news

ఆంధ్రప్రదేశ్ ముఖ్యమంత్రి చంద్రబాబుకు ఓ రాజ్యాంగబద్ధ సంస్ధ నుంచి నాలుగైదు రోజుల్లో నోటీసులు అందబోతున్నాయంటూ, నాలుగు రోజుల క్రిందట హీరో శివాజీ కొద్దిరోజుల క్రితం ప్రకటించి కలకలం రేపిన సంగతి తెలిసిందే. శివాజీ చెప్పిన దగ్గర నుంచి రాష్ట్రంలో చర్చ జరుగుతూనే ఉంది. శివాజీ చెప్పినట్టు గానే, 8 ఏళ్ళ క్రిందట కేసు తిరగదోడి, తెలంగాణలో ముందస్తు ఎన్నికలు జరుగుతున్న తరుణంలో చంద్రబాబుకు బాబ్లీ కేసులో మళ్లీ నోటీసులివ్వడం తెలుగు రాష్ట్రాల్లో చర్చకు దారితీస్తోంది. ఈ కేసు అటు మహారాష్ట్ర ఇటు తెలంగాణ, ఏపీకి ముడిపడి ఉంది.

నిజానికి అప్పట్లో చంద్రబాబుపై కేసులను మహారాష్ట్ర ప్రభుత్వం ఉపసంహరించుకుందని మీడియాలో వార్తలు కూడా వచ్చాయి. అయితే తెలంగాణలో ఎన్నికలు జరుగబోతున్న సమయంలో ఇప్పడు ఈ నోటీసుల అంశం తెరపైకి రావడం కొత్త చర్చకు దారితీసింది. అయితే, ఈ రోజు హీరో శివాజీ మరో సారి స్పందించారు. ఈ సారి, మరో పెద్ద బాంబు పేల్చారు. చంద్రబాబుకు మరో రెండుమూడు నోటీసులు రాబోతున్నట్లు చెప్పారు. చంద్రబాబు వారి ట్రాప్‌లో పడకుండా జాగ్రత్తగా ఉండాలని శివాజీ సూచించారు. అతి త్వరలోనే చంద్రబాబుకి ఆ రెండు నోటీసులు రాబోతున్నాయని కూడా చెప్పారు.

ప్రజలు ఎన్నుకున్న ప్రభుత్వాన్ని కూలదోయడం సరికాదని వ్యాఖ్యానించారు. కుర్చీ కాంక్ష మొదలైనప్పుడే విధ్వంసం మొదలవుతుందని శివాజీ చెప్పారు. జనవరిలో ఎన్నికలు వస్తాయని జగన్ ఎలా చెప్పగలుగుతున్నారని ఆయన ప్రశ్నించారు. ఏదో విధంగా చంద్రబాబును ఒంటరి చేసి, ప్రభుత్వాన్ని కూలదోయాలని చూస్తున్నారని ఆరోపించారు. దేశంలో మోదీకి ఎదురుగా నిలబడ్డ వ్యక్తి చంద్రబాబు ఒక్కరేనని శివాజీ వ్యాఖ్యానించారు. ఐక్యరాజ్యసమితిలో మాట్లాడే అవకాశం చంద్రబాబుకు దక్కడం తెలుగుజాతికి గౌరవమని శివాజీ అభిప్రాయపడ్డారు.

తాను ఎప్పుడూ సచివాలయంలోనే ఉంటానని, అమరావతి బాండ్ల జారీపై వచ్చిన ఆరోపణలపై గురువారం కూడా తాను చర్చకు సిద్ధమని రాష్ట్ర ప్రణాళికా సంఘం ఉపాధ్యక్షుడు సీ కుటుంబరావు మాజీ ఎంపీ ఉండవల్లి అరుణ్‌కుమార్‌కు సవాల్ విసిరారు. వెలగపూడి సచివాలయంలో బుధవారం ఆయన విలేఖరుల సమావేశంలో మాట్లాడుతూ అమరావతి బాండ్ల జారీలో ఒక్క రూపాయి అవినీతి జరిగినట్లు నిరూపించినా రాజీనామాకు తాను సిద్ధమన్నారు. ఉండవల్లికి ఏ వివరాలు కావాలన్నా ఇస్తామని, ఆ తరువాత చర్చకు రావొచ్చన్నారు. ఆయన చేసిన ఆరోపణలకు పదేపదే వివరణ ఇస్తున్నప్పటికీ, మళ్లీమళ్లీ ఆరోపణలు చేయడం దురదృష్టకరమన్నారు. తామిచ్చిన వడ్డీ కంటే తక్కువ వడ్డీ ఇస్తే ఆయనకు డబుల్ అరెంజర్ ఫీజు చెల్లిస్తామన్నారు.

ఆయా సంస్థలకు ఇచ్చే క్రెడిట్ రేటింగ్ ఆధారంగా వడ్డీని నిర్ణయిస్తారన్నారు. భారత్ రేటింగ్ ట్రిపుల్ బీ వద్ద ఉందని, డాలర్‌తో రూపాయి మారకం విలువ కూడా పడిపోయిందని, దీంతో ఎప్పుడూ లేనివిధంగా కేంద్ర ప్రభుత్వ బాండ్ల వడ్డీ కూడా పెరిగిందన్నారు. గతంలో కేంద్ర ప్రభుత్వ బాండ్ల వడ్డీ 7.35 శాతం ఉండగా, అదిప్పుడు 8.18కి పెరిగిందన్నారు. సీఆర్‌డీఏ రేటింగ్ ఏ ప్లస్ ఉందని, అందుకే ఆ వడ్డీ నిర్ణయించారన్నారు. గుజరాత్‌లో గుజరాత్ పెట్రోలియం కార్పొరేషన్ 1.75 శాతం అరెంజర్ ఫీజుగా చెల్లించిందని గుర్తుచేశారు. పోలవరం పనులు చేయకుండానే బిల్లులు చెల్లించామనడం సరికాదన్నారు. పోలవరం అథారిటీ తప్పుచేసిందా? అని ప్రశ్నించారు.

ప్రజల్లో లేనిపోని అపోహలు కలిగేలా ఆరోపణలు చేయవద్దని హితవు పలికారు. వైఎస్ రాజశేఖరరెడ్డి అవినీతిపరుడు కాదని తానెప్పుడూ అనలేదని ఉండవల్లి చెప్పారని, దీంతో వైఎస్ అనినీతిపరుడేనని ఆయన అంగీకరించారన్నారు. వైఎస్‌పై వచ్చిన రాజా ఆఫ్ కరెప్షన్ పుస్తకంపై చర్చకు తానెప్పుడైనా సిద్ధమని చెప్పారు. ముంబైలో పెద్ద పారిశ్రామికవేత్తలతో కూడా సీఎం సమావేశమయ్యారని గుర్తుచేశారు. కేవలం లిస్టింగ్ కార్యక్రమానికే ముంబై వెళ్లలేదన్నారు. పోలవరం, పరిశ్రమల ఏర్పాటుకు సంబంధించిన వివరాలన్నీ ఉండవల్లి ఇచ్చేందుకు కూడా సిద్ధమేనని కుటుంబరావు స్పష్టం చేశారు. కావాలంటే పెట్టుబడుల కాపీలను కూడా పంపుతానని చెప్పారు. నెలరోజులైనా సరే వాటిని అధ్యయనం చేసి రావాలని ఉండవల్లికి సూచించారు.

బాబ్లీ ప్రాజెక్టు ఆందోళన వ్యవహారంలో ఆంధ్రప్రదేశ్ ముఖ్యమంత్రి చంద్రబాబు నాయుడి పై మహారాష్ట్రలోని ధర్మాబాద్ కోర్టు నాన్ బెయిలబుల్ వారెంట్ జారీ చేసిన సంగతి ప్రస్తుతం రాష్ట్రంలో హాట్ టాపిక్ గా మారింది. ఎప్పుడో 8 ఏళ్ళ నాటి కేసు ఉన్నట్టు ఉండి ఎందుకు తిరగదోడారు ? ఎవరు ఈ పని చేసారు ? ఇప్పుడు ఈ రాజకీయ కక్ష ఎందుకు అనే చర్చ మొదలైంది. ఈ తరుణంలో, చంద్రబాబు స్వయంగా ఈ విషయం పై స్పందించారు. ఈ రోజు మధ్యాహ్నం శ్రీశైలం ప్రాజెక్టు దగ్గర జలసిరికి చంద్రబాబు హారతిచ్చారు. ఈ సందర్భంగా ఆ కార్యక్రమంలో బహిరంగ సభలో మాట్లాడిన ముఖ్యమంత్రి చంద్రబాబు, బాబ్లీ ఎపిసోడ్, నాన్ బెయిలబుల్ వారెంట్ల పై మొదటి సారి స్పందించారు.

"బాబ్లీ ప్రాజెక్టుకు వ్యతిరేకంగా పోరాడాను. ఉత్తర తెలంగాణ ఎడారి అవుతుందని పోరాటం చేశాను. కానీ బాబ్లీ కేసులో నాకు నోటీలిచ్చామని అంటున్నారు. నేను నేరం చేయలేదు.. ఘోరాలు చేయలేదు.. అన్యాయం అస్సలే చేయలేదు. ఉత్తర తెలంగాణ ఎడారిగా మారుతుందని బాబ్లీని వ్యతిరేకించాను. నేనేం తప్పు చేయలేదు.. ఏం చేస్తారో చేయండి అని ఆ రోజే పోలీసులకు చెప్పాను. ఇప్పుడు నోటీసులు.. అరెస్ట్ వారెంట్లు అంటున్నారు. అధికారం ఉన్నా లేకున్నా ప్రజల కోసమే పనిచేస్తాను. ఏ రాజకీయ పార్టీ వల్ల ప్రజల జీవితాల్లో వెలుగు వచ్చిందో ఆలోచించాలి" అని ఈ సందర్భంగా బాబు చెప్పుకొచ్చారు.

ఎనిమిదేళ్ల తర్వాత బాబ్లీ కేసును బయటకు తీయడం ఆశ్చర్యంగా ఉందని ఈ కేసులో చంద్రబాబుతో పాటు నోటీసు అందుకున్న, మంత్రి నక్కా ఆనందబాబు అన్నారు. చంద్రబాబు వెంట ఏపీకి చెందిన 20 మంది ఎమ్మెల్యేలం ఉన్నామని...బాబ్లీకి వ్యతిరేకంగా మహారాష్ట్ర సరిహద్దులో పోరాటం చేశామని తెలిపారు. సరిహద్దులో మహారాష్ట్ర పోలీసులు లాఠీచార్జ్‌ చేసి తమను చితకబాదారని గుర్తు చేశారు. ఆరోజు కేసు ఉపసంహరించుకున్నామని మహారాష్ట్ర పోలీసులు చెప్పారని మంత్రి తెలిపారు. ఆనాడు ఏపీ, మహారాష్ట్ర, కేంద్రంలో కాంగ్రెస్‌ ప్రభుత్వాలు ఉన్నాయని, వాళ్లే మాట్లాడుకుని ఖర్చులు భరించి విమానంలో తమని పంపారని పేర్కొన్నారు. కేసు ఉపసంహరించుకోకుండా తమని ఎలా పంపించారని ఆయన ప్రశ్నించారు. కేసు నమోదు అయ్యిందని బెయిల్‌ ఇచ్చామని కూడా చెప్పలేదన్నారు. కేసు ఉపసంహరించుకోకుండా తమని పంపించిన వారిపై చర్యలు తీసుకోవాలని మంత్రి నక్కా ఆనందబాబు డిమాండ్ చేశారు.