news

ఆంధ్రప్రదేశ్ ప్రభుత్వం చేస్తున్న పనులు ఎందుకు చేస్తుందో, ఎందుకు వెనక్కు తీసుకుంటుందో ఎవరికీ అర్ధం కాని పరిస్థితి. ఏపి ప్రభుత్వం చర్యలు అన్నీ కన్ఫ్యుజింగ్ గా ఉంటాయి. ఇప్పటి వరకు వివిధ ప్రభుత్వాలు, తాము జారీ చేసిన జీవోలు అన్నీ కూడా ఆన్లైన్ లో పెట్టేవి. ఆన్లైన్ లో ప్రజలు ఆ జీవోలు అన్నీ చూసుకునే వారు. అయితే ప్రభుత్వం అదే పనిగా రహస్య జీవోలు విడుదల చేయటం, అలాగే బ్లాంక్ జీవోలు విడుదల చేయటం, ఇలా అనేక అంశాలతో, ప్రభుత్వం విమర్శల పాలు అయ్యింది. ఏ జీవో ఎందుకు ఇస్తున్నారో కూడా ప్రజలకు తెలియటం లేదు. టిడిపి వెళ్లి గవర్నర్ కు ఫిర్యాదు చేయటంతో, గవర్నర్ కూడా ఆశ్చర్య పోయే పరిస్థితి. దీంతో వివాదం పెద్దది అవ్వటం, అలాగే రహస్య, బ్లాంక్ జీవోలు ఇవ్వకపోతే ఇబ్బంది అనుకున్నారో ఏమో కానీ, మొత్తానికి అసలు జీవోలు ఆన్లైన్ లో ఎందుకు పెట్టాలి, ప్రజలకు ఎందుకు అందుబాటులో ఉంచాలి అనే ఆలోచన రావటంతో, ఏకంగా జీవోలు అన్నీ కూడా ఆన్లైన్ నుంచి తీసి పడేసారు. ఎన్ని విమర్శలు వచ్చినా, ఎంత మంది ఏమి అనుకున్నా ప్రభుత్వం లెక్క చేయలేదు. దీని పై కొంత మంది కోర్టులో కూడా పిటీషన్ వేసారు. ఇది విచారణలో ఉంది. అయితే మళ్ళీ ప్రభుత్వం ఏమి అనుకొందో ఏమో కానీ, తమకు ఇష్టమైనవి మాత్రం చూపిస్తాం అంటుంది.

అది కూడా గతంలో ఇచ్చిన వేబ్సిట్ లో కాకుండా, https://apegazette.cgg.gov.in/ అనే వెబ్సైటులో తమకు కావాల్సిన జీవోలు పెడతాం అని ఉత్తర్వులు ఇచ్చింది. ఇప్పటికే రెండు పిటీషన్లు హైకోర్టులో ఉండటంతోనే, కోర్టుకు ఏమి చెప్పాలో తెలియక, ఇలా మధ్యే మార్గంగా అవసరమైన జీవోలు మాత్రమే పెడతాం అంటూ ముందుకు వచ్చిందనే విమర్శలు వస్తున్నాయి. ఇక నుంచి బయటకు ఇచ్చే జీవోలు అన్నీ కూడా, ఏపీ ఈ-గెజిట్ ద్వారానే అవసరం మేరకు మాత్రమే ప్రజలకు అందుబాటులో ఉంటాయాని ఉత్తర్వులు ఇచ్చారు. ప్రజలకు అవసరం లేనివి మాత్రం ఇక్కడ పెట్టం అంటుంది ప్రభుత్వం. మరి ప్రజలకు ఏది అవసరమో, ఏమిటో, ప్రజల చేత ఎన్నుకోబడిన ప్రభుత్వానికి, ప్రజల దగ్గర దాచేది ఏమి ఉంటుందో మరి. గోప్యత పేరుతో ఏమి దాచేస్తారో చూడాలి. ఎన్నో అదనపు అనవసర ఖర్చులు చేస్తూ ఇచ్చిన జీవోలు గతంలో వివాదాస్పదం అయ్యింది. ఇప్పుడు అలాంటివి అన్నీ దాచేసే అవకాశాలు ఉన్నాయని, అన్ని జీవోలు ప్రజల ముందు పెట్టాలనే డిమాండ్ వినిపిస్తుంది.

జగన్ మోహన్ రెడ్డి ప్రభుత్వం, తమది సంక్షేమ ప్రభుత్వం అని చెప్తూ ఉంటుంది. దీని కోసం రాజకీయంగా ఎన్నో జిమ్మిక్కులు కూడా చేస్తూ వచ్చింది. గతంలో ఇచ్చిన పధకాలు పేర్లు మార్చి, కొత్త పదకాలుగా చెప్పటం, ఏడాది గ్యాప్ ఇచ్చి, గత ప్రభుత్వంలో ఉన్న పధకాలు కొత్త పధకాలుగా చెప్పటం, కాలేజీలకు డైరెక్ట్ గా ఇచ్చి డబ్బులు, తల్లుల ఖాతాలో వేసి కొత్త పధకం అని చెప్పటం, ఇలా మొత్తంగా తమకు ఉన్న మీడియా, సోషల్ మీడియా ద్వారా, ఏదో సంక్షేమంలో ఇరగదీసినట్టు ప్రచారం చేసారు. చివరకు అక్కడ గత ప్రభుత్వాల్లో జరిగిన దాని కంటే, గొప్పగా ఇక్కడ సంక్షేమం ఏమి జరగటం లేదు. బోనస్ గా అభివృద్ధి ఆపేశారు. అయితే గత నాలుగు అయుదు నెలలుగా, రాష్ట్ర ఆర్ధిక పరిస్థితి పూర్తిగా గాడి తప్పింది, భవిష్యత్తులో కోలుకునే అవకాసం కూడా లేదు. అప్పులు కూడా గట్టిగా లాబీయింగ్ చేస్తే కానీ రాని పరిస్థితి, ఈ నేపధ్యంలోనే రాష్ట్ర ప్రభుత్వం, ఇప్పుడు కోతలు పెట్టటం మొదలు పెట్టింది. సంక్షేమ పధకాల లబ్దిదారులను తగ్గిస్తే, ఖర్చు తగ్గించుకోవచ్చానే ప్లాన్ అమలు చేసింది. అనర్హులు, అంటూ పధకాల్లో కోతలు పెట్టటం మొదలు పెట్టింది. దీని కోసం, ముందుగా రేషన్ కార్డుకు, ఆధార్ లింక్ చేస్తేనే పధకాలు అంటూ చెప్పటంతో, అందరూ ఆ పనిలో ఉన్నారు.

అలాగే గ్రామ, వార్డు సచివాలయంలో పని చేసే ఉద్యోగులు ప్రభుత్వ ఉద్యోగులని, వారు బీపీఎల్ ఫ్యామిలీ అయినా కోతలు పెట్టింది. ఇప్పుడు పెన్షన్ విషయంలో ఒకే ఇంటిలో రెండు పెన్షన్లు ఉంటే కుదరదు అని రద్దు చేసింది. దీంతో అందరూ లబో దిబో అంటున్నారు. వీరికి తోడు మొత్తం వాలంటీర్ల పెత్తనం కావటంతో, వారి ఇష్టా రాజ్యం అయిపొయింది. అయితే తాజాగా కృష్ణా జిల్లాలో చేయూత పథకం వర్తించదు అంటూ కొంత మందిని అనర్హులగా ప్రకటించటంతో వారు, ప్రతిపక్ష టిడిపి సహకారంతో కోర్టుకు వెళ్ళారు. దీంతో కోర్టు కీలక ఆదేశాలు ఇచ్చింది. ఒకసారి అర్హుడు అయిన వ్యక్తి, రెండో సారి అనర్హుడు ఎలా అవుతారు అంటూ ప్రశ్నించింది. ఒకసారి ఇచ్చిన సంక్షేమ పధకాలు, మళ్ళీ తీయటం కుదరదని, ర్జాకీయ కారణాలాతో నిలిపివేయటం కుదరదని చెప్పింది. వాలంటీర్లు లబ్దిదారులను తొలగించటం పైనా కోర్టు ఆగ్రహం వ్యక్తం చేసింది. వారు ప్రభుత్వ ఉద్యోగులు కాదని, వారికి సర్విస్ రూల్స్ లేవు అంటూ కౌంటర్ ఇచ్చింది. వాలంటీర్ల ఇష్టాఇష్టాలతో సంక్షేమ పధకాలు తొలగిస్తే కుదరదని చెప్పింది. మొత్తంగా ఒకసారి లబ్దిదారుడు అని మీరే చెప్పి, మరోసారి అనర్హుడని ఎలా చెప్తారు అంటూ కోర్టు ఆదేశాలు ఇచ్చింది. కోర్టు ఆదేశాలతో లబ్దిదారులు టిడిపికి కృతజ్ఞతలు చెప్పారు. ఇప్పుడు పెన్షన్ల విషయంలో కూడా అర్హులకు తొలగిస్తే, పోరాడతాం అని టిడిపి అంటుంది.

వైసీపీలో కేసులు ఉంటేనే టికెట్ లు, పదవులు వస్తాయి ఏమో కానీ, చాలా మంది నేతల పై అనేక ఆరోపణలు, కేసులు, జైళ్ళు, బైల్లుతోనే విషయాలు నడుస్తున్నాయి. ఇప్పటికే వైసీపీలో ఉన్న నేరస్తుల జాబితా పై దేశ వ్యాప్త చర్చ జరుగుతుంది. ఇప్పుడు మరో వైసీపీ నేత కేసుల్లో ఇరుక్కోవటమే కాకుండా, అరెస్ట్ కూడా అయ్యారు. మన రాష్ట్రంలో కాదు లేండి, కంగారు పడకండి. పక్క రాష్ట్రం పోలీసులు మన రాష్ట్రం వచ్చి మరీ, సీక్రెట్ గా ఆపరేషన్ కానిచ్చేసారు. ఆయన విశాఖలో ఒక బడా నేత. కాకపోతే ఓడిపోయారు. 2019లో విశాఖ సిటీ మొత్తం టిడిపి నేతలు గెలిచారు కాబట్టి, అక్కడ వైసీపీ ఓడిపోయింది. లేకపోతే ఆయన ఇప్పుడు ఎమ్మెల్యే కూడా అయ్యే వారు, అప్పుడు పరిస్థితి ఎలా ఉండేదో మరి. ఇక వివరాల్లోకి వెళ్తే, వైసీపీ విశాఖ వెస్ట్ ఇంచార్జ్, అలాగే అక్కడ నుంచి గత ఎన్నికల్లో పోటీ చేసిన మళ్ల విజయ్ ప్రసాద్‌, గతంలో ఎమ్మెల్యేగా కూడా చేసారు. ఆయన సేవలు నచ్చిన జగన్ మోహన్ రెడ్డి ప్రస్తుతం ఆయనకు ఏపీ ఎడ్యుకేషన్ అండ్ వెల్ఫేర్ డెవలప్ మెంట్ కార్పొరేషన్ ఛైర్మన్ పదవి కూడా ఇచ్చారు. ఈయన విశాఖలో ఉండే విజయసాయి రెడ్డికి సన్నిహితుడుగా కూడా ఉన్నారు. అయితే గత రాత్రి మళ్ల విజయ్ ప్రసాద్‌ ను ఒరిస్సా పోలీసులు విశాఖపట్నం వచ్చి, ఆయనను అరెస్ట్ చేసి ఒరిస్సా తీసుకుని వెళ్ళారు.

అంతకు ముందు విశాఖలో మేజిస్ట్రేట్ ముందు హాజరు పరిచి, వైద్య పరీక్షలు చేసి, మేజిస్ట్రేట్ అనుమతితోనే అదుపులోకి తీసుకుని, విశాఖ తీసుకుని వెళ్ళారు. ఇక ఆయన రూ.1250 కోట్ల స్కాం చేసారు అనేది ఆరోపణ. నమ్మకానికి అమ్మ వంటింది అంటూ, మనం టీవీలలో యాడ్ కూడా చూస్తూ ఉండే వాళ్ళం, అదే వేల్ఫేర్ గ్రూప్ పేరుతో వచ్చిన చిట్ ఫండ్ కంపెనీ. ఈ చిట్ ఫండ్ కంపెనీని ఆంధ్రప్రదేశ్, ఒరిస్సా, తెలంగాణా, చత్తీస్ఘడ్ రాష్ట్రాలాల కూడా నిర్వహించారు. అక్కడ డిపాజిట్ దారుల నుంచి పెద్ద ఎత్తున డబ్బులు వసూలు చేసి, వారికి తిరిగి చెల్లించ లేదు అనేది అభియోగం. గతంలోనే ఈ విషయంలో కేసులు కూడా నమోదు అయ్యాయి. సిబిఐ కూడా ఎంటర్ అయ్యింది. ఈ కేసు విచారణలో ఉంది. అయితే ఇవన్నీ తెలిసి కూడా, వైసీపీ ఆయనకు టిక్కెట్ ఇవ్వటం, ఓడిపోయినా సరే, సేవలు నచ్చి ఆయనకు ఏపీ ఎడ్యుకేషన్ అండ్ వెల్ఫేర్ డెవలప్ మెంట్ కార్పొరేషన్ ఛైర్మన్ పదవి కూడా ఇచ్చారు. ఇప్పుడు ఈయన చేసిన పనులకు ఒరిస్సా పోలీసులు వచ్చి పట్టుకెళ్లారు.