news

తెలంగాణ అసెంబ్లీ ఎన్నికల పోలింగ్ ముగిసింది. తెలంగాణ ఓటర్లు ఇచ్చే తీర్పు ప్రభావం జాతీయ రాజకీయాల పై, ముఖ్యంగా పొరుగున ఉన్న ఆంధ్ర రాష్ట్రం పైనా భారీగా పడుతుంది. అయితే ఈ ప్రభావం ఎవరికి అనుకూలిస్తుందనేది విశ్లేషకులు అంచనా వేస్తున్నారు. ఏపీ ముఖ్యమంత్రి చంద్రబాబు ఎన్నికల్లో పార్టీ తరఫున ప్రచారం చేసేందుకు రానని, మీరే చూసుకోవాలని తెలంగాణ నాయకులకు చెప్పారు. కానీ కాంగ్రెస్‌తో కలిసి ప్రజాకూటమిగా ఏర్పడిన తర్వాత తొలుత ఖమ్మంలో ప్రచారం నిర్వహించి ప్రతిస్పందన చూశారు. ఖమ్మంలో ప్రజల నుంచి అనూహ్య స్పందన రావటంతో, హైదరాబాద్‌లో కలియ తిరిగారు. హైదరాబాద్‌లోనూ ఆదరణ లభించడంతో, రాష్ట్ర పాలనపై, టీఆర్‌ఎస్ నాయకత్వంపై గళం పెంచారు.

తెలంగాణ ఓటర్లు ఎటువంటి తీర్పు ఇవ్వనున్నారు? అనేది 11వ తేదీన తేలిపోనున్నది. టీఆర్‌ఎస్ తిరిగి అధికారం చేపడితే ఆంధ్ర ఓటర్లపై ఎటువంటి ప్రభావం ఉంటుంది?, ఒకవేళ కాంగ్రెస్, టీడీపీ నేతృత్వంలోని ప్రజా కూటమి అధికారాన్ని చేపడితే అక్కడ రాజకీయ సమీకరణలు ఎలా ఉంటాయనే అంచనాలు, చర్చ జరుగుతున్నది. కూటమి విజయం సాధిస్తే ఆంధ్రలో అనూహ్యంగా రాజకీయాలు మారుతాయి. ఫలితంగా ఓటర్ల పై ప్రభావం పడుతుంది. ప్రజా కూటమి విజయం సాధిస్తే నాలుగైదు నెలల్లో ఆంధ్రలో జరగబోయే ఎన్నికల్లో టీడీపీ కార్యకర్తలు మరింత ఉత్సాహంగా పనిచేస్తారు. అంతేకాకుండా జాతీయ రాజకీయాల్లో కూడా ఈ కాంబినేషన్ హిట్ అవుతంది అనే నమ్మకం కలిగి, చంద్రబాబు ఫ్రంట్ లో మరిన్ని పార్టీలు వచ్చి చేరతాయి.

తెలంగాణ ఓటర్ల తీర్పు తర్వాత ఆంధ్రలో తప్పని సరిగా రాజకీయ సమీకరణలు మారుతాయి. కూటమి ఆంధ్రలోనూ ఏర్పడితే, దానిని ఎదుర్కొవడానికి వైఎస్సార్ కాంగ్రెస్ పార్టీ అధ్యక్షుడు వైఎస్ జగన్మోహన్ రెడ్డి కూడా పావులు కదుపుతారు. అప్పుడు ఆయన శతృవుకు శతృవు మిత్రుడు అన్న చందంగా బీజేపీతో దోస్తీ చేస్తారా?, అంతేకాకుండా మరో అడుగు ముందుకేసి సినీ నటుడు పవన్ కళ్యాణ్ నేతృత్వంలోని జన సేన పార్టీనీ కలుపుకుని వెళతారా? అనే కోణంలోనూ పరిశీలకులు లెక్కలు వేస్తున్నారు. తెలంగాణ అపద్ధర్మ ముఖ్యమంత్రి కే. చంద్రశేఖర్ రావు, అపద్ధర్మ మంత్రి కే. తారక రామారావు ప్రభృతులూ ఆంధ్రకు వెళ్ళి జగన్‌కు బాసటగా నిలిచే అవకాశమూ లేకపోలేదు.మొత్తానికి ఇప్పుడు రహస్యంగా ఉన్న మిత్రులు అందరూ, బహిరంగంగా వచ్చి చంద్రబాబు మీద దాడి చేస్తారు. చూద్దాం ప్రజలు ఏమి చేస్తారో.

తెలంగాణా ఎన్నికలు జరుగుతున్న వేళ, తెలంగాణా ప్రభుత్వానికి సుప్రీం కోర్ట్ షాక్ ఇచ్చింది. దీంతో, ముస్లింలకు కెసిఆర్ మరోసారి టోపి పెట్టారంటూ విమర్శలు వస్తున్నాయి. సుప్రీంకోర్ట్ తీర్పుతో కెసిఆర్ మోసం బైటపడిందని ప్రతిపక్షాలు అంటున్నాయి. 12% రిజర్వేషన్ల పై ముస్లింలకు కెసిఆర్ దగా చేసారని విమర్శలు గుప్పిస్తున్నారు. సుప్రీంకోర్టు కొట్టేస్తుందని తెలిసీ ముస్లింలు,ఆదివాసీలను కెసిఆర్ దగా చేసారని అంటున్నారు. ముస్లింలు,ఆదివాసీల పై టిఆర్ఎస్ కు కపట ప్రేమ అని నేడే బట్టబయలయిందని ప్రతిపక్షాలు విమర్శలు చేస్తున్నాయి. ఒక కమిషన్ వేసి అధ్యయనం చేయకుండా మూర్ఖంగా చేసినందుకు ఫలితం, ఇదే అని అంటున్నారు.

రిజర్వేషన్లు 50%కు మించకూడదని సుప్రీం కోర్టు ఈ రోజు తీర్పు ఇచ్చింది.రిజర్వేషన్లు 50శాతానికి కంటే మించవద్దని ఉన్నత న్యాయస్థానం స్పష్టం చేసింది. శుక్రవారం రిజర్వేషన్ల అంశంపై సుప్రీంలో వాదనలు జరిగాయి. తెలంగాణలో బీసీల జనాభా అధికంగా ఉన్నందున ప్రత్యేక పరిస్థితులు ఉన్నాయని తెలంగాణ ప్రభుత్వం తరపు న్యాయవాది వాదించారు. స్థానిక సంస్థల ఎన్నికల్లో రిజర్వేషన్లు 67 శాతం ఇవ్వాలని కోరింది. కాగా రిజర్వేషన్లు పెంచాలన్న తెలంగాణ ప్రభుత్వ అభ్యర్థనను సుప్రీంకోర్టు కొట్టి వేసింది. ఎన్నికలు జరుగుతున్న వేళ, ఈ రోజు సుప్రీంకోర్ట్ తీర్పే కెసిఆర్ పాలనకు మరణ శాసనం అని రాజకీయ విశ్లేషకులు అంటున్నారు.

"ఆంధ్రప్రదేశ్ లో కాపు రిజర్వేషన్ల పై మంజునాధ కమిషన్ వేసిన టిడిపి ప్రభుత్వం. జస్టిస్ మంజునాధ నేతృత్వంలో ప్రత్యేక బిసి కమిషన్ ద్వారా ఏపిలో అధ్యయనం. కానీ తెలంగాణలో అవేమీ పట్టించుకోని కెసిఆర్ మూర్ఖత్వం. ఫలితం తెలంగాణలో ముస్లింలు,ఆదివాసీలకు,బిసీలకు తీరని అన్యాయం. కెసిఆర్ మూర్ఖత్వం తెలంగాణకు శాపం.టిఆర్ ఎస్ ఒంటెత్తు పోకడ తెలంగాణ బడుగుల మనుగడకే శాపం. ఈ మూర్ఖపు పాలన ఇంకా కావాలా..? " అంటూ కాంగ్రెస్ సీనియర్ నేత విమర్శలు గుప్పించారు. ఎన్నికలు జరుగుతున్న సమయంలోనే, కేసీఆర్ బూటకం బయట పడిందని, కేసీఆర్ కు తగిన బుద్ధి చెప్పాలని అంటున్నారు.

లగడపాటి రాజగోపాల్.. తెలుగు రాష్ట్రాల్లో పరిచయం అక్కర్లేని పేరు. ఎన్నికలొచ్చాయంటే.. లగడపాటి సర్వే వివరాల కోసం తెలుగు రాష్ట్రాల్లో ప్రజలు ఆసక్తిగా ఎదురు చూస్తుంటారు. ప్రస్తుతం తెలంగాణలో ఎన్నికలు పూర్తి కావటం, నేషనల్ మీడియా మొత్తం తెరాస గెలుస్తుంది అనటంతో, అందరూ రాజగోపాల్ సర్వేలో ఏం చెప్పబోతున్నారా అంటూ ఆసక్తిగా ఎదురు చూస్తున్నారు. అంతగా ఉత్కంఠగా మారిన ఎన్నికల పై లగడపాటి తన అభిప్రాయాన్ని వెల్లడించారు. . 72 నుంచి 75 శాతం వరకు పోలింగ్ జరిగిందన్నారు. రాత్రి 9గంటలకు కచ్చితమయిన పోలింగ్ శాతం ఎంతనేది ఈసీ ప్రకటిస్తుందన్నారు.

అయితే 2014 ఎన్నికల నాటి కంటే అత్యధికంగా ఓటింగ్ శాతం నమోదయింది. ఎప్పుడూ లేని విధంగా తెలంగాణ ఎన్నికల్లో ఖర్చు పెరిగిపోయిందన్నారు. ప్రేమ, కసి, జాలి, ఆశ.. ఇవన్నీ తెలంగాణ ప్రజల్లో కనిపించాయన్నారు. 2014 ఎన్నికల్లో పోలయిన 68.5శాతం కంటే ఎక్కువగా ఓటింగ్ ఉంటే ఒకలా.. అంతకు మించి ఉంటే మరోలా చెప్పిన విషయాన్ని గుర్తు చేశారు. ఇండిపెండెంట్లు ఎక్కువ సంఖ్యలో గెలుస్తారని గతంలో చెప్పాననీ, ఇదే మాట నిజమవబోతోందన్నారు. 5-7 మంది ఇండిపెండెంట్లు గెలుస్తారని తెలిపారు. టీడీపీ పోటీ చేస్తున్న 13 స్థానాల్లో ఇద్దరు ఇండిపెండెంట్లు గెలుస్తారు.

టీడీపీ వర్సెస్ టీఆర్ఎస్ పోటీ ఉన్నవి 10 మాత్రమేనని, ఇంకో స్థానంలో ఎంఐఎంతో పోటీ ఉంది. 7 సీట్లు ప్లస్ ఆర్ మైనస్ 2గా అటు ఫలితాలు వస్తాయన్నారు. కాంగ్రెస్ కూటమి ఈ ఎన్నికల్లో 65 స్థానాలకు 10 సీట్లు అటు ఇటుగా వస్తాయన్నారు. టీఆర్ఎస్ 35 సీట్లు 10 స్థానాలు అటు ఇటుగా వస్తుందని తెలిపారు. ఎంఐఎంకు 6 నుంచి 7 సీట్లు గెలిచే అవకాశాలు ఉన్నాయి. బీఎల్ఎఫ్ ఒక చోట గెలుస్తుంది. న్యూస్‌ ఎక్స్‌ సర్వే ప్రకారం తెలంగాణలో హంగ్ ఏర్పడనుంది. తెలంగాణలో మొత్తం 119 స్థానాల్లో ఎన్నికలు జరగ్గా.. టీఆర్‌ఎస్‌ 57 స్థానాల్లో, ప్రజాకూటమి 46 సీట్లలో, బీజేపీ 6, ఇతరులు 10 చోట్ల గెలవనున్నారని న్యూస్ ఎక్స్ తెలిపింది. పోటా పోటీ వాతావరణంలో ఎన్నికలు జరిగాయని సర్వే చెబుతోంది. మరో పక్క టైమ్స్ నౌ, రిపబ్లిక్ టీవీలు మాత్రం తెరాస గెలుస్తుందని చెప్పారు.