news

ఏపీ ముఖ్యమంత్రి చంద్రబాబు తాజాగా సీఎస్ ఎల్వి సుబ్రహ్మణ్యానికి లేఖ రాసారు. ఇటీవల ఒక పత్రికకు సీఎస్ ఇచ్చిన ఇంటర్వ్యూ గురించి వివరణ కోరుతూ చంద్రబాబు ఈ లేఖ రాసారు. 'అధికారాలు లేని సీఎం' అని సీఎస్ ఒక ఇంటర్వ్యూలో ముఖ్యమంత్రిని సంబోధించారు. ఎన్నికల కోడ్ అమల్లో ఉన్నప్పుడు సీఎం అధికారాలు ఏంటో చెప్పే పని సీఎస్ ది కాదని చంద్రబాబు వ్యాఖ్యానించారు. సీఎస్ చేసిన వ్యాఖ్యలు తనకు బాధ కలిగించాయని చంద్రబాబు తెలిపారు. ఒక ఆంగ్ల పత్రికలో ప్రముఖంగా ప్రచురితమైన ఆ వార్తా కథనాన్ని కూడా తన లేఖకు జత చేశారు. ‘‘ఒక ముఖ్యమంత్రి పట్ల మీరు వాడిన భాష అభ్యంతరకంగా ఉంది. అఖిల భారత సర్వీసు అధికారుల ప్రవర్తనా నియమావళిని కూడా ఉల్లంఘించినట్లుగా ఉంది. "

"మీరు హుందా, గౌరవాన్ని పాటించలేదు. ఈ వార్తలో ప్రచురితమైనట్లుగా ఉన్న వ్యాఖ్యలు మీరు చేశారా! దీనిపై మీ వివరణ ఏమిటి?’’ అని ఎల్వీ సుబ్రమణ్యంను ముఖ్యమంత్రి చంద్రబాబు తన లేఖలో ప్రశ్నించారు. సీఎస్‌ వ్యాఖ్యలు అభ్యంతరకంగా ఉన్నాయని, చాలా తీవ్రమైనవని కొందరు సీనియర్‌ మంత్రులు, అధికారులు అభిప్రాయపడ్డారు. దీనిపై ముఖ్యమంత్రి వద్ద కూడా కొంత చర్చ జరిగింది. ఈ నేపథ్యంలో ఎల్వీ వివరణ కోరుతూ ముఖ్యమంత్రి లేఖ రాశారు. ‘‘ప్రభుత్వ ప్రధాన కార్యదర్శిని ముఖ్యమంత్రి నియమిస్తారు. తన విధులు, బాధ్యతల నిర్వహణలో ప్రధాన కార్యదర్శి సంబంధిత అంశాలను సీఎంకు నివేదిస్తారు. ప్రభుత్వ అధిపతి ముఖ్యమంత్రి. ఆయనకు అధికారాలు ఉన్నాయో లేవో వ్యాఖ్యానించే అధికారం ప్రధాన కార్యదర్శికి లేదు. ఎన్నికల కోడ్‌ అమల్లో ఉన్న సమయంలో సీఎంకు ఏ మేరకు అధికారాలుంటాయో భాష్యం చెప్పే పని సీఎ్‌సది కాదు. ఆ విషయంలో ఏదైనా సందిగ్ధత ఉంటే ఎన్నికల కమిషన్‌ తన వివరణ ఇస్తుంది తప్ప సీఎస్‌ కాదు’’ అని సీఎం వద్ద జరిగిన చర్చలో అభిప్రాయపడ్డారు.

ఎల్వీ తన పరిధిని అతిక్రమించారన్న అభిప్రాయం వ్యక్తం కావడంతో నేరుగా ఆయనకు దీనిపై లేఖ రాయాలని ముఖ్యమంత్రి నిర్ణయించారు. ప్రధాన కార్యదర్శిని సంజాయిషీ కోరుతున్నట్లు కాకుండా వివరణ కోరుతున్నట్లుగా రాసినట్లు సమాచారం. ‘‘ముఖ్యమంత్రికి అధికారాలు లేవని మీరు చెప్పినట్లుగా ఒక పత్రికలో వచ్చిన మీ ఇంటర్వ్యూ చూశాను. మీ వ్యాఖ్యలు నాకు బాధ కలిగించాయి. ప్రజాస్వామిక ప్రభుత్వాలు కొన్ని నియమ నిబంధనలు, రాజ్యాంగ సంప్రదాయాల ప్రకారం పనిచేస్తాయి. ఎన్నికల కోడ్‌ ఈ ఒక్క రాష్ట్రంలోనే కాకుండా మొత్తం దేశమంతా అమల్లో ఉంది. అన్ని చోట్లా ఒకటే కోడ్‌ అమల్లో ఉంటుంది తప్ప రాష్ట్రానికో రకంగా ఉండదు. మరే రాష్ట్రంలోనూ అధికారులు ఇటువంటి వ్యాఖ్యలు చేయడం లేదు. ఇక్కడ మీరిలా ఎందుకు మాట్లాడారో వివరణ ఇవ్వండి’’ అని ఆ లేఖలో సీఎం కోరినట్లు చెబుతున్నారు.

ఎలక్షన్ కమిషన్ నియమించిన ఆంధ్రప్రదేశ్‌ ప్రభుత్వ చీఫ్ సెక్రటరీ ఎల్వీ సుబ్రమణ్యం పై, జగన్ కేసుల్లో సీబీఐ సుప్రీం కోర్టును ఆశ్రయించింది. ఏపి ప్రతిపక్ష నాయకుడు వైఎస్‌ జగన్‌ అక్రమాస్తులకు సంబంధించిన ఎమ్మార్‌ ప్రాపర్టీస్‌ కేసు నుంచి ఎల్వీ సుబ్రమణ్యంని తప్పిస్తూ ఏపి ఉమ్మడి హైకోర్టు ఇచ్చిన ఆదేశాలను నిలిపి వేయాలని కోరింది. జగన్ పన్నిన ఈ కుట్రలో ఎల్వీ సుబ్రమణ్యం కూడా భాగస్వామి అని నిరూపించేందుకు స్పష్టమైన డాక్యుమెంట్లు, ఇతర ఆధారాలు తమ వద్ద ఉన్నాయాని తెలిపింది. జగన్ కు లబ్ది చేకూరుస్తూ, ఎల్వీ తీసుకున్న చర్యలతో ఏపీఐఐసీ పై తీవ్ర ఆర్థికభారం పడిందని సీబీఐ పేర్కొంది. అవినీతి నిరోధక చట్టం-1998 కింద ఆయనను విచారించేందుకు కేంద్రం నుంచి అనుమతి తీసుకున్నామని, ఎమ్మార్‌ కుట్రలో ఆయన పాత్రను నిరూపించే స్పష్టమైన ఆధారాలను కోర్టులో సమర్పించిన తర్వాత హైకోర్టులో క్వాష్‌ పిటిషన్‌ దాఖలు చేశారని వివరించింది. ఈ కేసు నుంచి ఎల్వీని తప్పించడం న్యాయ విరుద్ధమని సీబీఐ తెలిపింది. ఈ కేసు సుప్రీం కోర్ట్ లో, మే 10న విచారణకు రానున్నట్టు సమాచారం..

ఇదీ కేసు...ఉమ్మడి రాష్ట్ర ముఖ్యమంత్రిగా వైఎస్‌ ఉన్నప్పుడు... 2003 సెప్టెంబరు నుంచి 2005 మే దాకా ఎల్వీ సుబ్రమణ్యం పారిశ్రామిక మౌలిక సదుపాయాల కల్పనా సంస్థ (ఏపీఐఐసీ) వైస్‌ చైర్మన్‌, మేనేజింగ్‌ డైరెక్టర్‌గా పనిచేశారు. ఆ సమయంలో హైదరాబాద్‌ కేంద్రంగా ప్రభుత్వ-ప్రైవేటు భాగస్వామ్యంతో భారీ ప్రాజెక్టును చేపట్టారు. ఎమ్మార్‌ ప్రాపర్టీస్‌ కంపెనీతోపాటు మరి కొన్ని సంస్థలతో కలిసి ఏపీఐఐసీ దీన్ని చేపట్టేలా విధివిధానాలు రూపొందించారు. ఇదో భారీ హౌసింగ్‌ ప్రాజెక్టు. ప్లాట్లు, విల్లాలు, గోల్ఫ్‌కోర్సు, కన్వెన్షన్‌ సెంటర్ల నిర్మాణం వంటివి ఎన్నో ఇందులో భాగం. దీనికోసం స్పెషల్‌ పర్పస్‌ వెహికల్‌ (ఎస్‌పీవీ) ఏర్పాటు చేశారు. ఈ ప్రాజెక్టు అవసరమైన ప్రైవేటు భూమి సేకరణ ధర ఖరారు నుంచి ఒప్పందాలు, లీజు ఫీజుల నిర్ణయం, వాటాల ఖరారు, ఇతర నిబంధనల అమల్లో అనేక అవకతవకలు జరిగాయన్న ఆరోపణలపై సీబీఐ విచారణ జరిపింది.

ఇంటిగ్రేటెడ్‌ ప్రాజెక్టులో ఏపీఐఐసీని దగా చేశారని... ప్రైవేటు భాగస్వాములకు కోట్లరూపాయలు లాభం వచ్చేలా వ్యవహరించారని, ఇదంతా రహస్య నేరపూరిత కుట్ర మేరకు జరిగిందని సీబీఐ నిర్ధారించింది. 2011 ఆగస్టు 10న సీబీఐ కేసు నమోదు చేసిది.. ఇందులో ఎల్వీని 11వ నిందితుడిగా (ఏ-11) చేర్చింది. 2011 ఫిబ్రవరి ఒకటి నుంచి వరసగా చార్జిషీట్లు నమోదు చేసింది. అవినీతి నిరోధక చట్టం-1988 కింద ఎల్వీని విచారించేందుకు కేంద్ర ప్రభుత్వం నుంచి అనుమతి తీసుకుంది. అయితే, ఎల్వీ 2017లో హైకోర్టును ఆశ్రయించారు. తనపై సీఐబీ నమోదు చేసిన కేసునుంచి విముక్తి కల్పించాలని క్వాష్‌ పిటిషన్‌ దాఖలు చేశారు. ఈ పిటిషన్‌ను విచారించిన హైకోర్టు గత ఏడాది జనవరి 4న ఎల్వీకి ఈ కేసు నుంచి విముక్తి కల్పిస్తూ ఆదేశాలు జారీ చేసింది.

తిరుమల పై గత రెండు సంవత్సరాలుగా బీజేపీ చేస్తున్న కుట్ర, మనం చూస్తున్నాం. తమ స్వార్ధ రాజకీయం కోసం దేవుడితో ఆడుకోవటం, బీజేపీకి కొత్త కాదు. అయోధ్యలో చేసినట్టు, శబరిమలలో చేసినట్టు, మన రాష్ట్రంలో తిరుపతిని అడ్డం పెట్టుకుని చేద్దామని వాళ్ళు చేసిన ప్రయత్నాలు, ప్రతి సందర్భంలో ఫెయిల్ అవుతూనే ఉన్నాయి. ఇదే కోవలో, ఇప్పుడు బీజేపీకి మరో ఎదురు దెబ్బ తగిలింది. గత మూడేళ్లలో టీటీడీకి చెందిన ఖర్చులపై బయటి వ్యక్తులతో ఆడిట్ నిర్వహించేలా ఆదేశించాలని కోరుతూ హైకోర్టులో బీజేపీ నేత సుబ్రమణ్యస్వామి వ్యాజ్యం దాఖలు చేసిన విషయం తెలిసిందే. దీనిపై విచారణ చేపట్టిన తాత్కాలిక ప్రధాన న్యాయమూర్తి జస్టిస్ సి. ప్రవీణ్‌కుమార్, జస్టిస్ ఎం. సత్యనారాయణమూర్తిలతో కూడిన ధర్మాసనం మధ్యంతర ఉత్తర్వులివ్వాలన్న పిటిషనర్ అభ్యర్థనను శుక్రవారం తోసిపుచ్చింది.

అయితే, వేసవి సెలవుల తర్వాత ప్రధాన వ్యాజ్యంపై తుది విచారణ జరుపుతామని స్పష్టంచేసింది. ఈ వ్యాజ్యం వేసవి సెలవులపై విచారణకు వచ్చేలా చర్యలు తీసుకోవాలని హైకోర్టు రిజిస్ట్రీని ధర్మాసనం ఆదేశించింది. టీటీడీ, తిరుచానూరు పద్మావతి దేవితో పాటు మరో 11 ఆలయాలపై ప్రభుత్వ నియంత్రణను తప్పించాలని సుబ్రహ్మణ్య స్వామి, ఢిల్లీకి చెందిన సత్యపాల్‌ సభర్వాల్‌ హైకోర్టులో ప్రజాహిత వ్యాజ్యం దాఖలు చేశారు. ఆలయాలపై ప్రభుత్వానికి అధికారాన్ని కల్పించే హిందూ ధార్మిక సంస్థల, దేవాదాయ చట్టంలోని పలు సెక్షన్లను రద్దు చేయాలని వీరు కోరారు. టీటీడీలో గత మూడేళ్ల ఖర్చులపై బయటి వ్యక్తులతో ఆడిట్‌ నిర్వహణకు ఆదేశిస్తూ మధ్యంతర ఉత్తర్వులు ఇవ్వాలని సుబ్రహ్మణ్యస్వామి ఇటీవల హైకోర్టులో వాదనలు వినిపించారు.

టీటీడీని ఏపీ ప్రభుత్వ ఆధీనం నుంచి తప్పించాలంటూ గత సెప్టెంబరులో సుబ్రమణ్యస్వామి సుప్రీంకోర్టును ఆశ్రయించగా, అక్కడ చుక్కెదురయ్యింది. టీటీడీ స్థానిక చట్టాల ఆధారంగా పనిచేస్తోంది కాబట్టి ..ఈ వ్యవహారంలో తాము జోక్యం చేసుకోలేమని సుప్రీం ధర్మాసనం స్పష్టం చేసింది. ఈ కేసు విషయంలో హైకోర్టును ఆశ్రయిస్తే తమకు ఎలాంటి అభ్యంతరం లేదని ధర్మాసనం పేర్కొంది. దీంతో ఆయన హైకోర్టులో పిటిషన్ దాఖలు చేశారు. టీటీడీలో భారీగా అక్రమాలు జరిగాయని, వాటిని వెలికి తీసేందుకు గత మూడేళ్లలో జమాఖర్చులపై బయటి వ్యక్తులతో ఆడిట్‌ చేయించేలా మధ్యంతర ఉత్తర్వులు ఇవ్వాలంటూ ఇటీవల సుబ్రమణ్యస్వామి అనుబంధ పిటిషన్‌ దాఖలు చేశారు.