వారం క్రితం జగన్ ప్రమాణస్వీకారానికి అసలు ఖర్చే అవ్వలేదు అంటూ, చేసిన హడావిడి చూసాం. 29 లక్షలు అడ్వాన్స్ ఖర్చుగా ఇచ్చిన జీఓ చూపించి, మొత్తం ఖర్చు 29 లక్షలు మాత్రమే అని హడావిడి చేసారు. అయితే దీని పై ఎవరి వాదన వారిది ఉన్నా, జగన్ కేవలం 29 లక్షలు మాత్రమే ఖర్చు చేసారంటూ, ప్రాచుర్యం పొందింది. ఇది ఇలా ఉంటే, నిన్న జగన్ మోహన్ రెడ్డి, ప్రభుత్వం తరుపున ఇచ్చిన ఇఫ్తార్ విందు ఖర్చు చూసి, అందరూ అవాక్కయ్యారు. తెలుగు మీడియా ఈ విషయం గురించి ప్రస్తావన చెయ్యకపోయినా, జాతీయ మీడియా ఈ విషయం పై జగన్ మోహన్ రెడ్డిని ప్రశ్నించింది. కేవలం 6 వేల మందికి ఇఫ్తార్ విందు అని చెప్పి, అక్షరాల కోటి రూపాయలు ఖర్చు చేసారని, ఇంత దుబారా ఖర్చు ఎందుకు అయ్యింది అంటూ, జాతీయ మీడియా ప్రశ్నించింది.
ఇదే విషయం పై బీజేపీ కూడా దాడి ప్రారంభించింది. జగన్ నిన్న గుంటూరులో ఏర్పాటు చేసిన ఇఫ్తార్ విందుపై విమర్శలు వస్తున్నాయి. జగన్ తన ప్రమాణస్వీకారానికి రూ.29 లక్షలు మాత్రమే ఖర్చుగా చూపారని, అంతకంటే తక్కువ సంఖ్యలో ప్రజలు హాజరైన ఇఫ్తార్ విందుకు మాత్రం రూ.1.1 కోట్లు ఖర్చుగా చూపడం ఏంటని ఇప్పటికే విపరీతంగా ప్రచారం జరుగుతోంది. దీనిపై బీజేపీ నేత జీవీఎల్ నరసింహారావు స్పందించారు. భారతదేశం లౌకికవాద దేశమని, ఇలాంటి దేశంలో ప్రత్యేకంగా ఓ మతపరమైన కార్యక్రమాన్ని ప్రభుత్వ ఖర్చుతో నిర్వహించడం సరైన విధానం కాదని విమర్శించారు. మున్ముందు జగన్ ఇలాంటి నిర్ణయాలు తీసుకోరనే భావిస్తున్నామని స్పష్టం చేశారు. ఏపీ రెవెన్యూ లోటు ఉన్న రాష్ట్రం అని, గత సీఎం చంద్రబాబు పోరాటాలు, ధర్నాలను సైతం విలాసవంతంగా మార్చేసి ఖజానాకు గండికొట్టారని ఆరోపించారు. ఇప్పుడు జగన్ ఆయన బాటలో నడవరనే ఆశిస్తున్నానని జీవీఎల్ ట్వీట్ చేశారు.
