news

రాష్ట్ర ఎన్నికల ప్రధానాధికారి గోపాలకృష్ణ ద్వివేదితో రాజంపేట వైసీపీ ఎంపీ అభ్యర్థి మిథున్‌రెడ్డి రహస్య మంతనాలు నిర్వహించా రు. వీరిద్దరే దాదాపు గంటసేపు శనివారం సమావేశం అ య్యారు. దీంతో మిథున్‌రెడ్డి సీఈవోతో ఏం చర్చించారు? ఎవరిపైనైనా ఫిర్యాదు చేశారా? అనే విషయాలేవీ బయటకు తెలియలేదు. వైసీపీకి చెందిన మరో నేత తలసిల రఘురామ్‌తో కలిసి సచివాలయంలోని రాష్ట్ర ఎన్నికల ప్రధానాధికారి కార్యాలయానికి మిథున్‌రెడ్డి వచ్చారు. రఘురామ్‌ బయటే ఉండిపోగా.. మిథున్‌రెడ్డి ఒక్కరే సీఈవో గదిలోకి వెళ్లి.. గంట తర్వాత వచ్చారు. మీడియాకు ఏమి చెప్పకుండానే కారెక్కి వెళ్లిపోయారు.

ఎన్నికల ప్రక్రియ మొదలైన నాటి నుంచీ వైసీపీతోపాటు వివిధ పార్టీల నాయకులు సీఈవోను కలిశారు. ఎందుకు కలుస్తున్నదీ మీడియాకు వెల్లడించారు. ఫిర్యాదు లు, వినతిపత్రాలు ద్వివేదికి అందజేస్తూ వాటి తాలూకా ఫొ టోలు, వీడియోలను మీడియాకు విడుదల చేసేవారు. సీఈ వో ఆఫీసు నుంచి బయటకొచ్చిన తర్వాత ఎందుకు కలిసిందీ? ఏమని ఫిర్యాదు చేసిందీ అక్కడున్న విలేకరులకు చెప్పేవారు. వీటన్నింటికీ భిన్నంగా మిథున్‌రెడ్డి, సీఈవోల భే టీ సాగింది. ఓట్ల లెక్కింపునకు ఇంకా 20రోజులకు పైగా సమయం ఉంది. ఇలాంటి తరుణంలో మిథున్‌రెడ్డి రాష్ట్ర ఎన్నికల ప్రధానాధికారితో ఏకాంత చర్చల మర్మం ఏమిటో అంతుచిక్కని ప్రశ్నగా మారింది.

పశ్చిమబెంగాల్ సీఎం మమతా బెనర్జీ బీజేపీపై తీవ్ర విమర్శలు చేశారు. ఈ లోక్ సభ ఎన్నికల్లో కాషాయదళానికి కనీసం 80 స్థానాలు కూడా రావని ఎద్దేవా చేశారు. ఆంధ్రప్రదేశ్, తమిళనాడు, పంజాబ్, కేరళ, పశ్చిమ బెంగాల్, ఒడిశా రాష్ట్రాల్లో ఆ పార్టీకి ఒక్క సీటు కూడా దక్కదని స్పష్టం చేశారు. గుజరాత్, రాజస్థాన్ వంటి రాష్ట్రాల్లో కూడా ఓట్లు చీలిపోతాయని అన్నారు. అంతేకాకుండా 440 వోల్టుల విద్యుత్ ఎంత ప్రమాదకరమో, బీజేపీ కూడా అంతే ప్రమాదకరం అని వ్యాఖ్యానించారు. బీజేపీ దేశానికి అతిపెద్ద ముప్పు అని అభివర్ణించారు. అందుకే ప్రజలు ఆ పార్టీకి దూరంగా ఉండాలని, పొరబాటున కూడా ఆ పార్టీకి మద్దతుగా ఓటేయవద్దని విజ్ఞప్తి చేశారు.

అయితే తృణమూల్ కాంగ్రెస్ పార్టీ అధికారంలోకి వస్తే మాత్రం దేశానికి ఎలాంటి నష్టం ఉండదని, ఆ మేరకు తాను హామీ ఇస్తానని అన్నారు. హుగ్లీ జిల్లాలోని పండువాలో ఏర్పాటు చేసిన ఎన్నికల సభలో మమత మాట్లాడుతూ పై వ్యాఖ్యలు చేశారు. "బీజేపీ, మోదీ రెండోసారి అధికారంలోకి వస్తే దేశాన్ని భ్రష్టు పట్టిస్తారు. ఆ పార్టీ నిండా నిరక్షరాస్యులే. వాళ్ల నుంచి మనం ఏం ఆశిస్తాం చెప్పండి!" అంటూ విమర్శించారు. మోదీ హయాంలో దేశంలో ఘర్షణలు, కల్లోలాలు విపరీతంగా జరిగాయని మమతా బెనర్జీ తీవ్ర ఆగ్రహం వ్యక్తం చేశారు.

మమతా బెనర్జీ తనకు ఏటా మిఠాయిలు పంపుతారని ప్రధాని మోదీ పేర్కొనడంపై దీదీ భిన్నంగా స్పందించారు. తాను ప్రధాని మోదీకి బెంగాల్ రసగుల్లాలు పంపుతుంటానని, లడ్డూలో జీడిపప్పు, ఎండు ద్రాక్ష వాడినట్టుగా ఈసారి ఆ మిఠాయిల్లో ఇసుక, గులకరాళ్లు ఉండేలా చూస్తానని.. దీంతో ఆయన పళ్లు ఊడటం ఖాయమన్నారు. గతవారం ఇదే పట్టణంలో జరిగిన ఎన్నికల ప్రచారంలో ప్రసంగించిన మోదీ ప్రధాని పదవికి వేలం వేయరని మమతపై చురకలు వేయడం.. అలాగే ఓ ఇంటర్వ్యూలో మమతా బెనర్జీ తనకు ఏటా బహుమతులు, రెండు కుర్తాలు పంపుతుంటారని చెప్పడంతో దీదీ ఇలా స్పందించారు.

రాజకీయాల్లో మళ్లీ క్రియాశీలకంగా వ్యవహరిస్తున్న సినీ నటి, కాంగ్రెస్ నేత విజయశాంతి ఫెడరల్ ఫ్రంట్ విషయంలో వైసీపీ అధినేత జగన్ మోహన్ రెడ్డిని నిలదీశారు. కేసీఆర్ ప్రతిపాదించిన ఫెడరల్ ఫ్రంట్ కు జగన్ మద్దతిస్తున్నట్టు చెబుతున్నారని, కానీ, ఆయన ఏ కోణంలో మద్దతిస్తున్నారో చెప్పాలని కోరారు. 'వైసీపీ శాసనసభ్యులు టీడీపీలో చేరేలా అసెంబ్లీ స్పీకర్ ప్రోత్సహించాడంటూ రెండేళ్ల పాటు ఏపీ అసెంబ్లీని బహిష్కరించారు. మరి, తెలంగాణలో కేసీఆర్ కాంగ్రెస్ ఎమ్మెల్యేల ఫిరాయింపులను ప్రోత్సహిస్తున్నారు. అలాంటి వ్యక్తి ప్రతిపాదిస్తున్న ఫెడరల్ ఫ్రంట్ కు జగన్ మద్దతు ప్రకటించడం ఏమైనా న్యాయమా? ఏపీలో తప్పయిన ఫిరాయింపులు తెలంగాణలో ఏ విధంగా ఒప్పవుతాయో జగన్ చెప్పాలి.

కేసీఆర్ కాంగ్రెస్ ఎమ్మెల్యేలను ప్రలోభాలకు గురిచేయడంపై జగన్ అభిప్రాయం ఏంటో వివరించాలి' అంటూ విజయశాంతి ఫేస్ బుక్ లో పోస్టు పెట్టారు. అయితే, దీనిపై ఇటు వైసీపీ నేతలు కానీ, అటు టీఆర్ఎస్ నేతలు కానీ ఎవరూ స్పందించలేదు. రాములమ్మ ఫేస్‌బుక్ పోస్ట్ యథావిథిగా... " కేసీఆర్ ప్రతిపాదించిన ఫెడరల్ ఫ్రంట్‌కు మద్దతిస్తామని వైసీపీ అధినేత జగన్ గారు చెబుతున్నారు. ఈ సందర్భంగా నేను జగన్ గారిని అడిగేది ఒకటే... వైసీపీ ఎమ్మెల్యేలను టీడీపీలో చేరేందుకు ఏపీ అసెంబ్లీ స్పీకర్ ప్రోత్సహించారనే కారణంతో గత రెండేళ్ల పాటూ అసెంబ్లీ సమావేశాలను వైసీపీ ఎమ్మెల్యేలంతా బహిష్కరించారు. ఏపీలో పార్టీల ఫిరాయింపుపై తిరుగుబాటు చేస్తూ,"

"తెలంగాణలో కాంగ్రెస్ ఎమ్మెల్యేలను పార్టీ మారేందుకు ప్రలోభాలు పెడుతున్న కేసీఆర్ గారితో కలిసి, జాతీయ స్ధాయిలో ఫెడరల్ ఫ్రంట్ ఏర్పాటు చేయాలని జగన్ గారు ప్రయత్నించడం ఎంతవరకు సమంజసం. ఏపీలో తప్పైతే తెలంగాణలో ఎలా ఒప్పవుతుందో జగన్ గారు వివరణనివ్వాలి. కేసీఆర్ గారు కాంగ్రెస్ ఎమ్మెల్యేలను ప్రలోభ పెట్టడం జగన్ గారి దృష్టిలో తప్పా, ఒప్పా సమాధానం చెప్పాల్సిన అవసరం ఉంది" అని విజయశాంతి చెప్పుకొచ్చారు. అయితే రాములక్క వ్యాఖ్యలపై టీఆర్ఎస్, వైసీపీ నేతల నుంచి ఎలాంటి స్పందన వస్తుందో వేచి చూడాల్సిందే మరి.