news

రాజ్యసభ ఉపాధ్యక్షుడిగా పదవీబాధ్యతలు చేపట్టిన తొలినాడే హరివంశ్‌సింగ్‌ కేంద్ర ప్రభుత్వానికి ఓ చిన్న ఝలక్‌ ఇచ్చారు. ఓ ప్రైవేటు తీర్మానంపై ఓటింగ్‌కు అనుమతినిచ్చి సర్కార్‌ను ఇరకాటంలో పడేశారు. అదృష్టవశాత్తూ ఆ సమయంలో ఎక్కువ మంది విపక్ష సభ్యులు సభలో లేకపోవడం వల్ల ఓ ఇబ్బందికర పరిస్థితి నుంచి ప్రభుత్వం బయటపడగల్గింది. విషయమేంటంటే- ఒక రాష్ట్రంలో ఎస్సీ ఎస్టీలుగా రిజర్వేషన్‌ ఉన్నవారు మిగిలిన రాష్ట్రాల్లో సైతం ఎస్సీ ఎస్టీలుగా ఆ సౌలభ్యం అనుభవించేట్లు రాజ్యాంగాన్ని సవరించాలని విశ్వంభర్‌ ప్రసాద్‌ నిషాద్‌ అనే సమాజ్‌వాదీ సభ్యుడు ఓ ప్రైవేటు తీర్మానం ప్రవేశపెట్టారు.

ఇది అసాధ్యమని, ఒక కులాన్ని ఎస్సీ లేదా ఎస్టీ లేదా ఓబీసీ అనే కేటగిరీల్లో చేర్చడానికి చాలా ప్రక్రియ జరుగుతుందని సామాజిక న్యాయ శాఖ మంత్రి థావర్‌చంద్‌ గెహ్లాట్‌ తిరస్కరించారు. అనంతరం దీనిపై ఓటింగ్‌ జరగాలని విపక్షాలు కోరగా ఉపాధ్యక్షుడు హరివంశ్‌సింగ్‌ అందుకు అనుమతి ఇచ్చారు. ఇది అన్యాయమని, ఓ ప్రైవేటు తీర్మానంపై ఓటింగ్‌కు అనుమతివ్వడం అసాధారణమని న్యాయశాఖ మంత్రి రవిశంకర్‌ ప్రసాద్‌ అభ్యంతరం చెప్పారు. కానీ హరివంశ్‌ వినలేదు. ఒకసారి తాను రూలింగిచ్చేశాక వెనక్కి తీసుకోనన్నారు.

దాంతో ఆ తీర్మానాన్ని ఓడించడానికి ప్రభుత్వ విప్‌లు తమ పార్టీ సభ్యులను సభలోకి రప్పించడానికి పరుగులు పెట్టారు. చివరకు తీర్మానాన్ని 66-32 ఓట్ల తేడాతో సర్కారు ఓడించగల్గింది. విపక్ష సభ్యులు ఎక్కువమంది లేకపోవడం సర్కారుకు కలిసొచ్చింది. మరో పక్క, ప్రధాని నరేంద్రమోదీ వ్యాఖ్యల్లో కొన్నింటిని రాజ్యసభ చైర్మన్‌ వెంకయ్యనాయుడు రికార్డుల నుంచి తొలగించారు. ఏకంగా ప్రధాని వ్యాఖ్యలను రికార్డుల నుంచి తొలగించడం పార్లమెంటు చరిత్రలో బహుశా ఇదే మొదటిసారి కావచ్చు. మొత్తానికి, రాజ్యసభ చైర్మన్‌, డిప్యూటీ చైర్మన్, వరుస పెట్టి, కేంద్రానికి షాక్లు ఇస్తున్నారు.

కేంద్ర ప్రభుత్వం ఆంధ్రప్రదేశ్ రాష్ట్ర ప్రభుత్వం పై పరోక్షంగా దెబ్బతీసే కార్యక్రమాన్ని చేపట్టిందని రాజకీయ వర్గాలు చర్చించుకుంటున్నాయి. ముఖ్యంగా కేంద్రంలోని ఎన్డీయే ప్రభుత్వం నుండి తెలుగుదేశం పార్టీ వైదొలగిన అనంతరం చోటుచేసుకున్న పరిణామాల నేపథ్యంలో టీడీపీ-బీజేపీ మధ్య పచ్చ గడ్డి వేస్తే భగ్గుమనే పరిస్థితి నెలకొన్న విషయం విదితమే. అయితే ఏపిలోని రాష్ట్ర ప్రభుత్వం పై వివిధ రకాలైన ఒత్తిడిని తీసుకురావడంతో పాటు వేధింపులు కూడా జోడించాలన్నదే బీజేపీ లక్ష్యంగా పనిచేస్తోందని రాష్ట్ర టిడిపి వర్గాలు చెబుతున్నాయి.

దీనికి ప్రధానకారణం ఆంధ్రప్రదేశ్, తెలంగాణ రాష్ట్రాలలో భారీ సాగునీటి ప్రాజెక్టు పనులు చేపట్టిన పలు కాంట్రాక్టు సంస్థలపై గత వారం రోజులుగా 'రహస్య ఐటీ దాడులు నిర్వహించినట్లు అత్యంత విశ్వసనీయ వర్గాలు వెల్లడించాయి. అయితే ఈ విషయం బయటకు పొక్కడానికి వీలు లేదని ఐటీ శాఖ అధికారులు ఆయా కాంట్రాక్టర్లకు “హుకుం' కూడా జారీ చేసినట్లు తెలిసింది. ఉభయ తెలుగు రాష్ట్రాలల్లో సాగునీటి ప్రాజెక్టుల పనులు నిర్వహిస్తున్న బడా కాంట్రాక్టర్ల పైనే ఐటి శాఖ దృష్టిసారించిందని, దీని వెనుక కేంద్ర ప్రభుత్వంలోని పెద్దలు కొందరు సిఎం చంద్రబాబును వేధింపులకు గురి చేయాలన్న ఉద్దేశంతోనే ఇటువంటి తనిఖీలు చేయిస్తున్నారని తెలిసింది.

దీంతో ఐటి అధికారుల దాడులతో ఆయా కాంట్రాక్టర్లు ప్రాజెక్టుల పనులు చేపట్టేందుకు వీలు లేకుండా చేస్తున్నారని టిడిపి సీనియర్ నేతలు వ్యాఖ్యానిస్తున్నారు. ముఖ్యంగా ఎపిలోని రాజకీయాలను దృష్టిలో పెట్టుకొని ఈ రకమైన దాడులు చేయిస్తున్నారని పార్టీ వర్గాలు బాహాటంగా చెబుతున్నాయి. కేంద్రంలోని బీజేపీ ప్రభుత్వం నుండి టిడిపి వైదొలిగిన తరువాతనే ఇటువంటి సరికొత్త దాడులకు పాల్పడుతున్నారని నిర్ధారిస్తున్నారు. మరోపక్క కేంద్రంలో బీజేపీని ఇరకాటంలో పెట్టేలా తెలుగుదేశం పార్టీ పార్లమెంట్ సభ్యులు మూకుమ్మడిగా పార్లమెంట్ ఉభయసభల్లో చేస్తున్న ఆందోళనలను తిప్పికొట్టేందుక ఇటువంటి బ్లాక్మెయిల్ రాజకీయాలకు బీజేపీ పాల్పడుతోందని తెలుగుదేశం పార్టీకి చెందిన సీనియర్ మంత్రి ఒకరు వ్యాఖ్యానించారు.

ప్రధాన మంత్రి మోడీకి వ్యతిరేకంగా గళమెత్తిన టిడిపి ఎంపిలను కట్టడి చేయడానికే రాష్ట్రంలో ఐటీశాఖ భారీ సాగునీటి ప్రాజెక్టులు చేపట్టిన కాంట్రాక్టర్ల సంస్థలపై దాడులు నిర్వహిస్తున్నారని ఆయన స్పష్టం చేశారు. ఎపి సిఎం చంద్రబాబును నేరుగా ఢీకొనే సత్తా బీజేపీకి లేకనే ఇటువంటి దొంగచాటు వ్యవహారాలకు పాల్పడుతోందని ఆయన ఎద్దేవా చేశారు. ఎపి ప్రభుత్వం అత్యంత ప్రతిష్టాత్మకంగా నిర్మిస్తున్న 'పోలవరం' ప్రాజెక్టు పనులు చేస్తున్న కాంట్రాక్టర్ల పై బీజేపీ పెద్దలు నేరుగా గురిపెట్టారని, దీనిలో అక్రమాలు జరుగుతున్నాయంటూ ఆ పార్టీకి చెందిన రాష్ట్ర నాయకులు మొదలుకొని జాతీయస్థాయి నేతల వరకూ చేస్తున్న ఆరోపణల నేపథ్యంలో తాజాగా ఆయా కాంట్రాక్టు పై జరుగుతున్న రహస్య దాడులపై సర్వత్రా చర్చనీయాంశంగా మారింది.

ఆంధ్రప్రదేశ్ రాష్ట్ర ప్రభుత్వాన్ని ఏదో విధంగా ఇబ్బంది పెట్టాలని భావిస్తున్న బీజేపీ పెద్దలు ఆయా కాంట్రాక్టర్లను ఢిల్లీకి పిలిపించుకొని, సాగునీటి ప్రాజెక్టుల్లో జరిగిన అక్రమాలు, అవినీతి గురించి జాతీయ మీడియా ద్వారా బహిర్గతం చేయాలన్న ఉద్దేశంతో ఉన్నారని టిడిపి వర్గాలు చెబుతున్నాయి. ఇదే సమయంలో ప్రస్తుతం ఐటి దాడులు ఎదుర్కొన్న కొంతమంది కాంట్రాక్టర్లు ఐటి శాఖ ఉన్నతాధికారులకు లెక్కలతో సహా పూర్తి సమాచారాన్ని అందించారని అమరావతీ సచివాలయంలోని ఆర్థికశాఖలో జోరుగా చర్చ జరుగుతోంది. అయితే వీరిలో కొంతమంది కాంట్రాక్టర్లు మాత్రం తాము చట్టబద్ధంగానే పనులు నిర్వహిస్తున్నామని, అందుకు ఆంధ్రప్రదేశ్ రాష్ట్ర ప్రభుత్వం కూడా చట్టబద్ధంగానే వ్యవహరిస్తోందని, దీనిలో ఎలాంటి అక్రమాలు, అవినీతి జరగలేదని తేల్చిచెప్పినట్లు సమాచారం.

తమకు ఇచ్చిన సాగునీటి కాంట్రాక్టుల వల్ల తమకు నష్టం వచ్చిందని, అయినా రాష్ట్ర శ్రేయస్సును దృష్టిలో పెట్టుకొని పనులు కొనసాగిస్తున్నామని, సాగునీటి కార్యాలయాలన్నీ ప్రస్తుతం తెలంగాణ రాష్ట్రంలోని హైదరాబాద్లో ఉండటం వల్ల అక్కడే 'ఈ ఐటి శాఖ రహస్య దాడులు" జరిగాయని తెలిసింది. దీనికి తోడుగా తెలంగాణ కీలకమైన ప్రాజెక్టులన చేస్తున్నప్పటికీ ఆయా సంస్థల పై ఐటీశాఖ అధికారులు ఇప్పటి వరకూ ఎలాంటి దాడులు నిర్వహించలేదని, కేవలం ఆంధ్రప్రదేశ్ లో పనలు నిర్వహిస్తున్న సాగునీటి కాంట్రాక్టర్ల నే ఐటి శాఖ దాడులు చేపట్టిందని విశ్వసనీయవర్గాల సమాచారం. అయితే రాష్ట్రంలో ఐటిశాఖ దాడులు నిర్వహించిన నేపథ్యంలో రాష్ట్ర ఐటీశాఖ అధికారులకు కనీస సమాచారం అదించడం ఆనవాయితీ. అయితే అందుకు భిన్నంగా జరిగిన ఈ వ్యవహారంతో రాష్ట్ర ఐటీశాఖ అధికారులు కూడా అవాక్కయినట్లు తెలుస్తోంది. ఈ వ్యవహారంలో రాష్ట్ర ప్రభుత్వం ఎటువంటి చర్యలు తీసుకోనుందో వేచి చూడాల్సిందే. న్యూస్ సోర్స్ : ఆంధ్రప్రభ

మా భార్యను అనవసరంగా ఇరికించారు అంటూ, జగన్ మోహన్ రెడ్డి నిన్న రాసిన లేఖకు, సోషల్ మీడియాలో ఘాటు కౌంటర్, వైరల్ అయ్యింది. ఇదే ఆ కౌంటర్ "శ్రీ జగన్మోహన్రెడ్డి గారికి, ఆంధ్రప్రదేశ్ ప్రజలకు, ప్రజాస్వామ్యవాదులకు మీరు రాసిన బహిరంగలేఖ చాలా బాగుంది. ఆ లేఖను అందుకున్న ఆంద్రప్రదేశ్ ప్రజల్లో ఒకడిగా మీరు రాసిన లేఖకు ప్రత్యుత్తరం ఇస్తున్నాను. మీ మీద కాంగ్రెస్, తెదేపా కలిసి కుట్రచేసి కేసులు వేశారు అని మీరు ఆరోపించారు, ఏడేళ్ళ తర్వాత కూడా ఇంకా కక్ష సాధింపు చర్యలు సాగిస్తున్నారు అని., మీ భార్యను కూడా కోర్టుల చుట్టూ తిప్పాలనుకుంటున్నారని…. ఇలా రకరకాల ఆరోపణలు చేశారు, ఈ సందర్బంగా మిమ్మల్ని కొన్ని ప్రశ్నలు నేరుగా అడుగుతున్నాను

మీరు , మీ నాన్నగారు, మీ అమ్మగారు గతంలో చంద్రబాబు మీద వివిధ సందర్బాలలో కేసులు వేశారు. 1999 లోనే మీ నాన్నగారు శ్రీ వై.యస్ . రాజశేఖరరెడ్డీ గారు చంద్రబాబు మీద హైకోర్టులో కేసు వేశారు. అందులో పసలేదని కోర్ట్ డిస్మిస్ చేయబోయే పరిస్థితుల్లో ఆయన ఆ కేసు ఉపసంహరించుకున్నాడు ? అవి నిజాలే అయితే కేసు మీ నాన్నగారు ఎందుకు ఉపసంహరించుకున్నారు ? అప్పడు కాంగ్రెస్ పార్టీలో అందరూ దాన్ని వ్యతిరేకింఛటంతో తిరిగి పిటీషన్ వేశారు, దాన్ని కూడా హైకోర్ట్ 2000 లో డిస్మిస్ చేసింది, అయినా అదే ఆరోపణలతో మీ నాన్నగారు 2001లో డిల్లీ హైకోర్ట్ లో పిటీషన్ వేశారు, అదీ కూడా కోర్ట్ డిస్మిస్ చేసింది.

మరోసారి మీ నాన్నగారి అప్పటి అనుంగు అనుచరుడు, ఇప్పటి బిజెపి రాష్ట్ర అధ్యక్షుడు కన్నా లక్ష్మీనారయణ తో 2003 తో అదే ఆరోపణలతో సుప్రీం కోర్ట్ లో పిటీషన్ వేశారు, అది కూడా పసలేదని సుప్రీంకోర్ట్ డిస్మిస్ చేసింది. అయినా మీరు చంద్రబాబును ఇబ్బంది పెట్టాలనే ఏకైక లక్ష్యంతో 2004 ఎన్నికలకు ముందు , మీ నాన్నగారు హై కోర్ట్ లో అవే పాత ఆరోపణలతో మరోసారి హైకోర్ట్ కి వెళ్ళారు, ఈ లోపు ఎలక్షన్స్ వచ్చాయి, మీ నాన్నగారు ముఖ్యమంత్రి అయ్యారు. మీరు కూడా రంగంలోకి వచ్చారు. ఎలక్షన్స్ అయ్యాక ఆ పిటీషన్ కూడా హైకోర్ట్ కొట్టేసింది. కోర్ట్ అన్నిసార్లు కొట్టేసినా పదే పదే అదే ఆరోపణలతో , కేవలం చంద్రబాబును ఇబ్బంది పెడదాం, కోర్ట్ ల చుట్టూ తిప్పుదాం అనే ఏకైక లక్ష్యంతో ఒకటే పిటీషన్ తిప్పి తిప్పి కోర్ట్ లు మార్చి వేస్తూనే ఉన్నారు. కొర్ట్ లు కొట్టేస్తునే ఉన్నాయి.

అయినా మీ కక్ష తీరలేదు, 2004లో మరోసారి లక్ష్మీపార్వతి ద్వారా అవే ఆరోపణలతో ఈ సారి మీ ప్రభుత్వం ఉంది అని ఎసిబి కోర్ట్ లో పిటీషన్ వేయించారు. మీరు పదే పదే స్టే తెచ్చుకున్నాడు అని చేసే ఆరోపణలు ఈ కేసు మీద బాబు తెచ్చుకున్న స్టే కే. అసలు స్టే అని అర్ధం లేని ఆరోపణలు చేస్తారు కానీ, స్టే ఎందుకు తెచ్చుకున్నాడో మీకు తెలుసా ! కేసు విచారణ చేయవద్దు అని కాదు, విచారణకు స్వీకరించే ముందు అయన వాదన కూడా వినమని ఎసిబి కోర్ట్ ని ఆదేశించమనే !

ఆ తర్వాత కూడా మీరు చంద్రబాబును తప్పుడు ఆరోపణలతో ఇబ్బంది పెట్టటం ఆపలేదు. అప్పటికే అనేకసార్లు అనేక కోర్టుల్లో డిస్మిస్ అయిన అదే పిటీషన్ ని 2011 నవంబర్ లో మీ అమ్మగారైన విజయమ్మ గారితో హై కోర్ట్ లొ మరోసారి వేశారు, 2012 లో హై కోర్ట్ మరోసారి కొట్టేసింది. ఆ తర్వాత సుప్రీంకోర్ట్ కి వెళ్ళారు, అక్కడ కూడా చుక్కెదురు కావటమే కాకుండా, మీ అమ్మగారి మీద సుప్రీం కోర్ట్ తీవ్ర వ్యాఖ్యలు చేసింది, మీది రాజకీయ దురుద్దేశ్యంతో కూడిన అరోపణలు ఎందుకు అనుకోకూడదు అని కూడా ప్రశ్నించింది. ఆ పిటీషన్ పలుమార్లు, పలు కోర్టుల్లో డిస్మిస్ అయిన విషయం ఈ పిటీషన్ లో పేర్కొనకపోవటమే దానికి నిదర్శనం అని కూడా చెప్పింది .

ఇన్ని సార్లు ఒక వ్యక్తిని ఇబ్బంది పెట్టటం కోసం కోర్ట్ లో డిస్మిస్ అవుతూ వస్తున్నా, దాన్ని పదే పదే కోర్టుల్లో వేస్తూ కోర్ట్ లను, ప్రజలను పక్కదారి పట్టిస్తూ వచ్చిన మీరు, మీ నాన్నగారు, మీ అమ్మగారు, ఇప్పుడు సరికొత్తగా మా కుటుంబాన్ని ఇందులోకి లాగుతారా అని అమాయకంగా ప్రశ్నిస్తూ ఉంటే చాలా విచిత్రంగా ఉంది. మీరు మీ కుటుంబ సభ్యులతో కేసులు వేయించి ఇప్పుడు కుటుంబాల గురించి మాట్లాడటం హాస్యాస్పదం. మీకు అలా మాట్లాడే నైతిక అర్హత లేదు కాక లేదు. మీ కుటుంబం మొత్తం గత ఇరవై ఏళ్ళుగా ఒకే ఒక వ్యక్తిని పసలేని ఆరోపణలతో టార్గెట్ చేసి ఇప్పుడు మీమీద అయన టార్గెట్ చేశాడు అని చెప్పటం దొంగే .. దొంగా దొంగా అని అరిసినట్లుంది.

మీరు ఇప్పుడు స్నేహం చేస్తుంది బిజెపితో అ పార్టీయే కేంద్రంలో అధికారంలో ఉంది, ఈ రోజు రాజ్యసభ ఎన్నికల్లో కూడా బిజెపి కి లబ్ది చేకూరేలా ఎన్నికలు బాయ్ కాట్ చేసారు పైగా బిజెపి మీద అవిశ్వాస తీర్మానం పెట్టి, ఈ రోజు ఎన్డియే అభ్యర్ధికి వ్యతిరేకంగా ఓటేసిన తెదేపా బిజెపికి మిత్రుడు అని అరోపిస్తారు, ఇదేరకమైన న్యాయమో అర్ధం కావటం లేదు. ఇక మీమీద ఉన్న 12 కేసుల గురించి వాటి విచారణ గురించి నేను ప్రస్తావించటం అనవసరం, మీరు లేఖ రాసిన ఆంద్రప్రదేశ్ ప్రజలందరికీ కూడా తెలుసు. వాటి మీద విచారణ జరుగుతుంది, వాటిలో ఏకేసుని కోర్ట్ డిస్మిస్ చేయలేదు. ఆయాకేసుల విచారణకు హాజరు కావాల్సిన బాధ్యత మీది.

అందులో చంద్రబాబు ప్రస్తావన ఎందుకు వచ్చిందో, నాకు అర్ధం కాలేదు. కేవలం మీరు చేసిన తప్పులు, అవినీతి కారణంగా మీ కుటుంబ సభ్యులు కూడా విచారణ ఎదుర్కోవాల్సిన పరిస్థితి రావటంతో ఆ ఉక్రోషంతో , మీ అవినీతి నుండి ప్రజల దృష్టి మళ్ళించటానికి చంద్రబాబు ను ఇందులోకి లాగుతున్నారు. ఈ పసలేని, అసంబద్దమైన ఆరోపణలు వదిలేసి, మీరు ప్రతి శుక్రవారం కోర్ట్ కి హాజరు కండి. మీరు చేసిన అవినీతికి ఏదో ఒక రోజు మీకు శిక్ష తప్పదు... ఇట్లు ఆంద్రప్రదేశ్ ప్రజలు"