news

ధొలెరా సిటీ.. గుజరాత్ లో నిర్మిస్తున్న అతి పెద్ద నగరం.. ప్రధాని మోడీ స్వయంగా పర్యవేక్షిస్తూ కడుతున్న నగరం... ఈ నగర నిర్మాణం గురించి, పెద్దగా దేశంలో ఎవరికీ తెలియదు... ఎప్పుడైతే అమరావతికి చేస్తున్న అన్యాయం పై, చంద్రబాబు ఎదురుతిరిగి, ధొలెరా సిటీకి నిధులు ఇస్తారు, మాకు ఎందుకు ఇవ్వరు అని అడిగారో, అప్పటి నుంచి దేశంలో చర్చ మొదలైంది. అప్పటి వరకు ఎదో ప్రాజెక్ట్ అనుకున్న దేశ ప్రజలు, ఇంత పెద్ద ప్రాజెక్ట్ అని చంద్రబాబు చర్చలో పెట్టేంతవరకు, తెలియదు.. ఇప్పుడే ఈ విషయం పై అన్ని రాష్ట్రాల్లో చర్చ మొదలైంది.. కేంద్రం నిధులు ఇచ్చి మరీ ఈ నగరం కడుతుంటే, మిగతా రాష్ట్రాలు ఎందుకు ఊరుకుంటాయి ? దీంతో అమిత్ షా రంగంలోకి దిగి, కేంద్రం ఒక్క పైసా ఇవ్వటం లేదు అంటూ అబద్ధాలు కూడా ప్రచారం చేసారు... గుజరాత్ ప్రభుత్వం కూడా రంగంలోకి దిగింది... దేశ వ్యాప్తంగా చర్చ మొదలు కావటంతో, ఒక పేపర్ యాడ్ కూడా ఇచ్చింది.

ప్రభుత్వ ఖర్చుతో పార్టీ పరంగా వివరణ ఇచ్చినట్లు ఉన్న ఆ ప్రకటనల్లో కేంద్రం రూ.3 వేల కోట్లు మాత్రమే ధొలెరాకు ఇస్తుందని.. ఆ ప్రాజెక్ట్ వ్యయం రూ.57 వేల కోట్లు అని ప్రకటనల్లో చెప్పుకొచ్చారు. అమరావతిని ఉపాధి అవకాశాల కేంద్రంగా చంద్రబాబు తీర్చిద్దాలనుకుంటున్నారు. ధొలెరా కాన్సెప్ట్ కూడా అదే. అమరావతి పోటీ వస్తే.. ధొలెరా నష్టపోతుంది అన్న ఉద్దేశంతో కేంద్రం కావాలనే నిరాదరణ చూపిస్తోంది అనేది ఆంధ్రప్రదేశ్ ప్రజల అభిప్రాయం. అందుకే బయటకు చెప్పకపోయినా.. ప్రత్యేక పద్దతుల ద్వారా ధొలెరాకు వేల కోట్లు వెళ్తున్నాయనేది ఏపీ ప్రభుత్వం అనుమానం. యనల రామకృష్ణుడు కూడా అదే చెబుతున్నారు. ధొలెరాపై చంద్రబాబు విమర్శలు ప్రారంభించిన తర్వాత గుజరాత్ ప్రభుత్వం ఉలిక్కిపడుతోంది. ప్రచారం ఉద్ధృతం చేస్తోంది. కానీ టీడీపీ నేతలు మాత్రం అమరావతి- ధొలెరాను పోల్చి ఏపీకి జరిగిన అన్యాయాన్ని దేశ ప్రజల ముందుకు తీసుకెళ్లాలనుకుంటున్నారు.

ఈ ధొలెరా ఢిల్లీ-ముంబై పారిశ్రామిక కారిడార్‌లో భాగంగా నిర్మిమతవుతోంది. మొత్తం రెండు లక్షల ఇరవై వేల ఎకరాల ప్రాజెక్ట్. ఇందులో కోర్ ఏరియా 5,600 ఎక‌రాలు. రాజ‌ధాని అహ్మదాబాద్‌తో అనుసంధానం చేసేందుకు 10 లైన్ల ఎక్స్‌ప్రెస్ వే నిర్మిస్తున్నారు. ఈ ప్రాజెక్ట్‌ను 2007లో ప్రకటించారు. అది పేపర్లపైనే ఉంది. మోదీ ఎప్పుడు ప్రధానమంత్రి అయ్యారో..అప్పుడు ఈ నగారనికి మహర్దశ ప్రారంభమైంది. ప్రధానిగా బాధ్యతలు చేపట్టిన తర్వాత మోదీ... ధొలెరాకు రూ.2,784 కోట్లు నిధులు ఇచ్చారు. అంత‌ర్జాతీయ సంస్థల ద్వారా పెట్టుబడుల‌ను ఆక‌ర్షించ‌డంలోనూ కేంద్రం చొర‌వ తీసుకుంది. అన్ని విధాలుగా ధొలెరాకు అండగా నిలుస్తోంది. అహ్మదాబాద్, సూరత్, వడోదరా లాంటి పెద్ద నగరాలు ఉన్నా, ఇప్పుడు ధొలెరా, గిఫ్ట్ సిటీ లాంటి మరో పెద్ద నగరాలు మీరు కట్టుకుంటున్నారు, మరి అమరావతికి ఎందుకు సహాయం చెయ్యరు అని అడిగితే మాత్రం, మీకు మయసభ కావాలా అంటూ, బీజేపీ నేతలు ఎగతాళి చేస్తారు.

రాజధాని నిర్మాణం కోసం ప్రత్యేకంగా ప్రవేశపెడుతున్న రూ.2 వేల కోట్ల విలువ చేసే ‘అమరావతి బాండ్ల’ను జూన్ 6వ తేదీ తరువాత విడుదల చేయనున్నారు. ఈ బాండ్ల విడుదలకు సంబంధించిన ప్రక్రియను దాదాపు పూర్తి చేశామని, ఆర్బీఐ పాలసీ ప్రకటన తరువాత వీటిని జారీచేస్తారు. రాజధాని అభివృద్ధి పనుల పురోగతిపై గురువారం సచివాలయంలో జరిగిన 17వ అథీకృత సమావేశంలో ఈ బాండ్లకు సంబంధించిన వివరాలను సీఆర్‌డీఏ కమిషనర్ డాక్టర్ చెరుకూరి శ్రీధర్ ముఖ్యమంత్రికి తెలియజేశారు. ఎంతో గర్వంగా చెప్పుకునేలా పోలవరం ప్రాజెక్టు నిర్మాణంలో 55 శాతం పనులు పూర్తిచేయగలిగామని, అదే అమరావతి విషయానికి వస్తే ఆ స్థాయిలో పనులు వేగవంతంగా జరగడం లేదని ముఖ్యమంత్రి ఈ సమావేశంలో అభిప్రాయపడ్డారు.

చేపట్టిన పనులన్నీ సకాలంలో పూర్తి చేసేలా అన్ని విభాగాలను సమన్వయం చేసుకుంటూ నిరంతర పర్యవేక్షణ జరపాలని నిర్దేశించారు. పని సకాలంలో పూర్తి చేయడానికి అవసరమైన సమర్ధ వ్యవస్థను సిద్ధం చేసుకోవాలని, జరిగిన పనిని అంచనా వేయడానికి కూడా అదేస్థాయిలో ప్రత్యేక యంత్రాంగాన్ని ఏర్పాటు చేసుకోవాలని ముఖ్యమంత్రి చెప్పారు. అమరావతి ప్రధాన రహదారి పనులు జరుగుతున్న ప్రాంతంలో ఒక చోట దుమ్ము లేచి ఆ దారిన వెళ్లేవారికి ఇబ్బందిగా ఉందని, ఇలాంటి సమస్యలు ఎదురైనప్పుడు కనీస జాగ్రత్తలు తీసుకోవడం అత్యవసరంగా భావించాలని అన్నారు. వచ్చేది వర్షాకాలం అయినందున నిర్మాణ పనులు అనుకున్నట్టుగా సాగవని, ప్రత్యామ్నాయ ఏర్పాట్లతో సిద్ధంగా వుండాలని సూచించారు. ఇదే సమావేశంలో అంతర్జాతీయ సంస్థ ‘డస్సాల్ట్ సిస్టమ్స్’ ప్రతినిధులు అమరావతి 3డీ సిటీ డిజైన్లపై ప్రెజెంటేషన్ ఇచ్చారు. నగర ప్రణాళికలు, ప్రకృతి వైపరీత్యాలు, భూ ప్రకంపనలకు సంబంధించిన సూచనలు అందజేయడంలో ఈ 3డీ డిజైన్లు కీలకం కానున్నాయి.

అలాగే, నగరంలో జరుగుతున్న నిర్మాణాలను ఎప్పటికప్పుడు వాస్తవ సమయంలో ప్రత్యక్షంగా పర్యవేక్షించడానికి డస్సాల్ట్ సిస్టమ్స్ రూపొందించే 3 డీ డిజైన్లు ఉపకరిస్తాయి. అండర్ గ్రౌండ్ పైప్‌లైన్లు మొదలు భవంతుల మధ్య గాలి, వెలుతురు వరకు 3డీ టెక్నాలజీ సాయంతో అంచనా వేయవచ్చు. కొత్త నగరంలో ఏర్పాటు చేయబోయే అత్యాధునిక రవాణా వ్యవస్థకు 3 డీ సిటీ డిజైన్ ఏ విధంగా దోహదపడుతుందో సంస్థ ప్రతినిధులు ముఖ్యమంత్రికి తెలియజేశారు. డ్రైవర్ రహిత వాహనాలకు ఎప్పటికప్పుడు ఏవిధంగా సమాచారం అందేదీ విపులంగా తెలియజేశారు. అమరావతిని ప్రపంచ సంతోష నగరంగా తీర్చిదిద్దాలన్న లక్ష్యానికి అనుగుణంగా 3డీ సిటీ డిజైన్లను రూపొందిస్తున్నారు. ఇది నగర నిర్మాణ సమయంలోనే కాకుండా భవిష్యత్ అవసరాలకు ఉపయోగపడుతుంది. 6 మాసాల వ్యవధిలో 3డీ సిటీ డిజైన్లను పూర్తిచేయాలని ఈ సందర్భంగా సంస్థ ప్రతినిధులను ముఖ్యమంత్రి కోరారు.

కొత్త రాజధానిలో ఉష్ణోగ్రతలను తగ్గించేందుకు తీసుకోవాల్సిన జాగ్రత్తలపై నార్మన్ ఫోస్టర్ సంస్థ ప్రతినిధులు రూపొందించిన ప్రెజెంటేషన్‌ను ముఖ్యమంత్రి పరిశీలించారు. నిర్మాణ శైలి, పచ్చదనం, జల వనరులు, కాలుష్య నియంత్రణపై ప్రభుత్వ విధానాలు.. ఈ నాలుగింటిపై సమగ్ర దృష్టి పెట్టడం ద్వారా కనీసం 5 నుంచి 6 డిగ్రీల వరకు ఉష్ణోగ్రతలను తగ్గించవచ్చునని ప్రెజెంటేషన్‌లో వివరించారు. అమరావతిలో డిస్ట్రిక్ట్ కూలింగ్ సిస్టమ్‌ను ‘సింగపూర్ పవర్’ సంస్థ చేపడుతోందని, ప్రతి 440 మీటర్లకు కూల్ స్పాట్స్ ఏర్పాటు చేయడం ద్వారా 10 డిగ్రీల ఉష్ణోగ్రతల వ్యత్యాసం తీసుకురావచ్చునని సీఆర్‌డీఏ కమిషనర్ చెప్పారు. హైకోర్టు భవంతులకు సంబంధించిన టెండర్ల ప్రక్రియ పూర్తి చేస్తున్నామని, రూ.1685 కోట్ల వ్యయంతో దీనిని ఐకానిక్ నిర్మాణంగా చేపట్టబోతున్నామని సీఆర్‌డీఏ కమిషనర్ చెప్పారు. ప్రి ఫ్యాబ్రికేటెడ్ మెటీరియల్‌తో రాజధానిలో మూడు నక్షత్రాల హోటల్ నిర్మాణాన్ని చేపట్టడానికి ‘ఫార్య్చూన్ మురళీ’ యాజమాన్యం ముందుకొచ్చిందని వివరించారు. రహదారులకు సంబంధించి పనులు శీఘ్రగతిన జరుగుతున్నాయని, ప్రధాన ఆటంకంగా ఉన్న తాడేపల్లి ప్రాంతంలో గత వారమే సర్వే పూర్తి చేశామని అధికారులు ముఖ్యమంత్రికి చెప్పారు.

సొంత భూములు సైతం ప్రభుత్వ భూములుగా రెవెన్యూ దస్త్రాల్లో నమోదు కావడంతో వాటిపై క్రయ.. విక్రయాలు లేక.. ఇతర రుణ సదుపాయం పొందలేక వందల మంది రైతులు నలిగి పోతున్నారు. ఇకపై అలాంటి రైతులకు వూరట లభించనుంది. ఎర్ర చుక్కలు ఉన్న భూములు ప్రభుత్వ భూమిగా అధికారులు గుర్తించి వాటిపై రిజిస్ట్రారు కార్యాలయాల్లో రిజిస్ట్రేషన్లను నిలిపి వేయడం వల్ల రైతులు అనేక ఇబ్బందులు పడేవారు. ఇబ్బందుల సమయాల్లో వాటిని అమ్ముకోలేక.. కనీసం తాకట్టు పెట్టి బ్యాంకుల్లో రుణాలు పొందలేక అవస్థలు పడేవారు. ఎంతోకాలంగా అన్నదాతలు ఈ సమస్యపై ఆవేదనకు గురవుతూనే ఉన్నారు. ఈ సమస్యకు చంద్రబాబు ముగింపు పలకనున్నారు. నిషేధిత భూముల జాబితా 22-ఏలో ప్రైవేటు ఆస్తులు, చుక్కల భూముల సమస్యల పరిష్కారంపై రెవెన్యూ శాఖ కార్యాచరణ చేపట్టింది. గ్రామస్థాయిలోనే ఈ రెండు సమస్యలను పరిష్కరించేందుకు జూన్‌ 13 నుంచి 30 వరకు రాష్ట్రవ్యాప్తంగా స్పెషల్‌ డ్రైవ్‌ చేపట్టనున్నట్లు ఉపముఖ్యమంత్రి కేఈ కృష్ణమూర్తి బుధవారం తెలిపారు.

గతంలో రెవెన్యూ రికార్డుల్లో ఉన్న సమస్యలను పరిష్కరించేందుకు ‘మీ ఇంటికి-మీ భూమి’ కార్యక్రమం కింద గ్రామసభలు నిర్వహించామని, ఇప్పుడు ఇదే తరహాలో 22-ఏ, చుక్కల భూముల సమస్యలను పరిష్కరిస్తామన్నారు. తొలుత 22-ఏ నిషేధిత భూముల జాబితాను గ్రామస్థాయిలో పంచాయతీ కార్యాలయం లేదా రెవెన్యూ కార్యాలయాల్లో ప్రదర్శిస్తారు. అక్కడ వ్యక్తమయ్యే అభ్యంతరాలను రెవెన్యూ అధికారులు లిఖితపూర్వకంగా తీసుకుంటారు. అయితే, వారి వద్ద అప్పటికే మీ-సేవ ద్వారా ఇచ్చిన దరఖాస్తులు కూడా ఉంటాయి. వాటిపై కూడా అధికారులు జరిపే చర్చల్లో ప్రస్తావిస్తారు. రైతులు, ప్రైవేటు వ్యక్తుల అభ్యంతరాలను స్వీకరిస్తారు. దరఖాస్తులు, అభ్యంతరాల పరిశీలన పూర్తయ్యాక.. ధర్మంగా ఉండే వాటిని అక్కడిక్కడే పరిష్కరించేలా అధికారులకు ఆదేశాలు ఇచ్చినట్లు కేఈ చెప్పారు. ఓ ప్రైవేటు ఆస్తి, లేదా ఓ భూమిని అన్యాయంగా 22-ఏలో చేర్చినట్లు నిర్ధారణ అయితే వెంటనే దాన్ని ఆ జాబితా నుంచి తొలగిస్తారు.

గ్రామస్థాయిలో పరిష్కారం కాని వాటిని రాష్ట్ర కమిటీలు పరిశీలిస్తాయి. ఈ కమిటీలు జిల్లా స్థాయి ఉన్నతాధికారులతో సమన్వయం చేసుకొని క్షేత్రస్థాయిలో ఉన్న వాస్తవ పరిస్థితులను పరిగణనలోకి తీసుకొని పరిష్కరిస్తాయి. దీనికి అనుగుణంగా కలెక్టర్‌ తుది జాబితాను ప్రకటిస్తారు. ఈ రాష్ట్ర స్థాయి కమిటీలకు భూపరిపాలన శాఖ కమిషనర్‌, స్టాంప్స్‌ అండ్‌ రిజిస్ట్రేషన్‌, సర్వే డిపార్టుమెంట్‌ శాఖ సీనియర్‌ అధికారులు నేతృత్వం వహిస్తారు. చుక్కల భూముల క్రమబద్ధీకరణకు సంబంధించి జిల్లా కమిటీల నిర్ణయంపై ఏమైనా అభ్యంతరాలు ఉంటే 90రోజుల్లో సీసీఏల్‌ఏకు దరఖాస్తు చేసుకునే అవకాశాన్ని ఇస్తాం. దీనిపై సీసీఏల్‌ఏ తుది నిర్ణయాన్ని తీసుకుంటారు. 1954కు ముందు పేదలకు అసైన్డ్‌ చేసిన భూములను 22-ఏ జాబితా నుంచి తొలగించే ప్రతిపాదన ప్రభుత్వ పరిశీలనలో ఉందని కేఈ చెప్పారు.