news

తెలుగుదేశం పార్టీ అధ్యక్షులు నారా చంద్రబాబు నాయుడుతో గురువారం ఎన్టీఆర్ భవన్ లో సిపిఐ నాయకులు రామకృష్ణ, ముప్పాళ్ల నాగేశ్వర రావు, హరనాథ్ రెడ్డి తదితరులు సమావేశం అయ్యారు. ఈ సందర్భంగా రాష్ట్రంలో నెలకొన్న పరిస్థితులపై వారు చర్చించారు. 
9నెలల్లో రాష్ట్రాన్ని 9ఏళ్లు వెనక్కి నెట్టారని, ఇంత జీవన విధ్వంసం కనీవినీ ఎరుగమని, అన్నివర్గాల సంక్షేమం-రాష్ట్ర అభివృద్దికి తూట్లు పొడవడమే కాకుండా భావితరాల భవిష్యత్తును అంధకారం చేశారని సిపిఐ నేతలు అభిప్రాయబడ్డారు. కూల్చివేతలు-విధ్వంసాలు, రద్దులు-కోతలు, బెదిరింపులు-వేధింపులు,దాడులు-దౌర్జన్యాలు మున్నెన్నడూ లేవని అన్నారు. అమరావతిని చంపేశారని, పోలవరం సహా ప్రాజెక్టుల పనులన్నీ నిలిపేశారని, బిసి,ఎస్సీ,ఎస్టీ,మైనారిటి పేదలను అష్టకష్టాల పాలు చేశారని ఆగ్రహించారు. రాజధానికి రైతులిచ్చిన భూముల్లో పేదలకు పట్టాలు ఇస్తామని చెప్పి రైతులు, పేదల మధ్య విద్వేషాలు పెంచుతున్నారు. బిసి,ఎస్సీ,ఎస్టీ,మైనారిటీ పేదలు సాగుచేసుకునే అసైన్డ్ భూములను లాక్కుంటున్నారు. కార్డులు, పించన్ల తొలగింపు, అన్నా కేంటిన్ల మూసివేత, సంక్షేమ పథకాల్లో కోతలు దారుణమని అన్నారు. 151సీట్లు వచ్చాయన్న అహంభావంతో పేట్రేగిపోతున్నారని, రేపటి స్థానిక సంస్థల ఎన్నికల్లో మళ్లీ వీళ్లు గెలిస్తే మరింత పేట్రేగిపోతారని అన్నారు.

వైసిపి అరాచకాలకు అడ్డుకట్ట వేయాలని, ప్రజాస్వామ్యాన్ని నిలబెట్టుకోవాల్సిన బాధ్యత ప్రతిఒక్కరిపై ఉందని అన్నారు. అన్ని రాజకీయ పార్టీలు, ప్రజాసంఘాలు సంఘటితమై వైసిపి అరాచకాలను అడ్డుకోవాలనే అభిప్రాయం వ్యక్తం చేశారు. ఈ భేటిలో టిడిపి నాయకులు బచ్చుల అర్జునుడు, టిడి జనార్దన్, వర్ల రామయ్య తదితరులు పాల్గొన్నారు. అనంతరం విలేకరులతో వారు మాట్లాడారు. సీపీఐ రామకృష్ణ మాట్లాడుతూ...బీసీ రిజర్వేషన్లపై సీఎం జగన్ సరైన రీతిలో స్పందించలేదు. గత సీఎం చూపిన చొరవ చూపలేదు. అందరి అభిప్రాయాలు తీసుకోలేదు, సుప్రీం కోర్టుకు వెళ్లలేదు. ఎన్నికల్లో గెలిపించే బాధ్యత మీదే అంటూ మంత్రులకు వార్నింగ్ ఇవ్వటం జగన్ నైజాన్ని తెలియజేస్తోంది. స్ధానిక ఎన్నికల్లో రిజర్వేషన్లు తగ్గడం వల్ల బీసీలు 4 జడ్పీ చైర్మన్లలో ఒకటి, 65 జడ్పీటీసీలు, 65 ఎంపీపీలు, వేల సంఖ్యలో ఇతర స్ధానిక సంస్ధల పదవులను బీసీలు కోల్పోనున్నారు. బీసీ రిజర్వేషన్ల అంశంలో జగన్ నిర్లక్యంగా వ్యవహరించారు. గతంలో బీసీ రిజర్వేషన్ల అంశంపై కిరణ్ కుమార్ రెడ్డి అఖిలపక్ష సమావేశం నిర్వహించి సుప్రిం కోర్టుకు వెళ్లారు.

కానీ ఇప్పడు జగన్ అఖిలపక్షం ఎందుకు ఏర్పాటు చేయలేదు? అమరావతి నుంచి రాజధానిని తరలించేందుకు రూ. 5 కోట్లు పెట్టి లాయర్ ని నియవించిన జగన్ బీసీ రిజర్వేషన్లపై ఆ విధంగా ఎందుకు వ్యవహరించలేదు? రిజర్వేషన్లపై ప్రభుత్వం ఏకపక్షంగా ముందుకెళ్తోంది. ఎన్నికల్లో డబ్బు, మద్యం పంపణి చేస్తే 3 ఏళ్ల జైలు శిక్ష అని జగన్ చెప్పటం దెయ్యాలు వేదాలు వల్లించినట్లుంది. వైసీపీ ఎమ్మెల్యేలు గత ఎన్నికల్లో కోట్లాది రూపాయలు ఖర్చు పెట్టి గెలవలేదా? డబ్బు పంచటాన్ని మేం ప్రోత్సహించటం లేదు, కానీ కేవలం ఈ నెపంతో ప్రత్యర్ధి పార్టీల అభ్యర్డులను భయబ్రాంతులకు గురి చేసి స్ధానిక సంస్ధల ఎన్నికల్లో వైసీపీ గెలిచేందుకు ప్రయత్నం చేస్తోంది. దీనిపై ప్రజల్లో చర్చ జరగాలని రామకృష్ణ కోరారు. చంద్రబాబు నాయుడుతో భేటీ అయిన వారిలో సీపీఐ నాయకులు ముప్పాళ్ల నాగేశ్వరరావు, హరినాధరెడ్డి, టీడీపీ నేతలు బచ్చుల అర్జునుడు తదితరులు ఉన్నారు.

ప్రస్తుతం పంచాయతీ ఎన్నికల విషయంలో, బీసీ రిజర్వేషన్ తగ్గింపు ఇష్యూతో ఇబ్బంది పడుతున్న జగన్ కు, పంచాయతీ ఆఫీసులకు రంగుల విషయంలో కూడా, ఎదురు దెబ్బ తగిలే అవకాసం కనిపిస్తుంది. రాష్ట్రవ్యాప్తంగా వివిధ ప్రభుత్వభవనాలకు, పంచాయతీ కార్యాలయాలు, పాఠశాలలు, గుడులు, వాటర్ ట్యాంక్ లు, మరుగుదొడ్లు, శ్మశానాలకు అధికారపార్టీ రంగులేయించిన వైనంతోపాటు, వాలంటీర్ల వ్యవస్థ ను అడ్డంపెట్టుకొని, ప్రభుత్వం కొత్తగా తీసుకొచ్చిన చట్టం సాయంతో అధికారపార్టీ స్థానిక ఎన్నికల్లో గెలవాలని చూస్తోందని, ఈనేపథ్యంలో ఎన్నికల కమిషన్ నిబంధనల ప్రకారం నడుచుకొని, ప్రజాస్వామ్యబద్ధంగా ఎన్నికలు జరిగేలా చూడమని రాష్ట్ర ఎన్నికల కమిషనర్ కు విజ్ఞప్తి చేసినట్లు టీడీపీ రాష్ట్ర అధ్యక్షులు, మాజీ మంత్రి కళా వెంకట్రావు తెలిపారు. గురువారం ఆయన పార్టీ పొలిట్ బ్యూరోసభ్యలు వర్ల రామయ్య, ఎమ్మెల్సీలు పీ. అశోక్ బాబు, మంతెన సత్యనారాయణ రాజు, శాప్ మాజీఛైర్మన్ పీ.ఆర్.మోహన్, పార్టీ రాష్ట్ర మీడియా కోఆర్డినేటర్ దారపనేని నరేంద్రలతో కలిసి ఏపీ ఎన్నికల కమిషనర్ రమేశ్ కుమార్ ని కలిశారు. ప్రలోభాలకు తావులేకుండా, అధికారపార్టీ అరాచకాలు, రౌడీయిజానికి స్థానం లేకుండా, ప్రజాస్వామ్య బద్ధంగా, ప్రశాంత వాతావరణంలో ఎన్నికలు జరిపించేలా చూడాలని టీడీపీ తరుపున ఎన్నికల కమిషన్ ను కోరినట్లు కళా వెంకట్రావు విలేకరులతో చెప్పారు.

రంగులు వేయడాన్ని ఇప్పటికే హైకోర్టు తప్పుపట్టిన నేపథ్యంలో, వాటిని ఎంత త్వరగా తొలగిస్తే అంతమంచిదన్నారు. అదేవిధంగా రాష్ట్రప్రభుత్వం తీసుకొచ్చిన వాలంటీర్ల వ్యవస్థ ప్రభావం, వారి జోక్యం ఎన్నికల్లో లేకుండా చూడాలని విజ్ఞప్తి చేశామన్నారు. వైసీపీ ఎంపీ విజయసాయి రెడ్డి మాట్లాడుతూ, 90శాతం వరకు వైసీపీ కార్యకర్తలనే వాలంటీర్లుగా నియమించామని చెప్పడంజరిగిందని, ఆయన మాటల వీడియోను కూడా ఎన్నికల కమిషన్ కు ఇవ్వడమైందన్నారు. ఎన్నికల్లో మందు, డబ్బు ప్రభావం లేకుండా చూడాలంటూ, రాష్ట్రప్రభుత్వం ఇటీవలే ఒక చట్టం తీసుకొచ్చిందని, దాని ముసుగులో ప్రతిపక్షపార్టీ సభ్యులను లక్ష్యంగా చేసుకోవాలనే కుట్ర పూరిత ఆలోచనల్లో జగన్ అండ్ కో ఉన్నట్లుగా తమకు అనుమానం కలుగుతోందన్నారు. కాబట్టి ఆ చట్టం ముసుగులో ఎటువంటి అసాంఘిక కార్యకలాపాలు లేకుండా చూడాలని, ప్రతిపక్ష పార్టీ సభ్యులపై మోపే తప్పుడు కేసులను జాగ్రత్తగా పరిశీలించి నిర్ణయం తీసుకోవాలని ఎన్నికల కమిషనర్ ను కోరడం జరిగిందన్నారు. విశాఖలో టీడీపీ అధినేత చంద్రబాబునాయుడిపైనే ప్రభుత్వం దాడికి పాల్పడిందని, అటువంటప్పుడు సామాన్య నేతలు, కార్యకర్తలను స్థానిక ఎన్నికల్లో లక్ష్యంగా చేసుకుంటుందనడంలో ఎటువంటి సందేహం లేదన్నారు.

ఇక శాసనమండలి సభ్యులు, మంతెన సత్యనారాయణ రాజు మాట్లాడుతూ, " ఎగ్జిక్యూటివ్ రాజధాని పేరుతో విశాఖ చుట్టు పక్కల సుమారు 39వేల ఎకరాలను కబ్జా చేసిన జగన్మోహన్ రెడ్డి అండ్ కో.. ఇప్పుడు ఏకంటా ట్రస్టు భూములు, ఆలయ భూముల్ని కూడా తమ ఖాతాలో వేసుకునేందుకు యత్నించడం సిగ్గుచేటు. సింహాచలం ఆలయ భూముల్లో ఎలాంటి అక్రమాలు చోటు చేసుకున్నా.. జగన్మోహన్ రెడ్డికి అదే చివరి రోజు అవుతుంది. దోచుకోవడం, దాచుకోవడం, అమ్ముకోవడం వంటి తప్పుడు విధానాల్లో ఆరితేరిపోయిన ఏ -1, ఏ-2 దేవాలయాల జోలికి వస్తే క్షమించేది లేదని గుర్తుంచుకోవాలి. విజయనగరం రాజ వంశీకుడు, తెలుగుదేశం పార్టీ సీనియర్ నేత అశోక్‌ గజపతిరాజుపై జగన్మోహన్ రెడ్డి అండ్ కో పథకం ప్రకారం కుట్ర పన్నారు. రహస్య ఉత్తర్వులతో ఆయనను సింహాచలం దేవస్థానం చైర్మన్‌ పదవి నుండి, విజయనగరం సంస్థానాధీశులకు చెందిన మహారాజా అలక్‌ నారాయణ్‌ సొసైటీ ఆఫ్‌ ఆర్ట్స్‌ అండ్‌ సైన్స్‌(మాన్సాస్‌) ట్రస్టు అధ్యక్ష పదవి నుంచి కూడా తప్పించడం కుట్ర కాదా?" అంటూ ధ్వజమెత్తారు.

జగన్ వ్యవహారశైలి చూస్తుంటే, ఆయనకు ప్రజాస్వామ్యం పట్ల, రాజ్యాంగ వ్యవస్థల పట్ల ఏ మాత్రం గౌరవం లేనట్లుగా ఉందని, ప్రజాస్వామ్యానికి వ్యతిరేకంగా మాట్లాడటానికే ఆయన ఇష్టపడుతున్నారని, అందుకు తార్కాణం నిన్న జరిగిన రాష్ట్ర మంత్రి మండలి సమావేశంలో ఆయన చేసిన వ్యాఖ్యలేనని టీడీపీ సీనియర్ నేత, ఆ పార్టీ పొలిట్ బ్యూరోసభ్యులు వల్ల రామయ్య స్పష్టంచేశారు. గురువారం ఆయన మంగళగిరిలోని పార్టీ జాతీయ కార్యాలయంలో విలేకరులతో మాట్లాడారు. కేబినెట్ సమావేశంలో ముఖ్యమంత్రి మాట్లాడుతూ, ఒకనెలలో రాష్ట్రంలో స్థానికసంస్థల ఎన్నికలు జరగబోతున్నాయని, వాటిలో నూటికి 90శాతం మనమే గెలిచితీరాలని చెప్పడం, ఎక్కడైనా ఓడితే మంత్రులంతా ఇంటికేనని, ఫలితాలు ప్రతికూలంగా వస్తే మంత్రులంతా రాజ్ భవన్ కు వెళ్లిరాజీనామాలు ఇవ్వాలని చెప్పడం, ఎమ్మెల్యేలకు వచ్చే ఎన్నికల్లో టిక్కెట్లు దక్కవంటూ బెదిరింపు ధోరణితో వ్యవహరించాడన్నారు. ముఖ్యమంత్రి వ్యాఖ్యలు చూస్తుంటే, అసలు ఆయనకు ప్రజాస్వామ్యంపై నమ్మకముందా అని, ప్రజాస్వామ్యాన్ని చంపేయాలని భావిస్తున్నట్లుగా ఉందని రామయ్య అభిప్రాయపడ్డారు. ఎటువంటి గొడవలు, హింసాత్మక సంఘటనలు లేకుండా ప్రజాస్వామ్య బద్ధంగా ఎన్నికలు జరిపించాల్సిన బాద్యత మంత్రులపైనే ఉందని చెప్పాల్సిన ముఖ్యమంత్రే, అందుకు విరుద్ధంగా మాట్లాడితే ప్రజల్లోకి ఎలాంటి సంకేతాలు వెళతాయో ప్రత్యేకంగా చెప్పాల్సిన పనిలేదన్నారు.

స్థానిక ఎన్నికల్లో ఓడితే మంత్రులకు మూడినట్లేనని ముఖ్యమంత్రి చెప్పడం ద్వారా, వారికి ఆయన ఎలాంటి సంకేతాలు ఇవ్వాలనుకుంటున్నారో చెప్పాలన్నారు. సీఎం అలా మాట్లాడాక మంత్రులంతా ఎన్నికల్లో గెలవడం కోసం ప్రతిపక్షపార్టీలను భయభ్రాంతులకు గురిచేయడం, బూత్ లు క్యాప్చర్ చేయడం, భయానక చర్యలకు పాల్పడటం వంటి పనులు చేస్తారనడంలో ఎటువంటి సందేహం లేదన్నారు. ఏంచేసైనా సరే గెలవాలని, గెలుపే లక్ష్యమని ముఖ్యమంత్రే చెబితే, ప్రభుత్వ యంత్రాంగం మంత్రిమండలిని కాపాడకుండా ఉంటుందా అని వర్ల సందేహం వ్యక్తంచేశారు. పోలీసులు చట్టప్రకారం విధులు నిర్వర్తిస్తారా, ఎన్నికల విధులు నిర్వర్తించేవారంతా పక్షపాతం లేకుండా పనిచేస్తారా అని రామయ్య ప్రశ్నించారు. పార్టీ సమావేశాల్లో మాట్లాడినట్టుగా, మంత్రివర్గ సమావేశంలో ముఖ్యమంత్రే మాట్లాడటం చూస్తుంటే, రాష్ట్రంలో మరే పార్టీ బతికి బట్టకట్టకూడదన్న వైఖరిఆయనలో స్పష్టంగా కనిపిస్తోందన్నారు. ఎన్నికల్లో ఎలాగైనా గెలిచితీరాలని చెప్పడం ద్వారా ముఖ్యమంత్రి ఎంత ఘోరంగా ప్రజాస్వామ్యాన్ని అవమానించారో స్పష్టంగా అర్థమవుతోందన్నారు. మంత్రిమండలిలో ముఖ్యమంత్రి చేసిన వ్యాఖ్యలను న్యాయస్థానాలు సుమోటాగా స్వీకరించి వెంటనే, ఆయనపై చట్టప్రకారం చర్యలు తీసుకోవాలని వర్ల విజ్ఞప్తి చేశారు. బాధ్యతాయుతమైన స్థానంలో ఉన్న వ్యక్తే అలా మాట్లాడితే, స్థానిక సంస్థల ఎన్నికలను ఆయన ప్రజాస్వామ్యహితంగా నిర్వహించడానికి సిద్ధంగా లేరని తేలిపోయిందన్నారు.

రాజ్యాంగం మీద ప్రమాణం చేసిన ముఖ్యమంత్రే, అరాచకం సృష్టించండి, ఎన్ని ప్రలోభాలైనా పెట్టండి, గెలుపే లక్ష్యంగా పనిచేయండంటే, న్యాయస్థానాలు తప్పనిసరిగా జోక్యం చేసుకోవాల్సిందేనన్నారు. న్యాయస్థానాలు ముఖ్యమంత్రి వ్యాఖ్యలను సుమోటాగా స్వీకరించాలని, రాష్ట్ర ఎన్నికల కమిషనర్ కూడా సీఎం వ్యాఖ్యలను పరిగణనలోకి తీసుకోవాలని రామయ్య పత్రికాముఖంగా విజ్ఞప్తి చేశారు. ప్రజాస్వామ్యంలో గెలుపు ఓటములు సహజమనేది కూడా గ్రహించకుండా, బానిసలను ఆదేశించినట్లుగా జగన్మోహన్ రెడ్డి తన సహచర మంత్రులను, శాసనసభ్యులను ఆదేశించాడన్నారు. ఎన్నికల నిర్వహణ కోసం రాష్ట్రాన్ని ఐదుజోన్లుగా విభజించిన ప్రభుత్వం, అయిదుగురు ఇన్ ఛార్జ్ లను నియమించిందన్న వర్ల, ఉత్తరాంధ్రకు విజయసాయిరెడ్డి, ఉభయగోదావరి జిల్లాలకు వై.వి.సుబ్బారెడ్డి, కృష్ణా-గుంటూరుకు అయోధ్య రామిరెడ్డి, ప్రకాశం, నెల్లూరు, కర్నూలుకు వేమిరెడ్డి ప్రభాకర్ రెడ్డి, అనంతపురం,చిత్తూరు, కడపకు సజ్జల రామకృష్ణారెడ్డి లను నియమించారన్నారు. ప్రభుత్వం నియమించిన ఐదుగురు నేతలు ఎందులో నిష్ణాతులో, పాలనలో వారికున్న అనుభవమేమిటో ముఖ్యమంత్రి చెప్పాలన్నారు. విజయసాయిరెడ్డి బెదిరింపుల్లో నిష్ణాతుడని, ఆయనెక్కడ అడుగుపెడితే అక్కడ ఎవరైనాసరే గజగజ వణకాల్సిందేనని, అదేవిధంగా వై.వి.సుబ్బారెడ్డి ప్రలోభాల్లో, ఎదుటివారిని మాయచేయడంలో నిష్ణాతుడని వర్ల పేర్కొన్నారు.

అయోధ్య రామిరెడ్డి, వేమిరెడ్డి ప్రభాకర్ రెడ్డి లు తన బలంతో, తమకున్న అధికార బలంతో ఎంతటి వారినైనా కొనుగోలు చేయడంలో మంచి సిద్ధహస్తులని, చివరిగా చెప్పుకోవాల్సింది సజ్జల గురించేనన్నారు. జగన్ కు చెందిన సాక్షి సంస్థకు చెందిన వాహనాల్లో డబ్బులు, మద్యం తరలించడం, పార్టీకి చెందిన సమాచార వ్యవస్థలను బలోపేతం చేయడంలో సజ్జలను మించినవారు లేరన్నారు. బలహీన వర్గాలకు న్యాయం చేస్తానంటున్న ముఖ్యమంత్రి, ఎన్నికల నిర్వహణ భారం మొత్తం ఐదుగురు పెద్దరెడ్లకే అప్పగించడంలోని ఆంతర్యమేమిటో ఇప్పటికైనా రాష్ట్ర ప్రజలంతా గమనించాలని రామయ్య హితవుపలికారు. తనచర్యలతో మిగతా వర్గాలు పనికిరారని జగన్ చెప్పకనే చెప్పాడన్నారు. ప్రజాస్వామ్యాన్ని ఖూనీ చేస్తున్న ముఖ్యమంత్రి, ఇప్పటికైనా కళ్లు తెరిచి ఆలోచించాలని, పాలనాయంత్రాంగం మొత్తం సీఎం ఆదేశాలను పట్టించుకోకుండా, ప్రజాస్వామ్యబద్ధంగా, నియమనిబంధనల ప్రకారమే నడుచుకోవాలని వర్ల విజ్ఞప్తి చేశారు.