news

న్యూటన్స్ థర్డ్ లా అంటే ఇదేనేమో... ప్రతి ఆక్షన్ కి, ఈక్వల్ అండ్ ఆపోజిట్ రియాక్షన్ ఉంటుంది అంటారు ఇందుకే.. అమిత్ షా, మోడీ కలిసి, వాళ్ళ చేతిలో అధికారం ఉందని, ఇష్టం వచ్చినట్టు రెచ్చిపోతే ఊరుకుంటారా, వీళ్ళకి టైం వచ్చినప్పుడు, వీళ్ళకు టైం వచ్చినప్పుడు, వీళ్ళు చేసేది వీళ్ళు చేస్తారు. అదే ఇప్పుడు పశ్చిమబెంగాల్ ముఖ్యమంత్రి మమతాబెనర్జీ చేసారు. బీజేపీ జాతీయ అధ్యక్షుడు అమిత్ షా హెలికాప్టరు ల్యాండింగుకు మమతాబెనర్జీ నుమతి నిరాకరించిన ఉదంతం మాల్దా జిల్లాలో సంచలనం రేపింది. స్వైన్ ఫ్లూ జ్వరం నుంచి కోలుకున్న బీజేపీ అధినేత అమిత్ షా పశ్చిమబెంగాల్ రాష్ట్రంలోని మాల్దా జిల్లాలో ఈ నెల 22వతేదీన ర్యాలీలో పాల్గొనేందుకు విమానంలో కోల్‌కతాకు వచ్చి అక్కడి నుంచి బీజేపీ కార్యకర్తల ర్యాలీలో పాల్గొనేందుకు మాల్దాకు హెలికాప్టరులో రావాలనుకున్నారు.

ఈ మేరకు వీవీఐపీ హెలికాప్టరు మాల్దాలో ల్యాండింగు కోసం అనుమతించాలని మాల్దా జిల్లా అధికారులకు బీజేపీ నేతలు వినతిపత్రం సమర్పించారు. తమ పీడబ్లూడీ శాఖ ఎగ్జిక్యూటివ్ ఇంజినీరు నివేదిక ప్రకారం మాల్దా హెలిపాడ్ హెలికాప్టరు దిగేందుకు అనువుగా లేదని, అక్కడ ఇసుక, నిర్మాణ సామాగ్రి ఉన్నాయని జిల్లా అదనపు మెజిస్ట్రేట్ బీజేపీ నేతలకు రాసిన లేఖలో పేర్కొన్నారు. తాత్కాలిక హెలిపాడ్ లో కూడా నిర్మాణ పనులు చేపట్టినందున అమిత్ షా హెలికాప్టరు దిగేందుకు సురక్షితం కాదని అందుకే తాము హెలికాప్టరు ల్యాండింగుకు అనుమతించడం లేదని మాల్దా జిల్లా అదనపు మెజిస్ట్రేట్ స్పష్టం చేశారు. గతంలో బీజేపీ, తృణమూల్ కాంగ్రెస్ పార్టీల మధ్య ఏర్పడిన వివాదాల నేపథ్యంలో అమిత్ షా హెలికాప్టరు మాల్దాలో ల్యాండింగుకు మమతా బెనర్జీ సర్కారు నిరాకరించింది. ఈ ఉదంతం పశ్చిమబెంగాల్ రాష్ట్రంలో చర్చనీయాంశంగా మారింది. మాల్దా హెలిపాడ్ హెలికాప్టరు ల్యాండింగుకు అనువుగా ఉన్నా జిల్లా అధికారులు అనుమతి నిరాకరించడం బీజేపీతో మమతకు ఉన్న వైరుధ్యమే కారణమని తెలుస్తోంది.

అమిత్‌షా హెలికాప్టర్‌ను మాల్డా హెలిపాడ్‌పై దిగిందేకు టీఎంసీ సర్కార్ అనుమతించలేదని కేంద్ర మంత్రి రవిశంకర్ ప్రసాద్ సోమవారంనాడు మీడియాకు తెలిపారు. ఇదే హెలిపాడ్‌పై కొద్ది రోజుల క్రితం మమతా బెనర్జీ హెలికాప్టర్ ల్యాండ్ అయిందని చెప్పారు. కాగా, బీజేపీ విమర్శలను టీఎంసీ అధ్యక్షురాలు, ముఖ్యమంత్రి మమతా బెనర్జీ తిప్పికొట్టారు. తాము అనుమతి ఇచ్చినప్పటికీ వాస్తవాలను వక్రీకరించి ప్రజలను కేంద్రం తప్పుదారి పట్టిస్తోందని ఆమె చెప్పారు. భద్రతా కారణాల రీత్యా అమిత్‌షా హెలికాప్టర్‌ను వేరే చోట ల్యాండ్ చేయాలని పోలీసులు కోరారని, తాను సైతం పోలీసుల అభ్యర్థన మేరకు హెలికాప్టర్ ల్యాండింగ్‌‌ను వేరేచోట మార్చుకోవాల్సి వచ్చిందని చెప్పారు. ప్రజాస్వామ్యంపై నమ్మకం ఉన్నందువల్లే అమిత్‌షా మీటింగ్‌కు ప్రభుత్వం అనుమతి ఇచ్చిందని చెప్పారు.

చిత్తూరు జిల్లా పుంగనూరు నియోజకవర్గం సోమల మండలం కందూరులో ఆదివారం జరిగిన జనసేన సభ రసాభాసగా మారింది. వైసీపీ శ్రేణులు చొచ్చుకు వచ్చి ‘జై జగన్‌’ అంటూ నినాదాలు చేయడంతో గందరగోళం నెలకొంది. రెండు పార్టీల కార్యకర్తల వాగ్వాదం, తోపులాటలు, కుర్చీలు విసురుకోవడం వంటి ఘటనలతో ఉద్రిక్తత నెలకొంది. దీంతో.. హైపర్‌ ఆది పాల్గొన్న ఈ సభ అర్ధంతరంగా ముగిసింది. హైపర్‌ ఆది సభా వేదికపైకి రాకముందు కొందరు స్థానిక నేతలు ప్రసంగిస్తూ వైసీపీ అధినేత జగన్‌పై విమర్శలు చేశారు. దీనికి నిరసనగా వైసీపీ కార్యకర్తలు ‘జై జగన్‌’ అంటూ నినదించారు. అదే సమయంలో సభ వద్దకు హైపర్‌ ఆది రావడంతో ఆయన కారు అద్దాలపై వైసీపీ కార్యకర్తలు కొట్టారు.

దీంతో జనసేన కార్యకర్తలు వలయంగా ఏర్పడి సభావేదికపైకి ఆదిని తీసుకెళ్లారు. వైసీపీ శ్రేణుల నినాదాల మధ్యే హైపర్‌ ఆది ప్రసంగం మొదలుపెట్టారు. ఎన్నికలు జరిగే ఈ నాలుగు నెలలు జనసేనపై దాడులు చేసి గందరగోళం సృష్టించాలని కొందరు ప్రయత్నిస్తుంటారని, జాగ్రత్తగా ఉండాలని ఆది సూచించారు. కులపిచ్చితో కొందరు ఓట్లు వేస్తున్నారని, కానీ పవన్‌లాంటి నిస్వార్థ నేతను ఎన్నుకుంటే మంచి భవిష్యత్తు ఉంటుందన్నారు. పవన్‌ కల్యాణ్‌కు డబ్బు, పదవి పిచ్చిలేదని, కేవలం ప్రజాసేవ చేసేందుకే రాజకీయాల్లోకి వచ్చారన్నారు. ఆది ప్రసంగానికి వైసీపీ కార్యకర్తలు అడ్డుతగులుతూ ‘జై జగన్‌’ అంటూ నినాదాలు చేస్తూ వేదిక వరకూ వచ్చారు.

దీంతో ఆది తన ప్రసంగాన్ని ముగించేశారు. ఆది, మరికొందరు జనసేన నేతలను మరో మార్గం నుంచి పోలీసులు తిరుపతికి పంపారు. కాగా, ఇద్దరు పోలీసులు మాత్రమే బందోబస్తుకు రావడంతో ఆందోళనకారులను అదుపు చేయలేకపోయారు. ఈ సభకు హాజరైన కొందరు స్థానిక నేతల కథనం ప్రకారం, వైసీపీ అధినేత జగన్‌ పై విమర్శలు చేయడంతో గొడవ ప్రారంభమైంది. వారిని అడ్డుకున్న వైసీపీ కార్యకర్తలు ‘జై జగన్‌’ అంటూ నినాదాలు చేశారు. అదే సమయంలో హైపర్ ఆది, తన కారులో రావడంతో కారుపై దాడికి యత్నించారు. విషయం తెలుసుకుని వచ్చిన పోలీసులు ఆదిని మరో మార్గం గుండా తిరుపతి రహదారిపైకి చేర్చారు.

మీకు వేల కోట్లు ఇచ్చాం, లక్షల లక్షల కోట్లు ఇచ్చాం అంటూ డబ్బా కొట్టటానికి, వారినికి ఒక కేంద్రం మంత్రిని ఏపికి తీసుకువస్తాం అని జీవీఎల్ చెప్పాడో లేదో, ఈ రోజు నితిన్ గడ్కరీ విజయవాడలో వాలిపోయారు. చంద్రబాబు ప్రభుత్వం పై విమర్శలు ఎక్కు పెట్టి, మా మోడీ అంతా చేసేసారు అని చెప్పే టైంలోనే, చంద్రబాబు వీళ్ళ నిజ స్వరూపం బయట పెడుతూ, గడ్కరీకి ఘాటు లేఖ రాసారు. నితిన్ గడ్కరీకి పోలవరం నిధుల విడుదలపై సీఎం చంద్రబాబు లేఖరాశారు. పోలవరానికి ఇవ్వాల్సిన పెండింగ్ నిధులను వెంటనే విడుదల చేయాలని కోరారు. పోలవరం ప్రాజెక్టుకు సంబంధించి రూ.3,722 కోట్లు తక్షణం విడుదల చేయాలని కోరారు. ప్రాజెక్ట్ నిర్మాణం కోసం రూ.10,459 కోట్లు ఖర్చు చేయగా కేవలం రూ.6,727 కోట్లు మాత్రమే ఇచ్చారని చెప్పారు.

గత జులైలో పోలవరంలో కేంద్రమంత్రి గడ్కరీ పర్యటించినప్పుడు ఫిబ్రవరిలోపు నిధులు మొత్తం విడుదల చేస్తామని చెప్పారని గుర్తుచేశారు. ఈ విషయంలో ఎంతవరకు మాట మీద నిలబడ్డారో చెప్పాలని ప్రశ్నించారు. ఐదు రాష్ట్రాలకు ఉపయోగపడే పోలవరం ప్రాజెక్ట్‌ను కేంద్రం నిర్లక్ష్యం చేస్తోందని పేర్కొన్నారు. పోలవరం ప్రాజెక్టు నిర్మాణానికి సంబంధించి కేంద్రం ఇస్తామన్న హమీని తక్షణమే విడుదల చెయ్యాలని డిమాండ్ చేశారు. కేంద్రం సహకరించకపోయినా ఇప్పటి వరకు 64 శాతం పనులు పూర్తి చేసినట్లు తెలిపారు. ఇప్పటికైనా కేంద్రం ఇచ్చిన నిధులు, పోలవరం ప్రాజెక్టుకు ఇస్తామన్న హామీకి సంబంధించి నిధులు విడుదల చెయ్యాలని లేఖలో కోరారు.

మరో పక్క విజయవాడలో, గడ్కరీ చంద్రబాబు పై విమర్శలు చేసారు. విజయవాడ సిద్ధార్థ ఆడిటోరియంలో నిర్వహించిన కృష్ణా జిల్లా, విజయవాడ నగర భాజపా ముఖ్య కార్యకర్తల సమావేశానికి ఆయన హాజరయ్యారు. భాజపా ఏ మతానికీ వ్యతిరేకం కాదని.. తీవ్రవాదానికి మాత్రమే వ్యతిరేకమని చెప్పారు. కేంద్ర ప్రభుత్వం ఇస్తున్న నిధులు, అమలు చేస్తున్న పథకాలపై చర్చించడానికి సిద్ధంగా ఉన్నామన్నారు. కేంద్ర ప్రభుత్వం సహకారంతో పోలవరం పనులు 62 శాతం పూర్తయ్యాయని చెప్పారు. పోలవరం విషయంలో కేంద్రం ఘనతను రాష్ట్రం ఎందుకు ఒప్పుకోవడం లేదో తెలియడం లేదన్నారు. కేంద్ర ప్రభుత్వం ఎన్ని వేల కోట్ల రూపాయలు రాష్ట్రానికి ఇస్తున్నా వాటిని దుర్వినియోగం చేసి రూపాయి కూడా ఇవ్వలేదని సీఎం చంద్రబాబు దుష్ప్రచారం చేస్తున్నారని విమర్శించారు.