news

పోలవరంలోని కాపర్ డ్యామ్ నుంచి లక్షా20వేల క్యూసెక్కు ప్రవాహం సముద్రంలోకి వెళుతోందని, దేవీపట్నం, పోలవరం మండలాల్లోని 50 గ్రామాలకు బాహ్య ప్రపంచంతో పూర్తిగా సంబంధాలు లేకుండా పోయాయని, చాల మంది గిరిజనులు కొండలు, గుట్టలపైనే బిక్కుబిక్కుమంటూ బతుకుతున్నారని, ప్రభుత్వ ప్యాకేజీ అందకపోవడంతో గిరిజనులకు కొండలే నివాసాలయ్యాయని టీడీపీ సీనియర్ నేత, మాజీమంత్రి దేవినేని ఉమామహేశ్వరరావు ఆవేదన వ్యక్తం చేశారు. ఆదివారం ఆయన మంగళగిరిలోని పార్టీ జాతీయ కార్యాలయంలో విలేకరులతో మాట్లాడారు. ఆ వివరాలు ఆయన మాటల్లోనే... "గోదావరి ప్రవాహా ఉధృతి పెద్దగా లేని ఈ రోజుల్లోనే 50 గ్రామాలకు పూర్తిగా సంబంధాలు లేకపోతే, గతంలో అనుకున్న 20వేల కుటుంబాల నిర్వాసితులు పరిస్థితి భవిష్యత్ లో ఎలా ఉంటుందోనని తలుచుకుంటేనే భయమేస్తోంది. నిర్వాసితులకు నిర్మించాల్సిన కాలనీలు ఇప్పటికీ పూర్తి కాలేదు. పశుసంపద, మహిళలు, చిన్నారులను ఎలా తరలించాలనేదానిపై ప్రభుత్వానికి సరైన ఆలోచన విధానం లేదు. కాలనీలు నివాసానికి అనుకూలంగా లేక, ఇప్పుడుంటున్న ప్రదేశంలో ఉండలేక, ఎటువెళ్లాలో తెలియక నిర్వాసి తులుంతా దిక్కుతోచని స్థితిలో కొట్టుమిట్టాడుతున్నారు. పోలవరం పునాదులే లేవలేదని పాదయాత్రలో చెప్పారు. పునాదులే లేని పోలవరంలోఇప్పుడు 27మీటర్ల వరకు నీళ్లుఎలా నిలబడ్డాయో ముఖ్యమంత్రి రేపు రాష్ట్ర ప్రజలకు చెప్పాలి. పునాదులు లేవ లేదు కాబట్టి, నిర్వాసితులకు రూ.10లక్షలిస్తాను, గతంలో ఖాళీ చేసిన వారికి రూ.5 లక్షలిస్తాను... నిర్వాసితులందరికీ అన్ని వసతులతో కాలనీలు నిర్మిస్తానని పాదయాత్రలో జగన్ రెడ్డి చెప్పాడు. ఆయన పలికిన పలుకులు ఉత్తరకుమార ప్రగల్భాలని నేడు అర్థమైంది. పునాదులు లేవని పోలవరంలో దగ్గరదగ్గర 100 టీఎంసీల గోదావరి జలాలు ఎలా నిలబడ్డాయో ముఖ్యమంత్రి చెప్పాలి. వైసీపీ ప్రభుత్వం అధికారంలోకి వచ్చి రెండేళ్లు దాటింది... ఇప్పటికీ నిర్వాసితుల కాలనీల నిర్మాణాన్ని ఎందుకు పూర్తిచేయలేకపోయారో కూడాచెప్పాలి. గతంలో ముగ్గురు ముఖ్యమంత్రులు ఐదేళ్లలో పోలవరం నిర్మాణానికి ఖర్చుపెట్టింది కేవలం రూ.5,135కోట్లు. చంద్రబాబునాయుడు ముఖ్యమంత్రయ్యాక రూ.11,537 కోట్లు ఖర్చుపెట్టి, ఐదేళ్ల లోనే 72శాతం వరకు ప్రాజెక్ట్ పనులు పూర్తి చేశారు. జూన్ తొలి వారంలో సమాచార హక్కు చట్టం కింద అడిగిన ప్రశ్నకు సమాధానంగా తెలిసింది ఏమిటంటే, ఈప్రభుత్వం వచ్చిన రెండేళ్ల లోరూ.845 కోట్లు మాత్రమే ప్రాజెక్ట్ నిర్మాణాని కిఖర్చుపెట్టింది. రేపు ఏండబ్బాలు కొట్టుకోవడానికి పోలవరం పర్యటనకు వెళుతున్నారో పాలకులు చెప్పాలి. టీడీపీ హాయాంలో పోలవరం నిర్మాణానికి సంబంధించి జరిగే ప్రతిపని, దానికి సంబంధించిన సమాచారం ఆన్ లైన్లో అందుబాటులో ఉండేది.

అదేవిధంగా నేడు ఈ ముఖ్యమంత్రి పనుల పురోగతిని, డ్యామ్ సైట్లో జరుగతున్నపనులను ఎప్పటికప్పుడు ప్రజలకు ఎందుకు తెలియచేయడంలేదు? ఎందుకంటే అక్కడే పనులు జరగడంలేదు కాబట్టి. ప్రభుత్వం ఇప్పటివరకు ఖర్చుపెట్టిన రూ.845కోట్లలో ల్యాండ్ అక్విజే షన్ కే రూ.145 కోట్లు ఖర్చు చేశారు. అవి కూడా నిర్వాసితులు కాని వారి ఖాతాల్లోకి మళ్లించి, అధికారపార్టీ ఎమ్మెల్యే, ఇతరవై సీపీనేతలు ఎలా కాజేశారో ఇదివరకే టీడీపీ ఆధారాలతోసహా బయటపెట్టింది. నిర్వాసితుల సొమ్ముని దిగమింగిన వైనంపై ఇంతవరకు ఇరిగేషన్ మంత్రి గానీ, ముఖ్యమంత్రి గానీ ఇంత వరకు స్పందించ లేదు. ముఖ్యమంత్రేమో పెద్దపెద్ద ఎస్టేట్లు, ప్యాలెస్ లలో ఉంటాడు. జూన్ 2020 నాటికే 18వేల నిర్వాసితులను ఇళ్లలోకి పంపిస్తామని, మిగిలినవారిని 2021 మే నాటికి పంపిస్తామని ఇరిగేషన్ మంత్రి డబ్బాలు కొట్టాడు. ఏమయ్యాయి ఆయన చెప్పిన మాటలు? ఈ ప్రభుత్వానికి, ముఖ్యమంత్రికి దమ్ము, ధైర్యముంటే నిర్వాసితుల వద్దకెళ్లి వారితో మాట్లాడాలి. గతంలో చంద్రబాబునాయుడు కట్టిన ప్రాజెక్ట్ వద్దకెళ్లి ఫొటోలు దిగి, అంతా తామేచేశామని చెప్పుకోవడం కాదు? చేతనైతే గిరిజనుల ముందుకెళ్లి నిలబడండి. తుంగభద్ర హెచ్ఎల్సీ, ఎల్ఎల్సీ కాలువలు సహా, ఆఖరికి ధవళేశ్వరం బ్యారేజీని కూడా బోర్డు పరంచేశారు. ఇంకా సిగ్గులేకుండా సమర్థించుకుంటూ, స్పెల్లింగ్ మిస్టేక్ లని సమర్థించుకుంటున్నారు. అసలు ఈ సలహాదారులకు సిగ్గుందా? ఏం మాట్లాడుతున్నారో వారికై నా తెలుస్తుందా? కేంద్రం నోటిఫై చేసిన గెజిట్ లో వెలిగొండ ప్రాజెక్ట్ ను లేకుండా చేశారు. గాలేరు నగరి హంద్రీనీవాకు, మచ్చుమర్రికి ఎప్పుడు నీళ్లొస్తాయో చెప్పండి? రాయలసీమ లిఫ్ట్ ఇరిగేషన్ స్కీమ్ కూడా కేంద్ర గెజిట్ లో లేదు. వీటన్నింటికీ ఈ ప్రభుత్వం ఏం సమాధానం చెబుతుంది? తాడేపల్లిలో కూర్చొని సమీక్షలుచేస్తే సరిపోతుందా? ముఖ్యమంత్రి, వైసీ పీఎంపీలు ఎక్కడ గడ్డిపీకుతున్నారు? సాక్షి మేనేజర్ కేంద్ర గెజిట్ ను గుడ్డిగా ఎలా సమర్థిస్తాడు? రాయలసీమ రైతాంగం గొంతుకోస్తున్న గెజిట్ ను ముఖ్యమంత్రి ఎలా సమర్థిస్తాడు? ఒక్కసారి ఒక్కసారి అని పదవిలోకొచ్చి రాయలసీమ , పులిచింతల రైతులు గొంతుకోసే అధికారం ఈ ముఖ్యమంత్రి కి ఎవరిచ్చారు? ఇంత జరిగినా ముఖ్యమంత్రి నోటినుంచి ఒక్కమాట కూడా రాలేదు. ఇరిగేషన్ మంత్రైతే కంటికే కనిపించలేదు.

జగన్ మోహన్ రెడ్డి ప్రభుత్వం విడుదల చేసిన ఉత్తుత్తుత్తి జాబ్ క్యాలండర్ పై నిరసిస్తూ, ఈ రోజు తెలుగుదేశం, వామపక్షాలకు చెందిన విద్యార్ధి సంఘాలు అన్నీ, ఈ రోజు జగన్ మోహన్ రెడ్డి తాడేపల్లి క్యాంప్ ఆఫీస్ ముట్టడి పిలుపు ఇచ్చాయి. అయితే దీన్ని భగ్నం చేయటానికి పోలీసులు చేయని ప్రయత్నం లేదు. దాదాపుగా వెయ్యి మందికి పైగా పోలీసులను తాడేపల్లి క్యాంప్ ఆఫీస్ కు వెళ్ళే మార్గాలు అన్నిటిలో మొహరించారు. ఇక వివిధ జిల్లాల నుంచే వచ్చే యువతని నిన్నటి నుంచే అరెస్ట్ లు చేస్తున్నారు. అలాగే జేసి పవన్ రెడ్డి లాంటి వాళ్ళను కూడా అరెస్ట్ చేసారు. మొత్తంగా ఈ కార్యక్రమాన్ని ఎలా అయినా భగ్నం చేయాలని, యువత ఉద్యమాన్ని అణిచివేయాలని ప్రభుత్వం పన్నిన ప్లాన్ ఫలించలేదు. వివిధ మార్గాల ద్వారా యువత ఒక్కసారిగా మెరుపు వేగంతో క్యాంప్ ఆఫీస్ వైపు వచ్చారు. ఎటు నుంచి వచ్చారో, ఎలా వచ్చారో పోలీసులకు అర్ధం కాలేదు. ఒక్కసారిగా పోలీసులు వారిని చుట్టు ముట్టి వారిని అరెస్ట్ చేసారు. ఈ రోజు ఉదయం నుంచి కూడా తాడేపల్లి మొత్తం ఉద్రిక్త పరిస్థితి నెలకొంది. పోలీసులు ఎక్కడికక్కడ బ్యారికేడ్ లు ఏర్పాటు చేసి, వారిని అడ్డుకుంటున్నారు. ఎవరినీ కూడా తాడేపల్లి క్యాంప్ ఆఫీస్ వైపు వెళ్ళనివ్వం అని పోలీసులు చెప్పినా, వివిధ మార్గాల్లో అక్కడకి చేరుకున్నారు.

పోలీసుల వలయాన్ని చేదించుకుని తెలుగు యువత రాష్ట్ర అధ్యక్షులు, శ్రీరాం చిన్న బాబు, అలాగే మిగాతా నాయకులు అంతా కూడా, తాడేపల్లి క్యాంప్ ఆఫీస్ దగ్గర వరకు చేరుకోవటం జరిగింది. అయితే వారిని పోలీసులు వెంటనే అరెస్ట్ చేసి, బస్సుల్లో ఎక్కించి, నల్లపాడు పోలీస్ స్టేషన్ కు తరలించారు. వీరి అరెస్ట్ ని నారా లోకేష్ సహా, ఇతర తెలుగుదేశం నేతలు ఖండించారు. మాజీ మంత్రి ఆలపాటి రాజా, నల్లపాడు పోలీస్ స్టేషన్ కు వెళ్లి, ఎందుకు అదుపులోకి తీసుకున్నారో చెప్పాలని, కేసు పెడితే ఎందుకు కేసు పెట్టారో చెప్పాలని పోలీసులను నిలదీశారు. జగన్ మోహన్ రెడ్డి ప్రతిపక్షంలో ఉండగా, ఏడాదికి 2.30 లక్షల ఉద్యోగాలు ఇస్తామని చెప్పి, కేవలం 10 వేల ఉద్యోగాలు ఇచ్చారని, ప్రతి ఏట 6500 పోలీస్ ఉద్యోగాలు ఇస్తామని చెప్పి, కేవలం 400 పోస్టులు ఇచ్చారని, అలాగే గ్రూప్ 1, గ్రూప్ 2 కేవలం 36 పోస్టులు ఇచ్చారని, అందుకే కొత్త నోటిఫికేషన్ ఇవ్వాలని ఎంతగా మొత్తుకున్నా, జగన్ రెడ్డి వినటం లేదు కాబట్టే, క్యాంప్ ఆఫీస్ ముట్టడికి పిలుపు ఇచ్చామని నిరుద్యోగులు చెప్తున్నారు.

పాపం తమ అభిమాన నాయకుడుని కలుసుకోవటానికి 400 కిమీ నడుచుకుంటూ వచ్చి, చివరకు అవకాసం దొరక్క పోలీసులు అదుపులోకి తీసుకున్న సందర్భం ఇది. అతని పేరు కిషోర్. తెలంగాణాలోని సంగారెడ్డి జిల్లా నుంచి జగన్ మోహన్ రెడ్డిని కలవటానికి తాడేపల్లి వరకు నడుచుకుంటూ వచ్చాడు. అక్కడ నుంచి తాడేపల్లి దాదాపుగా 400 కిమీ. జగన్ ని కలవటానికి వచ్చానని, జగన్ అంటే తనకు అభిమానం అని, కేవలం అభిమానమే అని, తనకు ఇంకా ఏ ఉద్దేశాలు లేవని అతను చెప్పాడు. తనకు ఏ పని చేసి పెట్టాల్సిన అవసరం లేదని, కేవలం అభిమానంతో వచ్చానని అన్నాడు. అయితే తనను జగన్ వద్దకు వెళ్ళనివ్వలేదని, పర్మిషన్ ఉంటేనే పంపిస్తాం అన్నారని, ఒక కామన్ మ్యాన్ కు పర్మిషన్ ఇవ్వరు కదా, ఇప్పుడు నేను అప్పాయింట్మెంట్ ఎక్కడ నుంచి తీసుకుని వస్తాను అని అతను మీడియాతో అన్నాడు. అందుకే నడుచుకుంటూ వచ్చానని, ఇలా అయినా కలవనిస్తారు అనుకుంటే, ఇక్కడ తనను ఆపేసారని, కలవనివ్వటం లేదని మీడియాతో అన్నాడు. కలిసెంత వరకు తాను ఇక్కడ నుంచి వెళ్ళే ప్రసక్తే లేదని అన్నాడు. అయితే పోలీసులు మాత్రం, అదేమీ కుదరదు, పర్మిషన్ లేకుండా ఇక్కడ ఉండకూడదు అంటూ, అతన్ని అదుపులోకి తీసుకున్నారు. అయితే ఇక్కడ మరో విశేషం ఏమిటి అంటే, దారిలో వచ్చే అప్పుడు ఖర్చులకు డబ్బులు అయిపోవటంతో, తన దగ్గర ఉన్న మొబైల్ కూడా అతను అమ్మేశాడని చెప్తున్నారు. ఇంత అభిమానంతో, ఈ యువకుడు, 400 కిమీ నడుచుకుంటూ వచ్చినా, జగన్ మోహన్ రెడ్డి అసలు కలవక పోవటం పై పలువురు ఆశ్చర్యం వ్యక్తం చేస్తున్నారు. ఇప్పటికే జగన్ మోహన్ రెడ్డి మంత్రులను, ఎమ్మెల్యేలను, ఎంపీలను, పార్టీ నాయకులను కలవరు అనే పేరు ఉంది.

చివరకు ప్రజలు కూడా అటు వైపు రాకుండా, 144 సెక్షన్ పెట్టారు. ప్రజలు ముఖ్యమంత్రిని కలవటానికి వీలు లేని పరిస్థితితులు ఉన్నాయి. ఎంతో మంది తమ సమస్యలు చెప్పుకోవటానికి ఇక్కడ వరకు వచ్చి, కలిసే అవకాసం లేక తిరిగి వెళ్ళిపోతూ ఉంటారు. ఇన్ని విమర్శలు వస్తున్నా జగన్ మాత్రం బయటకు రారు. చివరకు ఈ యువకుడు నడుచుకుంటూ వచ్చినా బయటకు రాకపోవటం పై, పలువురు ఆశ్చర్యం వ్యక్తం చేస్తున్నారు. ఆ నడిచి వెళ్ళేది ఏదో కనీసం ఏ తిరుమలో వెళ్ళినా పుణ్యం కలిగేదని పలువురు వాపోతున్నారు. ఇక సోషల్ మీడియాలో అయితే, సోనూసూద్ ఉదంతాన్ని గుర్తు చేసుకుంటున్నారు. ఇలాగే హైదరాబాద్ నుంచి ముంబై వరకు వెళ్లి సోనూసూద్ ని కలిసిన అతనిని దగ్గరకు తీసుకుని, వాటేసుకుని, సెల్ఫీ కూడా దిగి పంపించారని, ఈ వెళ్ళేది ఏదో సోనూసూద్ వరకు వెళ్ళినా, మంచి అయినా జరిగేదని వాపోతున్నారు. ఏది ఏమైనా ఒక ముఖ్యమంత్రి ప్రజలకు అందుబాటులో ఉండాల్సిన అవసరం ఉంది. ఈ విమర్శలు నుంచి జగన్ బయట పడతారాని, మారుతారని ఆశిద్దాం.