news

అసెంబ్లీ సమావేశాలకు హాజరుకాని వైకాపా ఎమ్మెల్యేలకు జీతాలు ఎందుకుని ఆంధ్రప్రదేశ్‌ ముఖ్యమంత్రి చంద్రబాబునాయుడు ప్రశ్నించారు. అమరావతిలో ఏర్పాటు చేసిన తెదేపా రాష్ట్రస్థాయి కార్యశాలలో సార్వత్రిక ఎన్నికలు, అసెంబ్లీ సమావేశాలపై చర్చించారు. ఈ సందర్భంగా సీఎం మాట్లాడుతూ... వైకాపా పోరాడలేక పారిపోయిన పార్టీ, అసెంబ్లీకి రానివారు ఎమ్మెల్యేలుగా ఉండటం ఎందుకు అని ప్రశ్నించారు. బాధ్యత మరిచిన వైకాపా ఎమ్మెల్యేలు.. జీతాలు తీసుకోవడం మరువలేదని విమర్శించారు. కేంద్రం ఏపీకి నిధులివ్వకపోగా..పీడీ అకౌంట్లపై విమర్శలు చేస్తోంది.. కేంద్రం విమర్శలకు గట్టిగా సమాధానం ఇవ్వాలి. కేంద్రంతో సఖ్యతగా ఉంటే అన్నీఆమోదిస్తున్నారు. ఏపీ విషయంలో మాత్రం కేంద్రం కక్ష గట్టినట్టు వ్యవహరిస్తోంది’’ అని చంద్రబాబు ఆవేదన వ్యక్తం చేశారు.

"తెలుగుదేశం పార్టీలో మొదటి ప్రాధాన్యత బిసిలకే. పదవుల్లో,సంక్షేమంలో,అభ్యున్నతిలో బిసిలకే పెద్దపీట. టిడిపి చేస్తున్న అన్ని పనుల్లో తొలి తాంబూలం బిసిలకే. పేదల పార్టీ తెలుగుదేశం. పేదరికంలేని,ఆర్ధిక అసమానతలు లేని సమాజం ఏర్పాటే టిడిపి లక్ష్యం. క్రమశిక్షణ లేని పార్టీ, కట్టుబాటులేని కుటుంబం,క్రమశిక్షణ లేని వ్యవస్థ కుప్పకూలుతుంది. ఎంతమంది ఉన్నారు అనేదికాదు ఎంత ఐక్యంగా ఉన్నారు అనేది ముఖ్యం. మన కర్రతో మనల్ని కొట్టుకుంటే దెబ్బతగుల్తుందా లేదా..? రాజకీయాల్లో ఎత్తుగడలు ఉంటాయి.కానీ రాజకీయ వ్యూహాలు, ప్రతివ్యూహాలు బహిర్గతం కారాదు.మన కాళ్లకు మనమే బంధాలు వేసుకుంటే ముందుకు పోలేం. ఎన్నికల ముందు అందరూ సంఘటితంగా ఉండాలి. గ్రూపు విభేదాలకు స్వస్తి చెప్పాలి." అని చంద్రబాబు అన్నారు.

కేంద్రంపై ధ‌ర్మ పోరాటం కొన‌సాగుతోందని మరోసారి స్పష్టం చేశారు. పోరాడి ప్రత్యేక హోదా సాధించుకుందామని, యువత ఆత్మహత్యలు చేసుకోవద్దని ఆయన సూచించారు. కేంద్రం తెలంగాణకు సంబంధించిన బిల్లులు నాలుగురోజుల్లోనే పాస్ చేసిందని, ఏపీ విషయాన్ని వచ్చేసరికి క‌క్షక‌ట్టిన‌ట్టు వ్యవ‌హరిస్తున్నారని చంద్రబాబు మండిపడ్డారు. ‘‘నాలుగేళ్లల్లో సగటున 10.5 శాతం వృద్ధిరేటు సాధించాం. ప్రతి సంవ‌త్సరం రెండంకెల వృద్ధిరేటు సాధించిన రాష్ట్రం ఏపీనే. చంద్రన్న భీమా, అన్న క్యాంటిన్లతో ప్రభుత్వానికి మంచి పేరు వ‌స్తోంది. రాష్ట్ర వ్యాప్తంగా 300 అన్న క్యాంటిన్లు పెడతాం. అక్టోబ‌ర్ 2న ముఖ్యమంత్రి యువ‌నేస్తం పథకం ప్రారంభిస్తాం. అమ్మాయి ఆర్ధిక ప‌రిస్ధితుల ప్రాతిపదికన పెళ్ళికానుక ఇస్తాం. రాష్ట్రంలో డెంగ్యూ నివారణకు చర్యలు తీసుకోవాలి అని అధికారులను చంద్రబాబు ఆదేశించారు.

పశ్చిమ గోదావరి జిల్లాలో, గ్రామదర్శిని – గ్రామవికాసం కార్యక్రమంలో భాగంగా రాష్ట్ర ముఖ్య మంత్రి నారా చంద్రబాబునాయుడు పర్యటిస్తూ ప్రజలకు ఆమోదయోగ్యమైన పరిపాలన అందించడమే తమ లక్ష్యమని చెప్పారు. ఈ సందర్భంగా ఆయన మట్లడుతూ చంద్రన్న భీమ పధకం ద్వారా లక్షా 20 వేలు కుటుంబాలకు 2వేల కోట్ల రూపాయలు బీమా సోమ్మును అందించామన్నారు. రాష్ట్ర వ్యాప్తంగా 300 అన్న క్యాంటీన్‌లు ఏర్పాటు చేయాలనే లక్ష్యంగా పెట్టుకున్నామని, ఇప్పటి వరకూ 60 క్యాంటీన్‌లు ఏర్పాటు చేసామన్నారు. యువనేస్తం పథకం ద్వారా నిరుద్యోగులకు రూ.1000 పెన్షన్‌ ఇచ్చి,యువతకి అండగా నిలుస్తామని తెలిపారు. దేశంలో ఎక్కడా ఈ విధమైన పెన్షన్‌ ఇవ్వలేదని తెలిపారు.

రాష్ట్రంలో కోటి 44 లక్షల మందికి పెన్షన్లు అందిస్తున్నామని, మరో 4 కోట్ల 14 లక్షల మందికి రేషన్‌ అందిస్తున్నామన్నారు. అందరికి ఇళ్లు కల సాకారం చేయాలనే ఉద్ధేశంతో గ్రామాల్లో 13.30 లక్షలు, పట్టణాల్లో 7.40 లక్షలు ఇళ్లు నిర్మిస్తున్నామన్నారు. మరో 5 లక్షల ఇళ్లు మంజూరు చేసామన్నారు. పోలవరం ప్రాజెక్టును పూర్తి చేసే బాధ్యతను తీసుకున్నామన్నారు. పోలవరం ప్రాజెక్టు పూర్తి చేసి జాతికి అంకితం చేస్తామని ముఖ్యమంత్రి చంద్రబాబు నాయుడు చెప్పారు. రాజధాని నిర్మాణం కష్టంతో కూడుకున్న పని అంటూ ఈ విషయంలో కేంద్రం సహకరించకపోయినా అద్భుత రాజధాని నిర్మిస్తామని అన్నారు.

ఈ నేపధ్యంలో ఆయన మాట్లాడుతూ రాష్ట్రంలో పారిశ్రామికీకరణకు కృషి చేస్తుంటే వైసిపి, ఇతర పార్టీలు అడ్డుపడుతున్నాయన్నారు. ఎన్నో భారీ పరిశ్రమలు రాష్ట్రానికి రాబోతున్నాయన్నారు. రాష్ట్రానికి ప్రత్యేక హోదా ఇవ్వకపోయిన ఈజ్‌ ఆఫ్‌ డూయింగ్‌ బిజనెస్‌లో దేశంలోనే ప్రథమ స్థానంలో ఉన్నామన్నారు. వైసిపి తన అవినీతి కార్యక్రమాలను కాపాడుకోవడానికి కేంద్రంలో బిజెపితో కుమ్మక్కయిందన్నారు. రాజధాని బాండ్లు లిస్టింగ్‌ అయిన గంటలోనే ప్రభుత్వంపై నమ్మకంతో ఒకటిన్నర రెట్లు పెరిగాయన్నారు.

బీజేపీ దొడ్డిదారిన వస్తున్నారని, ఆ దొడ్డిదారే వైసిపీ, జనసేన పార్టీలని అన్నారు. నా జీవితం పేదలకు అంకితమని ఇందుకోసం 24 గంటలు కష్టపడి పనిచేస్తానన్నారు. పేదరికం పూర్తిగా నిర్మూలం చేయడమే తన ఏకైక లక్ష్యం, ఆశయం అన్నారు. ఒక రాష్ట్రం కోసం కేంద్రంపై అవిశ్వాస తీర్మానం పెట్టిన ఏకైకపార్టీ తెలుగుదేశం అన్నారు. పార్లమెంటులో కేంద్ర ప్రభుత్వానికి వ్యతిరేకంగా ప్రాంతీయ పార్టీ అయిన టీడీపీ అవిశ్వాస తీర్మానం పెడితే, ఏకంగా 126 మంది ఎంపీలు మద్దతు ప్రకటించారని చెప్పారు. బిజెపి మనల్ని ఏమి చేయలేదని ఆ పార్టీని చిత్తుచిత్తుగా ఓడించడం ఖాయమన్నారు. రాష్ట్రంలో 25 ఎంపి స్థానాలను మనమే గెలుస్తామన్నారు.

బిజెపి వైసిసీపీతో పొత్తు పెట్టుకొని ఏపి లోకి దొడ్డిదారిన చొరబడటానికి చూస్తుందని, ఆ దొడ్డిదారే వైసిసీపీ, జనసేన పార్టీలని అన్నారు. బిజెపి పార్టీ వైసిసీపీ, జనసేన పార్టీలని అస్త్రాలుగా ఉపయోగించి, టిడిపిని దెబ్బతీయాలని చూస్తోందని ఆయన చెప్పారు. కానీ వారు ఎన్ని ఎత్తులు వేసిన మన దగ్గర మాత్రం ఒక బలమైన అస్త్రం ఉందని, అదే తన మీద ప్రజలకు ఉన్న నమ్మకం అని, ఆ ఓటర్లే తన బలమని ఆయన చెప్పారు. అలాగే ఒక్క తెలుగుదేశం ప్రభుత్వం వల్లే రాష్ట్రం అభివృద్ధి చెందుతుందని, ప్రజలకు మంచి జరుగుతుందని, కాబట్టి ప్రజలందరూ కుల, వర్గ, జాతి, మత విభేదాలు లేకుండా ప్రతి ఒక్కరు తెలుగుదేశం పార్టీని గెలిపించాలని కోరారు.

జాతీయ ఉత్తమ ఉపాధ్యాయిని పురస్కార గ్రహీత మేకా సుసత్య రేఖపై ప్రధాని నరేంద్ర మోదీ ప్రశంసల జల్లు కురిపించారు. ఆమె సేవలను కొనియాడుతూ ట్వీట్ చేశారు. చిన్నారులకు అర్ధమయ్యేలా ఆసక్తికరంగా గణితం బోధిస్తున్నారని ప్రశంసించారు. సుసత్య రేఖ కుటుంబంలో అందరూ ఉపాధ్యాయులే. అమ్మ సత్యవతి దేవి, తాత వెంకన్న చౌదరి హిందీ పండిట్లుగా, నాన్న సత్యనారాయణ సోషల్ టీచర్‌గా రిటైర్ అయ్యారు. భర్త గురయ్య, అక్క ఇంద్రాణి, బావ వీరన్న, చెల్లెలు పద్మజారాణి, మేనమామ సత్యనారాయణ ఉపాధ్యాయులుగా పని చేస్తున్నారు. కుటుంబంలో మొదటిసారిగా తమ కుమార్తె జాతీయ పురస్కారం సాధించడం ఆనందంగా ఉందని సుసత్య రేఖ అమ్మ సత్యవతి దేవి చెప్పారు.

ఇది ఇలా ఉండగా, దేశ వ్యాప్తంగా 374కి అవార్డులు ప్రకటిస్తే, మన రాష్ట్రం నుంచి ఒక్కరే ఎంపిక కావటం పట్ల చర్చ జరుగుతుంది. 2016లో రాష్ట్రం నుంచి 10 మంది ఉపాధ్యాయులను జాతీయ అవార్డులకు ఎంపిక చేసిన కేంద్ర ప్రభుత్వం ఈ సారి వాటి సంఖ్యను ఒకటికి తగ్గించడం పట్ల ఆందోళన వ్యక్తమవుతోంది. నవ్యాంధ్రపై కేంద్ర సర్కారు వివక్ష చూపిందన్న అభిప్రాయాలు వ్యక్తమవుతున్నాయి. రాష్ట్రంలో దాదాపు 1.80 లక్షల మంది ఉపాధ్యాయులు ఉండగా, 2017 సంవత్సరానికి సంబంధించి ఒక్కరినే ఉత్తమ ఉపాధ్యాయ అవార్డుకు ఎంపిక చేశారు. శనివారం జాతీయ ఉత్తమ ఉపాధ్యాయ అవార్డుల జాబితాను చూసిన రాష్ట్ర ఉపాధ్యాయులు తీవ్ర నిరాశ వ్యక్తం చేశారు. రాష్ట్రానికి అన్యాయం జరిగిందని అంటున్నారు. విద్యా రంగంలో దేశంలోనే మంచి స్థానంలో ఉన్న ఏపీలో జాతీయ స్థాయి అవార్డులకు అర్హత కలిగిన గురువులు లేరా? అన్న ప్రశ్నలు వినిపిస్తున్నాయి.

కేంద్ర ప్రభుత్వ సూచన మేరకు తాజాగా ఆరుగురు ఉపాధ్యాయలను ఎంపిక చేసి ఆ జాబితాను రాష్ట్రం పంపించింది. కానీ, ఆ జాబితా నుంచి ఏకంగా ఐదుగురి పేర్లను తొలగించి తూర్పుగోదావరి జిల్లాకు చెందిన మేకా సుసత్యరేఖను మాత్రమే ఎంపిక చేశారు. తెలంగాణ, కర్ణాటక రాష్ట్రాల నుంచి ముగ్గురు చొప్పున, కేరళ నుంచి ఇద్దరు ఉపాధ్యాయులను ఎంపిక చేసి పంపమని కోరిన కేంద్రం.. ఆ మేరకు అందరినీ జాతీయ ఉత్తమ ఉపాధ్యాయ అవార్డులకు ఎంపిక చేయడం గమనార్హం. బాగా పనిచేస్తున్న ఉపాధ్యాయుల్ని గుర్తించి ప్రోత్సహించేందుకు, జాతీయ స్థాయిలో ఉపాధ్యాయ వృత్తి గౌరవాన్ని పెంచేందుకు ఈ అవార్డులను ఏర్పాటు చేశారు. భారత ప్రభుత్వం 1958వ సంవత్సరంలో జాతీయ ఉత్తమ ఉపాధ్యాయ అవార్డులను ప్రకటించింది.