్దు చేసుకోవాలని కేసీఆర్ నిర్ణయించారు. కేసీఆర్ తరఫున రాజశ్యామల యాగానికి ఎమ్మెల్యే ప్రశాంత్ రెడ్డి హాజరుకానున్నారు. ఎందుకు రద్దు చేసుకున్నారు అనే విషయం మాత్రం, బయటకు చెప్పలేదు. మరో పక్క,
వైసీపీ అధినేత జగన్ అమరావతిలో నిర్మించిన కొత్త ఇల్లు ప్రారంభోత్సవం వాయిదా పడింది. ముందుగా నిర్ణయించిన ప్రకారం ఫిబ్రవరి 14న గృహప్రవేశం జరగాల్సి ఉంది. అయితే, ప్రస్తుతం ఆ కార్యక్రమాన్ని వాయిదా వేసినట్టు వైసీపీ రాజకీయ వ్యవహరాల కార్యదర్శి వైవీ సుబ్బారెడ్డి ప్రకటించారు. ఈ కార్యక్రమం మళ్లీ ఎప్పుడు నిర్వహించేది త్వరలోనే తెలియజేస్తామని సుబ్బారెడ్డి వివరించారు.

జగన్ తన గృహప్రవేశానికి తెలంగాణ సీఎం కేసీఆర్‌ను సైతం ఆహ్వానించారు. అదే రోజు విశాఖ శారదా పీఠం వార్షికోత్సవాలకు కేసీఆర్ హాజరుకానున్నారు. అయితే ముందు జగన్ వాయిదా వెయ్యటం, తరువాత కేసీఆర్ రద్దు చేసుకోవటం, ఇవన్నీ చూస్తుంటే, రాజకీయ కారణాలతోనే రద్దు చేసుకున్నట్టు తెలుస్తుంది. కేసీఆర్ - జగన్ తో కలుస్తున్నారు అనే వార్తా, ఆంధ్రప్రదేశ్ రాష్ట్రంలో బాగా నెగటివ్ ఇంపాక్ట్ వచ్చింది. జగన్ చేపించిన సర్వేల్లో కూడా ఇదే అభిప్రాయం రావటంతో, జగన్ నష్ట నివారణ చర్యలు మొదలు పెట్టారు. అసలైతే కేటీఆర్ ని కలిసిన తరువాత, వెంటనే కేసీఆర్ ను కలవాల్సి ఉన్నా, ఏపిలో ప్రజలు ఎదురు తిరగటంతో, ఈ అభిప్రాయం మార్చుకున్నారు. ఇప్పుడు కేసీఆర్ ఏపి పర్యటన కూడా అందుకే వాయిదా పడిందనే అభిప్రాయం వస్తుంది.

తాను రాజకీయాల్లోకి రాను అని ముందే స్పష్టం చేశానని అదే మాటకు కట్టుబడి ఉన్నానని బీవీ రాజు గ్రూపు కంపెనీల చైర్మన్ కేవీ విష్ణురాజు స్పష్టం చేశారు. తాను జనసేన పార్టీలో చేరినట్లు వస్తున్న వార్తలు సరికాదన్నారు. పవన్ కళ్యాణ్ ని మార్యద పూర్వకంగా కలిసానని, ఆయన సూచన మేరకు అడ్వయిజరీ కమిటీలో సలహాలు ఇచ్చేందుకు అంగీకరించానని చెప్పుకొచ్చారు. విద్యా, ఉపాధి రంగాల్లో సలహాలు ఇచ్చేందుకు, సహకరించేందుబాధ్యతలు స్వీకరిస్తానని పవన్ కళ్యాణ్ కు స్పష్టం చేసినట్లు తెలిపారు. తాను పవన్ కళ్యాణ్ ని కలిసినప్పుడు ఇదే అంశంపై చర్చించినట్లు తెలిపారు. ఇకపోతే బీవీ రాజు గ్రూపు కంపెనీల ఛైర్మన్ గా కె.వి.విష్ణురాజు పనిచేస్తున్నారు. పద్మభూషణ్ బీ.వీ.రాజు మనవుడుగా విష్ణురాజు అందరికీ సుపరిచితులు.

ఇటీవల జనసేన అధినేత పవన్ కళ్యాణ్ ని కలిసిన ఆయన పలు అంశాలపై చర్చించారు. ఈ సందర్భంగా విష్ణురాజును జనసేనలోకి మనస్ఫూర్తిగా ఆహ్వానిస్తున్నట్లు పవన్ తెలిపారు. అంతేకాదు రాబోయే తరానికి మంచి భవిష్యత్తును ఎలా ఇవ్వాలని ఆలోచిస్తున్న వారిలో విష్ణురాజు ఒకరని, భీమవరం వెళ్లినపుడు ఆయన కాలేజీలను నిర్వహిస్తున్న విధానాన్ని చూసి ఆశ్చర్యపోయానన్నారు. విధానాల రూపకల్పనలో రాజు ఆలోచనలు ఎంతగానో ఉపకరిస్తాయని భావిస్తున్నానని, ఆయనను కలవడం సంతోషంగా ఉందన్నారు. స్మార్ట్ సిటీలు, పర్యావరణం అంశాలపై ఆయనకు అపారమైన అవగాహన ఉందని, జనసేన విధానాల రూపకల్పనలో ఆయన సలహాలు తోడ్పాటును అందిస్తాయని తాను భావిస్తున్నట్లు తెలిపారు.

వెంటనే విష్ణురాజును జనసేన విధానాల రూపకల్పన కమిటీ ఛైర్మన్ గా నియమిస్తున్నట్లు తెలిపారు. పార్టీకి అవసరమైన సేవలు అందించడానికి తాను సిద్ధంగా ఉన్నానని సమాజానికి మంచి చేయాలన్న లక్ష్యంతో పవన్ కళ్యాణ్ ఆలోచనలు ముందుకు సాగుతున్నాయని విష్ణురాజు ఆశాభావం వ్యక్తం చేసిన విషయం తెలిసిందే. అయితే విష్ణు రాజు మాత్రం ఖండించారు. తాను జనసేన పార్టీలో చేరలేదని.. రాజకీయాల్లోకి రాను, ఎన్నికల్లో పోటీ చేయనని స్పష్టం చేశారాయన. కేవలం అడ్వయిజరీ కమిటీలో సలహాలు ఇచ్చేందుకే అంగీకరించానని క్లారిటీ ఇచ్చారు. జనసేన అధినేత పవన్ కు నాకు మధ్య ఈ విషయాలపైనే చర్చ జరిగిందన్నారు. అయితే ఒక పక్క పవన్ కళ్యాణ్, ఆయన పార్టీలో చేరారని చెప్తుంటే, విష్ణు రాజు మాత్రం వారం తిరగకుండానే, జనసేన లో చేరలేదని చెప్పడం అందరిని ఆశ్చర్యానికి గురి చేస్తుంది…