news

ఆంధ్రప్రదేశ్‌కు ప్రత్యేక హోదా, విభజన అంశాల్లో తెలుగుదేశం చేపట్టిన ఆందోళన ఒక్కసారిగా పతాకస్థాయికి చేరుకొంది. పార్లమెంటు వర్షాకాల సమావేశాల ప్రారంభం రోజునే తెలుగుదేశం ఇచ్చిన అవిశ్వాస తీర్మానాన్ని స్పీకర్‌ సుమిత్రా మహాజన్‌ స్వీకరించడంతో ఒక్కసారిగా జాతీయ రాజకీయాలు వేడెక్కాయి. చంద్రబాబు రాజకీయ వ్యూహం ఫలించడంతో ఏపీ ప్రత్యేక హోదా జాతీయ స్థాయి చర్చకు నోచుకుందని చెప్పవచ్చు. అయితే ప్రస్తుతం బీజేపీ సారథ్యంలోని ఎన్డీయేకు ఈ అవిశ్వాస తీర్మానంతో ఎలాంటి ప్రమాదం లేదు. అవసరమైన మెజార్టీతో పాటు అన్నాడీఎంకే.. ఇతర పక్షాలు ఎన్డీయేకు మద్దతు ఇచ్చే అవకాశముంది. దీంతో అవిశ్వాస తీర్మానం వీగిపోవచ్చు. అయినప్పటికీ పార్లమెంటు సాక్షిగా యూపీఏ-2 హయాములో అప్పటి ప్రధాని మన్మోహన్‌సింగ్‌ ఇచ్చిన ప్రత్యేక హోదా అంశం మళ్లీ తెరపైకి వస్తుంది. గత నాలుగేళ్లలో మోదీ ప్రభుత్వం ఏపీకి ఎంత సాయం అందించిందీ, ఏయే ప్రయోజనాలు ఇంతవరకూ అమలుకు నోచుకోలేదన్న విషయం ప్రధానంగా చర్చకొచ్చే అవకాశముంది.

తాజా రాజకీయ వ్యూహంలో చంద్రబాబునాయుడు ఏకంగా ఒక దెబ్బకు నాలుగు పిట్టల్ని కొట్టారని రాజకీయ విశ్లేషకులు పేర్కొంటున్నారు. వైకాపాపై పైచేయి, రాష్ట్రంలో భాజపాను ఏకాకి చేయడం, పవన్‌కల్యాణ్‌ సారథ్యంలోని జనసేన విమర్శలకు బదులివ్వడం, జాతీయ రాజకీయపక్షమైన కాంగ్రెస్‌తో పాటు ఇతర పక్షాలను ఎన్డీయేకు వ్యతిరేకంగా ఒక తాటిపైకి తీసుకొని రావడం... ఈ నాలుగు అంశాలతో దేశ రాజకీయాల్లో తెలుగుదేశం కీలకభూమికను పోషించనుందన్న సంకేతాలు వెళ్లాయి. రాష్ట్రానికి ప్రత్యేకహోదా అంశంపై వైకాపా గత లోక్‌సభ సమావేశాల్లో అవిశ్వాస తీర్మానానికి యత్నించింది. అయితే పలు కారణాల వల్ల స్పీకర్‌ స్వీకరించేలేదు. ఏకంగా వైకాపాకు చెందిన ఐదుగురు లోక్‌సభ సభ్యులు తమ రాజీనామాలను సమర్పించి ఆమోదింపచేసుకున్నారు. అయితే తాజా లోక్‌సభ సమావేశాల్లో ఆంధ్రప్రదేశ్‌ అంశం అవిశ్వాస తీర్మానం రూపంలో చర్చకు రానుండటంతో వైకాపా సభ్యులు లేకపోవడంతో వారు తమ అభిప్రాయాలను వ్యక్తం చేసే అవకాశం కోల్పోయారు.

గత ఎన్నికల్లో బీజేపీ, తెలుగుదేశం పార్టీలు కలసి కట్టుగా పోటీచేశాయి. అనంతరం బీజేపీ తీసుకున్న నిర్ణయాలు తెలుగుదేశాన్ని ఆత్మరక్షణలో పడేశాయి. హోదా లేకపోయినా ప్యాకేజీ నిధులతో పాటు విశాఖ రైల్వే జోన్‌, కడప ఉక్కు కర్మాగారం, పోలవరం ప్రాజెక్టు.. తదితర అంశాలపై బీజేపీ పెద్దలు ఎలాంటి నిర్ణయం తీసుకోకపోవడంతో రాష్ట్ర ప్రజలకు జవాబు చెప్పుకోవాల్సిన అవసరం తెదేపాపై పడింది. దీంతో తప్పనిసరి పరిస్థితుల్లో ఎన్డీయేకు రాంరాం చెప్పింది. బీజేపీ పై పోరుబాట పట్టి, ఇప్పుడు పతాక స్థాయికి తీసుకువెళ్ళింది. ఇక పవన్ విషయానికి వస్తే, ప్రత్యేకహోదాపై లోక్‌సభలో అవిశ్వాస తీర్మానం ప్రవేశపెడితే తాను మద్దతు కూడగడుతానంటూ ప్రకటించారు. ఇప్పుడు తెలుగుదేశం అవిశ్వాస తీర్మానం ప్రవేశపెట్టడంతో పవన్‌ విమర్శలకు దీటైన జవాబిచ్చినట్టయింది. తాము రాష్ట్ర ప్రయోజనాల కోసం చిత్తశుద్ధిగా పోరాడుతున్నామని రాష్ట్ర ప్రజలకు తెదేపా తెలియపరిచినట్టయింది.

రాష్ట్ర విభజనతో ఏపీ తీవ్రంగా నష్టపోయిందన్న అంశాన్ని దేశప్రజల దృష్టికి తీసుకురావడంలో తెలుగుదేశం విజయం సాధించింది. అప్పట్లో రాష్ట్ర విభజన చేసిన కాంగ్రెస్‌ కూడా తప్పనిసరిగా అవిశ్వాస తీర్మానానికి మద్దతుపలికే పరిస్థితి తీసుకువచ్చింది. తెదేపాకు సంఖ్యాబలం లేనప్పటికీ కాంగ్రెస్‌, ఎన్‌సీపీలు అవిశ్వాస తీర్మానానికి వెంటనే తమ మద్దతు ప్రకటించాయి. అవిశ్వాసం వీగిపోయే పరిస్థితులున్నప్పటికీ పార్లమెంటులో చర్చ ద్వారా రాష్ట్రానికి జరిగిన అన్యాయాలపై దేశప్రజలకు వివరించేందుకు తెలుగుదేశం సిద్ధమవుతోంది. (సేకరణ ఈనాడు )

15ఏళ్ల తర్వాత రేపు లోక్‌సభలో అవిశ్వాస తీర్మానంపై చర్చ జరుగనుంది. మోదీ సర్కార్‌పై టీడీపీతో సహా ఇతర విపక్షాలు పెట్టిన అవిశ్వాస తీర్మానంతో దేశ రాజకీయాలు హాట్‌‌హాట్‌గా సాగుతున్నాయి. టీడీపీ ఎంపీలు ప్రవేశపెట్టిన అవిశ్వాస తీర్మానం ప్రస్తుతం ఏపీలో హాట్ టాపిక్‌గా మారింది. ఎన్డీయే ప్రభుత్వాన్ని పడగొట్టేంత మ్యాజిక్ ఫిగర్ విపక్షాలకు లేకపోయినప్పటికీ ఏపీకి జరిగిన అన్యాయాన్ని మరోసారి దేశ ప్రజలకు వివరించే అవకాశం దక్కిందని టీడీపీ ఎంపీలు భావిస్తున్నారు. గత పార్లమెంట్ సమావేశాల్లో కేంద్రం వైఖరిని ఎండగట్టిన గుంటూరు ఎంపీ గల్లా జయదేవ్‌కే ఈసారి కూడా అవిశ్వాస తీర్మానం సందర్భంగా టీడీపీ తరపున తొలుత మాట్లాడే అవకాశం దక్కింది. మరో పక్క, అధికార, ప్రతిపక్ష పార్టీలు వ్యూహ ప్రతివ్యూహాల్లో నిమగ్నమయ్యాయి. ఇప్పటికే కొన్ని పార్టీలు తమ తమ ఎంపీలకు విప్‌లు జారీచేయగా.. ఈ రోజు శివసేన, బీజేడీ పార్టీలు తమ ఎంపీలకు విప్‌ జారీచేశాయి.

అవిశ్వాసాన్ని ప్రవేశపెట్టిన తెదేపా.. ఈ చర్చ సందర్భంగా రాష్ట్ర విభజన చట్టాన్ని అమలు చేయడంలో కేంద్రం వైఫల్యాన్ని ఎండగట్టడంతో పాటు, విభజన హామీలు అమలు చేయకపోవడంతో రాష్ట్రానికి జరిగిన అన్యాయం, కేంద్ర ప్రభుత్వం నాలుగేళ్లుగా తాత్సారం చేస్తూ వచ్చిన తీరును దేశ ప్రజలముందు ఉంచేందుకు సన్నద్ధమవుతోంది. మరోవైపు భాజపా కూడా ఇప్పటివరకు రాష్ట్రానికి ఏమేం ఇచ్చాం? విద్యాసంస్థలు, కేంద్ర సంస్థలు, నిధుల కొరతకు సంబంధించిన అంశాలతో పాటు వివిధ పథకాలు, హామీల కింద రాష్ట్రానికి ఇచ్చిన నిధుల విషయాన్ని వివరించేందుకు సిద్ధమవుతోంది. మరో పక్క, శివసేన, అన్నాడీఎంకే మిగిలిన పక్షాలతో భాజపా సంప్రదింపులు కొనసాగిస్తోంది. దానికి తగినట్టుగానే శివసేన అధినేత ఉద్ధవ్‌ ఠాక్రేతో భాజపా జాతీయ అధ్యక్షుడు అమిత్‌షా ఈ రోజు ఫోన్‌లో మాట్లాడారు.

మాయావతి నేతృత్వంలోని బీఎస్పీ, బీజేపీని దెబ్బ కొట్టే ప్లాన్ వేసింది. వాస్తవానికి మాయావతి నేతృత్వంలోని బీఎస్పీకి పెద్ద బలమేమీ లేదు. అయినా యూపీలో మారిన పరిస్థితులు తమకు అనుకూలంగా మార్చుకునేందుకు ప్రయత్నిస్తోంది. ఇటీవల జరిగిన బైపోల్స్‌లో ఎస్పీ, డీఎస్పీ కూటమి బీజేపీ సిట్టింగ్ స్థానాలను కొల్లగొట్టింది. ఇప్పుడు అవిశ్వాసం సందర్భంగా బీజేపీ యూపీ ఎంపీలను తమ వైపు తిప్పుకునేందుకు ప్రయత్నిస్తున్నట్లు ఢిల్లీలో ప్రచారం జరుగుతోంది. ఈ లోక్‌సభ పదవీకాలం ఇంకా ఏడాది కూడా లేదు. ఇప్పుడు తమకు సహకరిస్తే వచ్చే ఎన్నికల్లో బీఎస్పీ తరపున టిక్కెట్లు ఇస్తామంటూ యూపీ బీజేపీ ఎంపీలకు మాయావతి గేలాం వేస్తున్నట్లు తెలుస్తోంది. ముఖ్యంగా బీజేపీలోని దళిత ఎంపీలను తనవైపు తిప్పుకునేందుకు మాయావతి ప్రయత్నిస్తున్నారు. అటు ఒడిస్సాలో అధికార బీజేడీ మాత్రం రేపు ఓటింగ్‌లో పాల్గొనకూడదని నిర్ణయించింది. లోక్‌సభలో బీజేడీకి 19 మంది సభ్యులు ఉన్నారు.

మోదీని వదలొద్దు.. అతను మాటాడిన మీటింగ్స్ నీ గుర్తు చేస్తా చెప్పండి.. మహా ఐతే సస్పెండ్ చేస్తారు ..అంతకు మించి ఏమీ చెయ్యలేరు.. ఒకరు సస్పెండ్ ఐతే .. ఇంకొకళ్లు కంటిన్యూ చెయ్యండి.. అంతేగానీ .. అతన్ని మాత్రమ్ వదలొద్దు.. ఇది చంద్రబాబు ఎంపీలకు ఈ రోజు చివరి సారిగా చెప్పిన విషయం. ఆంధ్రప్రదేశ్‌కు అన్యాయం జరిగిందని వ్యాఖ్యానించిన ప్రధాని మోదీ గత నాలుగేళ్లలో దాన్ని ఎందుకు సరిదిద్దలేకపోయారో సమాధానం చెప్పాలంటూ నిలదీయాలని ముఖ్యమంత్రి చంద్రబాబు తెదేపా ఎంపీలకు దిశా నిర్దేశం చేశారు. ఈ ఏడాది ఫిబ్రవరి 7న మోదీ లోక్‌సభలో మాట్లాడుతూ... పార్లమెంటు తలుపులు మూసి రాష్ట్ర పునర్విభజన బిల్లును ఆమోదించి కాంగ్రెస్‌ ఏపీకి అన్యాయం చేసిందని చెప్పారనిప్రస్తుత వర్షాకాల సమావేశాల్లో ఇదే అంశాన్ని గట్టిగా ప్రస్తావించాలని సూచించారు.

‘‘అవిశ్వాస తీర్మానం ప్రవేశపెట్టడానికి ముందే అన్ని పార్టీల నేతలను కలిసి మద్దతు కోరడం మంచిదైంది. ఆయా పార్టీలు మనకు అండగా నిలిచాయి. చర్చ సందర్భం గానూ వారి మద్దతు మనకే లభించేలా చూడాలి. పద్నాలుగేళ్ల తర్వాత కేంద్రం ఎదుర్కొంటున్న అవిశ్వాసం ఇది. ఇది మన రాష్ట్ర భవిష్యత్తుకు సంబంధించింది. అందుకే అన్ని అంశాలపై పూర్తిస్థాయిలో సన్నద్ధం కావాలి. చర్చకు మొత్తం పదిగంటల సమయం ఇచ్చే అవకాశముంది. దాన్ని సద్వినియోగం చేసుకోవాలి. తొలి అవకాశం తెదేపాకే వస్తుంది. చర్చపై ప్రధానమంత్రి సమాధానం ఇచ్చిన తర్వాత కూడా మళ్లీ అవకాశం ఉంటుంది. సమయం చాలకపోతే ప్రసంగం లిఖిత ప్రతిని అందజేయాలి"

"లోక్‌సభ రికార్డుల్లో నమోదు చేయమని కోరాలి. పార్టీ ఎంపీలంతా సమర్థ పాత్ర పోషించాలి. తెదేపాకు కేటాయించే సమయాన్ని బట్టి ఎంతమంది మాట్లాడేదీ ముందే నిర్ణయించుకొని అందుకు తగ్గట్టు బలమైన గొంతు వినిపించాలి. మాట్లాడానికి అవసరమైన అంశాలపై పార్టీపరంగా, ప్రభుత్వపరంగా సమాచారం అందుబాటులో ఉంచుతాం’’ అని చంద్రబాబు అన్నారు. లోక్‌సభ సభాపతి, రాజ్యసభ ఛైర్మన్‌లు నిర్వహించిన అఖిల పక్ష సమావేశాల చర్చల సారాంశాన్ని ఎంపీలు చంద్రబాబుకు వివరించగా... మాజీ ఎంపీ ఉండవల్లి అరుణ్‌కుమార్‌తో భేటీ వివరాలను సీఎం ఎంపీలకు చెప్పారు. ఉండవల్లి అందజేసిన పుస్తకాలు, నివేదికలు, న్యాయస్థానాల కేసుల్లోని అంశాలను అధ్యయనం చేయాలని సూచించారు.