25 ఏళ్ల క్రితం డ్వాక్రా, ఇతర సంఘాలు నెలకొల్పానని.. వృద్ధులు, మహిళల బాధలు చూశాక రూ. వెయ్యి పెన్షన్‌ ప్రకటించానని సీఎం చంద్రబాబు నాయుడు అన్నారు. ఇప్పుడు పెన్సన్‌ను రెట్టింపు చేశామని చెప్పారు. ఆదివారం టీడీపీ నేతలతో సీఎం టెలికాన్ఫరెన్స్ నిర్వహించారు. రాజకీయాలకు అతీతంగా పసుపు- కుంకుమ పథకం ఉంటుందన్నారు. పసుపు-కుంకుమ కార్యక్రమాన్ని భగ్నం చేసే కుట్రలు చేస్తున్నారని విమర్వించారు. డ్వాక్రా మహిళలే వైసీపీకి బుద్ధిచెబుతారని సీఎం తెలిపారు. పెన్షన్ల పెంపు అనుత్పాదక వ్యయం కాదని స్పష్టం చేశారు. పెన్షన్లతో మెరుగైన వృద్ధుల ఆరోగ్యం... బతుకుపై ఆత్మవిశ్వాసం పెరిగిందన్నారు. పసుపు కుంకుమ డబ్బులను మహిళలు దుర్వినియోగం చేయరని సీఎం పేర్కొన్నారు. రూ.20 వేల చొప్పున మహిళలకు అందజేస్తున్నామన్నారు. అయితే చెక్కులు చెల్లవనే దుష్ప్రచారాన్ని మహిళలు నమ్మవద్దని ఆయన చెప్పారు. రేపటి నుంచే డబ్బులు తీసుకోవచ్చని..బ్యాంకుల్లో రూ.2400 కోట్లు డిపాజిట్ చేసినట్లు తెలిపారు. ప్రత్యర్థుల దుష్ప్రచారాన్ని తిప్పికొట్టాలని నేతలకు చంద్రబాబు సూచించారు.
అంతే కాదు శనివారం కృష్ణా జిల్లా గన్నవరం మండలం కేసరపల్లి గ్రామంలో పసుపు-కుంకుమ, పింఛన్ల పంపిణీ కార్యక్రమానికి ముఖ్య అతిథిగా వచ్చి, అక్కడ ఏర్పాటుచేసిన బహిరంగ సభలో సీఎం చంద్రబాబు మాట్లాడుతూ ఇదే విషయం చెప్పారు. డ్వాక్రా మహిళల కళ్లలో ఆనందం చూడాలని 94 లక్షల డ్వాక్రా మహిళలకు పసుపు-కుంకుమ కింద మొదటి విడతలో రూ. 10 వేలు ఇచ్చానన్నారు. అలాగే రెండో విడతలో రూ. 10 వేలను ఈరోజున రూ. 2,500 చెక్కును అందజేయడం జరుగుతుందని చెప్పారు. రెండో చెక్కును మార్చి 8న రూ. 3,500కు, మూడో చెక్కును ఏప్రిల్‌ 5న 4 వేలకు ఇవ్వడం జరుగుతుందని తెలిపారు. ఆడపడచుల పెద్దన్నగా తాను వారి ఆర్థిక ప్రగతికి తోడ్పాటు నిస్తానని ముఖ్యమంత్రి చంద్రబాము ఈ సందర్భంగా పేర్కొన్నారు. 53 లక్షల మంది వృద్ధాప్య, వితంతు, ట్రాన్‌జెండర్స్‌కు పింఛన్లు నాలుగున్నర సంవత్సరాల్లో పది రెట్లు పెంచి భరోసా కల్పించి ఘనత తమ ప్రభుత్వానిదేనన్నారు.
మొదటిసారి పింఛన్లకు రూ. 9,600 కోట్లను, రెండో విడత రూ. 13,440 కోట్లను సంవత్సరానికి అయ్యే వ్యయాన్ని భరించి ఎన్టీఆర్‌ భరోసా కింద పింఛన్లను అందిస్తున్నట్లు తెలిపారు. పసుపు-కుంకుమ కింద మహిళలకు అన్ని విధాల న్యాయం చేయడానికి రూ. 10 వేలు ఉచితంగా ఇస్తున్నామన్నారు. వైకాపా కావాలనే అప్పుగా ఇస్తున్నట్లు దుష్ప్రచారం చేస్తోందన్నారు. ఈ ప్రచారాన్ని నమ్మవద్దని, ఇవి మీకు ఉచితంగా ఇస్తున్నానని, మీకు తోచిన విధంగా, మీరు లాభపడేలాగా ఆ డబ్బు వాడుకోండి అంటూ మహిళలకు చంద్రబాబు భరోసా ఇచ్చారు. అలాంటి తప్పుడు పేపర్లలో వచ్చే, తప్పుడు వార్తలు నమ్మవద్దని చెప్పారు. 26,769 మందికి చంద్రన్న పెళ్లి కానుక కింద రూ. 170 కోట్లు ఇచ్చామన్నారు. గత ప్రభుత్వాల హయాంలో పింఛన్ల పంపిణీలో పలు అవకతవకలు జరిగాయని, ఇప్పుడు తమ ప్రభుత్వం నేరుగా అర్హుల ఖాతాలలో పింఛన్లు వేస్తున్నామన్నారు. ఈనెల 9న నాలుగు లక్షల ఇళ్లకు ఒకేసారి గృహప్రవేశం చేయడంతో ప్రపంచంలో చరిత్ర సృష్టించబోతున్నామన్నారు.
