news

నందమూరి హరికృష్ణ విషయంలో తెలంగాణ ప్రభుత్వం మరో కీలక నిర్ణయం తీసుకుంది. ఇప్పటికే ఆయన అంత్యక్రియలు అధికారిక లాంఛనాలతో నిర్వహిస్తామని సీఎం కేసీఆర్ ప్రకటించారు. అంతేకాకుండా జూబ్లీహిల్స్‌లోని మహాప్రస్థానంలో హరికృష్ణ స్మారక చిహ్నం ఏర్పాటు కోసం ప్రభుత్వం ప్రత్యేకంగా స్థలాన్నికేటాయించింది. అంత్యక్రియలు ముగిశాక కుటుంబసభ్యుల నిర్ణయం మేరకు స్మారక చిహ్నం నిర్మించే అవకాశం ఉంది. ఆయన అంత్యక్రియలను మొయినాబాద్‌లో ఫాం హౌస్‌లో నిర్వహించాలని కుటుంబసభ్యులు అనుకున్నారు.

హరికృష్ణ పెద్ద కుమారుడు జానకీరాం అంత్యక్రియలు కూడా ఇక్కడే నిర్వహించారు. ఆ తర్వాత తెలంగాణ ప్రభుత్వం ఆయన అంత్యక్రియలను ప్రభుత్వ లాంఛనాలతో నిర్వహిస్తామని చెప్పడంతో వేదికను మార్చారు. మహాప్రస్థానంలో అంత్యక్రియలు నిర్వహించాలని ప్రభుత్వం నిర్ణయం తీసుకుంది. దీంతో ఆయన కుటుంబసభ్యులు ప్రభుత్వ నిర్ణయాన్ని అంగీకరించారు. మరో పక్క, హరికృష్ణ అంతిమ సంస్కారాలు ముగిసాయి. హరికృష్ణ చితికి రెండో కుమారుడు కల్యాణ్‌రామ్‌ నిప్పంటించారు. ఏపీ సీఎం నారా చంద్రబాబు నాయుడు, హ‌రికృష్ణ సోద‌రులు జయకృష్ణ, బాలకృష్ణ, సుప్రీంకోర్టు విశ్రాంత న్యాయమూర్తి జస్టిస్‌ జాస్తి చలమేశ్వర్‌ తదితరులు మహాప్రస్థానానికి చేరుకుని హ‌రికృష్ణ పాడెను మోశారు.

తొలుత మెహదీపట్నం నుంచి మహాప్రస్థానం వరకూ సాగిన అంతిమయాత్రలో సినీ, రాజకీయ ప్రముఖులు, తెదేపా శ్రేణులు, నందమూరి అభిమానులు భారీగా పాల్గొన్నారు. తెలంగాణ రాష్ట్ర మంత్రులు కేటీఆర్‌, తలసాని శ్రీనివాస్‌యాదవ్‌, తుమ్మల నాగేశ్వరరావు, ఏపీ మంత్రులు నారా లోకేష‌, ప్రత్తిపాటి పుల్లారావు, దేవినేని ఉమామహేశ్వరరావు తదితరులు హరికృష్ణ అంత్యక్రియల్లో పాల్గొన్నారు. అభిమానులు పెద్ద సంఖ్య‌లో త‌ర‌లివ‌చ్చి హ‌రికృష్ణ పార్థీవ‌దేహాన్ని క‌డ‌సారి తిల‌కించి అశ్రున‌య‌నాల న‌డుమ క‌న్నీటి వీడ్కోలు ప‌లికారు.

దివంగత నేత హరికృష్ణ అంతిమయాత్ర మొదలైంది. మధ్యాహ్నం రెండు గంటల ప్రాంతలో స్వగృహం నుంచి హరికృష్ణ పార్థివ దేహం బయటకు తీసుకువచ్చారు. ముఖ్యమంత్రి చంద్రబాబు స్వయంగా తన బావమరిది హరికృష్ణ పాడె పట్టుకున్నారు. ఒకవైపు చంద్రబాబు, మరోవైపు సుప్రీంకోర్టు మాజీ న్యాయమూర్తి జాస్తి చలమేశ్వర్ పాడె పట్టుకున్నారు. ఎన్టీఆర్, కల్యాణ్‌రామ్‌, కుటుంబ సభ్యులు అశ్రునయనాలతో ముందు నడిచారు. 'హరికృష్ణ అమర్ రహే' అంటూ అభిమానులు నినాదాలు చేశారు. హరికృష్ణ భౌతికకాయాన్ని అక్కడి నుంచి వైకుంఠ రథం (ప్రచార రథం) ఎక్కించారు. దాదాపు పది కిలోమీటర్ల మేర అంతిమయాత్ర సాగి మహాప్రస్థానం చేరుకోగానే ప్రభుత్వ లాంఛనాలతో హరికృష్ణ అంత్యక్రియలు జరగనున్నాయి.

హరికృష్ణ అంతిమయాత్రకు రెండు ప్రత్యేక వాహనాలను సిద్ధం చేశారు. తమ అభిమాన నటుడు, నాయకుడిని కడసారి చూసేందుకు పెద్దఎత్తున అభిమానులు హరికృష్ణ నివాసానికి తరలివచ్చారు. ప్రధానంగా ఆంధ్రప్రదేశ్ రాష్ట్రంలోని ఆయా ప్రాంతాల నుంచి వేలాదిమంది అభిమానులు హైదరాబాద్ చేరుకున్నారు. కాగా... అంతిమయాత్రలో తొక్కిసలాట జరుగకుండా ముందస్తు జాగ్రత్తలు తీసుకున్నారు. వందలాది మంది పోలీసులతో ఏర్పాట్లు చేశారు. తెలంగాణ ప్రభుత్వ లాంఛనాలతో హరికృష్ణ అంత్యక్రియలు జరగనున్నాయి.

చైతన్య రథసారిథి నందమూరి హరికృష్ణ అంతిమ యాత్ర ప్రారంభమైంది... మాసబ్ ట్యాంక్ లోని ఆయన నివాసం నుంచి మహాప్రస్థానం వైపు అంతిమయాత్ర సాగుతోంది... హరికృష్ణ భౌతికకాయంపై గౌరవంగా తెలుగుదేశం పార్టీ జెండాను కప్పారు... నందమూరి ఫ్యామిలీ సభ్యులతో కలిసి హరికృష్ణ భౌతికకాయం ఉన్న పాడేను తన భుజంమై మోసి... అంతిమ యాత్ర కోసం సిద్ధం చేసిన వాహనంలో ఎక్కించారు ఏపీ సీఎం చంద్రబాబు... అంతిమయాత్ర వాహనంలో ఏపీ సీఎం చంద్రబాబు, దగ్గుబాటి, యార్లగడ్డ, జస్టిస్ చలమేశ్వర్ తదితరులుండగా... అంతిమ యాత్రను నందమూరి కుటుంబ సభ్యులు, ఏపీ మంత్రులు లోకేష్, అచ్చెన్నాయుడు, టీడీపీ నేతలు అనుసరిస్తున్నారు. అంతిమయాత్రకు భారీ సంఖ్యలు టీడీపీ శ్రేణుల, హరికృష్ణ అభిమానులు తరలిరావడంతో మాసబ్ ట్యాంక్, మెహిదీపట్నం రోడు జనసంద్రమైంది. మరోవైపు మహాప్రస్థానానికి కూడా పెద్ద సంఖ్యలో తరలివచ్చారు అభిమానులు.

మరో వైపు అంతిమయాత్ర మార్గంలో వెళ్లే వాహనదారులకు ఇబ్బందులు తలెత్తకుండా ఉండేందుకు హైదరాబాద్, సైబరాబాద్ పోలీస్‌ కమిషనరేట్ల పరిధిలో ట్రాఫిక్ ఆంక్షలు విధించారు. మెహదీపట్నం, నానాల్ నగర్ X రోడ్, టోలిచౌక్‌, విస్పర్ వ్యాలీ టీ జంక్షన్ మీదుగా జూబ్లీహిల్స్‌ మహాప్రస్థానం వరకూ అంతిమ యాత్ర కొనసాగనుంది. వాహనదారులు ప్రత్యామ్నాయ మార్గాల్లో గమ్యస్థానాలకు చేరాలని ట్రాఫిక్ విభాగం సూచించింది. జూబ్లిహిల్స్ మహాప్రస్థానంలో సాయంత్రం తెలంగాణ రాష్ట్ర ప్రభుత్వం అధికారిక లాంఛనాలతో అంత్యక్రియలు నిర్వహించనున్నారు.