news

వైసీపీ అధినేత జగన్ సతీమణి భారతి పేరు ఎన్ఫోర్స్ మెంట్ డైరక్టరేట్ చార్జిషీటులో చేర్చిందన్న వార్తలు ఆ పార్టీలో కొత్త చర్చకు దారితీసింది. రాష్ట్రపతి ఎన్నిక నుంచి ఇప్పటివరకూ తాము బీజేపీకి అన్ని విధాలా సహకరిస్తున్నప్పటికీ, కేంద్రం ఇలాంటి బెదిరింపు ధోరణికి దిగడం పై పార్టీ వర్గాల్లో ఆగ్రహం వ్యక్తమవుతోంది. బీజేపీతో బంధం భవిష్యత్తులో ప్రమాదకరేమనన్న వ్యాఖ్యలు సీనియర్ల నుంచి వినిపిస్తున్నాయి. ఇదిలా ఉండగా, తాజాగా ఈడీ నిర్ణయం వెనుక రాజకీయ ఒత్తిళ్ల, వైసీపీని పూర్తి స్థాయిలో దారికి తెచ్చుకునే హెచ్చరిక సంకేతాలున్నట్లు చర్చ జరుగుతోంది.

రెండు వారాల క్రితం బీజేపీ అధ్యక్షుడు అమిత్ షాతో, జగన్ కు అత్యంత సన్నిహితుడైన ఒక ఎంపి చర్చించారు. రానున్న ఎన్నికల్లో వైసీపీ వంద సీట్లకు పోటీ చేస్తే, మిగిలిన 75 సీట్లలో తాము, జనసేన పోటీ చేస్తామని బీజేపీ కొత్త ప్రతిపాదనను తెరపైకి తీసుకువచ్చినట్లు రాజకీయ వర్గాల్లో ప్రచారం జరిగిన విషయం తెలిసిందే. అయితే, బీజేపీ ప్రతిపాదనను జగన్ సున్నితంగా తిరస్కరించి, దానివల్ల అంతా మునిగిపోతామని, ముఖ్యంగా తన పార్టీ దెబ్బతింటుందని, తన లక్ష్యం నెరవేరదని దూత పాత్ర పోషిస్తున్న సదరు ఎంపీకి స్పష్టం చేశారు.

దానికి బదులు వైసీపీ నష్టపోని ప్రతిపాదన రూపొందించాలని సూచించారు. అదే విషయాన్ని సదరు ఎంపీ బీజేపీ నాయకత్వానికి స్పష్టం చేశారు. తమ ప్రతిపాదనను జగన్ తిరస్కరించడం పై బీజేపీ నాయకత్వం ఆగ్రహం వ్యక్తం
చేసినట్లు ప్రచారం జరుగుతోంది. రాష్ట్రంలో బీజేపీకి ఎలాంటి బలం లేనందుకే ఎవరూ ఖాతరు చేయడం లేదని, తమను కాదని వెళ్లిపోయిన టీడీపీకి ఇప్పటికే ప్రభుత్వపరంగా, చుక్కలు చూపిస్తున్న బీజేపీ.. తన ప్రతిపాదనను తిరస్కరించిన వైసీపీకీ ఒక హెచ్చరిక సంకేతం పంపాలన్న భావనతో ఉన్నట్లు.. గత వారం నుంచే చర్చ జరుగుతోంది.

చివరకు అది ఈడీ రూపంలో ఉంటుందని మీడియా కథనాలతో స్పష్టమయింది. బీజేపీ ప్రతిపాదనను కాదన్నందుకే ఈ పరిణామాలు జరుగుతున్నాయన్న చర్చ రాజకీయ వర్గాల్లో జరుగుతోంది. కాగా ఈడీ నిర్ణయం మీడియాలో వెలువడిన నేపథ్యంలో వైసీపీ నేతలు కూడా బీజేపీ తీరుపై గుర్రుగా ఉన్నారు. రాష్ట్రపతి ఎన్నిక నుంచి, తాజా రాజ్యసభ డిప్యూటీ చైర్మన్ ఎన్నికకు దూరం ఉండి సహకరిస్తున్నా.. బీజేపీ తన సహజ శైలిని విడనాడకపోవడం పై వైసీపీ వర్గాలు ఆగ్రహంతో ఉన్నాయి. జాతీయ పార్టీల చట్రంలో ఉంటే ఇలాంటి బెదిరింపులు తప్పవన్న అనుభవం, గతంలో ఒకసారి కాంగ్రెస్ ద్వారా స్పష్టమయిందని గుర్తుచేస్తున్నారు.

ఇప్పుడు బీజేపీ కూడా కేసులు అడ్డు పెట్టుకుని బెదిరింపులకు దిగుతున్న వైనం.. జాతీయ పార్టీల బాహుబంధనాల్లో చిక్కుకోవడం మంచిదికాదన్న విషయాన్ని స్పష్టం చేస్తోందని విశ్లేషిస్తున్నారు. మహారాష్ట్రలో శివసేన సహా.. తొలుత ఎవరైతే మిత్రులుగా ఉన్నారో, వారినే తొక్కేసి సొంతగా ప్రభుత్వాలు ఏర్పాటు చేసుకున్న బీజేపీ వ్యూహాన్ని అర్ధం చేసుకోవడంలో తమ నాయకత్వం వైఫల్యం చెందిందని అంగీకరిస్తు న్నారు. టీడీపీని బీజేపీ నుంచి వేరు చేసేందుకే కృషి చేసినప్పటికీ, దానివల్ల తమకు కలిగే ఉపశమనం లేకపోగా పార్టీకి సంప్రదాయ ఓటు బ్యాంకుగా ఉన్న ముస్లింలను దూరం చేసుకో వలసి వచ్చిందని పార్టీ వర్గాలు ఆవేదన వ్యక్తం చేస్తున్నాయి. ఇప్పటికయినా జాతీయ పార్టీలపై ఆధారపడకుండా, సొంత నిర్ణయాలు తీసుకుంటేనే పార్టీకి భవిష్యత్తు ఉంటుందన్న వ్యాఖ్యలు వినిపిస్తున్నాయి. సోర్స్: సూర్య పత్రిక

మోడీ, షా ద్వయం, తమ నిజ స్వరూపాన్ని బయట పెడుతున్నారు. కర్ణాటక ఎన్నికల్లో, అధికారం చేజిక్కించుకుంటానికి వేసిన, ఎత్తులు, ఇక్కడ కూడా వేస్తున్నారు. కాకపోతే, అక్కడ ఎన్నికల ముందు చేస్తే, మనకి మాత్రం, దాదాపు 10 నెలల ముందే రంగంలోకి దిగారు. గత ఆరు నెలలు నుంచి, అంటే తెలుగుదేశం ఎన్డీఏలో నుంచి బయటకు వచ్చి, మోడీ అనే వ్యక్తిని చాకిరేవు పెడుతున్న దగ్గర నుంచి, మన రాష్ట్రం పై, చంద్రబాబు పై కక్ష తీర్చుకోవటానికి, వీళ్ళు చెయ్యని ప్రయత్నం లేదు. చుక్కలు చూపిస్తాం అని ఒకరు, చంద్రబాబుని, లోకేష్ ని జైల్లో పెడతాం అని ఒకరు, ఇలా అనేక విధాలుగా బెదిరిస్తూ వచ్చారు.

రాష్ట్రంలో అన్ని శాఖల్లో, తీవ్రంగా సాధించారు. ఎక్కడన్నా కొంచెం అవినీతి ఉంటుంది ఏమో, చంద్రబాబుని లోపల వేద్దాం అని చూసారు. ఢిల్లీలో స్పెషల్ టీంలు, మీటింగ్ లు పెట్టుకుని, రివ్యూలు చేసారు, చివరకు చంద్రబాబుని, అవినీతి విషయంలో, ఏమి చెయ్యలేము అనే అభిప్రాయానికి వచ్చారు. అందుకే, ఇప్పుడు రూట్ మార్చారు. ముఖ్యంగా, ఆర్ధిక మూలాల పై దెబ్బ కొట్టే ప్రయత్నం చేస్తున్నారు. సహజంగా, ఇన్నాళ్ళు బీజేపీ స్టైల్ చూస్తే ఇలాగే ఉంటుంది. ఏ రాష్ట్రంలో అన్నా, ఎన్నికలు జరుగుతున్నాయి అంటే, అక్కడ కాంట్రాక్టర్ల పై దాడులు జరుగుతాయి. అక్కడ వారిని లొంగదీసుకుని, వ్యతిరేక పార్టీలకు ఎన్నికల ఫండ్ ఇవ్వకుండా చేస్తారు.

సరిగ్గా మనకి కూడా అదే జరుగుతుంది. ఇప్పటికే నవయుగ లాంటి పెద్ద సంస్థ, పోలవరం ప్రాజెక్ట్ పనులు పరిగెత్తిస్తున్న సంస్థ పై, ఐటి దాడులు చేసి, వారిని భయబ్రాంతులకు గురి చేసారు. ఇది పోయిన నెల జరిగినా, వార్తా బయటకు రాకుండా జాగ్రత్త పడ్డారు. ఇంకా మిగతా కాంట్రాక్టర్ ల పై కూడా దాడులు జరిగాయి. పోలవరం పనులు ఆపటం, తెలుగుదేశం పార్టీకి ఈ కాంట్రాక్టర్లు ఎన్నికల ఫండ్ ఇవ్వకుండా చెయ్యటమే, దీని ప్రధాన ఉద్దేశం. ఇది ఇలా ఉండగానే, పోలవరం ప్రధాన కాంట్రాక్టర్, ట్రాన్స్‌ట్రాయ్‌ కంపెనీ పై ఈ రోజు, సెంట్రల్ గూడ్స్ అండ్ సర్వీస్ టాక్స్ అధికారులు దాడులు నిర్వహించారు.

గుంటూరు జిల్లా నరసారావుపేట ఎంపీ రాయపాటి సాంబశివరావుకు చెందిన హైదరాబాద్ కార్పోరేట్ కార్యాలయంపై సెంట్రల్ గూడ్స్ అండ్ సర్వీస్ టాక్స్ అధికారులు దాడులు నిర్వహించారు. పెద్ద ఎత్తున ఆయన పన్నులు కట్టకుండా ఎగవేశారని చెబుతూ ఈ దాడులకు దిగారు. భారతీయ జనతాపార్టీతో తెగదెంపులు చేసుకున్న నేపథ్యంలో తెలుగదేశం ఎంపీ కార్యాలయంపై దాడులు జరగడం విశేషం. రాయపాటికి చెందిన ఇంజనీరింగ్ మరియు నిర్మాణం కంపెనీ ట్రాన్స్‌ట్రాయ్ ఇండియా లిమిటెడ్ 2012లో ఏపీలోని పోలవరం ప్రాజెక్టు కాంట్రాక్టు దక్కించుకుంది. ట్రాన్స్‌ట్రాయ్‌ కంపెనీకి సంబంధించిన కార్పొరేట్ కార్యాలయాలను బేగంపేట్, కమలాపురికాలనీలో ఉన్నాయి.

అంతేకాదు రాజ్యసభ డిప్యూటీ ఛైర్మెన్ ఎన్నికల్లో తెలుగుదేశం ఎంపీలు కాంగ్రెస్ అభ్యర్థికి ఓటు వేసిన తర్వాత ఈ దాడులు జరగడం చూస్తే ఇది రాజకీయ కక్షచర్య సాధింపేనని తెలుగుదేశం నేతలు చెబుతున్నారు.తన కార్పొరేట్ కార్యాలయంపై దాడులు జరిగిన మాట వాస్తవమేనని ఎంపీ రాయపాటి సాంబశివరావు చెప్పారు. జీఎస్టీ కట్టాలని ఎలాంటి సూచనలు లేనందున తమ సిబ్బంది కూడా పట్టించుకోలేదని ఒక్కసారిగా దాడులు నిర్వహించడంతో వారంతా షాక్‌కు గురయ్యారని రాయపాటి తెలిపారు. 20212లో ట్రాన్స్ ట్రాయ్ సంస్థ పోలవరం ప్రాజెక్టు కాంట్రాక్ట్ దక్కించుకుంది. అయితే పనులు సరిగ్గా చెయ్యకపోవటం వల్ల, ట్రాన్స్ ట్రాయ్‌కు అప్పగించిన పనులు నవయుగ చేతికి మారాయి.

రాజధాని అమరావతి నగరంలో ఐఏఎస్‌, ఎమ్మెల్యేలు, ఎన్‌జీవోలకు నిర్మిస్తున్న హౌసింగ్ టవర్స్ నిర్మాణాలు వేగంగా సాగుతున్నాయి.. నూతన సాంకేతిక పరిజ్ఞానాన్ని అవలంబిస్తూ, మలేషియన్‌ షియర్‌ వాల్‌ టెక్నాలజీతో ఒక్క ఇటుక అవసరం లేకుండానే మొత్తం సిమెంట్‌ కాంక్రీట్‌తో ఆకాశహార్మ్యాలను నిర్మిస్తోంది ప్రభుత్వం. ఈ కారణంగా నిర్మాణాల పనులు వేగవంతంగా జరుగుతున్నాయి. రాయపూడి, నేలపాడు గ్రామాల్లో పెద్దఎత్తున జరుగుతున్న ఈ నిర్మాణాలుడిసెంబర్ నాటికి పూర్తి చేసేందుకు ప్రభుత్వం లక్ష్యంగా పెట్టుకుంది. అధునాతన సాంకేతిక పరిజ్ఞానాన్ని వినియోగిస్తున్న కారణంగా, తక్కువ మంది కూలీలతో లక్ష్యసాధన దిశగా నిర్మాణాలు కొనసాగుతున్నాయి.

డిసెంబరు చివరికల్లా రాజధానిలో 61 నివాస టవర్ల నిర్మాణం పూర్తి చేసి తాళం చెవులు అప్పగిస్తామని సీఆర్డీయే కమిషనర్‌ డాక్టర్‌ చెరుకూరి శ్రీధర్‌ తెలిపారు. ఈ టవర్లలో 3800 ఫ్లాట్లు నిర్మిస్తున్నామని, ఐఏఎస్‌ అధికారులు మొదలుకొని నాలుగో తరగతి ఉద్యోగుల వరకూ నివసించడానికి వీలుగా వీటిని నిర్మిస్తున్నట్లు తెలిపారు. ‘ఈ టవర్లలో ప్రస్తుతం ప్రతి ఆరు రోజులకు ఒక అంతస్తు చొప్పున నిర్మాణం చేసుకొంటూ వెళ్తున్నాం. ఈ ఏడాది జనవరిలో వీటి నిర్మాణం మొదలైంది. డిసెంబరు చివరి నాటికి మొత్తం పనులు పూర్తవుతాయి" అని అన్నారు.

"ఐఏఎస్‌ అధికారులకు కొంత విశాలంగా.. ఒక్కో అంతస్తుకు రెండు ఫ్లాట్లు వస్తాయి. ఎన్జీవోలకు ఒక్కో అంతస్తుకు నాలుగు వస్తాయి. వైశాల్యంలో తేడా తప్ప నిర్మాణ నాణ్యతలో అన్నీ ఒకటిగానే ఉంటాయి. వారి కోసం నిర్మించే క్లబ్‌ హౌస్‌లు కూడా ఒకే రకమైన నాణ్యతతో నిర్మిస్తున్నాం. సీఎం చంద్రబాబు ఈ విషయంలో స్పష్టమైన ఆదేశాలు ఇచ్చారు’ అని శ్రీధర్‌ చెప్పారు. మంత్రులు, సీనియర్‌ ఐఏఎస్‌, ఐపీఎస్‌ అధికారులు, జడ్జిల కోసం నిర్మించే 189 నివాస భవనాల పనులు త్వరలో మొదలు పెడతామని తెలిపారు. ఆ హోదాలో ఎవరు ఉంటే వారు ఇందులో నివాసం ఉండవచ్చని, ఇవి ప్రభుత్వ క్వార్టర్లని చెప్పారు.

సచివాలయానికి సంబంధించిన 5 టవర్ల నిర్మాణ పనులు మొదలయ్యాయని శ్రీధర్‌ తెలిపారు. ప్రస్తుతం పునాదుల తవ్వకం జరుగుతోందని, 40 అంతస్తులకంటే మించి జరిగే ఈ నిర్మాణాలు వచ్చే మే నెల నాటికి 25 అంతస్తులు వరకూ పూర్తి కావొచ్చని అంచనా వేస్తున్నట్లు ఆయన చెప్పారు. రాజధాని ప్రాంతంలో మొదటి దశ కింద ఇప్పటివరకూ రూ.28వేల కోట్ల విలువైన పనులు మంజూరు చేశామని, ఇవి వివిధ దశల్లో ఉన్నాయని వెల్లడించారు. సహజంగా ఇంటి నిర్మాణం అనగానే ఇసుక, సిమెంట్‌, ఐరన్‌, కంకరతో పాటు ప్రధానంగా గోడల నిర్మాణానికి ఇటుకలు అవసరమవుతాయి. అయితే ఇది ఖర్చుతో కూడిన వ్యవ హారం.

అలానే కొన్ని లక్షల ఇటుకలు నిర్మాణ ప్రదేశానికి తరలించాల్సి ఉంటుంది. వీటన్నింటిని పరిగణనలోకి తీసుకొన్న ప్రభుత్వం షియర్‌ వాల్‌ టెక్నాల జీని వినియోగిస్తోంది. లెజిస్లేటివ్‌, ఏఐఎస్‌ అధికారుల కోసం నిర్మిస్తున్న టవర్స్‌కి రూ. 635.91 కోట్లు ఖర్చు అవుతుందని అంచనా వేశారు. ఎన్‌జీవోలకు నిర్మిస్తున్న జీవో టైప్‌-1కి రూ.866.1 కోట్లు, క్లాస్‌-4 ఉద్యోగులకు నిర్మించే టవర్స్‌కి రూ. 707.44 కోట్లు కలిపి మొత్తం రూ. 2,209.45 కోట్లతో ఇళ్ల నిర్మాణాలు జరుగుతున్నాయి. ఇందుకోసం మొత్తం 65.4 ఎకరాల భూమిని వినియోగిస్తున్నారు. మొత్తం 61 టవర్స్‌లో 3,840 ఫ్లాట్ల నిర్మాణాలు జరుగుతున్నాయి.

శాసనసభ్యులు, మండలి సభ్యుల కోసం రాయపూడి గ్రామ పరిధిలోనే మరో బ్లాక్‌లో ఇళ్ల నిర్మాణాలు ప్రారంభించారు. ఇక్కడ 12 టవర్స్‌లో ఇళ్ల నిర్మాణాలు జరుగుతున్నాయి. మొత్తం 288 మంది ఎమ్మెల్సీలు, ఎమ్మెల్యేలకు ఇక్కడ నివాస సౌకర్యం కల్పిస్తారు. కృష్ణానదికి సమీపంలో రాయపూడి వద్ద అఖిల భారత సర్వీసు అధికారుల కోసం ఇళ్ల నిర్మాణాలు జరుగుతున్నాయి. మొత్తం ఇక్కడ ఆరు బ్లాకుల్లో ఇళ్లను నిర్మిస్తున్నారు. స్టిల్ట్‌ ఫ్లోర్‌ కలిపి మొత్తం 13 అంతస్థులుగా డిజైన్‌ చేశారు. మొత్తం 144 ఫ్లాట్లు నిర్మాణం చేస్తున్నా రు. ప్రభుత్వ ఉద్యోగుల కోసం నేలపాడు గ్రామంలో బహుళ అంతస్థుల నిర్మాణాలు ప్రారంభమయ్యాయి. మొత్తం 27.47 ఎకరాల విస్తీ ర్ణంలో 22 టవర్లను ఇక్కడ నిర్మిస్తున్నారు. 1,968 ఫ్లాట్ల నిర్మాణాలు జరుగుతున్నాయి. ఇవి అన్నీ 2019 ఫిబ్రవరి 12వ తేదీకి పూర్తి చేయాలనేది లక్ష్యంగా పెట్టుకొన్నారు.