news

విద్యుత్‌ చట్టం-2003లో సవరణలు చేయాలని కేంద్ర ప్రభుత్వం భావిస్తున్న నేపథ్యంలో ఆ ప్రతిపాదనలను వ్యతిరేకిస్తూ దిల్లీ ముఖ్యమంత్రి కేజ్రీవాల్‌.. ఈ రోజు ఆంధ్రప్రదేశ్ ముఖ్యమంత్రి చంద్రబాబుకు, భాజపాయేతర రాష్ట్రాల ముఖ్యమంత్రులకు లేఖలు రాశారు. ఆంధ్రప్రదేశ్‌ ముఖ్యమంత్రి చంద్రబాబు నాయుడు, పశ్చిమ్‌ బంగా ముఖ్యమంత్రి మమతా బెనర్జీ, కేరళ ముఖ్యమంత్రి పినరయి విజయన్‌, కర్ణాటక ముఖ్యమంత్రి హెచ్‌.డి కుమారస్వామి, పుదుచ్చేరి ముఖ్యమంత్రి వి.నారాయణ స్వామి, తమిళనాడు ముఖ్యమంత్రి పళనిస్వామి, మిజోరాం ముఖ్యమంత్రి లాల్ ‌తన్హ‌వ్‌లా,

పంజాబ్‌ ముఖ్యమంత్రి అమరీందర్‌ సింగ్‌, తెలంగాణ ఆపద్ధర్మ ముఖ్యమంత్రి కేసీఆర్‌, ఒడిశా ముఖ్యమంత్రి నవీన్‌ పట్నాయక్, సిక్కిం ముఖ్యమంత్రి పవన్‌ కుమార్‌ చామ్లింగ్‌లకు లేఖలు చేసి పలు విషయాలను ప్రస్తావించారు. విద్యుత్‌ చట్టం-2003లో మార్పులు తీసుకురావడం కోసం కేంద్ర ప్రభుత్వం చేసిన ప్రతిపాదనలు అభ్యంతరకరంగా ఉన్నాయని కేజ్రీవాల్ ఆ లేఖల్లో పేర్కొన్నారు. వీటిని తీవ్రంగా పరిగణించాల్సిన అవసరం ఉందని, విద్యుత్‌ రంగం పూర్తిగా కేంద్ర సర్కారు చేతిలోకి వెళ్లిపోతుందని, విద్యుత్ ధరలు పెరిగిపోతాయని ఆయన ఆందోళన వ్యక్తం చేశారు.

‘కొన్ని సంస్థలకు లాభాలు వచ్చేలా కేంద్ర ప్రభుత్వం దేశం మొత్తం విద్యుత్‌ రంగాన్ని ప్రైవేటీకరణ చేయాలని భావిస్తున్నట్లు అనిపిస్తోంది. పార్లమెంటులో ఈ బిల్లు ఆమోదం పొందడానికి వీల్లేదు. విద్యుత్‌ చట్టంలో సవరణలు తీసుకొచ్చే ప్రయత్నాన్ని పార్లమెంటులో మనం అందరం కలిసి అడ్డుకోవాల్సి ఉంది. ఈ బిల్లు వల్ల సామాన్య ప్రజలపై ఎలాంటి ప్రతికూల ప్రభావాలు పడతాయనే విషయాలను మనం ప్రచారం చేయాల్సి ఉంది’ అని ముఖ్యమంత్రులకు రాసిన లేఖల్లో కేజ్రీవాల్‌ పేర్కొన్నారు. ఈ అంశాలపై చర్చించడానికి తాను ఆయా రాష్ట్రాల ముఖ్యమంత్రులను కలవాలనుకుంటున్నానని ఆయన తెలిపారు.

రాష్ట్రంలో ఐటీ దాడులు కలకలం రేపాయి. శుక్రవారం ఉదయం నుంచి అర్ధరాత్రి దాటేదాకా వరుస సోదాలతో ఐటీ అధికారులు హడావుడి చేశారు. దీంతో ఎప్పుడు ఏమి జరుగుతుందోనన్న ఉద్రిక్తత సర్వత్రా కనిపించింది. పొరుగు రాష్ట్రాలనుంచీ అదనపు సిబ్బందిని రప్పించుకొని ఏకకాలంలో, ముందుగా ఎంచుకొన్న కంపెనీలు, వ్యాపారుల సంస్థలపై ఐటీ అధికారులు విరుచుకుపడ్డారు. గుంటూరులో ఐదు చోట్ల, విజయవాడలో మూడు సంస్థలపై, విశాఖలో రెండు ఆఫీసులపై, ప్రకాశం జిల్లాలో ఒకే నేతకు చెందిన పలు సంస్థలపై దాడులు మొదలుపెట్టారు. నెల్లూరులో టీడీపీ సీనియర్‌ నేత బీద మస్తానరావుకు (బీఎమ్మార్‌) చెందిన సంస్థల్లో సోదాలు శుక్రవారం కూడా కొనసాగాయి.

రాజధాని ప్రాంతమైన విజయవాడ, గుంటూరు నగరాలతోపాటు విశాఖ, నెల్లూరు, ప్రకాశం జిల్లాల్లోని పలు స్థిరాస్తి సంస్థలు, పరిశ్రమలు, రొయ్యల ఎగుమతి సంస్థలకు చెందిన కార్యాలయాలు, వాటిని నిర్వహిస్తున్నవారు, అందులో పనిచేస్తున్న ముఖ్యమైన ఉద్యోగుల ఇళ్లలో ఉదయంనుంచి రాత్రి వరకూ విస్తృతంగా తనిఖీలు సాగాయి. హైదరాబాద్‌లోని పలు చోట్ల కూడా తనిఖీలు చేశారు. వీటిల్లో పలువురు రాజకీయ ప్రముఖులకు సంబంధించిన సంస్థలూ ఉన్నాయి. నెల్లూరు జిల్లాలో తెదేపా ముఖ్య నేత బీద మస్తాన్‌రావుకు చెందిన సంస్థల్లోనూ, ప్రకాశం జిల్లాలో కందుకూరు ఎమ్మెల్యే పోతుల రామారావుకు(ఈయన వైకాపా నుంచి తెదేపాలో చేరారు) చెందిన పరిశ్రమల్లోనూ, విశాఖలో నంబూరు శంకరరావు (రేవంత్‌రెడ్డి సన్నిహితుడని ప్రచారం ఉంది. వైకాపాలో క్రియాశీలంగా వ్యవహరిస్తున్నారు) సంస్థల కార్యాలయాల్లోనూ సోదాలు జరిగాయి. రాష్ట్రవ్యాప్తంగా మొత్తం 28 చోట్ల తనిఖీలు నిర్వహించినట్లు సమాచారం.

విజయవాడలో శుక్రవారం తెల్లవారుజామునే ఐటీ అధికారులు తమ పని మొదలుపెట్టారు. చెన్నై, బెంగళూరు, హైదరాబాద్‌ ప్రాంతాల నుంచి మొత్తం 9 బృందాలు గురువారం రాత్రికే విజయవాడ చేరుకొన్నాయి. తెలతెలవారుతుండగానే తనిఖీలు మొదలుపెట్టారు. తొలుత సదరన్‌ డెవలపర్స్‌లో, అనంతరం వరుసగా శుభగృహ, వీఎస్‌ ఎకో బ్రిక్స్‌లో తనిఖీలు చేపట్టాయి. బెంజ్‌ సర్కిల్‌లోని నారాయణ విద్యాసంస్థ కార్యాలయానికి వెళ్లినా, ఏమనుకున్నారోఏమోగానీ తనిఖీలు జరపకుండానే వెనువెంటనే వెనుదిరిగారు. అప్పటికే సమాచారం అందడంతో మీడియా.. మహాత్మాగాంధీ రోడ్‌లోని సదరన్‌ డెవలపర్స్‌ వద్దకు చేరుకొంది. గుంటూరుకు చెందిన వల్లభనేని శ్రీనిసవారావు కృష్ణాజిల్లా పెనుగంచిప్రోలు మండలం నవాబుపేటలో ఏర్పాటుచేసుకొన్న వీఎస్‌ ఎకో బ్రిక్స్‌లో మరో టీమ్‌ తనిఖీలు జరిపింది.

ఏపీలో తాజా రాజకీయ పరిణామాలు, శుక్రవారం ఏపీలో జరిగిన ఐటీ సోదాలపై హీరో శివాజీ మీడియాతో మాట్లాడారు. ఏకకాలంలో సోదాలు చేయడాన్ని ఆయన తీవ్రంగా తప్పుబట్టారు. రాష్ట్ర ప్రభుత్వాన్ని ఏదో విధంగా దెబ్బతీయాలని కొందరు కుట్ర చేస్తున్నారని ఆయన చెప్పుకొచ్చారు. చంద్రబాబు ప్రభుత్వానికి ముప్పుందని తాను ముందే చెప్పిన విషయాన్ని ఈ సందర్భంగా మరోసారి శివాజీ గుర్తు చేశారు. చంద్రబాబుపై కోపం ఉంటే ఎన్‌కౌంటర్‌ చేయండని ఆయన తీవ్ర ఆవేదన వ్యక్తం చేశారు. మన రాష్ట్రంలో ఉన్న నలుగురు, ఈ నలుగురిలో ఉన్న ఒక మహిళామణి కలిసి, ఢిల్లీలో చేసిన తతంగమే ఈ ఐటి దాడులని శివాజీ అన్నారు. అయితే, ఆ మహిళామణి పేరు చెప్పటానికి మాత్రం ఆయన నిరాకరించారు. నా మాటలు వింటే ఎవరో తెలుస్తుందని, పేర్లు చెప్తే, నన్ను లీగాల్ ఇరికించటానికి రెడీగా ఉన్నారని అన్నారు.

"ప్రశాంతంగా ఉన్న రాష్ట్రంలో అల్లర్లకు కుట్ర చేస్తున్నారు. ఏపీకి చెందిన నలుగురైదుగురు ఢిల్లీలో కుట్రలు చేస్తున్నారు. బీజేపీ నేత జీవీఎల్‌ అర్థంలేకుండా మాట్లాడుతున్నారు. ఏపీ ప్రజలు పిచ్చోళ్లని అనుకుంటున్నారా?. సొంత ఆదాయం, ప్రయోజనాల కోసం మోసం చేస్తున్నారు. ప్రత్యేకహోదా అంశాన్ని మోదీ చెప్పలేదని, మార్ఫింగ్‌ చేశారని అంటున్నారు. మోదీ రెచ్చగొట్టి పంపడంతోనే ఇలాంటి ఘటనలు ఏపీలో జరుగుతున్నాయి. ప్రత్యేకహోదా లేకుంటే ఏపీ అభివృద్ధి చెందదు. హోదాపై జగన్‌, పవన్‌ ఎందుకు మాట్లాడటం లేదు. నవంబర్‌ 2వ వారం నుంచి హోదా సైన్యాన్ని తయారుచేస్తున్నాం. గొప్ప సైన్యం ఉన్న వ్యక్తి పవన్ కల్యాణ్ ప్రత్యేక హోదా గురించి ఎందుకు మాట్లాడటం లేదు. అన్ని పార్టీలు కలిస్తేనే ప్రత్యేక తెలంగాణ వచ్చింది" అని శివాజీ ఈ సందర్భంగా స్పష్టం చేశారు.

"ఏపీకి ఇంతకంటే చీకటిరోజు ఉండదేమో.?. రాష్ట్ర ప్రభుత్వాన్ని ఇబ్బందులకు గురిచేస్తున్నారు. చంద్రబాబే లక్ష్యమైతే ఎన్‌కౌంటర్ చేయండి. బాబును ఎన్‌కౌంటర్ చేయడానికి కూడా కేంద్రం వెనకాడదు. డిసెంబర్‌లో జరగాల్సిన ఐటీ దాడులు ఈ రోజే జరిగాయి. మోదీ ప్రత్యేక హోదా ఇస్తానని చెప్పలేదనడం దుర్మార్గం. బీజేపీ నేతలకు సినిమా అంటే ఎలా ఉంటుందో త్వరలోనే చూపిస్తాం. రేవంత్ ఆస్తుల గురించి ఎవరు సమాచారం ఇచ్చారో ఏపీలో ఐటీ సోదాలకు సంబంధించి కూడా అతనే సమాచారం ఇచ్చారు. మీడియాకు ముందే సమాచారం తెలియడంతో ఐటీ అధికారులు ప్లాన్ మార్చారు" అని శివాజీ ఈ సందర్భంగా చెప్పుకొచ్చారు.