news

నవ్యాంధ్రలో కులాల మధ్య చిచ్చుపెట్టేందుకు వైసీపీ అధ్యక్షుడు వైఎస్‌ జగన్‌ ప్రయత్నిస్తున్నారని ముఖ్యమంత్రి చంద్రబాబు విరుచుకుపడ్డారు. దీనిని నీచాతినీచమైన చర్యగా అభివర్ణించారు. ఓటమి భయంతోనే ఈ రకంగా వ్యవహరిస్తున్నారని విమర్శించారు. చంద్రబాబు ఎన్డీఏలోకి రాకుండా తలుపులు మూసేశామని బీజేపీ జాతీయ అధ్యక్షుడు అమిత్‌ షా చేసిన వ్యాఖ్యలపై మండిపడ్డారు. సోమవారం సాయంత్రం ఢిల్లీలో విలేకరులతో, ఉదయం టీడీపీ నేతలతో టెలికాన్ఫరెన్స్‌లో సీఎం మాట్లాడారు. అభివృద్ధి గురించి మాట్లాడలేకే కులాల మధ్య జగన్‌ చిచ్చు పెట్టే ప్రయత్నం చేస్తున్నారని ఆయన విమర్శించారు. సామాజిక న్యాయం కోసం పాటు పడే ఏకైక పార్టీ తెదేపానేనని సీఎం స్పష్టం చేశారు.

తన పార్టీలో, ప్రభుత్వంలో అన్ని కులాలూ ఉన్నాయని.. జగన్‌ ఒక కులానికి వంతపాడుతున్నారని, అది మంచి పద్ధతి కాదని హితవు పలికారు. ‘కులాలకు, అధికారులకు సంబంధమేంటి..? ఏ కులానికి చెందిన కార్యదర్శులు ఎక్కువగా ఉన్నారు..? దాదాపు అన్నికులాల వాళ్లు ఉన్నారు. మంత్రుల్లో నలుగురు రెడ్లు ఉన్నారు. ఏకులానికి అన్యాయం జరిగింది...? సామాజిక న్యాయం చేయడంలో నేను ముందుంటా’ అని స్పష్టం చేశారు. ఆంధ్రలో వేడుకగా జరుగుతున్న పింఛన్లు, పసుపు-కుంకుమ చెక్కుల పంపిణీ భగ్నానికి కూడా జగన్‌ కుట్ర పన్నారని, శాడిజంతో వ్యవహరిస్తున్నారని అన్నారు. ‘వైసీపీ సైకో పార్టీగా మారింది.

రాష్ట్రానికి వచ్చే పరిశ్రమలను అడ్డుకుంటోంది. పెట్టుబడులు రాకుండా కుట్రలు చేస్తోంది. ప్రజలు కష్టాల్లో ఉండాలన్నదే వైసీపీ ఉద్దేశం. అభివృద్ధికి అడ్డుపడడం దాని సైకో ధోరణికి నిదర్శనం. పింఛన్ల సభలను భగ్నం చేయడం సైకో పోకడ. పసుపు-కుంకుమ భగ్నం చేయడం జగన్‌ శాడిజానికి నిదర్శనం. ఓట్ల తొలగింపు పేరుతో ఢిల్లీలో జగన్నాటకం నడుపుతున్నారు. రాజకీయ లబ్ధి కోసమే ఈసీకి వైసీపీ ఫిర్యాదు చేసింది’ అని నేతలకు సూచించారు. అన్ని వర్గాల బాగుకోసమే ఫెడరేషన్లు పెట్టి ప్రోత్సహిస్తున్నామని చంద్రబాబు చెప్పారు. మోదీ పక్షాన జగన్‌ ఉండటం చూసి మైనార్టీలు ఆయనకు దూరం అయ్యారన్నారు. జగన్‌కు ఉన్న కుల పిచ్చి ఏమిటో అందరికీ తెలుసని చంద్రబాబు వ్యాఖ్యానించారు.

‘మొరిగే కుక్కలకు బెదిరేదిలేదు. ఒక్క ముఖ్యమంత్రి చంద్రబాబునాయుడుకు, మాకు అండగా నిలిచిన ప్రజలకు మాత్రమే భయపడతాం..’ అని స్త్రీ, శిశు సంక్షేమశాఖ మంత్రి పరిటాల సునీత వైసీపీ నేతలను హెచ్చరించారు. ప్రభుత్వం ప్రతిష్టాత్మకంగా చేపట్టిన రెట్టింపు పింఛన్లు, పసుపు-కుంకుమ సొమ్ము అందజేత కార్యక్రమంలో భాగంగా ఆదివారం ఆమె ఆత్మకూరు మండలం తోపుదుర్తిలో ఏర్పాటు చేసిన సభకు హాజరయ్యారు. ఈ సందర్భంగా ఆమె ఉద్వేగపూరితంగా మాట్లాడారు. టీడీపీకి, తమ కుటుంబానికి లభిస్తున్న ఆదరణ చూసి ఓర్వలేకే వైసీపీ నేతలు గ్రామాల్లో చిచ్చు రేపుతున్నారని మండిపడ్డారు. తోపుదుర్తిలో ఎన్నో అభివృద్ధి కార్యక్రమాలు చేపట్టామన్నారు. రూ.60 లక్షలతో సీసీ రోడ్లు నిర్మించామన్నారు. స్త్రీనిధి ద్వారా పొదుపు మహిళలకు రూ.5 కోట్ల రుణాలు అందించామన్నారు. హంద్రీనీవా ద్వారా గ్రామంలోని రెండు చెరువులు నీటితో నింపామన్నారు. ఈ రోజు ఆ గ్రామం చుట్టూ పచ్చదనం కనిపిస్తోందంటే అది హంద్రీనీవా నీరు వల్ల కాదా అని ప్రశ్నించారు. ఈ రోజు తప్పుడు ఆరోపణలు చేస్తున్న తోపుదుర్తి కుటుంబం అదే నీటితోనే పంటలు పండించుకోవడం లేదా అని ప్రశ్నించారు.

పార్టీలకతీతంగా గ్రామాలు అభివృద్ధి చేస్తున్నామన్నారు. టీడీపీ అధికారంలోకి వచ్చిన తరువాత ఎన్నో కార్యక్రమాలు చేపట్టి తోపుదుర్తి గ్రామాన్ని అభివృద్ధి చేశామన్నారు. మహిళలకు ముఖ్యమంత్రి అధిక ప్రాధాన్యం ఇచ్చి పసుపు-కుంకుమ కార్యక్రమం చేపడితే అది చూసి ఓర్వలేకే వైసీపీ నాయకులు దుర్బుద్ధితో అడ్డుకుంటున్నారని విమర్శించారు. ఎన్ని అడ్డంకులు సృష్టించినా, ఎన్ని సమస్యలు వచ్చినా ప్రభుత్వం వెనుకడుగు వేయకుండా అభివృద్ధి కార్యక్రమాలు చేపట్టిందన్నారు. పచ్చని పల్లెల్లో చిచ్చుపెట్టే కార్యక్రమాలు చేపడితే తాము భయపడమని, కేవలం అభివృద్ధికే తాము ప్రాధాన్యమిస్తామన్నారు. గతంలో ఎన్నడూలేని విధంగా నీళ్లొచ్చిన తరువాత ఇతరులకు కూలికి వెళ్లకుండా గ్రామస్థులు తమ పొలాల్లోనే పంటలు పండించుకుని ప్రశాంతంగా జీవనం సాగిన్నారన్నారు. దీన్ని చూసి ఓర్వలేక గ్రామంలో తోపుదుర్తి కుటుంబీకులు చిచ్చు పెడుతున్నారన్నారు. అభివృద్ధికి సహకరించాలని, ప్రశాంతంగా జీవనం సాగించే అమాయకపు ప్రజలకు ఇబ్బంది కల్పించవద్దని కోరారు. మహిళా మంత్రిగా గ్రామంలోకి తాను వస్తే వైసీపీ నాయకులు అడ్డుకోవాలని ప్రయత్నించడం బాధాకరమన్నారు. గ్రామాన్ని అన్నిరకాలుగా అభివృద్ధి చేయడం తప్పా అని ఉద్వేగపూరితంగా ప్రశ్నించారు. మహిళలకు ఇచ్చే పసుపు-కుంకుమ విలువ తెలియని వైసీపీ నాయకులకు మాట్లాడే హక్కు లేదన్నారు. ఎంతోమంది మహిళల పసుపు-కుంకుమ తుడిపేసిన వారికి దాని విలువ ఏమి తెలుస్తుందని ఆగ్రహం వ్యక్తం చేశారు. గ్రామాల్లో ప్రతి మహిళా తమ తోబుట్టువులా భావించి పసుపు-కుంకుమ ద్వారా చెక్కులు అందిస్తామని, పార్టీలకతీతంగా అందరూ ప్రభుత్వ సంక్షేమ పథకాలు సద్వినియోగం చేసుకునేలా చూస్తామన్నారు.

తోపుదుర్తిలో ఉద్రిక్తత.. తోపుదుర్తి గ్రామంలో ఆదివారం పసుపు-కుంకుమ కార్యక్రమం ఉద్రిక్తత మధ్య జరిగింది. ఈ కార్యక్రమానికి ముఖ్యఅతిథిగా హాజరుకావాల్సిన మంత్రి పరిటాల సునీతను గ్రామంలోకి రానివ్వకుండా అడ్డుకోవాలని గ్రామానికి చెందిన వైసీపీ మహిళా కార్యకర్తలు రోడ్డుపై భైఠాయించి నిరసన వ్యక్తం చేశారు. మంత్రి కార్యక్రమాన్ని అడ్డుకుంటామని వైసీపీ నాయకులు ముందస్తుగానే ప్రకటించడంతో పోలీసులు అప్రమత్తమయ్యారు. గ్రామానికి రెండు కిలోమీటర్ల దూరంలోనే మంత్రి కాన్వాయ్‌ని పోలీసులు ఆపారు. అలాగే పరిటాల శ్రీరామ్‌ కాన్వాయ్‌ని కనగానపల్లి మండలం బోగినేపల్లి వద్ద ఆపారు. గ్రామంలో నిరసన వ్యక్తం చేస్తున్న విషయం మంత్రి దృష్టికి ఎస్పీ తీసుకెళ్లారు. అయినా ఎట్టి పరిస్థితుల్లోనూ షెడ్యూల్‌ మేరకు తోపుదుర్తిలో సభ నిర్వహించాల్సిందేనని మంత్రి పట్టుబట్టారు. ఈ నేపథ్యంలో నిరసన వ్యక్తం చేస్తున్న మహిళా వైసీపీ కార్యకర్తలను అరెస్టు చేసి వారి ఇళ్లలోనే గృహ నిర్బంధం చేశారు. అనంతరం తోపుదుర్తి గ్రామంలో యథావిధిగా మంత్రి ఆధ్వర్యంలో సభ నిర్వహించారు.

ఈరోజు అనగా 04-02-2019 వ తేదీన గౌరవ ఆంధ్రప్రదేశ్ శాసన సభ ప్రతిపక్ష నాయకులు YSRCP అధ్యక్షులు శ్రీ Y.S జగన్ మోహనరెడ్డి గారు ఈ రోజు అనగా ది04-02-19 వ తేదీన ఢిల్లీ లో భారత చీఫ్ ఎలక్షన్ కమిషన్ గారికి ఆంధ్రప్రదేశ్ పోలీసు చీఫ్ డి జి పి, ఆర్.పి ఠాకూర్ గారి పైన, ఇంటిలిజెన్స్ చీఫ్ ఏ.బి.వెంకటేశ్వర రావు గారి పైన, DIG L&O జి. శ్రీనివాస్ గారి పైన, నిరాధారమైన ఆరోపణలు చేస్తూ, అబాండాలు వేసి సదరు విషయాలు ప్రెస్ మీట్లో మీడియా వారికి వెల్లడించడం, ఆంద్రప్రదేశ్ పోలీసు అధికారుల సంఘం తీవ్రంగా ఖండిస్తుంది. నిజాయితీగా సమర్ధవంతము గా పని చేస్తున్న పోలీసు అధికారుల మనో దైర్యం దెబ్బ తీసే విధంగా మరియు కులం పేరుతో నిందలు వేయడం మమ్ములను అనగా రాష్ట్ర పోలీసులను తీవ్రంగా బాధించింది. ఏ పార్టీ అధికారం లో ఉన్నా కూడా ఎప్పుడు పని చేస్తున్న సిబ్బంది, అధికారులే పని చేస్తారన్న విషయాన్ని గుర్తుంచుకోవాలి అని తెలియ పర్చుకొంటున్నాము.

ఈ సందర్బముగా DSP ల ప్రమోషన్ల లో 37 మందికి గాను 35 మందికి ఒకే సామజిక వర్గం వారికీ, అడ్డదారులలో ప్రమోషన్లు కల్పించారు అనే విషయం పూర్తిగా సత్యదూరమైనది. DSP ప్రమోషన్ల విషయంగా హై కోర్ట్ వారిచే ఫైనలైజ్ చేసిన సీనియారిటీ లిస్ట్ మేరకు కమిటీ సమావేశమై అర్హులైన వారిని కులమతాలకు అతీతంగా, శాఖ పరమైన నిబంధనలు మేరకు, రాజ్యాంగం కల్పించిన హక్కుల మేరకు SC ,ST మొదలైన విషయంగా రోస్టర్ నిబంధనలు పాటించి ప్రమోషన్లు ఇవ్వబడినవి. అంతే గాని దానికి భిన్నంగా కుల ప్రాతిపదికిన జరగలేదు అన్న విషయం తెలుసు కోవాలని కోరుతున్నాము. మొత్తం 91 సబ్ డివిజన్లు ఉండగా అందులో OC -32, BC -30, SC -06, ST -04, ముస్లిమ్స్ -05, IPS అధికారులు- 05, ఖాళీలు -09, వున్న విషయం గమనించాలని కోరుచున్నాము. ఇటీవల మా ఆంధ్రప్రదేశ్ గౌరవ డి జి పి శ్రీ ఆర్.పి.ఠాకూర్ ఐ పి ఎస్ గారు మరియు ఇతర ఉన్నతాధికారుల చొరవతో గౌరవ సి ఎం గారు మరియు హోమ్ మినిస్టర్ గార్లు ఆంధ్రప్రదేశ్ వ్యాప్తంగా 2019 మంది పోలీస్ కానిస్టేబుళ్ల నుండి హెడ్ కొనిస్టేబుళ్లుగా మరియు 566 మందికి హెడ్ కానిస్టేబుళ్ల నుండి ఏఎస్ఐ లు గామొత్తం 3151 మందికి ప్రమోషన్ లకు ఉత్తరువులు వెలువడినాయి. అదే విధంగా సాయుధ దళములలో పని చేయుచున్న పోలీసులకు, మహిళలకు కూడా అతి త్వరలో ప్రమోషన్లు కల్పించుటకు చర్యలు తీసుకోబడుచున్నవి. ఈ క్రమము లో అనేక మందికి ప్రమోషన్ లు కల్పించడం జరిగినది.మిగిలిన వారు కూడా ట్రైనింగ్ పూర్తి చేసుకొని వచ్చినందున వారికి కూడా అతి త్వరలో ప్రమోషన్ లు లభించనున్నాయి.ఈ విధంగా ప్రమోషన్ లు ఎన్నడూ లేని విధంగా లభించడం లో తమరు ఎందుకు బాధ పడుతున్నారో అర్ధం కావడం లేదు.

తమరు రాష్ట్ర వ్యాప్తముగా పాద యాయాత్ర చేసిన క్రమములో పోలీసు సిబ్బంది, అధికారులు ఎంతో చాక చక్యంగా సమస్యలు లేకుండా మీ యొక్క యాత్ర పూర్తి కావడానికి తోడ్పడినారు.అట్టి పోలీసు శాఖ ఉన్నతాధికారుల పై అబాండాలు వేయడం ధర్మం కాదని, గుడ్డ కాల్చి ఎదుటి వారి మొఖం పైన వేసే చందంగా ఉందని తెలియజేస్తున్నాము. రాబోవు రోజులలో సార్వత్రిక ఎన్నికలు జరగన్నునందున వివిధ పార్టీలకు, నాయకులకు ఎవరి జండాలు, అజెండాలు వారికి ఉంటాయని వాటి మేరకు వారు పోలీసుల పై నిందలు మోపే అవకాశం ఉంటుందని కనుక పోలీసు అధికారులు రాజ్యాంగం మేరకు చట్ట పరిధిలో నిబంధనల మేరకు నిక్కచ్చిగా వ్యవహరించి శాంతి భద్రతలు కాపాడాలని ఈ క్రమం లో ఆంధ్ర ప్రదేశ్ పోలీసు అధికారుల సంఘం అండగా ఉంటుందని రాష్ట్ర ప్రధాన కార్యదర్శి ఆంధ్ర ప్రదేశ్ పోలీసు అధికారులు సంఘం ప్రధాన కార్యదర్శి దళవాయి సుబ్రమణ్యం పోలీసు అధికారులు సంఘం తరపున తెలియపరచారు.