news

భూమా కుటుంబం ప్రజా సేవకే అంకితమని మాజీ మంత్రి భూమా అఖిలప్రియ అన్నారు. శనివారం చాగలమర్రి గ్రామానికి వచ్చారు. ఈ సందర్భంగా ఆమె మాట్లాడుతూ సార్వత్రిక ఎన్నికల్లో జగన్‌కే ఓటు వేయాలన్న సంకల్పంతో ప్రజలు పట్టం కట్టారని అన్నారు. రాష్ట్రంలో వైసీపీకి పెద్దఎత్తున అత్యధిక స్థానాలు వస్తాయని ఎవరూ ఊహించలేదని అన్నారు. ప్రజా తీర్పుకు కట్టుబడి ఉంటామని అన్నారు. తాము అధికారంలో ఉన్నా లేకున్నా ప్రజలకు అందుబాటులో ఉంటూ సేవ చేస్తామని అన్నారు. దివంగత భూమా నాగిరెడ్డి, శోభానాగిరెడ్డి ఆశయాలతో ప్రజలకు సేవ చేస్తామని అన్నారు. స్థానిక సంస్థల ఎన్నికల్లో టీడీపీ తరపున పోటీ చేయడం తథ్యమని అన్నారు. సార్వత్రిక ఎన్నికల్లో కొనసాగిన వైసీపీ హవా స్థానిక సంస్థల ఎన్నికల్లో ఉండదని అన్నారు. ఆ పార్టీ నాయకులు, కార్యకర్తలకు తాము అండగా ఉండి ఎన్నికల్లో విజయం కోసం కృషి చేస్తామని అన్నారు.

తాము ఏ పార్టీలో చేరే ఆలోచన లేదని అన్నారు. అధికారంలో ఉన్నప్పుడు బాధ్యతగా నియో జకవర్గాన్ని అభివృద్ధి చేశామన్నారు. ఓడిపోయినా ప్రజలకు ఏ కష్టం రాకుండా సేవ చేస్తానని అన్నారు. పార్టీ బలోపేతానికి కృషి చేస్తామని అన్నారు. స్థానిక సంస్థల ఎన్నికల్లో సత్తా చాటాలని కార్యకర్తలకు పిలుపునిచ్చారు. అనంతరం అహోబిలం పుణ్యక్షేత్రంలో చాగలమర్రికి చెందిన టీడీపీ నాయకులు గంగుల ప్రతాప్‌ ఏర్పాటు చేసిన శుభకార్యక్రమానికి మాజీ మంత్రి అఖిలప్రియ, ఆళ్లగడ్డ మార్కెట్‌యార్డ్‌ చైర్మన్‌ బీవీ రామిరెడ్డి, పుట్టాలమ్మ చైర్మన్‌ అంబటి మహేశ్వర్‌రెడ్డి హాజరయ్యారు. ఆలయ ప్రధాన అర్చకులు రమేష్‌ దంపతులు షష్టిపూర్తి చేసుకున్నందుకు మాజీ మంత్రి కుటుంబ సభ్యులకు అభినందనలు తెలియజేశారు.

శాసనసభ ఎన్నికల్లో భీమవరంలో తనను ఓడించేందుకు రూ.150 కోట్లు ఖర్చు చేశారని తెలిసిందని, శాసనసభలో తాను అడుగు పెట్టకుండా ఎలాగైనా ఓడించాలనేదే దాని వెనుక లక్ష్యమని జనసేనాధిపతి పవన్‌ కల్యాణ్‌ సంచలనాత్మక ఆరోపణ చేశారు. ప్రజా తీర్పును గౌరవిస్తానని, ఒక్క ఓటమి తమ పార్టీని నిలువరించబోదన్నారు. తాను ఓటమిని అంగీకరించేవాడిని కాదని, విజయం సాధించే వరకు పోరాడతానని స్పష్టం చేశారు. గుంటూరు జిల్లా మంగళగిరిలోని పార్టీ కార్యాలయంలో శనివారం పార్టీ కార్యకర్తల సమావేశంలో ఆయన మాట్లాడారు. కార్యకర్తల్లో ఎవరెవరు ఎక్కడి నుంచి వచ్చారో అడిగి తెలుసుకున్నారు. తన ఒక్కడి ఓటమి కోసమే రూ.150 కోట్లు ఖర్చు చేస్తే, రాష్ట్రమంతా ఎంత ఖర్చు పెట్టారో ఆలోచిస్తూనే భయం వేస్తుందని అన్నారు. పరాజయాన్ని అంగీకరించని తాను గెలిచేవరకూ పోరాటం చేస్తూనే ఉంటానని ఆ పార్టీ అధినేత పవన్‌ కల్యాణ్‌ స్పష్టం చేశారు.

‘నా జీవితం రాజకీయాలకు అంకితం. మళ్లీ చెబుతున్నా... నా శవాన్ని నలుగురు మోసుకువెళ్లే వరకు నేను జనసేనను మోస్తా. నాకు ఓటమి కొత్త కాదు. దెబ్బతినే కొద్దీ ఎదిగే వ్యక్తిని. 25 సంవత్సరాల లక్ష్యంతో రాజకీయాల్లోకి వచ్చాను. ఓటమి ఎదురైతే తట్టుకోగలనా లేదా అని నన్ను నేను పరీక్షించుకున్న తర్వాతే పార్టీ స్థాపించా’ అని పవన్‌ చెప్పారు. ఈవీఎంల అక్రమాలు, ధన ప్రలోభం వంటివి తాజా ఓటమికి కారణాలుగా చెబుతున్నారని, వీటన్నింటినీ తాను పట్టించుకోబోనని పేర్కొన్నారు. వైకాపా పాలన ఎలా ఉంటుందో చూద్దామని అన్నారు. ఎక్కడ సమస్య ఉంటే అక్కడ, ఎక్కడ ఆకలి ఉంటే అక్కడ జనసేన గుర్తు కనబడాలని, ప్రజలకు మనం ఉన్నామనే భరోసా ఇవ్వాలని చెప్పారు.

‘మీరు ఉంటారా వెళ్లిపోతారా అని సమీక్షకు వచ్చిన ప్రతి అభ్యర్థిని నేను అడుగుతున్నాను. వెంట ఉండేందుకే ఇక్కడి వరకు వచ్చామని వారు చెబుతున్నారు. ఇంతకుమించిన విజయం ఏం కావాలి? ప్రతికూల పరిస్థితుల్లోనే వ్యక్తిత్వం బయటపడుతుంది. ఓటమి ఎదురైనప్పుడే అవతలివారు మనవారా? పరాయివారా అన్న విషయం అర్థమవుతుంది. ఈ పార్టీ కార్యాలయం అందరిదీ. ఎవరు ఎప్పుడయినా రావచ్చు. అందరినీ కలిసేందుకు ప్రత్యేక సమయం కేటాయిస్తాను’ అని వివరించారు. విశాఖ, నెల్లూరు, ప్రకాశం జిల్లాల్లో పోటీ చేసిన జనసేన అభ్యర్థులతోను పవన్‌ సమావేశమయ్యారు. జిల్లాల వారీగా అభ్యర్థులతో మాట్లాడి ఎన్నికల సరళి, ఫలితాలపై చర్చించారు. ప్రజలతో మమేకం కావాలన్నారు. పార్టీని బలోపేతం చేయాలని, క్షేత్రస్థాయిలో జనం సమస్యలపై సమగ్ర అవగాహనకు రావాలని ఉద్బోధించారు. పంచాయతీ, జడ్పీ, పురపాలక ఎన్నికల్లో దీటుగా పోరాడదామన్నారు.

కడప జిల్లాలో ఇసుక మాఫియా రెచ్చిపోయింది. ఇసుక అక్రమ రవాణాకు అడ్డులేకుండా పోతోంది. అడ్డు వచ్చినవారిని చంపేందుకు కూడా వెనకడటం లేదు. అక్రమంగా ఇసుక రవాణా చేస్తున్నారని అడ్డుకునేందుకు ప్రయత్నించిన రెవెన్యూ సిబ్బందిపై దాడి చేశారు. ఇసుక అక్రమ రవాణా చేస్తున్న మాఫియా ముఠా వీఆర్వో, వీఆర్ఏను ట్రాక్టర్‌తో ఢీకొట్టించారు. కడప జిల్లాలోని సిద్ధవటం మండలం ఎస్. రాజంపేటలో ఈ ఘటన జరిగింది. ఈ ఘటనలో రెవెన్యూ సిబ్బంది గాయపడ్డారు. వీఆర్వో ఆరిఫ్, వీర్‌ఏ వెంకటపతికి గాయాలు కావడంతో కడప రిమ్స్ ఆస్పత్రికి తరలించి చికిత్స అందిస్తున్నారు. పెన్నానది నుంచి ఇసుక మాఫియా అక్రమంగా ఇసుక తరలిస్తున్నట్టు సమాచారం అందడంతో రెవెన్యూ సిబ్బంది అక్కడికి వెళ్లి అడ్డుకున్నారు. ట్రాక్టర్‌ను ఆపేందుకు ప్రయత్నించారు. ఇసుక ట్రాక్టర్‌తో వారిని డ్రైవర్‌ ఢీకొట్టాడు. 

విద్యుత్‌ స్తంభాన్ని ఢీకొని ట్రాక్టర్‌ బోల్తా పడటంతో డ్రైవర్‌ అక్కడి నుంచి పరారయ్యాడు. బైక్ నుంచి ట్రాక్టర్‌ను ఆపేందుకు ప్రయత్నించిన వారిని ట్రాక్టర్‌తో ఢీకొట్టాడు. ఈ క్రమంలో పక్కనే ఉన్న విద్యుత్ స్తంభాన్ని ఢీకొని అనంతరం ట్రాక్టర్ బోల్తాపడింది. దీంతో ట్రాక్టర్‌ను వదిలేసి డ్రైవర్, మరో వ్యక్తి పరారయ్యారు. గాయపడిన రెవెన్యూ సిబ్బందిని స్థానికులు కడప రిమ్స్‌కు తరలించి చికిత్స అందిస్తున్నారు. పోలీసులు కేసు నమోదు చేసి దర్యాప్తు చేస్తున్నారు.