news

ఒక పక్క కంపెనీల ప్రారంభోత్సవాలు.. మరో పక్క ఇరిగేషన్ ప్రాజెక్ట్ ల ప్రారంభోత్సవాలు.. మరో పక్క పేదల ఇళ్ళ ప్రారంభోత్సవాలు.. ఇలా సంక్షేమం, అభివృద్ధి, వ్యవసాయం అన్నీ దూసుకుపోతున్నాయి. ఈ రోజే మూడు లక్షల ఇళ్ళ గృహప్రవేశాలు చేసిన ఆంధ్రప్రదేశ్ ప్రభుత్వం, ఈ నెల 11న మరో కార్యక్రమానికి శ్రీకారం చుట్టింది. ఈ నెల పదకొండున వంద అన్న క్యాంటీన్ లు ప్రారంభం కానున్నాయి. రాష్ట్ర వ్యాప్తంగా నిరుపేదల ఆకలి తీర్చేందుకు ప్రభుత్వం అన్న క్యాంటీన్ల ఏర్పాటుకు శ్రీకారం చుట్టింది. 50వేల జనాభా పైబడిన అన్ని పట్టణ ప్రాంతాల్లో 203 అన్న క్యాంటీన్లను ప్రారంభించాలని ప్రభుత్వం నిర్ణయం తీసుకుంది. దీనిలో భాగంగా తొలిదశలో 100 అన్న క్యాంటీన్లు ఈ నెల 11న ప్రారంభించేందుకు అధికార యంత్రాంగం సన్నాహాలు చేస్తోంది. మిగిలిన వాటిని కూడా సాధ్యమైనంత త్వరగా ప్రారంభించేందుకు చర్యలు చేపట్టారు.

203 క్యాంటీన్ల ఏర్పాటుకు బడ్జెట్లో రూ. 200 కోట్లను ఇప్పటికే ప్రభుత్వం కేటాయించింది. ఒక్కొక్క క్యాంటీన్ ఏర్పాటుకు రూ. 36 లక్షలను మంజూరు చేసింది. క్యాంటీన్ల ఏర్పాటుకు స్థలాల కొరత ఉండటంతో అన్నింటినీ ప్రారంభించడం సాధ్యం కాలేదు. అందుబాటులో ఉన్న 100 ప్రాంతాల్లో ఇప్పటికే పనులు పూర్తవుతున్నాయి. ఈ మేరకు విజయవాడ, గుంటూరులో ఇప్పటికే రెండు క్యాంటీన్లను పైలెట్ ప్రాజెక్టుగా నిర్వహిస్తూ పరిస్థితిని ఎప్పటి కప్పుడు తెలుసుకుంటూ అవసరమైన చర్యలు తీసుకుంటోంది. కొత్తగా ఏర్పాటు చేయనున్న ఈ 100 క్యాంటీన్లు వారంలో ఆరు రోజులపాటు నిరుపేదలకు ఆహారాన్ని అందిస్తాయి. అయితే ఆదివారం మాత్రం వీటికి సెలవుగా నిర్ణయిస్తూ ప్రభుత్వం ఉత్తర్వులు కూడా విడుదల చేసింది. ఉదయం టిఫిన్, మధ్యాహ్నం, రాత్రి భోజనానికి కలిపి మొత్తం రూ.15లు ఒక్కరి నుంచి వసూలు చేస్తారు. అంటే పూటకు రూ.5లు మాత్రమే వసూలు చేయాలని ప్రభుత్వం నిర్దేశించింది.

ఈ ఒక్కొక్క క్యాంటీన్లలో ఉదయం 300 మందికి టిఫిన్, మధ్యా హ్న భోజనం 360 మందికి, రాత్రి భోజనం 240 మందికి అందించేలా ఏర్పాట్లు చేస్తున్నారు. అయితే క్యాంటీన్ల ప్రారంభం అనంతరం స్థానిక పరిస్థితులకు అనుగుణంగా అవసరాన్ని బట్టి వీటిని మరింత పెంచే అవకాశాలు ఉన్నాయని అధికార వర్గాలు వెల్లడించాయి. ఆహారం ఇలా... వారంలో 6 రోజులపాటు పనిచేసే అన్న క్యాంటీన్లల్లో అందించే ఆహార వివరాలు ఈ విధంగా ఉన్నాయి. సోమవారం అల్పాహారంగా ఇడ్లీ లేదా పూరి, మంగళవారం ఇడ్లీ, ఉప్మా, బుధవారం ఇడ్లీ, పొంగలి, గురువారం ఇడ్లీ, హరి, శుక్రవారం ఇడ్లీ, ఉప్మా, శనివారం ఇడ్లీ, పొంగలి అందించేందుకు అధికార యంత్రాంగం చర్యలు చేపట్టింది. ప్లేటుకు మూడు ఇడ్లీ లేదా మూడు పూరి, అదే విధంగా ఉప్మా, పొంగలి 200 గ్రాములు ఇస్తారు. మధ్యాహ్నం, రాత్రి భోజునంలో అన్నంతో పాటు ఒక కూర, పప్పు, సాంబారు, పెరుగు, పచ్చ డి అందించనున్నారు. మధ్నాహ్నం, రాత్రి భోజనంలో అన్నం 400 గ్రాములు, కూర 100 గ్రాములు, సాంబారు 120 గ్రాములు, పెరుగు 75 గ్రాములు అందించనున్నట్లు అధికార యంత్రాంగం పేర్కొంది. ఈ క్యాంటీన్లు ఉదయం 7.30 గంటల నుంచి 10 గంటల వరకు టిఫిన్, మధ్యాహ్నం 12.30 గంటల నుంచి 3 గంటల వరకు, అదే విధంగా రాత్రి 7.30 గంటల నుంచి 9 గంటల వరకు పనిచేస్తాయి.

బెజవాడ నగరంలోకి ఈ-రిక్షాలు ప్రవేశిస్తున్నాయి. వీటికి కూడా ఇక రిజిస్ర్టేషన్‌ తప్పనిసరి చేయాలని రవాణా శాఖ నిర్ణయం తీసుకుంది. జిల్లా వ్యాప్తంగా వీటిని నిరభ్యంతరంగా కొనుగోలు చేసుకోవచ్చు. సాధారణ ఆటోల మాదిరిగానే వాటికి కూడా రిజిస్ర్టేషన్‌ ప్రక్రియను అధికారులు పూర్తి చేస్తారు. ఈ-రిక్షాలకు అనుమతులు ఇవ్వటంతో పాటు నగరంలో వీటిని తప్పనిసరి చేసే అంశాన్ని రవాణా శాఖ పరిశీలిస్తోంది. నగరంలో ఈ-రిక్షాలను తప్పనిచేసే ముందు ఆటో యూనియన్ల అభిప్రాయం కూడా తీసుకుని, వారి అంగీకారంతో ముందుకు వెళ్ళాలన్న ఆలోచనతో రవాణా శాఖ ఉంది. రవాణా రంగ రాజధానిగా ఉన్న విజయవాడ నగరంలో ఆటోల వ్యవస్థను సంస్కరించి, ఈ-రిక్షాలను ప్రవేశ పెట్టాలన్న ఆలోచనను జిల్లా రవాణా శాఖ చేస్తోంది.

ఈ-రిక్షాలకు ప్రాధాన్యత ఇవ్వాలని సీఎం చంద్రబాబు కూడా పదే పదే చెబుతున్న నేపథ్యంలో, రాజధాని ప్రాంతంలో కీలకమైన విజయవాడ నగరంలో కాలుష్య రహిత సరికొత్త ఆటో వ్యవస్థను తీసుకు రావటానికి ఈ-రిక్షాలను రవాణా శాఖ ప్రత్యామ్నాయంగా భావిస్తోంది. విజయవాడ నగరంలో తిరుగాడే ఆటోల స్థానంలో ఈ-రిక్షాలను ప్రవేశపెట్టడానికి అనుసరించాల్సిన విధి విధానాలపై అధ్యయనం చేస్తోంది. నగరంలో 30 వేల ఆటోలు ఉన్నాయి. వీటన్నింటినీ ఈ-రిక్షాలుగా మార్చమని ప్రభుత్వమేమీ నిర్దేశించలేదు. ఉత్తర్వులూ ఇవ్వలేదు. అలాగని రవాణా శాఖ ఉన్నతాధికారులు కూడా దీనికి సంబంధించి మార్గదర్శకాలను నిర్దేశించలేదు. అయినప్పటికీ నగరంలో కాలుష్య తీవ్రతను తగ్గించటానికి ఈ-రిక్షాలను తప్పనిసరి చేయాలన్న ఆలోచనతో జిల్లా రవాణా శాఖ ఉంది.

ఆటోవాలాల అభిప్రాయం తీసుకుని, వారి నుంచి వచ్చిన స్పందనను రవాణా శాఖ కమిషనర్‌ బాలసుబ్రహ్మణ్యం దృష్టికి తీసుకు వెళ్ళి, అమలుకు శ్రీకారం చుట్టాలని డీటీసీ మీరాప్రసాద్‌ భావిస్తున్నారు. నగరంలో 30 వేల ఆటోలున్నాయి. వీటిలో సీఎన్‌జీ ఆటోలు ఆరు వేలు ఉన్నాయి. 24 వేల ఆటోలు డీజిల్‌, పెట్రోల్‌తో నడిచేవే. విజయవాడకు అతి సమీపంలో ఉన్న గన్నవరం, పెనమలూరు, కంకిపాడు, ఇబ్రహీంపట్నం మండలాల పరిధిలో ఉన్న పాత ఆటోల స్థానంలో కొత్తగా సీఎన్‌జీ ఆటోలకు అనుమతులు ఇచ్చారు. వీటిని వెంటనే ఈ-రిక్షాలుగా మార్చడం భావ్యం కాదని రవాణా శాఖ అధికారులు భావిస్తున్నారు. సీఎన్‌జీ ఆటోలతో కాలుష్యం ఉండదు కాబట్టి వీటిని మినహాయించాలని భావిస్తున్నారు. 24 వేల పాత ఆటోలను ఈ-రిక్షాలుగా మార్చడం అవసరమని భావిస్తున్నారు.

రేపల్లె దగ్గర ఉన్న ఆనగాని రంగారావు నగర్ లో ఆనందం తాండవిస్తుంది. నాలుగు తరాల నుంచి నిలువ నీడకు నోచుకోని యానాది కుటుంబాలకు పక్కాగృహ నిర్మాణం పూర్తి కాగా గురువారం గృహప్రవేశ మహోత్సవం జరిగింది. ఎక్కడో మట్టి డొంకల్లో చుట్టూ గుడిసెల్లో భయం భయంగా రోజులు గడుపుతున్న 33 కుటుంబాల గిరిజనులకు నగరం పంచాయతీలోని కాపులపాలెంలో ఇళ్ళ స్థలాలు ఇచ్చారు. ఎస్టీల కోసం ఏర్పాటు చేసిన ప్రత్యేక ఆవాస ప్రాంతానికి ఎమ్మెల్యే అనగాని సత్యప్రసాద్ తండ్రి పేరు మీదగా అనగాని రంగారావు నగర్ అని నామకరణం చేశారు. అంతటితో విడిచి పెట్టకుండా ఎన్టీఆర్ గ్రామీణ హౌసింగ్ స్కీమ్ లో ఎమ్మెల్యే అనగాని సత్యప్రసాద్ 33 పక్కా గృహ నిర్మాణాలకు మంజూరు ఇచ్చారు.

తమంత తాముగా ఇళ్ళు కట్టుకునే స్తోమత లేని గిరిజనులకు విలేజ్ రికన్స్ట్రక్షన్ ఆరనైజేషన్ స్వచ్చంద సంస్థ బాసటగా నిలిచింది. ఎన్టీఆర్ హౌసింగ్ స్కీం కింద ప్రభుత్వం అందించిన నిధులకు తోడు ఎమ్మెల్యే అనగాని సత్యప్రసాద్ నిధులు, తమ సొంత నిధులను జోడించి వీఆర్వో సంస్థ ఇళ్లు సముదాయం నిర్మించింది. ఇళ్ళలో నుంచి వచ్చే వ్యర్థ జలాలు నేలమీద కనిపించకుండా ఆండర్ గ్రౌండ్ పైప్లైన్ల ద్వారా బయటకు నడిచే ఏర్పాటు చేశారు. కాలనీలో ఏర్పాటు చేసిన ఇంకుడు గుంటల్లోకి వ్యర్థ జలాలు మళ్పించే విధంగా పైప్లైన్లు ఏర్పాటు చేశారు. అన్ని సౌకర్యాలతో నిర్మించిన ఇళ్ళను గురువారంలబ్దిదారులకు అందచేస్తారు.

గృహ సముదాయ నిర్మాణానికి ముందు పల్లంగా ఉన్న ఇళ్ళ స్థలాలను మెరక చేయడం, రోడ్లకు మట్టితోలటం, ప్రతి కుటుంబానికి మరుగుదొడ్లు నిర్మించటం పనులను షిఫర్డ్ సంస్థ నిర్వహించింది. కాలనీలో గ్రామ పంచాయితీ ఆధ్వర్యంలో సీసీ రోడ్లు నిర్మాణం జరిగింది. ఊరిబయట నుంచి అనగాని రంగారావు నగర్లోకి దారితీసే ప్రధాన రహదారిని కూడా సీసీ రోడ్లుగా నిర్మించారు. ఎన్నికల సందర్భంలో వాగ్దానం చేసిన మాటను నిలబెట్టుకున్న ఎమ్మెల్యే అనగానికి రుణపడి ఉంటామని అంటున్నారు. ఈ రోజు రాష్ట్ర వ్యాప్తంగా 3 లక్షల ఇళ్ళల్లో గృహప్రవేశాలు జరిగిన సంగతి తెలిసిందే. గతంలో ఒకేసారి లక్ష ఇళ్లకు గృహప్రవేశాలు నిర్వహించి కొత్త ఒరవడికి శ్రీకారం చుట్టిన ప్రభుత్వం, ఈసారి అంతకు రెండు రెట్లు ఎక్కువగా మూడు లక్షల ఇళ్లకు సామూహిక గృహప్రవేశా చేపట్టింది.