news

ముఖ్యమంత్రి చంద్రబాబు పాలనలో నిరుపేదల సొంత ఇంటి కల సాకారం అవుతున్నట్లు గ్రామీణ గృహ నిర్మాణం, సమాచార పౌర సంబంధాలశాఖమంత్రి కాలవ శ్రీనివాసులు తెలిపారు. సచివాలయం 4వ బ్లాక్‌లోని పబ్లిసిటీ సెల్‌లో బుధవారం ఆయన విలేకరులతో మాట్లాడారు. రాష్ట్రవ్యాప్తంగా గురువారం ఒకే రోజు 3 లక్షల మంది పేదలు తమ సొంత ఇళ్లలోకి గృహ ప్రవేశాలు జరిపే మహోన్నత కార్యక్రమం జరుగుతోందన్నారు. రాష్ట్ర చరిత్రలో ఇదొక అద్వితీయమైన ఘట్టంగా ఆయన అభివర్ణించారు. విజయవాడలోని ఇందిరాగాంధీ మున్సిపల్‌ స్టేడియంలో సీఎం ఈ కార్యక్రమాన్ని ప్రారంభిస్తారన్నారు. ఆర్థిక ఇబ్బందులను అధిగమిస్తూనే పేదలకు పక్కా ఇళ్ల నిర్మాణానికి తమ ప్రభుత్వం అధిక ప్రాధాన్యం ఇస్తోందన్నారు.

యూనిట్‌ ధరను రూ. 70వేల నుంచి రూ. 1.50 లక్షలకు పెంచినట్లు తెలిపారు. రాష్ట్రంలోని 110 మున్సిపాలిటీలు, 9 నోటిఫైడ్‌ మున్సిపాలిటీల పరిధిలోని 2093 వార్డులు, 12,767 గ్రామ పంచాయితీల్లో ఏక కాలంలో 3 లక్షల గృహ ప్రవేశాలు నిర్వహిస్తున్నట్లు చెప్పారు. గ్రామీణ ప్రాంతాల్లో 2.71 లక్షలు, పట్టణాల్లో 24,145 ఇళ్లను ప్రారంభిస్తున్నట్లు తెలిపారు. హుదూద్‌ తుపాన్‌ బాధితులకు సంబంధించిన 5,118 ఇళ్లు కూడా ఇదే కార్యక్రమంలో లబ్దిదారులకు అందచేస్తామన్నారు. రాష్ట్రంలో 2019 మార్చి నాటికి 10 లక్షల గృహాలను ఎన్టీఆర్‌ గృహ నిర్మాణ పథకం ద్వారా గ్రామీణ ప్రాంతాల్లో అందించాలని సీఎం నిర్దేశించారన్నారు. అవినీతికి తావు లేకుండా లబ్దిదారుల బ్యాంకు ఖాతాల్లో ఇళ్ల నిర్మానానికి ఇచ్చే నిధులు జమ చేయడం, ఇళ్లను జియో ట్యాగింగ్‌, ఆధార్‌ ద్వారా అనుసంధానించడం, సిమెంటు తదితర ఇంటి నిర్మాణ సామగ్రీని తక్కువ ధరల్లోనే లబ్దిదారులకు అందుబాటులో ఉంచేందుకు తమ ప్రభుత్వం చర్యలు చేపట్టిందన్నారు. నిర్మాణానికి అవసరమైన సాంకేతిక సహాయాన్ని గృహ నిర్మాణశాఖ ద్వారా అందించడం వల్ల ఇళ్ల నిర్మాణం వేగవంతమైనట్లు మంత్రి తెలిపారు.

గృహప్రవేశ ఏర్పాట్లు... ఇళ్లకు మామిడి తోరణాలు కట్టిస్తున్నారు. ప్రజాప్రతినిధులు వచ్చే చోట్ల మేళతాళాలు ఏర్పాట్లు చేస్తున్నారు. రాష్ట్రవ్యాప్తంగా ఒక్క నియోజకవర్గం మినహా 174 నియోజకవర్గాల పరిధిలోని 664 మండలాలు, 12,767 గ్రామ పంచాయతీలు, 110 మున్సిపాలిటీల్లోని 2,093 వార్డుల్లో ఈ కార్యక్రమానికి ఏర్పాట్లు చేస్తున్నారు. శ్రీకాకుళంలో 19,616, విజయనగరంలో 16,504, విశాఖపట్నంలో 27,697, తూర్పుగోదావరిలో 37,207, పశ్చిమగోదావరిలో 27,710, గుంటూరులో 24,767, ప్రకాశంలో 19,655, నెల్లూరులో 19,045, చిత్తూరులో 20,888, కడపలో 15,891, అనంతపురంలో 24,608, కర్నూలులో 24402 ఇళ్లు గృహప్రవేశాలకు సిద్ధం చేశారు. ఈ కార్యక్రమాన్ని గురువారం ఉదయం విజయవాడలో ఇందిరాగాంధీ స్టేడియంలో జరిగే సభలో సీఎం చంద్రబాబు ప్రారంభించనున్నారు.

ఆగస్టు 12 నుంచి 16వ తేదీ వరకు, తిరుమల దర్శనం ప్లాన్ చేసుకున్నారా ? అయితే, ఒకటికి రెండు సార్లు ఆలోచించండి. ఆ సమయంలో, పరిమితి స్థాయిలోనే, అతి తక్కువ మందికి మాత్రమే స్వామి వారి దర్శనం జరుగుతుంది. ఇవి వివరాలు... మహా సంప్రోక్షణ సందర్భంగా తిరుమల శ్రీవేంకటేశ్వర స్వామివారి దర్శనాన్ని ఐదు రోజుల పాటు పూర్తిగా నిలిపివేయాలని తితిదే సూత్రప్రాయంగా నిర్ణయించింది. ఈ నెల 24న జరగనున్న దేవస్థానం ధర్మకర్తల మండలి సమావేశంలో దీనిపై చర్చించి తుది నిర్ణయం తీసుకోనుంది. శ్రీవారి ఆలయంలో అష్టబంధన బాలాలయ మహా సంప్రోక్షణకు ఆగస్టు 12 నుంచి 16 వరకు తితిదే ముహూర్తం నిర్ణయించింది. 12 ఏళ్లకోసారి జరిగే ఈ మహా క్రతువు సందర్భంగా వైదిక కార్యక్రమాలు పెద్ద ఎత్తున చేపడతారు. వైఖానస ఆగమ నిబంధనల మేరకు ఆ సమయంలో ఆలయ సిబ్బంది సైతం బంగారు వాకిలి దాటి లోపలికి వెళ్లే అవకాశం ఉండదు.

గర్భాలయంలో మరమ్మతులనూ అర్చకులే చేస్తారు. ఆనంద నిలయం చుట్టూ కూడా పలు క్రతువులు జరగనున్నాయి. ఈ కారణంగా శ్రీవారి దర్శనాన్ని గంటల తరబడి నిలిపివేయాల్సి ఉంటుంది. కొద్ది సమయం మాత్రమే.. పరిమిత సంఖ్యలో భక్తులకు దర్శనం అవకాశం ఉంటుంది. ఇదే సమయంలో వరుస సెలవులు ఉండడంతో పాటు సంప్రోక్షణను పురస్కరించుకొని భక్తులు అధికంగా తరలివస్తే.. దర్శనం కల్పించటం సాధ్యపడదని తితిదే అంచనా వేస్తోంది. ఈ తరుణంలో స్వామివారి దర్శనాన్ని పూర్తిస్థాయిలో నిలిపివేయాలని యోచిస్తోంది. తిరుమలకు చేరుకున్నాక యాత్రికులు నిరీక్షించడం కంటే.. ముందుగానే అప్రమత్తం చేయడం ఉత్తమమన్న ఆలోచనతో ఉంది.

పన్నెండేళ్లకోసారి ఈ క్రతువును నిర్వహిస్తారని, శ్రీవారి ఆలయంతో పాటు అన్ని ఉపఆలయాల మహాసంప్రోక్షణ చేస్తారని అన్నారు. ఆగస్టు 11, 12 తేదీల్లో నిర్వహించే తోమాల, అర్చన సేవలకు ఉదయాస్తమాన సేవ భక్తులను మాత్రమే అనుమతిస్తారు. 16న ఉదయం మహాసంప్రోక్షణ జరుగుతుంది. చివరి రోజున యాగశాలలోని ఉత్సవమూర్తులను గర్భాలయంలోకి చేర్చడంతో వైదిక కార్యక్రమాలు సమాప్తమవుతాయి. మహాసంప్రోక్షణలో భాగంగా శ్రీవారి మూలవిరాట్టు, ఇతర దేవతామూర్తుల శక్తిని బింబం నుంచి కుంభంలోకి ఆవాహనచేసి ఉపచారాలు, శాంతిహోమాలు నిర్వహిస్తామని ప్రధాన అర్చకులు వేణుగోపాల దీక్షితులు తెలిపారు. అష్టబంధనం అంటే ఎనిమిది రకాల వస్తువులతో తయారుచేసిన చూర్ణమని, దీని ఆయుర్దాయం 12 ఏళ్లు ఉంటుందని ఆగమ సలహాదారు సుందర వరదభట్టాచార్యులు వివరించారు. ఈ అష్టబంధనాన్ని శ్రీవారి పాదాల కింద ఉంచుతామన్నారు.

సమీకృత ఇంధన అభివృద్ధి పథకం(ఐపీడీఎస్‌), దీనదయాల్‌ ఉపాధ్యాయ గ్రామ జ్యోతి యోజన(డీడీయూజీజేవై) పథకాల పనితీరులో అత్యుత్తమ ప్రదర్శన కనబరిచినందుకు తమను కేంద్ర ప్రభుత్వం అభినందించిందని ఏపీ ఇంధన శాఖ ఒక ప్రకటనలో తెలిపింది. సిమ్లాలో మంగళవారం జరిగిన ఇంధనశాఖా మంత్రుల సదస్సులో కేంద్ర ఇంధనశాఖ మంత్రి ఆర్‌కే సింగ్‌ ఈ మేరకు అభినందించారని పేర్కొంది. గృహాల విద్యుదీకరణ, సాంకేతిక, వాణిజ్య నష్టాలు తగ్గించుకోవడం, బొగ్గు వినియోగంలో సౌలభ్యత, 24 గంటల విద్యుత్తు సరఫరా తదితర అంశాల్లో ఏపీ పనితీరును వారు ప్రశంసించారని వివరించారు. ఏపీ ఇంధనశాఖా మంత్రి కళా వెంకటరావు తరఫున ఈసదస్సుకు ఇంధన శాఖ ముఖ్యకార్యదర్శి అజయ్‌జైన్‌ హాజరయ్యారు. అత్యుత్తమ పనితీరు కనబరుస్తున్నందున తమకు కేంద్రం అన్ని విధాల సహకరించాలని చంద్రబాబు కోరినట్లు ఆయన సమావేశంలో వివరించారు.

ఏపీ విద్యుత్ రంగం ఎనర్జీ సామర్థ్యం, బొగ్గు కొరతల నివారణ, రెన్యువబుల్ ఎనర్జీ తదితర అంశాలపై తీసుకుంటున్న చర్యలను వివరించారు. విద్యుత్ వినియోగం పెద్దగాలేని సమయాల్లో రోజుకు 500 మెగావాట్ల విద్యుత్తు ఆంధ్రప్రదేశ్ ప్రభుత్వం ఆదా చేస్తున్నట్లు తెలిపారు. 2014లో ఇంధన లోటు 8 శాతం కంటే ఎక్కువగా ఉండేదన్నారు. 2016 నాటికి నూరు శాతం గృహ విద్యుదీకరణను సాధించడంలో విజయం సాధించామన్నారు. ట్రాన్స్మషన్ పంపిణీ నషాల తగ్గింపు 12.06 శాతం నుండి 9.72 శాతానికి దేశంలోనే మొట్టమొదటిసారిగా ఏపీ తగ్గించగలిగిందన్నారు. ఇందులో కూడా ఏపీ ట్రాన్స్ కో 2.32 వాతం తక్కువ ట్రాన్స్మిషన్ నష్టాలను సాధించి రికార్డు సృష్టించిందన్నారు. ఈ సందర్భంగా ఏపీ ప్రచార రథానికి ఇతర రాష్ట్రాల నుండి మంచి స్పందన లభించిదన్నారు. ఈ సందర్భంగా ఎలక్ట్రిక్ మొబిలిటీ పాలసీపై ఏపీ యొక్క ప్రోత్సాహకాలు వారిని ఎంతో ఆకట్టుకున్నాయి.

ఈ సందర్భంగా ఎలక్ట్రిక్ మొబిలిటీ విధానంపై ప్రత్యేకంగా వివరించడం జరిగింది. ఈ విధానం ద్వారా విద్యుత్ వాహనాల అభివృద్ధి చేస్తున్న విధానాన్ని వారు ఇతర రాష్ట్రాలవారికి తెలియజేశారు. ఈ వాహనాలకు రిజిస్ట్రేషన్ ఛార్జీల మినహాయింపు, రోడ్డు పన్ను, విద్యుత్ వాహన తయారీ పార్కులు, అభివృద్ధి, ఛార్జింగ్ వనరులు వంటి అంశాలను వివరించారు. అంతేకాకుండా ఈ విద్యుత్ వాహనాల వినియోగాన్ని మరింతగా ప్రోత్సహించేందుకుగానూ ఈ ఏడాది జూలై నాటికి 50 ఛార్జింగ్ స్టేషన్లను ఏర్పాటు చేయనున్నారు. ఈ సందర్భంగా విజయనగరం జిల్లాలో పైలెట్ ప్రాజెక్టు కింద ఏర్పాటుచేసిన 250 గ్రిడ్ ఆధారిత సోలార్ పంప్సెట్ల విధానంపై వివరించారు. రాష్ట్రంలో అత్యంత విజయవంతమైన ప్రాజెక్టుగా ఆయన దీనిని అభివర్ణించారు. దీనితో పాటు ఏపీలో 11 లక్షల స్మార్టు మీటర్లను ఏర్పాటు చేయనున్నట్లు తెలిపారు. సోలార్ పంపసెట్ల విధాన అమలుపై పలు రాష్ట్రాల ప్రతినిధులు ఏపీ పనితీరును ప్రశంసించారు.