news

ఈ రోజు ఆంధ్రప్రదేశ్ ప్రభుత్వం పై, హైకోర్టు తీవ్ర ఆగ్రహం వ్యక్తం చేసింది. రాష్ట్రంలో 2018 నుంచి 2019 వరకు నరేగా పనులు చేసిన వారికి, గత రెండేళ్లుగా ప్రభుత్వం బిల్లులు చెల్లించటం లేదు అంటూ, రాష్ట్ర హైకోర్టులో సీనియర్ న్యాయవాది వీరా రెడ్డి, ప్రణతి, నర్రా శ్రీనివాస్ పిటీషన్ దాఖలు చేసారు. ఈ పిటీషన్ల పై దాదాపుగా ఎడాదిగా విచారణ జరుగుతుంది. ఈ విచారణ సందర్భంగా, చీఫ్ జస్టిస్ అరూప్ కుమార్ గోస్వామీ ఆధ్వర్యంలో ఉన్న బెంచ్ విచారణ చేపట్టింది. 2018 నుంచి 2019 వరకు ఎన్ని బిల్లులు పెండింగ్ లో ఉన్నాయి, ఎంత మొత్తం చెల్లించాలో కోర్టుకు నివేదిక ఇవ్వాలని ధర్మాసనం రాష్ట్ర ప్రభుత్వాన్ని ఆదేశించింది. అయితే ఈ సందర్భంలో ప్రభుత్వ తరుపు న్యాయవాది స్పందిస్తూ, కేంద్రం నుంచి డబ్బులు రాలేదని చెప్పారు. అయితే దీని పై రాష్ట్ర హైకోర్టు ఆగ్రహం వ్యక్తం చేసింది. 2018 నుంచి 2019 వరకు బిల్లులు రాకపోతే, ఆ తరువాత సంవత్సరాలకు బిల్లులు ఎలా వచ్చాయని హైకోర్టు ప్రభుత్వాన్ని నిలదీసింది. పైగా, 5 లక్షల రూపాయలు ఉన్న బిల్లులకు, 20 శాతం తగ్గించి ఇస్తామని కోర్ట్ కు చెప్పి, ఆ డబ్బులు తరువాత ఎందుకు ఇవ్వలేదని, హైకోర్టు ప్రభుత్వం పై ఆగ్రహం వ్యక్తం చేసింది. రెండు వారాల్లో దీని పై తమకు పూర్తి స్థాయిలో అఫిడవిట్ దాఖలు చేయాలని కోరింది. ఒక వేళ రాష్ట్ర ప్రభుత్వం నుంచి సరైన సమాధానం రాకపోతే మాత్రం, రాష్ట్ర ప్రభుత్వ చీఫ్ సెక్రటరీని, హైకోర్టుకు పిలిపించాల్సి ఉంటుందని, ధర్మాసనం హెచ్చరించింది.

ఏడు లక్షల పనులకు బిల్లులు పెండింగ్ లో ఉన్నాయని, పిటీషనర్ తరుపు న్యాయవాదులు రాష్ట్ర హైకోర్టు ధర్మాసనం ముందుకు తీసుకొచ్చారు. కేంద్రం నుంచి వచ్చిన నిధులను దారి మళ్ళించారని వారు కోర్టుకు తెలిపారు. అందు వల్లే అసలు ఎన్ని నిధులు పెండింగ్ లో ఉన్నాయి, కేంద్రం నుంచి ఎంత వచ్చింది, ఎంత రావాలి, ఈ నిధులు వివరాలు ఏంటి, కేంద్రం నుంచి నిధులు రాలేదని ప్రభుత్వం చెప్తుంటే, ఆ తరువాత ఏడాదికి నిధులు ఎలా వచ్చాయో, వీటి అన్నిటి పై, రాష్ట్ర ప్రభుత్వం ఒక అఫిడవిట్ ఇవ్వాలని రాష్ట్ర హైకోర్టు ఆదేశించింది. ఎన్నో రోజులు నుంచి ఈ కేసు పెండింగ్ లో ఉన్నా, గతంలో హైకోర్టు ఇచ్చిన ఆదేశాలను రాష్ట్ర ప్రభుత్వం పట్టించుకోకపోవటం పై హైకోర్టు సీరియస్ అయ్యింది. ఒకవేళ పూర్తి స్థాయి అఫిడవిట్ లో, తమకు కావాల్సిన వివరాలు అన్నీ రాకపోతే, చీఫ్ సెక్రటరీ ని వచ్చే వాయిదాకి హైకోర్టుకు పిలిపిస్తామని హెచ్చరించింది. రెండు వారాల్లో అఫిడవిట్ దాఖలు చేయాలని, హైకోర్టు రాష్ట్ర ప్రభుత్వాన్ని ఆదేశించింది.

ఈ రోజు తెలుగుదేశం పార్టీ ఆవిర్భావ దినోత్సవం సందర్భంగా, చంద్రబాబు పార్టీ ఆఫీస్ లో జరిగిన వేడుకల్లో పాల్గున్నారు. ఈ సందర్భంగా చంద్రబాబు అనేక విషయాల పై స్పందించారు. ఆయన మాటల్లో "సరిగ్గా 40 ఏళ్ల క్రితం ఇదే రోజున స్వర్గీయ నందమూరి తారక రామారావు తెలుగుదేశం పార్టీని ఏర్పాటు చేశారు. ఆయన కేవలం అధికారం కోసమే పార్టీని స్థాపించలేదు. తెలుగు వారి గుర్తింపు కోసం, తెలుగు ప్రజల రుణం తీర్చుకోవాలని పార్టీని ఏర్పాటు చేశారు. నాడు ఎమ్మెల్యే క్వార్టర్స్ లో తెలుగుదేశం పార్టీని స్థాపించి ప్రజల ఆదరణతో 9 నెలల్లోనే అధికారం సాధించిన ఏకైక నాయకుడు నందమూరి తారకరామారావు. తెలుగు వారి ఆత్మ గౌరవాన్ని ప్రపంచానికి చాటిన వ్యక్తి ఎన్టీఆర్. రాజకీయాల నిర్వచనం మార్చాలనే సంకల్పంతో పాటు సంక్షేమం, అభివృద్ధి రెండు కళ్లుగా నాడు అనేక కార్యక్రమాలు చేపట్టారు. నేడు అవి దేశానికి ఆదర్శమయ్యాయి. నాడు ఎన్టీఆర్ రూ.2 కిలో బియ్యం ప్రవేశపెడితే నేడు కేంద్రం అదే స్పూర్తితో వన్ నేషన్ వన్ రేషన్ కార్యక్రమానికి మొదలు పెట్టింది. నాడు ఎన్టీఆర్ రైతులకు అందించే విద్యుత్ కు శ్లాబ్ రేట్ రూ. 50 కి తీసుకువస్తే నేడు వాటన్నింటికి చిల్లు పెట్టి జగన్ మోటర్లకు మీటర్లు పెట్టి రైతులపై భారం మోపేందుకు సిద్దమయ్యారు. గుడెసెలో ఉండే ప్రతి పేద వాడికి పక్కా ఇళ్ల నిర్మాణానికి ఎన్టీఆర్ శ్రీకారం చుడితే నేడు కేంద్రం అదే బాటలో ప్రతి ఒక్కరికి ఇళ్లు నిర్మాణం చేపడుతోంది. నాడు మెజారిటీలో ఉన్న ప్రభుత్వాన్ని కుట్రతో రద్దు చేస్తే కేవలం 30 రోజుల్లో ఎన్టీఆర్ ను మళ్లీ గద్దెనెక్కించిన జాతి మన తెలుగు జాతి. దేశంలో ఎక్కడా లేని విధంగా ఒక ప్రాంతీయ పార్టీ కేంద్రంలో ప్రధాన ప్రతిపక్షంగా పని చేయడం ప్రతి ఒక్క తెలుగు వాడికి గర్వకారణం. నేను ముఖ్యమంత్రి అయిన తరువాత ప్రజల్లో ఆత్మవిశ్వాన్ని పెంచాం. హైదరాబాద్ లో హైటెక్ సిటీ ప్రారంభించి లో తెలుగుజాతి కోసం సంపద సృష్టించాం. యువత భవిష్యత్ ను దృష్టిలో పెట్టుకొని ఐటీని అభివృద్ధి చేసి తద్వారా సైబరాబాద్ నిర్మాణం చేయగలిగాం. అవుటర్ రింగ్ రోడ్డు, ఎయిర్ పోర్టు, జీనోమ్ వ్యాలీలు నేడు రాష్ట్రానికి వచ్చాయంటే నాడు మనం వేసిన బీజాలే నేడు పెరిగి పెద్దదై ప్రజలకు మెరుగైన సౌకర్యాలు కల్పిస్తున్నాయి. జీనోమ్ వ్యాలీ నేడు కోవిడ్ సమయంలో ఉపయోగపడిందంటే దానికి మన ముందు చూపే కారణం."

"ఒకప్పుడు ఏపీలో ఒక ఎకరం అమ్మితే తెలంగాణలో 3 ఎకరాలు కొనుక్కునేవారు. కానీ నేడు తెలంగాణలో ఒక ఎకరా అమ్మితే ఏపీలో రెండు ఎకరాలు కొనే పరిస్థితి వచ్చిందని కేసీఆర్ మాట్లాడటం చూస్తే వైసీపీ పాలనలో రాష్ట్ర పరిస్థితి ఎంత దుర్బరంగా ఉందో అర్దమవుతోంది. అమరావతి ద్వారా యువతకు ఉద్యోగాలు, పోలవరం ద్వారా రైతులకు నీళ్లు అందించే విధంగా సంకల్పించి పనులు వేగిరం చేశాం. సంక్షేమంతో పాటు అభివృద్ధి పథంలో రాష్ట్రాన్ని ముందుకు తీసుకువెళ్లాం. ఒక మనిషి పుట్టుక నుంచి చనిపోయేంత వరకు అనేక పథకాలను అందించాం. నాడు ప్రత్యేకహోదా విషయంలో కేంద్రం మీద ఒత్తిడి తెచ్చాం. దక్షిణ భారతదేశంలో ఏపీని అన్ని రంగాల్లో అభివృద్ధి చేశాం. జగన్ రెడ్డి ప్రభుత్వం కేవలం 20 నెలల్లోనే లక్షా 70వేల కోట్లు అప్పు చేసి ప్రతి కుటుంబం మీద రూ. 2 లక్షల 50వేల భారం మోపారు. నిత్యావసర ధరలు, పెట్రోల్, డీజిల్, కరెంట్, విద్యుత్, ఇంటిపన్ను, వృత్తి పన్నులు పెంచేశారు. ఇలా అన్నింటిని పెంచుకుంటూ పోతే ప్రజలు ఏ విధంగా బ్రతుకుతారోనన్న ధ్యాస ప్రభుత్వంలో లేదు. కో-వి-డ్ సమయంలో ప్రభుత్వం నిర్లక్ష్యంగా వ్యవహరిస్తోంది. ఒక వైపు ఆర్ధిక సమస్యలు వస్తున్నా ప్రభుత్వం పట్టించుకోవడం లేదు. ఎప్పుడూ లేని విపత్కర పరిస్థితులు నేడు రాష్ట్రంలో ఉన్నాయి. నాడు ప్రత్యేకహోదా వస్తే ఉద్యోగాలు వస్తాయని 25 మంది ఎంపీలను గెలిపిస్తే కేంద్రం మెడలు వంచుతామన్న జగన్ రెడ్డి ఇప్పుడెక్కడ దాక్కున్నారు? 27 మంది వైసీపీ ఎంపీలు ఏం చేస్తున్నారు?

టీడీపీ హయాంలో పోలవరం 70 శాతం పూర్తి చేస్తే మిగిలిన పనులను పూర్తి చేయడానికి ఆపసోపాలు పడుతున్నారు. లక్ష నుంచి రెండు లక్షల కోట్ల సంపద ఉన్న అమరావతిని సర్వనాశనం చేశారు. మూడు రాజధానుల పేరుతో మూడు ముక్కలాడుతున్నారు. తెలుగుదేశం హయాంలో 16 లక్షల కోట్ల ఎంవోయులు, 5.20 లక్షల మందికి ఉద్యోగాలు తెస్తే జగన్ రెడ్డి రెండేళ్లల్లో ఒక్క కంపెనీ అయినా తెచ్చారా? ఒక్కరికి అయినా ఉద్యోగం ఇచ్చారా? ఆంధ్రుల హక్కుగా ఉన్న విశాఖ ఉక్కు పరిశ్రమ ప్రవేటీకరణకు వ్యతిరేకంగా పోరాటం చేయకుండా 7 వేల ఎకరాల భూములు అమ్మితే సరిపోతుందని ముఖ్యమంత్రే మాట్లాడటం దుర్మార్గం. నాడు మద్యపాన నిషేదం చేస్తానని హామీనిచ్చి నేడు మద్యం ధరలు మూడు రెట్లు పెంచి సొంత కంపెనీలతో నాశిరకం బ్రాండ్లు తీసుకువచ్చి ప్రజల ఆరోగ్యంతో చెలగాటమాడుతున్నారు. ఈ ఏడాది కేవలం మద్యం ద్వారా రూ.20వేల కోట్లు ఆదాయం పెంచేందుకు ప్రయత్నిస్తున్నారు. రెండు బడ్జెట్ లను ఆర్డినెన్స్ ల ద్వారా ప్రవేశపెట్టిన ప్రభుత్వాన్ని నా జీవిత చరిత్రలో ఎప్పుడూ చూడలేదు. ఎంత ఖర్చు చేశారో ప్రజలకు చెప్పాల్సిన భాద్యత ప్రభుత్వానికి లేదా? రాష్ట్రం జగన్ రెడ్డి తాత జాగీరు కాదు. జవాబుదారీ తనంగా ఉండాల్సిన ప్రభుత్వం అసెంబ్లీలో కనీసం బడ్జెట్ కూడా పాస్ చేసుకోలేకపోతున్నారు. ప్రజలను చైతన్యవంతులుగా చేయడం నా బాధ్యత. నిజాన్ని పదే పదే చెప్పకపోతే ఎదుట వ్యక్తులు పదే పదే చెప్పే అబద్దాలే నిజమని ప్రజలు నమ్మే పరిస్థితి వస్తుందని డా. బి.ఆర్ అంబేద్కర్ ఎప్పుడో చెప్పారు. మనం నిజాన్ని ఒకటికి 100 సార్లు చెప్పాలి లేదంటే సమాజం నాశనం అవుతుంది. అంకితమైన భావంతో పని చేస్తాం, ప్రజా సేవకు పునరంకితం అవుతాం. "

మన రాష్ట్రంలో గత రెండేళ్ళలో పెట్టుబడులు ఎన్ని వచ్చాయి అంటే, గట్టిగా ఒక పేరు చెప్పటానికి లేదు. మన రాష్ట్రం నుంచి వేల్లిపోయినవి అయితే లూలు, అదానీ డేటా సెంటర్, రిలయన్స్ జియో, ఇలా చాలా చెప్పవచ్చు. అయితే ఏదో ఒక రూపంలో ఒక కంపెనీ ముందుకు వచ్చింది. దాదాపుగా ఏడాది పైనా అవుతున్నా, ఆ కంపెనీ ఇంకా ఎందుకు రాలేదు అని ఆలోచిస్తున్న సమయంలో, ఆ కంపెనీ దివాళా తీసింది అనే వార్త, అటు ఏపి ప్రభుత్వాన్ని, ఇటు ప్రజలను కూడా షాక్ కు గురి చేసింది. కడపలో ఉక్కు ఫ్యాక్టరీ అనేది, మన విభజన చట్టంలో ఒక అంశం. అన్ని హామీలు లాగే, ఇది కూడా కేంద్రం విస్మరించింది. దీని కోసం అప్పట్లో టిడిపి ఎంపీలు, ఆమరణ నిరాహార దీక్ష కూడా చేసారు. అయినా కేంద్రం దిగిరాక పోవటంతో, అప్పటి ముఖ్యమంత్రి చంద్రబాబు, రాష్ట్రమే కడప స్టీల్ కుడుతుందని ప్రకటించి, భూమి పూజ కూడా చేసారు. అయితే ఎన్నికలు రావటం, ప్రభుత్వం మారటం, జగన్ మోహన్ రెడ్డి మారటంతో, మొత్తం రివర్స్ అయ్యింది. అన్ని ప్రాజెక్ట్ లు లాగానే, ఇది కూడా చెల్లికి మళ్ళీ పెళ్లి కాన్సెప్ట్ లో, జగన్ మోహన్ రెడ్డి, మళ్ళీ భూమి పూజ చేసారు. అయితే రాష్ట్ర ప్రభుత్వ కాకుండా, బ్రిటన్ కు చెందిన లిబర్టీ స్టీల్స్‌ ని తీసుకుని వచ్చారు. సరేలే ఏదో ఒకటి, ప్రైవేటు కంపెనీ అయితే ఏమిలే, ఏదో ఒకటి పెట్టుబడి వస్తుంది కదా అని అందరూ అనుకున్నారు.

అయితే ఏడాది దాటినా ఇంకా పరిశ్రమ లేదు, ఏమి లేదు. వీళ్ళు ఎప్పుడు అడుగు పెడతారా అని భావిస్తున్న సమయంలో, పిడిగు లాంటి వార్త బ్రిటన్ నుంచి వినిపిస్తుంది. అదే లిబర్టీ స్టీల్స్ దివాళా తీసింది అనే వార్త. అదేంటి, ఏడాది లోపే ఈ కంపెనీ దివాళా తీస్తుందని తెలిసినా, ఒక రాష్ట్ర ప్రభుత్వం, ఆ కంపెనీతో ఎలా పెట్టుబడి పెట్టించాలని అనుకున్నది అనుకుంటే, దానికి సమాధానం లేదనే చెప్పాలి. ఈ కంపెనీ దివాళా తీసిందనే వార్తలు రావటంతో, ఈ కంపెనీని ఎలా వదిలించుకోవాలి అనే పనిలో వైసీపీ ప్రభుత్వం పడింది. వెంటనే బ్రిటన్ లోని ఇండియన్ ఎంబసీకి లేఖ రాసి, మొత్తం నివేదిక పంపించాలని కోరింది. దీని పై త్వరలోనే ఒక నిర్ణయం తీసుకునే అవకాసం ఉన్నట్టు తెలుస్తుంది. అయితే లిబర్టీ గ్రూప్, బ్రిటన్ ప్రభుత్వాన్ని ఆదుకోవాలని కోరగా, బ్రిటన్ ప్రభుత్వం కూడా, మేము ఏమి చేయలేం అని చేతులు ఎత్తేసినట్టు తెలుస్తుంది. మొత్తంగా, ఏదో ఒక కంపెనీ వస్తుంది, అదీ రాయలసీమలో వస్తుందని సంతోష పెడుతున్న ప్రజలకు, చివరకు అది ఒక దివాళా కంపెనీ అని తెలియటంతో, నిరాసకు గురయ్యారు.