news

కేసులున్న ప్రజాప్రతినిధుల కేసులను ఏడాది లోగా విచారణ పూర్తి చేయాలి అంటూ గతంలో సుప్రీం కోర్టు ఆదేశాలు ఇచ్చిన సంగతి తెలిసిందే. అయితే ఈ ప్రక్రియలో కేంద్రం సహకారం లేకపోవటంతో, ఇది ముందుకు వెళ్ళ లేదు. దీంతో కేసులున్న ప్రజా ప్రతినిధులు ఊపిరి పీల్చుకున్నారు. ఇలాగే సాగదీయవచ్చు అని అనుకున్నారు. అయితే అనూహ్యంగా సుప్రీం కోర్టు ఈ రోజు వారికి షాక్ ఇచ్చేలా కీలక నిర్ణయం తీసుకుంది. ప్రజాప్రతినిధుల పై దాఖలైన సత్వర విచారణకు సంబందించిన పిటీషన్ ఈ రోజు సుప్రీం కోర్టులో విచారణ జరిగింది. దీనికి సంబంధించి గతంలో సుప్రీం కోర్టు నియమించిన అమికస్ క్యూరీ తన నివేదికను సుప్రీం కోర్టుకు అందచేసారు. అయితే సత్వర విచారణకు సంబంధించి, కేంద్ర ప్రభుత్వం తన వైఖరి వెల్లడించాలి అంటూ, గత ఏడాది నవంబర్ లో కేంద్రాన్ని సుప్రీం ఆదేశించింది. అయితే కేంద్రం ఇప్పటి వరకు కూడా ఎలాంటి కౌంటర్ వేయలేదు. దీంతో కేంద్ర ప్రభుత్వం పై చీఫ్ జస్టిస్ ఎన్వీ రమణ తీవ్ర ఆగ్రహం వ్యక్తం చేసారు. కేంద్ర ప్రభుత్వం జవాబు చెప్పక పొవటం, బాధ్యతారాహిత్యంగా పరిగణించాల్సి ఉంటుందని అన్నారు. కేంద్రం ఈ విషయం చాలా తేలికగా తీసుకుందని, ఈ కేసు విచారణ ఎంత త్వరగా పూర్తవ్వాలని అందరూ కోరుకుంటుంటే, కేంద్రం ఇప్పటి వరకు తమ వైఖరి చెప్పలేదని అన్నారు.

అయితే ఈ కేసులకు సంబంధించి, విచారణ తొందరగా అవ్వాలి అంటే, ప్రత్యేక ధర్మాసనం నియమించాలి అంటూ విజ్ఞప్తులు వస్తున్న నేపధ్యంలో, దీని పై కూడా తొందర్లోనే నిర్ణయం తీసుకుంటామని చెప్పారు. అలాగే మరో అంశం కూడా సుప్రీం కోర్టు స్పందిస్తూ, పలు రాష్ట్రాల్లో ప్రజాప్రతినిధుల పై దాఖలు అయిన కేసులను ఉపసంహరించుకుంటున్నాయని, అలా ఉపసంహరించుకోకుండా ఆదేశాలు జారీ చేయాలని కొంత మంది సుప్రీంని కోరటంతో, ఈ విధంగా హైకోర్టుల అనుమతి లేకుండా, ఈ విధంగా కేసులు ఉపసంహరణ చేయకూడదు అంటూ, సుప్రీం కోర్టు ఆదేశించింది. అలాగే మరో సంచలన ఆదేశం కూడా ఇస్తూ, ఈ కేసులు విచారణ చేస్తున్న న్యాయమూర్తులు కేసు అయ్యేంత వరకు రిటైర్డ్ అవ్వటం కానీ, బదిలీ అవ్వటం కానీ కుదరదు అనే అంశం కూడా తెలియ చేసారు. అయితే కేంద్రం పై సుప్రీం ఆగ్రహం వ్యక్తం చేస్తూ, పది రోజుల్లోగా కౌంటర్ వేయాలని, ఇదే చివరి అవకాసం అని హెచ్చరించారు. ఈ కేసుని 25వ తేదీకి వాయిదా వేసారు.

మరోసారి, మరో రోజు, మళ్ళీ అదే తీరు. ఈ రోజు కూడా హైకోర్టు, ఆంధ్రప్రదేశ్ ప్రభుత్వం పై తీవ్ర స్థాయిలో మండి పడింది. గ్రామీణ ప్రాంతాల్లో, పురపాలక సంఘాల్లో, నగర పాలక సంస్థల్లోని, ప్రభుత్వ స్కూల్స్ ప్రాంగణాల్లో, సచివాలయ భవనలు, రైతు భరోసా కేంద్రాలు, పంచాయతీ భవనాలు నిర్మించటం పై హైకోర్టు తీవ్ర ఆగ్రహం వ్యక్తం చేసింది. గతంలోనే, ప్రభుత్వ స్కూల్స్ లో, ఇటువంటి భవనాలు నిర్మించవద్దు అని స్పష్టమైన ఉత్తర్వులు ఇచ్చినప్పటికీ, వాటిని ఉల్లఘించి నిర్మాణాలు చేయటమే కాక, ఈ రోజుకీ కూడా నిర్మాణాలు కొనసాగిస్తూ ఉండటం పై, హైకోర్టులో అయుదు కోర్టు ధిక్కరణ పిటీషన్లు నమోదు అయ్యాయి. వీటి అన్నిటినీ పరిగణలోకి తీసుకున్న హైకోర్టు, నలుగురు అధికారుల పై సీరియస్ అయ్యి, వారు కోర్టు ముందు హాజరు కావాలి అంటూ గతంలో ఆదేశాలు ఇచ్చింది. ఈ రోజు రాష్ట్ర హైకోర్టులో ఈ పిటీషన్ విచారణకు రావటంతో, నలుగురు ఐఏఎస్ ఆఫీసర్లు హైకోర్టు ముందు హాజరు అయ్యారు. ఇలా కోర్టు ధిక్కరణ కేసు కింద, ఇంత మంది ఐఏఎస్ ఆఫీసర్లు హాజరు కావటం చాలా అరుదు అనే చెప్పాలి. ఈ నలుగురులో, పంచాయతీ రాజ్ ప్రిన్సిపల్ సెక్రటరీ గోపాల్ కృష్ణ ద్వివేది, పంచాయతీ రాజ్ కమిషనర్ గిరిజా శంకర్, పురపాలక శాఖ సెట్రటరీ శ్రీలక్ష్మీ, గతంలో పురపాలక శాఖలో పని చేసిన విజయ్‍కుమార్, వీళ్ళు నలుగురు హాజరు అయ్యారు.

అయితే ఇరిగేషన్ అధికారులు కూడా, కోర్టుకు హాజరు కావాల్సి ఉండగా, తమకు హైదరాబాద్ లో , కృష్ణా, గోదావరి బోర్డుతో మీటింగ్ ఉంది కాబట్టి, తాము హాజరు కాలెం అంటూ, కోర్టుకు తెలిపారు. అయితే హాజరు అయిన నలుగురు అధికారుల పై హైకోర్టు ఆగహ్రం వ్యక్తం చేసింది. పేద పిల్లలు చదువుకునే స్కూల్స్ లో, రాజకీయ వాతావరణం ఎలా సృష్టిస్తారు అని ప్రశ్నించింది. స్కూల్ వాతవరణాన్ని కలుషితం చేస్తున్నారని కూడా హైకోర్టు ఆగహ్రం వ్యక్తం చేసింది. మీలో ఎవరైనా జెడ్పీ స్కూల్స్ లో కానీ, ఏదైనా ప్రభుత్వ స్కూల్ లో చదువుకున్నారా అని ప్రశ్నించింది. అలా చదువుకుంటే ఆ బాధ ఏంటో మీకు తెలిసేదని చెప్పింది. తాము అదే ప్రభుత్వ స్కూల్ చదివి, ఇక్కడ వరకు వచ్చామని, జడ్జి పేర్కొన్నారు. గతంలో హైకోర్టు ఇచ్చిన ఆదేశాలు ఉద్దేశపూర్వకంగా ఉల్లంఘించారని తాము భావిస్తున్నాను అంటూ హైకోర్టు స్పష్టం చేసింది. ఈ కేసుని పూర్తి స్థాయిలో విచారణ చేస్తామని, ఆగష్టు 31వ తేదీన, అధికారులు అందరూ మళ్ళీ కోర్టు ముందు హాజరు కావాలి కోర్టు ఆదేశాలు ఇచ్చింది.

విజయనగర మహారాజులు, త్యాగానికి పెట్టింది పేరు. వారు చేసిన త్యాగాలు ఇప్పటికీ చెప్పుకుంటూ, ఆ కుటుంబానికి గౌరవం ఇస్తూ ఉంటారు. ముఖ్యంగా మాన్సాస్ ట్రస్ట్ ఆధ్వర్యంలో నడిచే విద్యా సంస్థలకు మంచి పేరు ఇప్పటికీ ఉంది. రాజకీయంగా ప్రత్యర్ధులు ఉన్నా, మాన్సాస్ జోలికి మాత్రం, ఇప్పటి వరకు ఎవరూ వెళ్ళలేదు. రాజశేఖర్ రెడ్డి కూడా, రాజకీయంగా ఎదురుకున్నారే కానీ, ఏ రోజు అశోక్ గజపతి రాజుని ఎదుర్కోవటానికి, మాన్సాస్ ని అడ్డు పెట్టుకోలేదు. ఈ నేపధ్యంలోనే 2019లో వైసిపీ అధికారంలోకి వచ్చిన దగ్గర నుంచి, మాన్సాస్ ని టార్గెట్ చేస్తూ వచ్చారు. మన్సాస్ చైర్మెన్ గా ఉన్న అశోక్ గజపతి రాజుని టార్గెట్ చేయటం మొదలు పెట్టారు. ముఖ్యంగా గతంలో జగన్ మోహన్ రెడ్డి కేసులు విషయంలో, హైకోర్టుకు అశోక్ గజపతి రాజు ఫిర్యాదు చేసారు అనే కోపం కావచ్చు, ఆయన్ను టార్గెట్ చేసారు. మాన్సాస్ చైర్మెన్ గా అశోక్ గజపతి రాజుని రాత్రికి రాత్రి తొలగించి, ఆయన స్థానంలో, సంచయితను నియమించారు. అయితే దీని పై సుదీర్ఘంగా, ఏడాదికి పైగా జరిగిన న్యాయ పోరాటంలో, హైకోర్టు సంచయిత నియామకాన్ని రద్దు చేసింది. దీంతో మళ్ళీ అశోక్ గజపతి రాజు, మాన్సాస్ చైర్మెన్ గా నియామకం అయ్యారు. ఇక్కడ వరకు అంతా బాగానే ఉంది, కోర్టు ఆదేశాలు కాబట్టి ప్రభుత్వం ఏమి చేయలేక పోయింది.

ఇక తరువాత, ఈవో సహకరించటం లేదని, జీతాలు ఇవ్వటం లేదని, ఇలా అనేక వార్తలు వచ్చాయి. చివరకు ఇది కూడా కోర్టు ముందకు వెళ్ళటం, కోర్టు ఈవో ని చీవాట్లు పెట్టటం జరిగింది. ఇలా నడుస్తూ ఉండగానే, ఇప్పుడు మాన్సాస్ విషయంలో మరో ట్విస్ట్ నెలకొంది. మాన్సాస్ చైర్మెన్ గా తనని నియమించాలి అంటూ, ఆనందగజపతిరాజు కుమార్తె ఊర్మిళా గజపతి, హైకోర్టులో ఈ రోజు పిటీషన్ వేసారు. అశోక్ గజపతి రాజుని తొలగించి, తనను నియమించాలని పిటీషన్ వేసారు. ఈ కేసు రేపు హైకోర్టు ముందు విచారణకు రానుంది. అయితే ఇప్పటి వరకు సంచయిత తనని తీసేయటం పై అపీల్ చేయలేదు. ఈ నేపధ్యంలో ఉన్నట్టు ఉండి ఊర్మిళా గజపతి తెర పైకి రావటంతో అందరూ ఆశ్చర్య పోతున్నారు. సంచయితకు, ఊర్మిళకు పొసగదు. మరి ఊర్మిళ పిటీషన్ వెనుక ఎవరు ఉన్నారు, ఆమె ఉద్దేశాలు ఏమిటి ? ఇన్నాళ్ళు లేనిది , ఇప్పుడే ఆమె ఎందుకు పిటీషన్ వేసారు అనేది తెలియాల్సి ఉంది. అయితే ఈ పిటీషన్ పై రేపు హైకోర్టులో విచారణ జరగనుంది. మరి ఏమి జరుగుతుందో చూడాలి.