news

రహదారి ప్రమాదాల నివారణలో భాగంగా విజయవాడ నగరంలో ప్రయోజ్‌ ఫౌండేషన్‌ ఆధ్వర్యంలో వాహన చోదకులకు అవగాహన కల్పిస్తున్నారు. ట్రాఫిక్‌ రద్దీ ఎక్కువగా ఉండే మూడు కూడళ్లను ఎంపిక చేసుకుని వినూత్న తరహాలో జనచైతన్యానికి తమవంతుగా ప్రయత్నం చేస్తున్నారు. ఈ క్ర‌మంలో ద్విచక్ర వాహనదారులు హెల్మెట్లు ధరించాలని, కారు నడిపే వారు- ముందు సీటులో కూర్చునే వారు తప్పనిసరిగా సీటుబెల్టు పెట్టుకోవాలని సూచిస్తూ మంగ‌ళ‌వారం ఉద‌యం బెంజిసర్కిల్‌ కూడలి వద్ద యమధర్మరాజు, చిత్రగుప్తుడు వేషధార‌ణ‌లో ట్రాఫిక్‌ జాగ్రత్తల గురించి వివరించి అందరినీ ఆకట్టుకున్నారు.

నగరంలో ఉన్న ట్రాఫిక్ కూడళ్ళ వద్ద యమధర్మ రాజు, చిత్ర గుప్తుడు వేషదారణలో ఉన్న వ్యక్తులతో పాటు, 15 అడుగల ఎట్టు కలిగిన వ్యక్తులతో రోడ్ సేఫ్టీ పై అవగాహాన కలిగించారు. ఈ కార్యక్రమం వారం రోజుల పాటు జరగనుంది. హెల్మెట్ లేని వారికి, సీట్ బెల్ట్ పెట్టుకొని వారికి గులాబీ పువ్వుతో పాటు హెల్మెట్‌ కీచైన్‌, కరపత్రం అందిస్తారు. రహదారి భద్రతపై ఎవరు ఎంతగా ప్రయత్నించిన‌ప్ప‌టికీ వాహనదారుల్లో సొంతంగా తమ ఆలోచనల్లో మార్పు తీసుకురావడం వల్లే సత్ఫలితాలు సాధించే వీలుంటుందని ఈ సంద‌ర్భంగా విజయవాడ ట్రాఫిక్‌ ఏసీపీ శివరామిరెడ్డి తెలిపారు.

అంకుర సంస్థల ప్రోత్సాహం, చిన్న మధ్య తరహా పరిశ్రమల అభివృద్ధి, నైపుణ్యాభివృద్ధి, ఇన్ఫర్మేషన్ టెక్నాలజీలో అలీబాబా సంస్థ తన సాంకేతిక పరిజ్ఞానాన్ని ఆంధ్రప్రదేశ్ లో వినియోగించడానికి ముందుకు వచ్చింది. ఈ మేరకు ముఖ్యమంత్రి చంద్రబాబు నాయుడు సమక్షంలో ఏపీ ఎకనామిక్ డెవెలప్మెంట్ బోర్డు సీఈఓ జాస్తి కృష్ణ కిషోర్, అలీబాబా క్లౌడ్ ఇండియా ఎండీ డాక్టర్ అలెక్స్ లీ అవగాహన ఒప్పందం కుదుర్చుకున్నారు. ఉండవల్లి లోని ముఖ్యమంత్రి నివాసం లో ఈ కార్యక్రమం జరిగింది. స్మార్ట్ సిటీల అభివృద్ధి, ట్రాఫిక్ నిర్వహణ లో తమకున్న అనుభవాన్ని మరింత పదును పట్టి, ఆంధ్రప్రదేశ్ లో వినూత్న ఆవిష్కరణలు చేయడానికి తాము సిద్ధంగా ఉన్నట్టు అలీబాబా సంస్థల ప్రతినిధులు ముఖ్యమంత్రి కి వివరించారు.

వివిధ ప్రభుత్వ శాఖల్లో సాంకేతికతను జోడించి మరింత సులభతరమైన విధానాలు అమలయ్యేలా శిక్షణ కార్యక్రమాలు ఆ సంస్థ చేపట్టనుంది. ఈ వ్యవస్థలో భాగస్వామ్యులైన ప్రభుత్వ శాఖలతో అవగాహన సదస్సు లో పాల్గొన్న ఆ సంస్థ తమ అధికారులను కూడా ఇక్కడ శిక్షణ ఇవ్వడానికి పంపనున్నారు. దేశంలో సుమారు ఆరు వేల కంపెనీలతో ప్రత్యక్షంగానూ, పరోక్షంగానూ పని చేస్తున్న అలీబాబా సంస్థ తమ కార్యకలాపాలను ఆంధ్రప్రదేశ్ లో మరింత విస్తరించనుంది. ప్రపంచంలో ఎటువంటి సృజనాత్మకమైన విధానం అందుబాటులోకి వచ్చినా, అది ఆంధ్రప్రదేశ్ కు కూడా ఉపయోగపడేలా తాము దృష్టి పెట్టామని ముఖ్యమంత్రి చెప్పారు. ఒకానొకప్పుడు పాలనా వ్యవహారాల్లో ఇంటర్నెట్ అంటే తెలియని పరిస్థితుల్లో ఆంధ్రప్రదేశ్ లో విజయవంతంగా ఈ ప్రయోగాలు చేసి ప్రజలకు పాలనను మరింత సౌలభ్యంగా ఉండేలా చేశామని చంద్రబాబు నాయుడు అన్నారు.

అభివృద్ధి జరగాలంటే తగు వాతావరణం ఏర్పాటు చేయాలి, ఆధునిక సాంకేతికతను జోడించి భవిష్యత్ కి చక్కటి బాటను వేయాలన్నదే తమ ఆలోచన విధానమని ఆయన తెలిపారు. ఆధార్ లాగే భూధార్ తెచ్చాం.. భూములన్నిటి సమగ్ర సమాచారాన్ని పొందుపరచగలిగాం. సిఎఫ్ఎంఎస్ ద్వారా ఆర్ధిక పరిస్థితి, ఆదాయ వ్యయాలను పూర్తి అదుపులోకి తెచ్చుకుని సమర్థ ఆర్థిక నిర్వహణ వ్యవస్థను తేగలిగాం... ఈ-ప్రగతి ద్వారా అన్ని ప్రభుత్వ శాఖలను ఒకే సాంకేతిక వ్యవస్థ లోకి తెచ్చి సేవలన్నిటిని ప్రజలకు ఆన్ లైన్ లో అందుబాటులోకి ఉంచే అవకాశం కల్పించాం..రియల్ టైం గవెర్నెన్స్ ద్వారా పాలన ను ప్రజలకు మరింత చెరువులోకి తెచ్చాము..."అని ముఖ్యమంత్రి వివరించారు. ఆధునిక సాంకేతికతను అంది పుచ్చుకోగలిగే ఏకైక రాష్ట్రం ఆంధ్రప్రదేశ్ అని ముఖ్యమంత్రి స్పష్టం చేసారు.

అమరావతి బాండ్లకు బొంబాయి స్టాక్ ఎక్ఛ్సేంజ్ (బీఎస్సీఈ) లో అద్వితీయమైన స్పందన వచ్చినట్లు ప్రణాళికా సంఘం ఉపాధ్యక్షుడు సి.కుటుంబరావు తెలిపారు. ఏపీ సచివాలయం 4వ బ్లాక్ పబ్లిసిటీ సెల్ లో ఈరోజు మధ్యాహ్నం ఆయన మీడియాతో మాట్లాడారు. రాజధాని అమరావతి నిర్మాణానికి రూ.2 వేల కోట్ల విలువ గల బాండ్లు జారీ చేసిన గంట వ్యవధిలోనే బీఎస్సీఈలో మదుపరుల నుంచి రూ.2 వేల కోట్లు సమకూరినట్లు చెప్పారు. ఆశించిన దానికంటే ఒకటిన్నర రెట్లు సబ్‌స్క్రైబ్‌ అయిందని, రాష్ట్ర బ్రాండ్ ఇమేజ్ తోపాటు ముఖ్యమంత్రి చంద్రబాబు నాయుడుపై ఉన్న నమ్మకంతోనే ఇంత స్పందన వచ్చిందని.. ఇది గొప్ప విజయమని అన్నారు. అమరావతి బాండ్ల విడుదలతో జాతీయ, అంతర్జాతీయ మదుపరుల్లో రాష్ట్ర ఇమేజ్ పెరిగిందని చెప్పారు.

ముంబయిలో నిన్న జరిగిన బాండ్ల లిస్టింగ్‌ (బాండ్లను కొనుగోలు చేసిన సంస్థలకు స్టాక్‌ మార్కెట్‌లో ఇతరులకు విక్రయించుకునే వీలు కల్పించడం) కార్యక్రమానికి దేశంలోని వ్యాపార దిగ్గజాలు హాజరైనట్లు తెలిపారు. ముఖేష్ అంబానీ, గోద్రెజ్, కుమార మంగళం బిర్లా, మహేంద్ర గ్రూప్ ప్రతినిధులు, బీకే గోయంకా, రహేజా సంస్థ ప్రతినిధులు తదితరులు వచ్చినట్లు తెలిపారు. రాష్ట్రంలో పెట్టుబడులు పెట్టేందుకు ప్రతిఒక్కరూ ఆసక్తి కనబరిచారని, విదేశీ పెట్టుబడిదారులు కూడా లక్ష కోట్లకు పైగా పెట్టుబడులు పెట్టడానికి సుముఖంగా ఉన్నారని చెప్పారు.

ఏపీకి కేంద్రం సాయం చేయకపోయినా చంద్రబాబు ఆధ్వర్యంలో జరుగుతున్న రాష్ట్రాభివృద్ధిని చూసి బీజేపీ ఎంపీ జీవీఎల్ నరసింహారావు వంటి వారు ఓర్వలేకపోతున్నారని, ఈర్ష్యతో నిరాధారమైన ఆరోపణలు చేస్తున్నారని విమర్శించారు. బాండ్ల విడుదల వ్యవహారం అంతా పారదర్శకంగా జరిగిందని, ఒక్క రూపాయి అవినీతి జరిగినట్లు రుజువు చేసినా తాను రాజీనామా చేయడానికి సిద్ధంగా ఉన్నట్లు కుటుంబరావు తెలిపారు. రుజువు చేయలేని పక్షంలో జీవీఎల్ రాజీనామా చేస్తారా? కనీసం క్షమాపణలైనా చెబుతారా? అని అడిగారు. ఎందుకు ఇలా విషం కక్కుతున్నారో అర్ధం కావడం లేదని, ఈ బాండ్లలో పెట్టుబడి పెట్టినవారు నష్టపోతారని చెబుతున్నారని, వారు ఎలా నష్టపోతారని కుటుంబరావు ప్రశ్నించారు.