news

జగన్‌ అక్రమాస్తుల కేసుల్లో, ఒక కేసు అయిన వాన్పిక్ కేసులో, A3 నిందితుడు నిమ్మగడ్డ ప్రసాద్‌ను సెర్బియా పోలీసులు అరెస్ట్ చేసిన సంగతి తెలిసిందే. ఆయన సెర్బియా దేశానికి విహార యాత్రకు వెళ్ళిన సందర్భంలో, ఆయాన ఎయిర్ పోర్ట్ లో దిగగానే, ఇంటర్ పోల్ సాయంతో, అక్కడి పోలీసులు, నిమ్మగడ్డను అరెస్ట్ చేసారు. అయితే నిమ్మగడ్డ అరెస్ట్ వార్తా తెలిసిన వెంటనే, వైసీపీ అలెర్ట్ అయ్యింది. నిమ్మగడ్డ వేరే దేశంలో అరెస్ట్ కావటం, తమ అధినేత ఆ వాన్పిక్ కేసులో A1 నిందితుడుగా ఉండటంతో, ఎక్కడ ఏమి జరుగుతుందో అని భావించి, ముందుగా నిమ్మగడ్డను భారత దేశం రప్పించే ప్రయత్నాలు ప్రారంభించారు. అందుకు ముందుగా మన దేశం సపోర్ట్ చాలా అవసరం. అందుకే, ఈ విషయాన్ని వెంటనే కేంద్రానికి చెప్పి, తమకు అనుకూలంగా ఉన్న కేంద్ర ప్రభుత్వం చేత, నిమ్మగడ్డను మన దేశానికి రప్పించ వచ్చు అని అనుకున్నారు.

అనుకున్నదే ఆలస్యం, బాగా పవర్ ఉంటుందని, వైసీపీకి ఉన్న 22 ఎంపీల చేత కేంద్రానికి లేఖ రాయించారు. కేంద్రమంత్రి జైశంకర్‌ కు 22 మంది ఎంపీలు లేఖ రాసి, ఆయన్ను వెళ్లి కలిసి మరీ పరిస్థితి వివరించారు. నిమ్మగడ్డను ఎలా అయినా మన దేశం తీసుకు రావాలని, దానికి సంబందించిన చొరవ కేంద్రం తరపున చెయ్యాలని, ఈ 22 మంది వైసిపీ ఎంపీలు, కేంద్ర విదేశాంగ మంత్రి జైశంకర్‌కు వినతిపత్రం సమర్పించారు. ఆయన్ను అరెస్ట్ చేసిన కేసులో అసలు ఆధారాలు లేవని, సెర్బియా పోలీసులు అత్యుత్సాహంతో అరెస్ట్ చేసారని, సెర్బియాలోని భారత రాయబార కార్యాలయం ద్వారా చర్యలు చేసుకోవాలని విజ్ఞప్తి చేశారు. అయితే దీని పై మాత్రం, కేంద్రమంత్రి జైశంకర్‌ వేరే విధంగా స్పందించినట్టు సమాచారం. ఇలాంటి విషయాల్లో కేంద్రం జోక్యం ఉండదని తేల్చి చెప్పారు.

అది సివిల్‌ వివాదమని, అందువల్ల కేంద్ర ప్రభుత్వం ఏమీ చేయలేదని కేంద్ర మంత్రి, వైసీపీ ఎంపీలకు తేల్చి చెప్పారు. అయితే మీరు ఆ వ్యక్తిని జైల్లో కలవాలి అంటే, కేంద్రం దానికి తగ్గ ఏర్పాట్లు చేస్తుంది కాని, మా వ్యక్తిని అరెస్ట్ చేసారు, విడిచి పెట్టండి అని మేము అడగం అని, కేంద్రం తరుపున తేల్చి చెప్పారు. దీంతో చేసేది ఏమి లేక, ఎంపీలు తిరిగి వచ్చి, విషయం విజయసాయి రెడ్డికి వివరించారు. విజయసాయి రెడ్డికి, పిఎంఓలో డైరెక్ట్ ఎంట్రీ ఉంటుంది కాబట్టి, ఆయన అటు నుంచి ఏమైనా చేస్తారా అనేది తెలియాల్సి ఉంది. అయినా విదేశాల్లో ఒకసారి అరెస్ట్ చేసారు అంటే, ఆధారాలు లేకుండా అరెస్ట్ చెయ్యరు. అరెస్ట్ చేసిన తరువాత, ఇష్టం వచ్చినట్టు విడిచి పెట్టరు. అందులోను ఇది రస్‌ అల్‌ ఖైమా దేశం ఇచ్చిన ఫిర్యాదు. మరి నిమ్మగడ్డను, వైసీపీ నేతలు, ఎలా మన దేశానికి తీసుకు వస్తారో చూడాలి.

ఈ రోజు జగన్ మోహన్ రెడ్డి కుటుంబంతో పాటు జెరుసలేం పర్యటనకు వెళ్తున్న సంగతి తెలిసిందే. ఇందు కోసం ప్రత్యెక విమానంలో గన్నవరం నుంచి హైదరాబాద్ వెళ్లారు జగన్. అయితే ముందుగా ఎక్కడా లీక్లు ఇవ్వకుండా, ఈ రోజు హైదరాబాద్ వెళ్ళటంతోనే, అటు తెలంగాణా గవర్నర్ నరసింహన్ ను, మరో పక్క తెలంగాణా ముఖ్యమంత్రి కేసీఆర్ తో జగన్ భేటీ కావటం ఆసక్తి రేపుతుంది. ముందుగా జగన్ మోహన్ రెడ్డి, తెలంగాణా గవర్నర్ తో భేటీ అయ్యారు. ఈ భేటీ దాడుపుగా గంటకు పైగా సాగింది. ఇది ఇలా ఉంటే, కొత్త గవర్నర్ రాక ముందు, నరసింహన్ షడ్యుల్ లో లేకపోయినా, కేవలం జగన్ ను కలవటం కోసం, హైదరాబాద్ నుంచి విజయవాడ వచ్చారు. ఇలా ఇంతకు ముందు ఎప్పుడూ జరగలేదు. అయితే ఈ భేటీల పై వైసీపీ స్పష్టత ఇచ్చింది.

కేవలం ఏపి, తెలంగాణా సమస్యల పరిష్కారం కోసమే, కలిసారు అంటూ చెప్తున్నారు. అయితే గవర్నర్ తో గంట సేపు భేటీ అయిపోగానే, జగన్ మోహన్ రెడ్డి, మళ్ళీ కేసిఆర్ వద్దకు వెళ్లారు. ప్రగతి భవన్ కు చేరుకొని, కేసీఆర్ తో చర్చలు జరిపారు. అయితే ఈ భేటీలో విభజన అంశాలతో పాటు, గోదావరి పై కట్టే ప్రాజెక్ట్ విషయం పై చర్చించినట్టు, వైసిపీ వర్గాలు చెప్తున్నాయి. ఈ నెల 8 న కేంద్రం, ఇరు రాష్ట్రాలతో కలిపి, విభజన అంశం పై మీటింగ్ పెట్టిందని, ఆ విషయాలు అన్నీ చర్చించటానికి జగన్ మోహన్ రెడ్డి, ఈ రోజ కేసిఆర్ ని, గవర్నర్ ను కలిసారని, వైసీపీ వర్గాలు చెప్తున్నాయి. అంతకు మించి, దీంట్లో మరే ఉద్దేశం లేదని, రాజకీయ చర్చలు అసలు లేవని చెప్తున్నారు. అయితే, సహజంగా, ఇద్దరూ సియంలు కలుస్తున్నారు అంటే, ముందే సమాచారం ఉంటుంది.

ముందుగానే మీడియా ఊదరగొడుతుంది. అయితే ఈ రోజు మాత్రం, జగన్ మోహన్ రెడ్డి సడన్ గా వెళ్లి కలిసారు. దీంట్లో రాజకీయ కోణం లేకపోలేదని విశ్లేషకులు భావిస్తున్నారు. బీజేపీ, కేసిఆర్ ను టార్గెట్ చెయ్యటం, అటు ఆంధ్రాలో కూడా జగన్ పై విమర్శలు ఎక్కు పెట్టటం, మరో పక్క విద్యుత్ పై లెటర్ అఫ్ క్రెడిట్ ఇవ్వమని రాష్ట్రాలని అడుగుతూ ఇబ్బంది పెట్టటం, రాష్ట్రాల హక్కులన్నీ నెమ్మదిగా ఢిల్లీలోనే ఉంచుకోవాటం, ఇలా వీటి పై చర్చించారని, బీజేపీ దూకుడికి ఎలా కళ్ళెం వెయ్యాలి, తెలుగు రాష్ట్రాల్లో బీజేపీ ఎదగకుండా ఎలా చెయ్యాలి అనే రాజకీయ చర్చలు కూడా ప్రముఖంగా జరిగినట్టు తెలుస్తుంది. మొత్తానికి ఈ రోజు సాయంత్రం జగన్, తన కుటుంబ సభ్యులతో కలిసి నాలుగు రోజులు జెరూసలేం పర్యటనకు వెళ్తున్న సమయంలో, ఈ ప్రయాణానికి ముందే తెలంగాణ గవర్నర్, సీఎంతో జగన్ భేటీ కావడంతో రెండు రాష్ట్రాల్లో చర్చనీయాంశమైంది.

జగన్ మోహన్ రెడ్డి గారు మొన్న జరిగిన కల్లెక్టర్స్ కాన్ఫరెన్స్, ఎస్పీల కాన్ఫరెన్స్ లో, ప్రజలు మన వద్దకు వస్తే, చిరు నవ్వుతో పలకరించాలి, వాళ్ళ సమస్యలను నవ్వుతూనే పరిష్కరించాలి అని చెప్పిన సంగతి తెలిసిందే. అయితే, వాస్తవంలో మాత్రం, అందుకు భిన్నంగా పరిస్థితులు జరుగుతున్నాయి. ముఖ్యంగా పోలీసుల, ఆందోళన చేస్తున్న వారి పై, ఈ మధ్య కాలంలో, తీవ్రంగా స్పందిస్తున్నారు. మొన్నటి మొన్న తమ ఉద్యోగ భద్రత ఇవ్వాలి అని ఆందోళన చేసిన కాంట్రాక్టు ఉద్యోగులుని, ఆడవాళ్ళు అని కూడా చూడకుండా, లాగి అవతల పడేసి అరెస్ట్ చెయ్యటం చూసాం. ప్రతి రోజు ఎదో ఒక ఆందోళన జరుగుతూ ఉండటం, వారి పై పోలీసుల దురుసు ప్రవర్తన చూస్తూనే ఉన్నాం. జగన్ మోహన్ రెడ్డి గారు చెప్పే దానికి, గ్రౌండ్ లో జరుగుతున్న వాటికి ఇంత తేడా ఉంది.

అయితే ఈ రోజు రైతుల పై పోలీసులు ప్రవర్తించిన తీరు, విమర్శలకు దారి తీస్తుంది. వారి ఆందోళన అర్ధం చేసుకోవాలి, లేకపోతే చర్చల ద్వారా పరిష్కారం చెయ్యాలి, ఇలా బట్టలు ఊదిపోయేలా ఈడ్చుకురావటం పై విమర్శలు వస్తున్నాయి. రైతన్నల ప్రభుత్వం అని చెప్పుకునే వైసిపీ పార్టీ, దీని పై సమాధానం చెప్పాలని తెలుగుదేశం పార్టీ డిమాండ్ చేస్తుంది. వివరాల్లోకి వెళ్తే, కృష్ణా జిల్లా నందిగామ మండలం కేతవీరునిపాడులో ఈ రోజు తీవ్ర ఉద్రిక్త పరిస్థితులు కనిపించాయి. రైతులను పోలీసులు అరెస్ట్ చేసిన తీరుతో అందరూ షాక్ అయ్యారు. విద్యుత్ అధికారులకు వ్యతిరేకంగా ఆందోళన చేస్తున్న రైతులను, పోలీసులు ఈడ్చుకు వెళ్ళి, జీప్ లో పడేసారు. తరువాత వారిని అరెస్ట్ చేసారు. అరెస్ట్ చేసిన రైతులను పోలీస్ స్టేషన్ కు తరలించారు.

పవర్ గ్రిడ్ నిర్మాణం కోసం, అక్కడ రైతులతో ఒప్పందాలు జరిగాయి. అయితే ఇప్పటి వరకు, రైతులకు ఇస్తాను అన్న పరిహారం మాత్రం ఇవ్వలేదు. ఈ నేపధ్యంలోనే రైతుల పొలాల్లో, ఈ రోజు విద్యుత్ అధికారులు వచ్చి, పనులు చేపట్టారు. మాకు రావాల్సిన పరిహారం ఇంకా రాలేదని, అది ఇవ్వకుండా ఎలా పనులు చేస్తారు అంటూ, రైతులు తీవ్ర నిరసన వ్యక్తం చేసారు. రైతుల మాటలు పట్టించుకోకుండా, గత వారం రోజులుగా విద్యుత అధికారులు వచ్చి పనులు చేస్తున్నారు. దీంతో గురువారం రైతులు తీవ్ర ఆందోళన చేసారు. పరిహారం ఇస్తేనే పనులు చెయ్యనిస్తాం అని ఆందోళన బాట పట్టారు. దీంతో అక్కడ అధికారులు, పోలీసులకు సమాచారం ఇవ్వటంతో, పోలీసులు వచ్చి, రైతులను ఈడ్చుకుంటూ తీసుకువెళ్ళి జీప్ ఎక్కించారు. ఈ తరుణంలో రైతుల ఒంటి మీద బట్టలు కూడా ఊడిపోయాయి. ఈ చర్య పై సర్వత్రా విమర్శలు వస్తున్నాయి. ఎంపీ కేశినేని కూడా ఈ చర్యను ఖండించారు. చర్చల ద్వారా అయ్యే సమస్యను, రైతన్నల అరెస్ట్ దాకా తీసుకువెళ్తున్నారని ఆరోపణలు వస్తున్నాయి.