news

కేంద్ర ఎన్నికల సంఘం చేసే ప్రతి బదిలీకి కారణాలు చెప్పలేమని రాష్ట్ర ఎన్నికల ప్రధానాధికారి గోపాలకృష్ణ ద్వివేది స్పష్టం చేశారు. రాష్ట్ర ప్రభుత్వం కూడా ప్రతి బదిలీకి కారణాలేమీ చెప్పదన్నారు. అధికారులపై ఆరోపణలు ఉన్నా లేకపోయినా బదిలీలు చేసుకోవచ్చని చెప్పారు.గురువారం ద్వివేది మీడియాతో మాట్లాడారు. రాష్ట్ర ప్రభుత్వం కూడా 3 నెలలకే అధికారులను బదిలీ చేసిన సంఘటనలున్నాయని.. ఈసీ చేసిన ఎస్పీల బదిలీకి కారణాలు అవసరం లేదని చెప్పారు. సాధారణ రోజుల్లో జరిగే బదిలీలకు ప్రభుత్వాలు ప్రత్యేకించి ఎలాంటి కారణాలు చెప్పవు కదా? అని వ్యాఖ్యానించారు. ఎస్పీలను ఈసీ కేవలం బదిలీ మాత్రమే చేసిందని, అది శిక్ష కాదని స్పష్టం చేశారు.

ఎస్పీలు రాహుల్‌దేవ్‌ శర్మ, వెంకటరత్నంను బదిలీ చేసింది ఈసీ అయితే తనకు లేఖ రాసి ఏం ప్రయోజనమని ద్వివేది ప్రశ్నించారు. రాష్ట్రంలోని పోలీసు అధికారులను బదిలీ చేస్తూ ఈసీ తనకు ఉత్తర్వులు పంపిందని.. వాటిని తాను సీఎస్‌కు పంపానని చెప్పారు. ఎస్పీలిద్దరూ రాసిన లేఖలు తనకు అందలేదని.. అందితే వాటిని సీఈసీకి పంపుతానని తెలిపారు. రాష్ట్రంలోని పోలీసులపై వైసీపీ ఆరోపణలను ఈసీ పరిగణనలోకి తీసుకుంటే విచారణ జరిగి ఉండేదని, బదిలీలకు అదొక్కటే కారణమై ఉండదని వ్యాఖ్యానించారు. రాష్ట్రంలోని ఎస్పీలు, అదనపు డీజీలను బదిలీ చేసేటప్పుడు తనతో ఎలాంటి సంప్రదింపులు జరపలేదని, కచ్చితంగా జరపాల్సిన నిబంధన కూడా ఏదీ లేదని వెల్లడించారు.

సిట్‌కు సహకరిస్తున్నాం.. డేటా చోరీ, ఫాం-7పై వేసిన సిట్‌ బృందాలకు సహకరిస్తున్నామని, అధికారులు అడిగిన ప్రశ్నలన్నింటికీ వివరణలు ఇస్తున్నామని చెప్పారు. వైసీపీ, ప్రజాశాంతి పార్టీ గుర్తులు ఒకేలా ఉన్నా యని, ప్రజాశాంతి పార్టీ గుర్తు మార్చాలంటూ వచ్చిన ఫిర్యాదులపై ద్వివేది స్పందించారు. ఏ పార్టీకైనా ఇప్పుడు గుర్తులు మార్చ డం వీలుకాదని స్పష్టం చేశారు. ప్రజాశాంతి పార్టీ అధ్యక్షుడు కేఏ పాల్‌కు భద్రత పెంచమని పోలీసులకు సూచించామన్నారు. జగన్‌, విజయ్‌సాయిరెడ్డిల బెయిల్‌ రద్దు అంశం తమ పరిధిలో లేదన్నారు. ఎన్నికలు ప్రశాంతంగా నిర్వహించేందుకు రాష్ట్రవ్యాప్తంగా వేలాది మందిపై బైండోవర్‌ కేసులు పెట్టామన్నారు

వైసీపీ అధినేత జగన్‌.. నరేంద్ర మోదీ మనిషని, ఆయనకు ఓటేస్తే బీజేపీకి వేసినట్లేనని ఏపీ ప్రజలు గుర్తించాలని ఢిల్లీ ముఖ్యమంత్రి అరవింద్ కేజ్రీవాల్ అన్నారు. గురువారం ఆయన ఏపీ సీఎం చంద్రబాబు నాయుడుతో కలిసి కృష్ణా జిల్లాలోని మైలవరంలో జరిగిన బహిరంగ సభలో మాట్లాడారు. అనంతరం వివిధ నియోజకవర్గాల్లో జరిగిన రోడ్‌షోలలో కూడా పాల్గొన్నారు. అసెంబ్లీ ఎన్నికల్లో టీడీపీని భారీ మెజారిటీతో గెలిపించాలని, అది కోరేందుకే తాను ఢిల్లీ నుంచి వచ్చానని కేజ్రీవాల్ ప్రజలను అభ్యర్థించారు. 25 ఎంపీ సీట్లలో కూడా టీడీపీని గెలిపించి కేంద్రంలోనూ బలోపేతమయ్యేలా చేయాలని కోరారు. దేశం అభివృద్ధి చెందాలంటే మోదీని ఓడించాలని, ఏపీ అభివృద్ధి చెందాలంటే చంద్రబాబుని గెలిపించాలని కేజ్రీవాల్ పిలుపునిచ్చారు. ఆంధ్రప్రదేశ్‌ను అన్నివిధాలా ముందుకు తీసుకెళ్లగలిగిన నాయకుడు చంద్రబాబేనని అన్నారు. దేశంలో ఎవరు చేయని విధంగా వృద్ధులు, మహిళలు, రైతులు అన్నివర్గాల వారిని చంద్రబాబు ఆదుకున్నారని తెలిపారు.

గత ఐదేళ్ల పాలనలో మోదీ దేశాన్ని నాశనం చేశారని కేజ్రీవాల్ మండిపడ్డారు. నోట్లరద్దు, జీఎస్టీలతో ప్రజలను ఇబ్బంది పెట్టారన్నారు. అన్నదమ్ముల్లా కలిసున్న హిందూ, ముస్లింల మధ్య చిచ్చుపెట్టారని ఆరోపించారు. నరేంద్ర మోదీ మళ్లీ అధికారంలోకి వస్తే దేశాన్ని కాపాడలేమన్నారు. ఆయన మళ్లీ వస్తే ప్రజాస్వామ్య వ్యవస్థ కుప్పకూలుతుందన్నారు. ‘‘నేను, పశ్చిమ బెంగాల్ ముఖ్యమంత్రి మమతా బెనర్జీ, చంద్ర చంద్రబాబు కలిసి మోదీపై పోరాడుతున్నాం. ఏపీలో జగన్‌కు ఓటు వేయొద్దు. జగన్.. మోదీ మనిషి. మీరు ఆయనకు ఓటేస్తే మోదీ మళ్లీ అధికారంలోకి వచ్చేస్తారు. చంద్రబాబు నాయుడు ప్రత్యేక హోదా గురించి పోరాడుతున్నారు. నేను ఢిల్లీకి రాష్ట్ర హోదా కల్పించాలని పోరాడుతున్నాను. మమ్మల్ని గెలిపిస్తే కేంద్రంలో అధికారంలోకి వచ్చి.. ఏపీకి ప్రత్యేక హోదా, ఢిల్లీకి రాష్ట్ర హోదా సాధిస్తాం’’ అని కేజ్రీవాల్ తెలిపారు. ఏపీ పర్యటనలో భాగంగా కేజ్రీవాల్ విజయవాడలో ఉత్తర భారతీయ ప్రజా సంఘాలతో కూడా భేటీ అయ్యారు. చంద్రబాబును గెలిపించేందుకు కృషి చేయాలని వారిని కోరారు.

దేశంలోని నేరస్తులకు, దొంగలకు, అవినీతిపరులకు ప్రధాని నరేంద్ర మోడీ కాపాలా కాస్తున్నారని, అభివృద్ధిని పక్కనపెట్టి హిందూ, ముస్లిములకు మధ్య విద్వేషాలను సృష్టించి లబ్ధిపొందాలని చూస్తున్నారని అరవింద్‌ కేజ్రీవాల్‌ అన్నారు. మోడీ పాలనలో దేశంలో రైతులు, మేథావులు, మైనార్టీలపై దాడులు జరిగాయన్నారు. దేశంలోనే ప్రస్తుత ఎన్నికలు కీలక భూమిక పోషించనున్నాయని, ప్రతి ఒక్కరూ ఆలోచించి ఓటు వేసి మోడీకి గుణపాఠం చెప్పాలని పిలుపునిచ్చారు. ఎపి అభివృద్ధి అనుభవశీలి చంద్రబాబుతోనే సాధ్యమవుతుందని అన్నారు. ఏపిలో వైసిపి నేత జగన్‌ ప్రధాని మోడీతో లోపాయికారి ఒప్పందం కుదుర్చుకున్నారని, జగన్‌ పార్టీకి ఓటేస్తే ఆ ఓటు వృథా అవుతుందని తెలిపారు. ముఖ్యమంత్రి చంద్రబాబు మాట్లాడుతూ భవిష్యత్తులో వృద్ధాప్య, వితంతు పింఛన్లను రూ.3వేలకు పెంచుతామని చెప్పారు.

ఎంపీగా ఉండి ఏం పనిచేశారని ప్రశ్నించిన ఓ ఓటరు వెనుక పరుగు తీశారు నెల్లూరు జిల్లా గూడూరు వైసీపీ అభ్యర్థి వర ప్రసాద్. నియోజకవర్గంలో రూ. 1.20 లక్షలతో అభివృద్ధి పనులు చేశానని, పెద్ద పెట్టున కేకలు వేశారు. వారు వినకుండా వెళ్లిపోతున్నప్పటికీ వెంటపడి మరీ కేకలు వేశారు. రోడ్డపై కాసేపు హల్‌చల్ చేశారు. ఇప్పడు ఈ వీడియో సోషల్ మీడియాలో హల్‌చల్ చేస్తోంది. మార్నింగ్ వాక్‌కు వచ్చిన వరప్రసాద్ రోడ్డుమీద వెళ్తున్న వారిని తనకు ఓటు వేయాలని అభ్యర్థించారు. మీకు ఎందుకు ఓటు వేయాలని పాదచారి ఆయన్ను ప్రశ్నించారు. గూడూరు అభివృద్ధి చేసిన వారికే ఓట్లు వేస్తామని పాదచారి చెప్పడంతో వరప్రసాద్ ఖంగుతిన్నారు.

పాదచారి ప్రశ్నకు బదులుగా.. తాను రూ. 1.20 కోట్లతో నియోజకవర్గాన్ని అభివృద్ధి చేశానని చెప్పారు. ఇలాంటి ఎంపీని మీరు ఎక్కడైనా చూశారా అని ఓటరును వరప్రసాద్ ప్రశ్నించారు. రూ. 40 లక్షలతో గూడూరు పట్టణాన్ని అభివృద్ధి చేశానని ఆయన చెప్పారు. తన సమాధానం వినడానికి ధైర్యం లేదని శివాలెత్తిపోయారు. వరప్రసాద్ మండిపడడంతో పాదచారి అక్కడి నుంచి వెళ్లిపోతుండగా... వరప్రసాద్ అతడి వెంటబడి మరీ వెళ్లి సమాధామిచ్చారు. అయితే వర ప్రసాద్ చేసిన హంగామాతో అక్కడ ఉన్న వారందరూ అవాక్కయ్యారు. ఆ వీడియో సోషల్ మీడియాలో వైరల్ అవ్వటంతో, ఆయన ఎందుకు ఇలా విపరీత ప్రవర్తనతో ప్రవర్తించారో అని చూసిన వారు అనుకుంటున్నారు.