news

రఘురామకృష్ణం రాజు కేసు, ఆయన విడుదల వ్యవహారంలో ఇప్పుడు కొత్త ట్విస్ట్ నెలకొంది. ప్రధానంగా, రఘురామరాజు గుంటూరు సిఐడి కోర్టు ఆదేశాల ప్రకారం రిమాండ్ లో ఉండి, ఆయనను అక్కడ నుంచి సుప్రీం కోర్టు ఆదేశాలు ప్రకారం సికింద్రాబాద్ లో ఉన్న ఆర్మీ హాస్పిటల్ కు తరలించారు. అక్కడ హాస్పిటల్ నివేదిక వచ్చిన తరువాత, సుప్రీం కోర్టులో రఘురామరాజు తరుపు న్యాయవాదులు బెయిల్ పిటీషన్ వేయగా, సుప్రీం కోర్టు బెయిల్ మంజూరు చేసింది. ఆ బెయిల్ మంజూరు చేస్తూ, ఆర్మీ హాస్పిటల్ నుంచి డిశ్చార్జ్ అయిన తరువాత పది రోజుల్లో బెయిల్ బాండ్ పేపర్లు సమర్పించాలని ఆదేశించింది. అయితే ఈ లోపు ఆయన, గుంటూరు సిఐడి కోర్టు ఆదేశాల మేరకు రిమాండ్ లో సికింద్రాబాద్ ఆర్మీ హాస్పిటల్ లో చేరినప్పుడు, ఆయన వ్యక్తిగత పూచీకత్తు కోసం ఇచ్చిన బాండ్ ని అమలు చేయాల్సిన బాధ్యత జైలు అధికారులది అని చెప్పి, సిఐడి కోర్టు పేర్కొంది. ఆ విధంగా చేయకపోవటం వలన, సాంకేతికంగా సమస్యలు ఎదురవుతాయని సిఐడి కోర్టు భావించినట్టు తెలుస్తుంది.

రఘురామరాజు రిమాండ్ ను ఈ నెల 25వ తేదీ వరకు పొడిగిస్తూ సిఐడి కోర్టు నిర్ణయం తీసుకున్నట్టు, రఘురామరాజు న్యాయవాదులకు సమాచారం అందింది. దీంతో న్యాయవాదులు, సుప్రీం కోర్టు ఇచ్చిన ఆదేశాలను సిఐడి కోర్టు దృష్టికి తీసుకుని వెళ్ళారు. ఆర్మీ హాస్పిటల్ నుంచి డిశ్చార్జ్ అయిన పది రోజుల్లో, బండ్లు సమర్పించాలని సుప్రీం కోర్టు ఆదేశాలు ఇచ్చినట్టు సిఐడి కోర్టు దృష్టికి తెచ్చారు. రిమాండ్ పొడిగిస్తూ ఇచ్చిన సర్టిఫైడ్ కాపి కోసం, రఘరామ రాజు న్యాయవాదులు ఈ రోజు సిఐడి కోర్టులో దరఖాస్తు చేసారు. ఆ సర్టిఫైడ్ కాపీ వచ్చిన తరువాత, దీని పై ఏమి చేయాలనే విషయం పై రఘురామరాజు న్యాయవాదులు నిర్ణయం తీసుకోనున్నారు. అయితే ఇదంతా సాంకేతికంగా జరిగిన విషయం అని, దీన్ని సాకుగా చూపి, మళ్ళీ రఘురామరాజుని అరెస్ట్ చేసే అవకాసం లేదని న్యాయ నిపుణులు చెప్తున్నారు. ఇప్పటికే సుప్రీం కోర్టు స్పష్టంగా బెయిల్ ఆర్డర్స్ ఇచ్చిందని, అది కాకుండా ప్రభుత్వం కానీ, సిఐడి కానీ ఇప్పుడు ఏమి చేయలేదని చెప్తున్నారు.

అశోక్ గజపతి రాజుని తిరిగి సింహాచలం చైర్మెన్ గా నియమిస్తూ, హైకోర్టు ఆదేశాలు ఇచ్చిన సంగతి తెలిసిందే. అయితే, ఈ రోజు ఆయన తీర్పు వచ్చిన నేపధ్యంలో, సింహాచలం వెళ్ళారు. దాదాపుగా ఏడాది తరువాత తిరిగి ఆయన దేవుడు దర్శనం చేసుకున్నారు. అయితే ఆలయానికి చైర్మెన్ గా వచ్చినప్పుడు కానీ, వీవీఐపిలు వచ్చినప్పుడు కానీ, పండితులు వచ్చి, తలపాగా చుడతారు. ఇది గౌరవ సుచికంగా ఆలయంలో పాటించే మర్యాదులు. అయితే అశోక్ గజపతి రాజు, చైర్మెన్ హోదాలో తిరిగి ఆలయానికి వచ్చినా, ఎప్పుడూ లభించే గౌరవం ఇప్పుడు ఆయనకు లభించలేదు. అయితే ఈ పరిణామం పై అశోక్ గజపతి రాజు అభ్యంతరం వ్యక్తం చేసారు. ఆలయానికి వచ్చిన ప్రతి సారి, జరిగే సంప్రదాయం ఇప్పుడు ఎందుకు పాటించలేదని, ఇది తమకు చిన్నప్పటి నుంచి లభిస్తున్న గౌరవం అని, ఈ రోజు ఎందుకు ఇలా చేసారు అంటూ, ఆయన అక్కడ అధికారులను నిలదీశారు. అధికారులు వెయ్యద్దు అన్నారో, మరి ఇంకా ఎవరైనా చేయవద్దు అన్నారో కానీ, ఇలా చేయకపోవటం పై ఆయన ఆగ్రహం వ్యక్తం చేసారు. అయితే క-రో-నా నేపధ్యంలోనే, ఇలా చేయలేదని, మంత్రి ఆదేశాలు ఉన్నాయి అంటూ, అక్కడ ఉన్న వారు చెప్పటంతో, అశోక్ గజపతి రాజు మరింత ఆగ్రహం వ్యక్తం చేసారు.

అయితే మంత్రి వెల్లంపల్లి మాత్రం, తాను ఏ ఆదేశాలు ఇవ్వలేదని, వాళ్ళు ఎందుకు అలా చేసారో తనకు తెలియదని తప్పించుకున్నారు. అయితే చైర్మెన్ హోదాలో వచ్చినా, ఇలా మీ ఇష్టం వచ్చినట్టు చేయటం గర్హనీయం అని అశోక్ గజపతి రాజు అన్నారు. ముఖ్యమంత్రికి, మంత్రులకు మంచి బుద్ధి ప్రసాదించాలని ఆ దేవుడిని కోరుకున్నట్టు చెప్పారు. అయితే ఇక్కడ మరో అంశం ఏమిటి అంటే, ఆలయ అధికారులు అయినా ఈవో, ఏఈవో, ఇలా ఉన్నతాధికారులు ఎవరూ అశోక్ గజపతి రాజు వచ్చిన సందర్భంలో లేరు. చైర్మెన్ గా ఏడాది తరువాత తిరిగి వచ్చినా, ఆయన ఆలయానికి వచ్చినా ఎవరు రాలేదు. ప్రభుత్వం ఈ అంశం పై సుప్రీం కోర్టుకు అపీల్ కు వెళ్ళే ఆలోచనలో ఉండటంతోనే, ఉన్నతాధికారులు ఎవరూ వచ్చి ఉండరని, వస్తే మళ్ళీ ప్రభుత్వ పెద్దల ఆగ్రహానికి గురి కావాల్సి ఉంటుందనే ఉద్దేశంతోనే ఎవరూ వచ్చి ఉండరని అంటున్నారు. అయితే ఇప్పుడు హైకోర్టు తీర్పు నేపధ్యంలో, మళ్ళీ ప్రభుత్వం కొత్తగా ఉత్తర్వులు ఇవ్వాల్సిన అవసరం లేదని, కోర్టు తీర్పు ప్రకారం అశోక్ గజపతి రాజు చైర్మెన్ గా వచ్చేస్తారని న్యాయ నిపుణులు చెప్తున్నారు.

ఆంధ్రప్రదేశ్ పబ్లిక్ సర్వీస్ కమిషన్ నిర్వహించిన గ్రూప్ వన్ పరీక్షల్లో ఫలితాలు వచ్చి, రేపటి నుంచి ఇంటర్వ్యూ లు ప్రారంభం కావలసిన నేపధ్యంలో, ఈ గ్రూప్ వన్ పరీక్షలు నిర్వహణ, వాల్యుషన్ లో పెద్ద ఎత్తున అక్రమాలు జరిగాయని, గత కొన్ని రోజులుగా దీని పై అనేక మంది అభ్యర్ధులు ఆందోళన వ్యక్తం చేస్తున్న విషయం తెలిసిందే. అయితే దీని పై కొంత మంది అభ్యర్ధులు, అభ్యంతరం వ్యక్తం చేస్తూ, పరీక్షలు రద్దు చేయాలి అంటూ, హైకోర్టుని ఆశ్రయించారు. ఈ ఒక్క అంశం పైనే, దాదాపుగా 40 వరకు పిటీషన్లు దాఖలు అయ్యాయి. ఈ అంశం పై ఈ రోజు హైకోర్టులో సుదీర్ఘంగా విచారణా జరిగింది. ఈ పిటీషన్లపై ఈ రోజు ఉదయం నుంచి సాయంత్రం వరకు ఇరు పక్షాలు హోరాహోరీగా వాదనలు వినిపించాయి. ప్రభుత్వం వైపు నుంచి సీనియర్ న్యాయవాదులు తమ వాదనలు గట్టిగా వినిపించారు. ఇరువురి వాదనలు విన్న ఆంధ్రప్రదేశ్ హైకోర్ట్, మధ్యంతరంగా కొన్ని ఆదేశాలు జారీ చేసింది. ఈ పరీక్షలు నిర్వహణలో అవకతవకలు జరిగాయని చెప్పి, హైకోర్టు ప్రాధమిక నిర్ధారణకు వచ్చిందా అనే అనుమానం కలిగేలా, హైకోర్ట్ ఇచ్చిన మధ్యంతర ఉత్తర్వులు, రాష్ట్ర ప్రభుత్వానికి ఎదురు దెబ్బగానే భావించాల్సి ఉంటుంది. ఆంధ్రప్రదేశ్ హైకోర్టు ఇచ్చిన ఆదేశాల్లో, కీలక విషయాలు ఉన్నాయి.

వచ్చే నాలుగు వారాల వరకు, ఈ పరీక్షలకు సంబంధించి, తదుపరి చర్యలు ఏవి కూడా తీసుకోకూడదు అంటూ, హైకోర్టు ఆదేశాలు జారీ చేసింది. రేపటి నుంచి ఆంధ్రప్రదేశ్ పబ్లిక్ సర్వీస్ కమిషన్ నిర్వహించే ఇంటర్వ్యూ లు కూడా ఆగిపోనున్నాయి. ఆంధ్రప్రదేశ్ పబ్లిక్ సర్వీస్ కమిషన్ నిర్వహించిన పరీక్షా పత్రాలు, మ్యాన్యువల్ గా కాకుండా, డిజిటల్ పద్దతిలో వాల్యుషన్ చేసారని, దీనిలో అక్రమాలు కూడా జరిగాయని, ఈ ప్రక్రియ వల్ల అనేక మంది ప్రతిభ కలిగిన విద్యార్ధులకు కూడా అన్యాయం జరిగింది అంటూ, కొంత మంది విద్యార్ధులు హైకోర్టుని ఆశ్రయించారు. అంతే కాకుండా, గతంలో నిర్వహించిన కొన్ని పరీక్షల్లో ఎక్కువ మార్కులు వచ్చిన వారికి కూడా ఈ సారి తక్కువ మార్కులు వచ్చాయని, కేవలం కొంత మంది వ్యవహరించిన తీరు వల్లే, విద్యార్ధులకు అన్యాయం జరిగిందని, హైకోర్టులో వాదించారు. ఈ నేపధ్యంలోనే, హైకోర్ట్ ఆదేశాలు ఇస్తే, నాలుగు వారాల వరకు ఎలాంటి చర్యలు తీసుకోకూడదు అంటూ `స్పష్టమైన ఆదేశాలు ఇచ్చింది.